الأخبار
أخبار السودان
يا ديدبان الفجر بان
يا ديدبان الفجر بان
يا ديدبان الفجر بان


01-26-2014 09:13 PM
الأستاذ / محجوب شريف



يا ديدبان الفجر بان
أهو داك لاح
أرضاً سلاح
بمبان عصي .... عصيانا بان
قسماً قسم
وضح النهار
وعيان بيان
تِتحت يا ذاك البيان
تتحت حتاً
حتي آخر نقطة فيك
لا فيش ولا تفتيش يعيش
تسقط زنازين الهوان

يوماً تري الخرطوم تهِــز
الأرض حتي الإنفجار
بحري المحطة الوسطي
ترويها الشوارع بالهتاف
وهنالك أمدرمان ترز
تهتف تجلجل شقلبان
يا ويلك أمبدات هديك
وغباين الأطراف وراك
وكماين الأحزان صياح
مُدناً تهب حفيانه من أقصاها لي أقصاها
تلقي قراها تجري وراها
غُـبنها علما الإفصاح

آن الأوان
نطلق سراح كل الأناشيد
المنتفة والمكتفة والمكندكة بالضجيج
كل الزغاريد المجففة في سراديب النفوس
تمرق تكُــوس الهمبريب
والخبز والحرية والندية
دندنة الأغاني العذبة
قهقهة المزاح
والليل نجوماً ساطعات
وكذلكم فلق الصباح
كم مرة تِم ...تِررم ... ترِم
أضحت تراح ... ترراح ... تراح
ووطنا إتـقــبـقب رُكن
تب ما أستراح

الطلقة ما بتنبت بذور
هل شفت يوم عصفور يدور حول العصي ؟
رفرف جناح وعزف نشيد ؟
ما شقشقت بنت الطيور
حتي أنثني الغصن الرطيب
مجداً لأنفاس الحياة
تباً لهم
يا أيها الوطن الحبيب
تباً لها
الأيدي التي
ما إتعلمت يوماً تبر الوالدين
تباً له
القلم الذي كتب الغلط
تباً له
الوتر الذي عزف الجراح أفراح

المجد للشعب الذي
علمنا ... وإتكلمنا .... وإحتجينا .... وإتظلمنا
الدرجنا ما دفرنا
القربنا ما نفرنا
الربانا ما كفرنا
والفرهدنا بين أنفاسو نقدل
في دروبو نصاح
آن الأوان
الوقت راح
هذا قرار الشعب
مُش يعني إقتراح

فالتعترف
خُت بندقيتك وإنصرف
فالزلازل خطوة منك والرياح
تكفي السرادق .... والخنادق ... والبنادق ... والجراح
ومعسكرات بؤس النزوح
عطشان ومكسور الجناح
والروح كأهون ما يكون
أن تُستباح

من أجل أن نحيا سنبني
للصغار القادمين
هذا الوطن أجمل مكان
نطفي الحريق ... نلقي الطريق
بين الرحيق والبرتكان
نقدر نقول
الأمر كان .... بي إيدنا نحن
وليس أيدي الأمريكان


ـــــــــــــــــــــــــــــــــ
شاعر الشعب محجوب شريف - يا ديدبان الفجر بان

صرخة جديدة تخرج من رئة شاعرنا الأستاذ محجوب شريف ليرسم لنا عبر حرفه المصادم أجمل خارطة طريق لوطن دوماً في الخاطر والبال . سلِمت يا محجوب .
خضر حسين








تعليقات 23 | إهداء 2 | زيارات 7416

التعليقات
#898051 [ساهر]
0.00/5 (0 صوت)

01-27-2014 05:37 PM
من أكتوبر 1964 إلى الهتاف والتغني والتغزل في مايو 1969 إلى الهتاف ضدها إلى الانتفاضة إلى الهتاف ضد البشير إلى......... عش يا أخى في ألمانيا مع كريمتك وريح نفسك.... والله أنت تنفخ في قربة مقدودة.


#897876 [المشتهى السخينه]
0.00/5 (0 صوت)

01-27-2014 02:09 PM
التحدى ما زال امام خليفة المسلمين الرئيس الدائم الراشى الاعظم .. محجوب شريف العفيف لا يملك شيئا من حطام الدنيا وما خايف من بكره.. التحدى قدم له طنا خالصا من الذهب عيار 24 فى مناسبة ولتكن ( تكريمه ) من الدولة ..ونراهن يقينا انه سيرفضها .. نبارك لهيئة علماء السودان وشيوخها والشيخ عبدالحى وشيخ عصام وشيخ كارورى هدايا السيد الرئيس الدائم والمتكرره ونأمل ان يقوم بتقديم طن الذهب بعد ان يرفضه محمجوب شريف اليهم ..ليزيدهم سعادة وهناء ومجد للدفاع عن قيم الدولة الرساليه السودانيه ( المتبقيه ) وقيادتها المؤمنه ..


#897799 [أنا]
0.00/5 (0 صوت)

01-27-2014 01:05 PM
مانفستو هادر للآتي ..مولود النور ..بمده العارم..روحه العامر


#897775 [منحنى النيل]
0.00/5 (0 صوت)

01-27-2014 12:43 PM
التحيه ليك ياشاعر الشعب
وامنيات من القلب بدوام الصحه والعافيه
ودى المحريه فيك ياود شريف....يانظيف


#897773 [مدحت عروة]
0.00/5 (0 صوت)

01-27-2014 12:42 PM
هسع عليكم الله فى مقارنة بهذا الزول المكتح بتراب الوطن زولا نضيف اصلا لا سرق لا كتل ولا سجن بل اتسجن زولا متريح بريحة الوطن هل فى مقارنة بينه وبين اى كوز عواليق؟؟؟
ووالله الذى لا اله غيره لا انى شيوعى او يسارى ولا ح اكون لكن كلام اونضم او شعر هذا الزول يهز المشاعر الوطنية ويخليك تعرض فى الهمبريب وتدق صدرك وتقول انا سودانى هذا السودان الاصلا وكلو كلو ما بيشبه هؤلاء المتاسلمين الماعارف من اين اتوا؟؟هم ما بيشسبهوا السودان كلو كلو !! بيشبهوا شذاذ الآفاق ناس حماس ونهضة تونس وكيزان مصر وكل عواليق العالم من المتاسلمين الذين يشترون بآيات الله ثمنا قليلا قاتلهم الله انى يؤفكون !!!!
محجوب شريف ايها الشريف الله يديك العافية طول ما الدجاجة حافية!!!


#897516 [سفيان محمد]
0.00/5 (0 صوت)

01-27-2014 09:18 AM
.


#897464 [Abdo]
0.00/5 (0 صوت)

01-27-2014 08:43 AM
كتر من شموعك يا محجوب فالظلام دمس و الرؤيا بقت معتمه و شعاع الامل في مثل هذه الكلمات للوطن و الشعب ، بوركت


#897446 [شايقى]
0.00/5 (0 صوت)

01-27-2014 08:31 AM
.


#897382 [ود البطانه]
4.25/5 (4 صوت)

01-27-2014 07:37 AM
كل يحفظ هذه القصيدة التي سوف نرددها يوم الكنس.... الله يديك الصحة والعافية يا استاذ يا وطن انت زاتك.


#897363 [rashidiya]
3.00/5 (2 صوت)

01-27-2014 07:19 AM
يا الله كلما انقبضت انفاسنا واختنقنا و احسسنا بانعدام الاكسجين وضيق التنفس . كلما لفنا اليأس و طوانا الحزن على وطن نفتقده ونحن فيه وكلما ظننا ان الامل تلاشى فى عودة الامان والفرح فى دنيانا أطل الفارس المقدام يمتطى قلمآ طالما انتشلنا من غياهب الهم الى ساحات الفرح الممتع. كلماتك هى البلسم لكل سودانى موجوع ومهموم بحال الوطن. عافاك الله استاد محجوب ودمت لنا دومآ طاقه وكوه تدخل الهمبريب لدنيانا فتنعشنا .دمت للوطن وللشعب اجمع. ولك منا كل الحب والتقدير


#897338 [الغاضبة]
3.00/5 (2 صوت)

01-27-2014 06:55 AM
من أجل أن نحيا سنبني
للصغار القادمين
هذا الوطن أجمل مكان
نطفي الحريق ... نلقي الطريق
بين الرحيق والبرتكان
نقدر نقول
الأمر كان .... بي إيدنا نحن
وليس أيدي الأمريكان

الله الله يا شاعر الثورة، يا شاعر الشعب، رجاااااء يا أهل الراكوبة علقوا وزينوا لنا راكوبتنا بهذه القصيدة العصماء وارفعوها عالية لتكون ملهمة للثوار وللأحرار الذين لا ينتظرون ولا يؤمنون بمفاجآت السفاحين والقتلة ...


#897308 [عبد الرحمن محمد الحسن]
1.00/5 (1 صوت)

01-27-2014 06:28 AM
المجد للشعب الذي
علمنا ... وإتكلمنا .... وإحتجينا .... وإتظلمنا
الدرجنا ما دفرنا
القربنا ما نفرنا
الربانا ما كفرنا
والفرهدنا بين أنفاسو نقدل
في دروبو نصاح
آن الأوان
الوقت راح
هذا قرار الشعب
مُش يعني إقتراح

---
رائع يا شاعر الشعب


#897302 [العميد المرفود]
5.00/5 (1 صوت)

01-27-2014 06:23 AM
انت الابداع الفضل فينا


#897162 [ولهان بيك]
5.00/5 (2 صوت)

01-26-2014 11:49 PM
هلا هلا يا ودشريف
كلما تضلم و تزداد سواد تجينا شايل سراجك تنور لينا الدرب,, كلما الانفاس تتكتم و تتحبس تجينا شايل انبوبة الاوكسجين ترجع لينا الشهيف و الزفير ,,, كلما الدم يتجمد في العروق او يسيل في التراب تجينا شايل بنك الدم و تضخه في عروقنا ,,, ياسلام يا سلام يا سلام على اولادك يا بلد متين تنصفيهم و تبادليهم المحبة زي ما بيحبوك ليه لغاية هسع ما قادرة تعرفي صليحك من عدوك ؟؟ روح يا شيخ الله يفتح عليك دنيا و آخرة و يا ودشريف و يا ود مريم خليك متاكد انو عازة عافية منك و راضية عليك تمام الرضا


#897152 [ابو العلاء الجديد]
3.00/5 (2 صوت)

01-26-2014 11:41 PM
تحية الي شاعر الشعب


#897144 [sood zac]
1.00/5 (1 صوت)

01-26-2014 11:31 PM
لك التحية ياعبقري وامد الله في ايام وعافاك


#897112 [همســــــــة]
3.00/5 (2 صوت)

01-26-2014 10:39 PM
( كارتــر ) بتاع الانتخابات و( النزاهة )داك ؛ قاعد يسمع المفاجأة معانا ولا لفوها ليه في جريدة ؟


#897102 [Abdu]
3.00/5 (2 صوت)

01-26-2014 10:25 PM
استاذ يا استاذ


#897090 [faisalmukhtar]
3.00/5 (2 صوت)

01-26-2014 10:05 PM
عوفيت وانت تتقدم الجميع فأردا أجنحة للمقاومه وانت الذي تعاني ما يعجز عن تحمله الا الأيوبيين فهنينا لشعب مازال يتقدمه امثال محجوب فرهان محجوب علي الشعب هو المنتصر بإذن الله


#897089 [nagatabuzaid]
5.00/5 (1 صوت)

01-26-2014 10:04 PM
لك التحية محجوب شريف لكن الرومى كانت مولعة اكثر من شقلبان وخلت كيزان التاسعة هربوا من بيوتهم وبعضهم انحشر تحت الامهات والاخوات يسويها الله المرة دى بلا توقف


#897088 [سن ألفيل]
5.00/5 (1 صوت)

01-26-2014 10:03 PM
يا سلام والله ابداع


#897077 [ابو نور]
5.00/5 (1 صوت)

01-26-2014 09:53 PM
حبيب الشعب شاعر الشعب الان الان نشعر بنطلاق الشرارةعندما تفتح لنا شبابيك الهمبريب من عمنا شريف الحبيب
هاهو يامحمد احمد حبيبكك يناديك.عما قريب الهمبريب تفتح شبابيك االحبيب يامحمد احمد وتشتهى ويطل عليك وتشتهى


#897058 [ودعمر]
5.00/5 (1 صوت)

01-26-2014 09:37 PM
الأمر كان .... بي إيدنا نحن
وليس أيدي الأمريكان
رد جميل من شاعر كبير "للمفاجأه البيونسو بيها كارتر في احتقار لكل من هو سوداني"!!! لكن زي ما قال الاستاذ الفجر بان وانحنا ماحانقتلك زي الليبيين لكن حنسلمك للخواجات البتساررم ديل في لاهاي



خدمات المحتوى


مساحة اعلانية





الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة