الأخبار
أخبار إقليمية
مسؤول الخارجية (زعلان)..!!!
مسؤول الخارجية (زعلان)..!!!
مسؤول الخارجية (زعلان)..!!!


02-28-2014 07:20 AM
صلاح الدين عووضة

* مسؤول الشؤون الخارجية (بتاعنا) غاضبٌ جداً من كثرة (تدويل) قضايانا الداخلية..
* وصرح لكاتب هذه السطور قائلاً - بلغة أهل الصحافة - :(أمبيكي بتاع مين وبن شماس بتاع مين؟! ليه ما نحل قضايانا لوحدنا؟!)..
* (تخيَّل)؛ مسؤول (الشؤون الخارجية) - وليست (الداخلية) - (زعلان شديد) من رؤية وجوه أجنبية في بلادنا كل يوم والآخر..
* ويقول أنه صار مثل (عامة السودانيين) غير مشغول بالذي يشغل (بعض) قادتنا أنفسهم به، والصحافة، ونفرٌ من مثقفاتية (طق الحنك) في مجال السياسة..
* واستحلفني بالله - مسؤول الشؤون الخارجية هذا - أن أجري استطلاعاً عشوائياً بين السودانيين لأرى (كم) منهم يعرف ما يجري في مفاوضات أديس، أو يفهم ما يريده عرمان، أو يهمه أن تنجح نجحت المفاوضات هذه أم تفشل..
* ثم يعاتبني في الذي كتبته قبل أيام عن تغزُّل بعض سفرائنا في بت مكناس الموريتانية قائلاً بحرقة: (يا خي ما تخليهم يتغزلوا في الناها السمحة دي زي ما هم عاوزين بدل ما يمشوا أديس عشان يشوفوا أمبيكي وعرمان وعقار)..
* ويضيف موضحاً - مسؤول الشؤون الخارجية (بتاعنا) - :(إنت فاكر دبلوماسيتنا زي زمان تتعامل مع الجمال المكاني والزماني والبشري؟! دي بقى فيها جفاف شديد في زمن الأبوجات والنيفاشات والأديسات والدوحات؛ فيا خي خليهم يروُّحوا عن أنفسهم شوية في واحات عيون الناها)..
* وأواصل استماعي - مندهشاً - إلى مسؤول الشؤون الخارجية هذا وهو يباغتني بسؤال هو أدرى بإجابته مني بحكم (تخصصه): ( بذمتك تقدر تحصر لي عدد المرات اللي فاوضنا فيها متمردين وحردانين وطمعانين وحاملي سلاح طوال سنوات الإنقاذ؟!)..
* ثم يستطرد قائلاً دونما انتظار لإجابة من جانبي على سؤاله هذا: (طيب؛ هل ممكن يكون ده وضع طبيعي لحكومة تحترم نفسها ومواطنيها؟!)..
* وبمناسبة الإشارة إلى (المواطنين) هؤلاء - يضيف مسؤول الشؤون الخارجية - :(بالجد حكومتنا دي لا تحترم مواطنيها وإلا ما كانوا في أسفل قائمة اهتماماتها بعد مناوي ودبجو وعرمان وعقار وكل المتمردين عليها بالسلاح لا بالتظاهر السلمي)..
* بقى أن تعلم - عزيزي القارئ - أن مسؤول الشؤون الخارجية (بتاعنا) هذا ليس هو كرتي، بالطبع، وهو لا يكاد يصدق حتى الآن أنه نجا باعجوبة من (مقصلة) التعديلات الوزارية الأخيرة..
* ولا هو السفير (أزرق الناها)، بالتأكيد، وهو لم (يُكرِّم) بعد لمنصب وكيل وزارة الخارجية الذي أُختير له فضلاً عن خشيته من عدم رؤية بنت مكناس مرة أخرى إن هو فُصل من الخارجية جراء تصريحات مثل هذه..
* ولا هو رئيس دائرة الشؤون الخارجية بالمؤتمر الوطني، قطع شك، إلا أن يكون بصدد إعلانه إنضمامه إلى حزب الترابي دون أن يدري أن الترابي هذا بـ (صدد إعلان إنضمامه إلى الوطني)..
* إنه - أعزائي الكرام - هشام عبد اللطيف (بتاعنا)..
* وحين أقول (بتاعنا) فإنما أعني (بتاع) صحيفتنا هذه (الصحافة)..
* والشؤون الخارجية المسؤول عنها هشام هذا هي التي تُسمى في بعض الصحف الأخرى (إدارة الأخبار العالمية)..
* إنه أظرف حلفاوي وُلِّيَ مثل المنصب الصحفي هذا من قبل..
* ولو كان الأمر بيدي لأخترته (سفيراً) عوضاً عن العبيد المروح أو سناء حمد..
* فإلى جانب إجادته اللغة الإنجليزية فهو ذو إلمام كبير بـ (الشؤون الخارجية)..
* وذو إلمامٍ - كذلك- بشؤون شعبنا (الداخلية!!!!!).


الصحافة
[email protected]


تعليقات 15 | إهداء 0 | زيارات 6910

التعليقات
#929091 [bent alnil]
0.00/5 (0 صوت)

02-28-2014 07:44 PM
و الله بلدنا بقت تحير ناس ماشة الدوحة واديس اتفاوضوا و ما اتفقوا... حسب معلوماتي التفاوض ده علم لأنه ما ممكن الناس ما تصل لاتفاق و لو الحكومة بطلت دلع الحركات ده كان أحسن و بعدين موضوع الإنجليزي و المؤهلات عندنا عكس كل ما كترت شهاداتك و علمك كلما بقيت عاطل و تستبعد من المنافسة ... كسرنا رقبتنا في القراية ماجستير و دبلومات و لغات و في الآخر العامل فيها شاعر و جنوا جكس و قعادتحت الشجر سكرتير تالت ضمن سلسلة شعراء الناها . بلدنا دي تتصلح بس اعطوا الخبز لخبازه و يجيبوا ناس بتعرف لغة مش مسؤول يقول كلام و مترجمه يقول كلام و من عرف شعر قوم أمن شرهم عفوا أقصد لغة...


#929046 [ZA HAGAN]
0.00/5 (0 صوت)

02-28-2014 06:16 PM
We have a problem with our foreign affairs presentatives not speaking and writting Arabic very well , never mind English !


#929018 [بي كرت]
5.00/5 (1 صوت)

02-28-2014 05:01 PM
ياخي سيحتا ركبنا ، هسه قلنا في مسؤول ضميرو صحى وبقى يحس بآلام واوجاع الناس نجي نلقاه عربجي زينا ؟


ردود على بي كرت
United States [صالة المغادرة] 03-01-2014 06:43 AM
دى بكرتين مش كرت بعدين ما تنسى وزير خارجيتك زاتو بكروت ثلاثة احداهن فى ايطاليا واثنتين فى بلاد السجم والندم والالم .


#928985 [أب كجنكي]
0.00/5 (0 صوت)

02-28-2014 04:15 PM
دا رأي مسؤول الشؤون الخارجية (بتاعنا)
وإنت رأيك شنــو ..؟ يا ود عـوضة .. وبالمناسبة إنت صلاح عووضة دفعتنا في الستينات في القولد واللا زولا تاني . وفي كل الأحوال إليك تحيّاتي ..


#928876 [الطيب خالد]
5.00/5 (1 صوت)

02-28-2014 12:50 PM
ينصر دينك يا عووضة خارجيتنا ليها زمن طويل تبحث لمن يسبر غورها وهى جات منك ضربة البداية يا ما فيها الكثير المثير منذ أن تربعت عليها الإنقاذ وخلفت رجلها وأصبحت ملك مشاع لها دون غيرها 0


#928859 [kalifa ahmed]
3.50/5 (2 صوت)

02-28-2014 12:23 PM
وين سناء الهجليجية !!!! مكسرت كيزان الداخل !!!!! منشدة التكسرة ماعارفيين يختوها وين ؟؟ يوم وزيرة ويوم سفيرة وما حايقة !!!!!


#928831 [بت السودان]
5.00/5 (1 صوت)

02-28-2014 11:25 AM
أحييك يا أستاذ عووضة ,, و كما عهدناك لا تخاف في الحق لومة لائم ..
أما بالنسبة للأخ الدباغ يا أخينا المقال يتضمن أبعاد أكبر و أعمق من مجرد إجادة هشام للغة الإنجليزية؛؛ و بعدين ليه بس ركزت في اللغة الإنجليزية و اتغاضيت عن إلمامه بشؤون شعبنا الداخلية و كذلك الخارجية ؟؟ و لو وُجِد شخص بهذه المواصفات ما الغضاضة في ان يُرشح الى منصب وزير الشؤون الخارجية ؟؟ و لو كان في ناس بالمواصفات دي كان حالنا اتعدل !


اما بالنسبة للأخ المشروع : انت طلعت OFF POINT من الموضوع !


#928817 [سوداني متابع]
5.00/5 (1 صوت)

02-28-2014 10:42 AM
مسابقة فنتازيا السودان :

أختار أحد الاجابات علي السؤال التالي : (الطيب راعي فالح و أمين سيد الغنم في السعودية و السودانيين كلهم مبسوطين شدييييييييد منو )
ايه اللي خلي الطيب يبقي راعي غنم الناس في الغربة ؟؟؟

1.عشان ما عندنا غنم؟ .

2. عشان الطيب ما بيعرف يرعي الغنم؟

3. عشان ما في قش و علوق للبهائم في السودان ؟


ردود على سوداني متابع
[بت السودان] 03-01-2014 10:22 PM
الإجابات التلاتة صح !!

United States [AburishA] 02-28-2014 03:28 PM
هيعيهيعااااع حلوة شديد اخ سوداني متابع** مافي خيارات !!! الاستعانة بصديق! لا لا لا

** أحذف لي **(اجابتين) !!!!


#928763 [الدباغ]
5.00/5 (1 صوت)

02-28-2014 09:10 AM
يعني عشان حلفاوي يجيد الانجليزية عاوز تعينو وزير خارجية ⁉️⁉️⁉️ ما هذا البؤس


ردود على الدباغ
United States [ودكترينا] 02-28-2014 08:33 PM
*** الحلفاويين عندهم ممثل قاعد الآن فى أديس أبابا...بين ياسر عرمان وامبيكى...وزولك يا (دباغ)الاسمو غندور أمبارح ماجا الجلسة فى أديس...مرقو...مرقو....مرقو...!!!

United States [AburishA] 02-28-2014 03:37 PM
هيع هيع هااااع.. ضحكتنى والله يا دباغ.. دباغتك شينة خلاص !!!

** انت من وين ياللخو ... ناس حي ***الدباغة** مدني بفهومها’’ طايرة"

United States [شطة] 02-28-2014 12:56 PM
يالدباغ كلاب الحلة جابو جلد,,,,,,,,,,,,,,,,,,

قال بؤس قال
مساكين مقهورين و مجهجهين الواحد شدة ما ممغوص, تقول يطق, يشقى صلاح عووضة ويكتب ليكم كلمتين عسى ان تفهموا ومنها تروحوا عن انفسكم(ده حقت ناس المشروع الحضارى), يجى زى ده يقول ليهو حلفاويين وشنو كده ما عارف,,,,,,,

European Union [ابوعديلة] 02-28-2014 11:56 AM
والله البؤس فيك ياخينا فأنت تعلق على موضوع لم تفهم فيه طظ من سبحان الله .

United States [شالكا] 02-28-2014 09:49 AM
لم تفهم ما بين السطور يا دباغ .. المغزي أكبر من هشام الحلفاوي ...


#928762 [حدباي]
3.50/5 (2 صوت)

02-28-2014 09:08 AM
بسيطة .. وصي هشام بكتابة معلقة في الناها .. و علي طول يعين نائب وكيل الخارجية .


#928757 [المشروع]
4.50/5 (2 صوت)

02-28-2014 09:00 AM
اقتباس:(أن أجري استطلاعاً عشوائياً بين السودانيين لأرى (كم) منهم يعرف ما يجري في مفاوضات أديس، أو يفهم ما يريده عرمان).
اذا كان الناس ما عارفة عرمان عايز شنو تبقى دي مشكلة الناس ومشكلة عرمان وكمان ما معقول الحكومة تمش تتفاوض مع شخص هو ما عارف عايز شنو؟ وفي الحالة دي تنطبق عليهم الأية (ضعف الطالب والمطلوب)..
وانا كمان اضيف لكلام الاخ والله حتى ناس الحكومة ما عارفين عايزين شنو بالضبط وينطبق عليهم المثل تسويها بي ايديك تغلب اجاويدك.

اخي عووضة طبعا بمناسبة اجادة اخونا للغة الإنجليزية وربنا يوفقه ويديه العافية ... الآن نشأ جيل من الشباب بالخارج درس من الإبتدائية حتى تخرج من الجامعة ويعرف اللغة الإنجليزية ولغة البلاد التي هو فيها معرفة معايشة ويتنفس بها ويفكر بها ومع ذلك يجيدون اللغة العربية بحكم الزوجات القاعدات في البيت في بلاد الغربة وهن يلعب دور كبير جدا وباقيات عشرة على المبادي وعلى الاصول حتى ان الاب قد يكون متساهلا في بعض الاحيان وتكون الام صمام الامان وتلعب الام دور استاذ الدين والعربي والتاريخ والجغرافيا ويقمن بدور كبير للحفاظ على اللغة العربية وجزاهن الله خير الجزاء
وانا شخصيا شقيقي ابنته في احدى الدول الخارجية ودرست من الإبتدائي الى الثانوني الآن كلها بلغة البلد التي تقيم فيها وكمان تعرف العربية كتابة وحديثا من البيت من الوالد والوالدة وهي بالمناسبة جاءت الأولى على مستوى المنطقة وكان المفروض او من يحتفل بها السفارة ولكن ليست هي الناها.
وكمان عزيزي صلاح عووضة ازيدك من الشعر بيت والله العظيم واليوم يوم جمعة قابلت واحد سوداني يا عووضة يعرف معرفة تامة رأيته يتحدث كأنه يشرب موية من اللغات التالية:
الانجليزية
التركية
البنغالية
التايلندية
الفلبينية
الاردية (الباكستانية)
الهندية

اخي عووضة طبعا عملنا له اختبار فوري في لغتين هي البنغالية والفلبينية والهندية وكانت النتجية ممتازة وكنت شاهد على ذلك اما بقية اللغات على حسب كلامه فقط
وكما قال حسين خوجلي الان في الخارج يوجد (يوجد سودان تاني بالخارج) ونحن حتى الآن ما عارفين عرمان ولا غندور ولا كمال عبيد عازين شنو ولي شنو


#928739 [قنقليس]
0.00/5 (0 صوت)

02-28-2014 08:15 AM
والله ماشاء الله ، دا سفير تفتيحة، أنا أحترم كل من يحب الجمال ويتغزل فيه..... لكن بصراحة يا الدنقلاوي كدي قول لي ... إنت قاصد شنو الضبط؟ عينك في الفيل وقاعد في ضلو! يعني لو في واحد من جماعة "لفحن جرن" قرأ المقال دا ولم يكملوا وفهم لحدي الحتة الوقف فيها بسسسس؟ أها بعد دا انت ح تودي وشك وينننن؟ وإنت عارف في مواضيع زي دي السبب الحقيقي للمشكلة بيضيع بعد يتم تناقل الموضوع بين نفرين او تلاتة ، ح نقعد بعد داك نكوس ليك في الضمانة


#928726 [منشاااااااااات]
4.63/5 (4 صوت)

02-28-2014 07:48 AM
دوختنا معاك----الله يسامحك



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية
تقييم
9.00/10 (2 صوت)




الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة