الأخبار
أخبار سياسية
فيديو : عشانكم ما بموت شارع



10-08-2013 02:05 PM
عصام عيسى رجب

(1)

عَشانْ دَمَّ الشَّهيد يا خَيْ
عَشانْ دَمَّ الشَّهيدة بَنْيْ
عَشانْ مُصْعَبْ
وُوَدْ مُوسى
وبابِكِرْ أبّشَرْ والنُّور
عَشانْ هاجِرْ
عَشانْ سارَّة
عَشانْ سالِمْ
وإْبراهيم،
مُنير أحمَدْ
وشَرَف الدِّينْ
صُهيبْ وأْكرَمْ ......
عَشانْكُمْ جُمْلَة يا شُهدانا
يا أجَمَلْنا
يا أبطالْنا
يا ثورَتْنا
يا نورنا السَّطَعْ ضوَّايْ
عَشانْكُمْ ما بموت شارِعْ
ولا بِهْمِدْ هُتاف النِّيلْ
ولا بِرْقُدْ تَبَلْدِي حزينْ
ولا بِصحى النَّخيل مَغبونْ ........

(2)

أمانَة علينا
زي ما غنَّى "وَرْدِي" زمان:
"ما نَبرَحْ نِضالنا شِبِرْ ...."
ولا بنِنْهانْ
دِماكُمْ دَينْ
على كُلَّ الوراكُم تار
ليوم الدَّين ....
دِماكُمْ نجمةْ السارِينْ
منارَةْ حَقْ
وسِدْرَةْ مُنتهى الْعِزَّة
وكرامَةْ زولْ
عِرِفْ دربْ الْخَلاصْ بى وينْ
حِفِظْ دَرْس النِّضال دَرْسينْ ......

(3)

عَشانك إنتَ يا سودانْ
عَشانْ هُوبْ مِنْ جديد تنهضْ
وطَنْ سامِقْ
وبِملأْ الْعَين ......
نفاخِرْ بيهو في الدُّنيا
نباهي الكونْ
نغنِّي كمانْ .....
دا هُوْ السُّودانْ
دا أرض الْعِزْ
وحاتْكُمْ أجمَلْ الأوطانْ ......

(4)

أريتْ تصحو
أيا شُهدانا
مِنْ أجمَل نُعاس وسُباتْ
تشوفوا الظَّلَمه صاغْرِين كيف
وواجْمِينْ كيف
وراجْفِينْ كيف
هُتافْكُمْ بَسْ
يمين هزَّ الْعُروش الزَّيف
وزَلْزَلْ عُصْبَةْ الْفُجَّارْ
أتاريهم صَنَمْ مِنْ قَشْ
أتاريهم عِجِلْ سامْري
وكمان خوّارْ ......
أريتْ تصحو
أيا شُهدانا
مِنْ أجمَل نُعاس وسُباتْ
تِكَفْكِفوا دَمْعَةْ الأُمَّاتْ
تَقُولُولِنْ:
مَهَرْ هذا الْوَطنْ غالي
وما ماتْ من فَداهو الرُّوح .......
تَقُولُولِنْ:
دِمانا بترسم الفجر الْهَداكْ
لاحَتْ تباشيرو،
وضِياهْ قَدْ بانْ .......
دِمانا بترسم السُّودانْ
حِلِمْ فارِدْ
جناحاتو السُّمُرْ غيماتْ
مطَرْ يغسِلْ سنينْ الْمُرْ
يجُرْ توبْكَنْ سَماءْ العافية
عَفُوكَنْ يُمَّه
ما دام النِّضال واحِدْ
ودَرْب الْعِزَّة ما دَرْبينْ .......

عصام عيسى رجب
الأحد 29 سبتمبر 2013 م


..


تعليقات 2 | إهداء 0 | زيارات 3313

التعليقات
#795158 [ناصح]
4.07/5 (5 صوت)

10-08-2013 08:08 PM
التحية للشهداء والتحية للشاعر عصام رجب . وإن شاء الله دمهم ما يضيع هدر .


#795026 [nagatabuzaid]
4.07/5 (5 صوت)

10-08-2013 05:09 PM
ان شاء الله ما يموت الشارع والجميع حيرجع من الخارج ويصارع



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية
تقييم
5.50/10 (2 صوت)




الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة