الأخبار
أخبار السودان
فيديو: قصيدة جديدة : سقوط الاقنعة المليون



10-21-2013 02:00 PM

(1)

يمينْ ساقْطِينْ
يمينْ ساقْطِينْ
يمينْ ساقْطِينْ
يمْكِنْ يومْ ....
أو يومينْ
قُولْ أُسبوع وأُسبوعين
شهر بى حالو
قُولْ شهَرينْ
بَسْ: ساقْطِينْ ....!!!!!!
وداقِين التُّرابْ تَتَرَبْ
عَجاجْكُمْ شين ....!!!!


(2)

وزي ما السَّيلْ حَدَر غيركم
طُغاةْ وطُغاةْ .......
نشِيلكُمْ والله غَمْضَةْ عين
تعالوا نعدَّد السَّاقْطِين:
أوَّلْهُم:
شرَدْ بى ليلْ ......
وما شَفَعَتْلُو جِرْسَةْ آخِرْ التَوباتْ:
"أنا فْهِمتَ ...... أنا فْهِمتَ"
خلاص دَرْسَ الْفَهَم خَلَّصْ
وفاتَتْ حِصَّةْ التاريخْ .......
ومِنْ اللّوحْ محاك شعبكْ
رماكْ في سَلَّةْ النِّسيان ......
وتانيهُمْ:
دا كان "فرعون"
وبِحْلَمْ بى فراعينو الصغار
يعيدو الْكَرَّة تاني وَراهُو
جِيل لى جِيلْ.....
يِهَتْفْ الشَّعب: خلاصْ أرحلْ ...!!!
يقول ليهم: شويَّه كَمانْ ....
شويَّه كَمانْ،
شويَّه كَمانْ،
شويَّه كَما......
إلى أنْ غرَّقو الْمِيدان .......
وتالِتْ،
كان عَقِيدْ جِدَّاً
ومَهَبُوشْ أو ...
يموَّلْ في الْخُلوق أجمع
كُلْ مَنْ شالْ سِلاح يومينْ ......
شِيْ جيش أحمَرْ
وجيش أصفَرْ
كتاب أخضَرْ .....
وبرضو لسانو فايت الْحَدْ
وشوفوا لما جاءْ الْطَوفان
وَقِتْ مِنَّ الجُحُر
جَرُّهو زي جُرذان .......
ورابِع
أيييييييهْ
يخزِّنْ في الْهوانْ ويلوُكْ
يراجِع سِيرةْ الْخُسرانْ
وكيف قد هانْ ......
ويقرأْ الْقِصَّة بالْمَقلوب
وكانْ ما كانْ ........
وخامِسْ
شُوُ يكابِر زييييييييينْ
يقول: ما بَتْرُك الْكُرْسي
دا إِرْثْ الوالِدْ الخالِدْ
أبّدْ خالِدْ ليوم الدَّين .....
وبَسْ لَمْتينْ ....؟!
وبَسْ كَمْ يومْ
تطولُو مهازِلَنْ بالْكومْ
ويدفَعْ كُلْ فواتير الظُّلُمْ
بالدَّمْ .........
دَفِعْ حاااااضِرْ ..... وما بى الدَّين ....!!!!!!

(3)

وآخِرْ هَمّْ
أبِشْرو الدور عليكم جاءْ
سُقُوطْكُمْ واللهْ شايفِنُّو
عيانْ وبَيانْ ......
وزي ما أنْذَلُّوا جبَّاريِنْ
أشدَّ ظُلُمْ
وكَمْ قاهْرِيِنْ
يمين تِنذَلُّوا حُمرَةْ عِينْ
أزَفْ وقت الْحِسابْ الْجَد
شِيلوا الشيلة
أرجو عدالة الشهداء
وياتْ مَنْ قد ظَلَمْتُمْ شينْ
عينْ بىْ عينْ
وسِنْ بىْ سِنْ
ودَمْ بىْ دَمْ
وويلْ بىْ وييييييييييلْ .......
وهَلْ دامتْ لغيركم شانْ
تخلِّدْكُم كَمانْ وكَمانْ ......؟!
أبِشْرُوا إذَنْ
وراجياكُمْ كؤوس الذُّلْ
تدَفِّقْ حنظلاً مسموم ......
مِنو الْما جَنْدَلو التاريخ،
كسَر صَنَمُو،
وشالُو السَّيلْ
كأنْ ما كانْ .......؟!
سُقُوطْكُمْ حانْ
سُقُوطْ يا ظُلْمْ
يا جَبَروتْ
سُقُوطْ يا قَهْرْ
سُقُوطْ كَهَنوتْ
سُقُوطْ الأقْنِعَة الْمِليون .......
سُقُوطْ يا زِيِفْ
سُقُوطْ يا خوفْ
سُقُوطْ يأس الرِّجالْ الشَّينْ
سُقُوطْ حَسْرةْ شبابنا الزَّينْ
سُقُوطْ شان يِنْهَض السُّودانْ
عزيزاً كانْ
عزيزْ حيكونْ
عزيزْ لى آخِر الأزمانْ .....
سُقُوطْ ياهُووو
سُقُوطْ يا مَنْ سُقُوطْكُمْ آنْ
سُقُوطْ الآنْ ....!!!!!
سُقُوطْ الآنْ ....!!!!!
سُقُوطْ الآنْ ....!!!!!

عصام عيسى رجب
الثلاثاء 01 أكتوبر 2013 م


عصام عيسى رجب
...






تعليقات 3 | إهداء 0 | زيارات 2620

التعليقات
#806049 [nagatabuzaid]
0.00/5 (0 صوت)

10-21-2013 10:25 PM
مليون يمين ساقطين بمليون شهيد ساقطين نعم يمين ساقطين رغم قواتكم الخاصة وناس مالى وبوبكو حرام يمين ساقطين بعزة الله يمن ساقطين


#805932 [بعشوم]
0.00/5 (0 صوت)

10-21-2013 07:23 PM
قول شهرين قول سنتين
بس ساااااقطين ساقطين
يا وسخين ..


يا رب ارنا فيهم يوما عبوسا قمطريرا


#805703 [محمد الشيخ]
0.00/5 (0 صوت)

10-21-2013 02:36 PM
سقوط الآن ،،، سقطت سقطت يا كيزان ،،، يا أخوان يا جرزان ،،، يا أسقط بني الإنسان ،،، سقوط الآن



خدمات المحتوى


مساحة اعلانية





الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة