الأخبار
منوعات سودانية
الفنان محمد ميرغني : جمهور ندى القلعة كلو (مراهقين كبار).. والفنانين بقى ما عندهم شغلة غير (الجلبطة) بالكريمات..!
الفنان محمد ميرغني : جمهور ندى القلعة كلو (مراهقين كبار).. والفنانين بقى ما عندهم شغلة غير (الجلبطة) بالكريمات..!
 الفنان محمد ميرغني  :  جمهور ندى القلعة كلو (مراهقين كبار).. والفنانين بقى ما عندهم شغلة غير (الجلبطة) بالكريمات..!


04-12-2014 11:03 PM
حوار : محاسن أحمد عبدالله
صاحب تجربة غنائية ثرة لا يشق لها غبار.. وضع بصمته الواضحة في تاريخ الأغنية السودانية، وقدم أجمل وأروع وأحلى الأغنيات.. صاحب آراء جريئة وواضحة.. لا يعرف الرمادية ولا الضبابية في إجاباته، متى ما سئل حول أي قضية تهم الوسط الفني. نشأ وترعرع في أمدرمان، في بيئة جمعت كل ألوان الفنون وكل نجوم الرياضة وأهل الفكر والسياسة، وتشبّع من ذلك المورد وارتوى منه وفطم عليه، ليقدم تجربة خاصة به أكسبته المقومات الإبداعية المتفردة.. هو الفنان محمد ميرغني، الذي بحثت عنه (فلاشات)، والتقت به للحديث في عدد من المحاور، خصوصاً ما يتعلق بالساحة الفنية والوضعية التي تقف عليها الآن.. فماذا قال؟
*بداية.. دعنا نعود بالذاكرة قليلاً إلى الوراء.. في بداياتك الفنية الأولى، هل وجدت اعتراضاً من الأسرة بأن تصبح مغنياً؟
اعتدل في جلسته وقال: (أنا اتولدت في أمدرمان في حي السيد المكي بسمع صوت نوبة الإسماعيلية والحياة الأمدرمانية بثقافتها وطرقها الصوفية المختلفة والحركة الإبداعية والتعليمية والاجتماعية التي كانت تعنى بإنسان المنطقة فوجدت نفسي في مدرسة متكاملة ومجتمع مثقف سياسيا ووسط رجال يتحدثون عن الوطن، لم أجد اعتراضاً من الأسرة وفي (سمايتي) كان شايلني سرور وحايم بي).!
*أنت معلم.. ألم يؤثر اتجاهك للفن في مهنتك تلك؟
نعم أنا معلم ولمدة أربعة وأربعين عاماً، (يعني سنواتي في المهنة دي أكبر من عمرك إنتي)!.. لكن بحب الغنا، وفي ذلك استشرت أساتذتي وقتها الماحي وعبد الله عربي وعلي ميرغني، فدلوني على الطريق وأصبحت فناناً.
*مع من من الفنانين تزامنت فترة ظهورك؟
مع الفنان عثمان مصطفى ومحمود علي الحاج والجيلاني الواثق وأنس العاقب.
*الفنان يتحلق حوله عدد من المعجبات.. كيف كان تقبل زوجتك للمعجبات؟
ما عندي مشكلة لأني (مدرس بنات) بدرس بالغنا، ولو ما كان إحساسي جميل وصادق حتكون حصتي فاشلة وزوجتي فاهمة الكلام ده كويس يعني أنا فنان ملك الجميع.!
*قريباً من الساحة الفنية.. ما هي ردة فعلكم كفنانين كبار تجاه ما يدور بين الفنانين الشباب بتكوين اتحاد خاص بهم؟
أجاب بانفعال: (ريحونا راحة كبيرة)، ويواصل: (إذا كانوا شايفين إنهم كده بيتطوروا بقول ليهم أهلا بيكم يا شبابنا (المتوثب) ومرحبا بـ(الحركة الشعبية الفنية لتحرير السودان)!!.
*مقاطعة: ردك هذا يحمل طابعاً استهتارياً؟
يا أخوانا اتحاد شنو (الحيعملوهو وهم بيغنوا في غنانا)، أقول ليك حاجة: أسمعي أغنية (الطير المهاجر) لوردي.. حتلقيها بتعادل كل غناهم الغنوهو.!
*أنت بردِّك هذا تظلم فنانين آخرين قدموا أغنيات جميلة ولهم بصمتهم؟
إذا هم شايفين كده بقول ليهم (مبروك عليكم).. وإذا (ده غناكم) ومسكتوا بيهو البلد ودي طموحاتكم ربنا يسهل عليكم!.
*ألا تعتقد أن مجرد اتجاه الشباب لفكرة تكوين اتحاد خاص بهم يدل على فشل الاتحاد الأم؟
العبرة يا أستاذة ما في تكوين اتحاد!.. العبرة في تكوين شخوصهم بالعلم والمعرفة وياريت يستطيعوا يتساووا مع العاقب محمد حسن وخليل إسماعيل وفرح وكرومة، لما يبقوا زي ديل ممكن يعملوا اتحاد.. لكن هسي ما أظن.!
*افتراضياً.. هل يمكن أن يتحقق حلمهم هذا؟
في قوانين كتيرة في المسألة دي إن شاء الله يقدروا يلتزموا بيها، لأن المادة (27) تقول: لا يجوز ممارسة المهن الموسيقية أو المسرحية دون التسجيل في السجل، والمادة 15: لا يجوز الترخيص لأي ممارس للمهنة أو استخدام لممارسة المهنة، إلا إذا كان مسجلا في أيٍّ من السجلات المنصوص عليها في المادة 15.
*هل هذا تكسير للمجاديف؟
(عليك الله مش كفاية التحزب العايش فيهو السودان)، بدل يساعدوا في التفكيك أحسن يساعدوا في لم هويتهم ويتحدوا (الله يرضى عليهم).
*الفنانون الشباب الذين تتحدث عنهم يمكنهم أن يضعوا بصمتهم عالمياً؟
من خلال شنو؟.. الغناء بالإنجليزي دا ما منّو فايدة.. ولو الفنانين الشباب دايرين يمسخوا لينا هويتنا السودانية ما بنخليهم والله.
*أشعر أن حديثك هذا موجه للفنان نايل الذي شارك بالغناء باللغة الإنجليزية في برنامج (ذا فويس)؟
أنا سمعت نايل بيغني.. واتعاطفت معه.. بس أخدت عليهم الغناء بالإنجليزي.. هسي عليك الله لو كان غنى (جسمي المنحول) لأبو صلاح مالو؟.. وبعدين نحنا بنفتخر بشبابنا وبتراثنا وبأغنياتنا كمان، وأزيدك من الشعر بيت: نحنا أسياد الإيقاعات في العالم العربي.!
*معروف عنك خلافاتك الدائمة مع الفنانين حول ترديدهم لأغنياتك.. ووصل الأمر بك إلى المحاكم كما حدث مع الفنان الراحل محمود عبد العزيز وفرفور وغيرهم.. لماذا؟
أيوه.. وصلت المحاكم لأنو (ده حقي)؟ ولا إنتو شايفين أحسن أسكت؟
*لكنك رددت في بداياتك أغنيات الغير ممن سبقوك من الفنانين.. يعني (حلال علينا وحرام عليكم)؟
ما بنكر أننا غنينا للسبقونا.. لكن كمان كان عندنا غنانا الخاص!.
*ما هو رأيك بصراحة في أزياء الفنانين الشباب اليوم؟
أغلبهم قاعدين في (بترينات) و(مجلبطين بالكريمات) والمكياج والبدرة وتفتيح البشرة، بقينا نعاين ليهم بنظرة شائهة ما بتشبه الفنان زمان.. (لعل الحاصل خير).!
*ما رأيك في الفنان صلاح ولي.. وفي ما يقدمه من أداء استعراضي مصاحب للغناء؟
صلاح ولي ده داير يخلق حاجة جديدة.. وهو لسه في أول الطريق.. ونوع الفن ده مفروض يخليه للفنان عبد القادر سالم أو الحلفاويين، لأنه يعبر عن تراث مناطقهم بالرقصات، وصلاح ولي أحسن يشوف ليه (دلوكة ولا صقرية).
*ما هو أميز صوت نسائي موجود في الساحة الفنية الآن؟
ما في صوت نسائي بعد حنان النيل وسمية حسن.. لكن في واحدة لفتني صوتها في احتفال بقاعة الصداقة اسمها مكارم بشير غنت أغنية للفنانة الراحلة منى الخير، مكارم دي عندها مساحة صوتية واسعة وصوتها رخيم وقوي ومعبر بتمنى إنو تكون من طالبات معهد الموسيقى.
*ألم يلفت انتباهك صوت سميرة دنيا مثلاً؟
الفنان غير صوتو عندو حاجات تانية جميلة.. مثلا طريقة تفكيروا ورصانة عقله.. و..
*مقاطعة: لم تجبني عن سؤالي بخصوص سميرة دنيا؟
ردي بسيط ما عندي غيرو.. (الفنان رسالة).!
*وندى القلعة؟
ندى ما عندها صوت مؤثر.. وبدأت تتلاشى الآن وما عندها جمهور.!
*ألا تعتقد أن إجابتك هذه بها نوع من (التحامل) على القلعة؟
رد سريعاً: شوفي جمهور ندى كلو من المراهقين (كبار السن) والجهلاء من أصحاب المال والمصلحة.. وديل طبعاً (محرومين) ليس إلا.!
*بصراحة ما هو تقييمك لمشوار عبد الوهاب وردي الفني؟
أبوه الله يرحمه زمان قال إنو عبد الوهاب (ما عندو علاقة بالغنا)... وهذا يكفي ولا يستطيع عبد الوهاب أن يفرض نفسو كفنان مهما عمل.!
*بعيداً عن الفن.. ما هو لونك السياسي؟
بانفعال: ما عندي لون سياسي لوني الهلال بس.. وزعيمي واحد هو الزعيم إسماعيل الأزهري.
*هل هي إجابة دبلوماسية (حذرة)؟
بالعكس.. لو بتتكلمي عن الحكومة والإنقاذ.. أعرفي إنو أغلب قادة الثورة أنا درستهم ومنهم (يوسف عبد الفتاح وسليمان محمد سليمان واللواء حسن كركب) وغيرهم.
*يردد البعض بأن صوتك (شاخ) وأصبحت غير قادر على الغناء.. ما تعليقك؟
معليش.. أنا لسه صوتي بخير و(ما شاخ).!!

اليوم التالي


تعليقات 23 | إهداء 0 | زيارات 9096

التعليقات
#972805 [جاكس]
0.00/5 (0 صوت)

04-14-2014 01:22 PM
في اعتقادي أن هذه الصورة ملعوب فيها بالفوتوشوب، وأصبحت أقرب للرسم الكاركتيري منها للصورة الفوتوغرافية. ولدرجة أن ملامح ندى القلعة كادت تختفي.

ولكن للأسف شاهدت المغنية ندى القلعة في صور تبدو فيها قريبة من تلطيخ هذه الصورة المصاحبة للخبر، وكأنها مسخ من كثرة وكثافة المساحيق والتشويه لدرجة أن من يشاهدها يشعر بالتقزز والقرف. ناهيك عن (برط) كثير من النساء للوجه واليدين بالمواد الكيمائية الحارقة فيصبح جلد الواحدة منهن مثل قوس قزح، الشفتان سوداوان وبقية الوجه فاتح، ظهر الذراع اسود وأسفل الذراع فاتح. مثل البلياتشو أو المهرج.

من المؤسف أن معظم النجمات العربيات يسئن استخدام مساحيق التجميل بهذه الطريقة المضحكة، مقارنة بمعظم المشاهير من الممثلات والمغنيات الغربيات.

ولا أعرف ما السر في ذلك.


#972112 [بت قضيم]
4.00/5 (1 صوت)

04-13-2014 08:46 PM
الاستاذ محمد ميرغني كنت اتمني وانا اقراء هذا اللقاء ان تكون لك شفافية في نقدك لجيل الفنانين الشباب ولكن للاسف لم تنصفهم اما عن مرحلتكم الفنية ونحن من معاصريها فقد بدات تتلاشى لعدة عوامل منها الثقافة المعاصرة ارجو ان لا نظلم عطاء شباب هذه المرحلة فان لهم قاعدة عريضة يتقبلون كلماتهم ولحنهم وادائهم وينسجمون معه اما مرحلتكم فصارت مؤرشفة في ذاكرة من عاصروكم ومنهم نحن حتى في مصر ام كلثوم من الجيل المعاصر لدية الوقت لاستماع اغنية لام كثوم لمدة ساعة وكذلك العندليب الاسمر عبد الحليم حافظ ومحمد عبد الوهاب وفريد الاطرش والقائمة طويلة سوى كانت داخل السودان او الوطن العربي هذه المرحلة بدات في الاضمحلال والتلاشي وصارت من الذكريات من من الجيل الحالي يستمع ويستمتع بحقيبة الفن او برنامج ربوع السودان دعوا الشباب ياخذون فرصتهم في التطوير حسب ثقافتهم ولك الود


#971982 [السفير]
0.00/5 (0 صوت)

04-13-2014 05:24 PM
كان يسألوهو عن رأيه فى حمادة بت هل هو صاحب رسالة فنية ام ماذا؟ووووراجل المرا دا حلو حلا هل عملت مردود ايجابى على شكل الضبابية التى صاحبت اغانى الزمن دا وكدا....


#971955 [عاشق الفن القديم]
0.00/5 (0 صوت)

04-13-2014 04:54 PM
والله احابتك حلوة وانت فعلاً ود امدرمان زولاً دغري وامين مع نفسك وفنك ولو اي ذول بيجاوب كدي والله كنا بقينا ناس لكن الناس بقت عايزه النفاق الاجتماعي وكسير الثلج لمصالح خاصة وفعلاً انت استاذ ومعلم ولازم الزول يقول الحقيقه وللاعور انت اعور واليوم كبرته ذياده في نظرنا وانت لم تشيخ ولسع شباب والله ياابوحميد


#971948 [ابو حمدي]
5.00/5 (1 صوت)

04-13-2014 04:47 PM
استاذ الاجيال العملاق هحمد ميرغني اهل العفة والعفاف ردود استاذ ومربي لاشك في ذلك


#971763 [nasrmo]
5.00/5 (1 صوت)

04-13-2014 01:25 PM
استاذي الجليل اقول لك لقد اصبت في قولك وكل من ينتقد رايك هذا عليه ان ينظر الى نفسه في المراه ويحدث نفسه بصدق وبكل تفاني سيغير رايه اكيد الله يحفظكم يارب ويبقيكم لنالاننا في بلد حرمنا من كل شيى فقط بقينا نحيا ايامنا هذه لنسمعكم ارجوكم اتحفونا بجديدكم واطربونا بقديمكم حتى يتعلم من صدق نفسه بانه فنان ان يرتقي ويقدم مستوى يليق بهذا الشعب الذي سكت 25 سنه وخلت الساحة لندى وامثالها ينعقون


#971697 [رانيا]
5.00/5 (1 صوت)

04-13-2014 12:37 PM
ندى القلعة دي لو ما غزيتوها في كل موضوع ما بترتاحوا .. ندى فنانة موهوبة وصوتها رائع وشكلها جميل وعندها جاذبية وبطلوا الغيرة والحقد ده على الناس ! في السودان الناس تعشق وتمجد القبح فقط .كونوا حقانيين عشان ربنا يفتحها عليكم ويفك كربتكم بدل الشتم في عباد الله .


#971608 [السفير]
5.00/5 (2 صوت)

04-13-2014 11:19 AM
استاذ محمد ميرغنى لك التحية...طبعا دى ردود ناس امدرمان ما فيها اى لف ودوران...كلامك حقيقى لكن سميرة دنيا صوتها عذاب وبالغت فى حقها ونحن بنحبها شديد اما ندى تعبانة خالص وكيسها فاضى .


#971560 [ود النييييييييل]
4.00/5 (1 صوت)

04-13-2014 10:55 AM
كلاموو صاح في ظل الحركات..الاسلامية والأخوان المسلمون ضاعت العقائد والقيم ..يرفعون شعار تطبيق الشريعة..ولكن مايحدث في الدول الكافرة لايحدث..


#971544 [فيصل أحمد عمر أحمد الرياض]
4.50/5 (2 صوت)

04-13-2014 10:39 AM
لافض فوهك يااستاذ محمد ميرغنى ومتعك الله بالصحه والعافيه


#971526 [الجمبلق]
4.75/5 (3 صوت)

04-13-2014 10:24 AM
من ارقى الفنانين ومن اعذب الاصوات الاستاذ العملاق محمد ميرغنى ابنعوف هذا الرجل عندما كنا طلبة فى جامعة الخرطوم كنا نقيم حفلات كثيرة فى اللكلية بفنانين كبار. زمان الهتش الهسى دا موجود دا مافى كانوا كلهم قامات سامقة . الفنان الوحيد الذى تجد كل الطلبة جالسون ويستمعون فقط فى حفلته دون اى رقيص ولا هجيج كان الاستاذ محمد ميرغى كنا لمن نجيبه يغنى اى واحد ياخذ كورنا وفى كرسى ويستمع للفن الاصيل وسيظل الاستاذ محمد ميرغن قامة لاتدانيها اصوات هؤلاء المخابيل فنانى الزمن الاغبر تلقى الواحد عامل فيها فنان مفلفل شعره ولابس كيف ما تعرف وسلسل ما تعرفه دا راجل ولا بنت ولا مهرج رحم الله الفنانين الاصلين تلقى البدلة الما خمج ربنا يقويكم ويخليكم لينا يا استاذ محمد ميرغى وصدقونى هذا الجيل اذا انتهى الناس احسن تشوف ليها مديح.


#971524 [أب قرن]
5.00/5 (1 صوت)

04-13-2014 10:22 AM
ما كان ينبغي أن يتكلم عن فنانين مثله بتلك السخرية وندوية برضو حبيبتنا كان بقت مجلبطة بالكريمات ولا مدخنة !!!!!


#971502 [Abu Areej]
5.00/5 (2 صوت)

04-13-2014 10:08 AM
اعتقد كان موفقاً جداً في الاجابة على الاسئلة رغم قساوة الردود ولكن هي الحقيقة المرة


#971491 [اللحوي]
0.00/5 (0 صوت)

04-13-2014 10:00 AM
ناس "الهميم" ما بيحبوا زي الكلام ده .... !!!!


#971467 [أب وجنات]
5.00/5 (1 صوت)

04-13-2014 09:46 AM
لو سمحتو قولوا الأستاذة الفنانة العملاقة ندى القلعة ومحمد ميرغني دة حاقد ليس إلا شوفوا حفلاتها العامة والخاصة والله زي هلال مريخ شيء كبار وشباب وشابات وشفع وكهول ... ندى القلعة وبس


ردود على أب وجنات
European Union [sudani] 04-14-2014 12:45 AM
كلامك صح لانو الذوق انحط والناس عايزة ترقص بس ناس ندي وشاكلتها ديل تجار الفن داخل وخارج السودان ناس الشريف بريد فني مش كده نوعية ماتت فيهم اخلاق السودانية وكرامتهم

United States [وليد توفيق] 04-13-2014 12:41 PM
ما قال ليك الاستاذ جمهورها من الجهلة وناس القرقوش العايزين يظهروا


#971453 [يحيي العدل]
0.00/5 (0 صوت)

04-13-2014 09:38 AM
يا أستاذ محمد ميرغني ما رأيك في صبغة الشعر ؟؟؟


#971441 [طارق الباز]
1.00/5 (1 صوت)

04-13-2014 09:27 AM
مشكلتنا عندنا اعلام احوص


#971428 [جركان فاضى]
0.00/5 (0 صوت)

04-13-2014 09:17 AM
لالالالالالالالا يا استاذنا الكبير محمد ميرغنى.....الا ندى القلعة....الا ندوية....ندوية دى رهيبة رهيبة رهيبة...وصدمنى تعليقك على سميرة دنيا....سميرة دنيا دى الهواء البتنفسو...لك اطيب التحية والاحترام وادام عليك نعمة الصحة....بس ندوية وسميرة خط احمر...اما جلبطة النسوان فهى واضحة وضوح الشمس...واااااااااااضحة شديد...الوش اصبح زى الفشفاش


ردود على جركان فاضى
European Union [sudani] 04-14-2014 12:39 AM
لو قلت سميرة دنيا فنانة ذات صوت جميل اهلا بس بلا انتاج وليها عشرات السنين وحتي انتاجة الضنين م بالجودة بالتستحق. اما ندويتك دي ماقاله الاستاذ فيها عين الحقيقة والواقع بتاع البلد البقي فيها الفن مهزلة وتجارة واشياء اخري لاداعي لذكرها حليل الطرب .اخر العنقود في الفن النسائي البلابل وبعض المطربات في بداية الجدد في اول السلم لان مستواهم افضل بعدين الفنان او البني ادم سيرة واخلاق قبل ان يكون فنان وكفى،،،*

European Union [Carbeeno] 04-13-2014 11:30 AM
أحي الأستاذ الراقي معلم الأجيال أستاذنا الجليل محمد ميرغني - أخي جركان أنت يظهر إنك تحب الأستاذ محمد ميرغني إنت إنسان وطني وراقي مثله ما مشكله واصل في إعجابك بندي القلعه بس طبعا هي المتغير والأستاذ محمد هو الثابت ....

United States [السفير] 04-13-2014 11:23 AM
يا جركان فاضى ضحكنى تعليقك دمك خفيف...سميرة دنياok لكن ندوية بصراحة كيسها فاضى وتاماها موية.


#971416 [shersh]
5.00/5 (1 صوت)

04-13-2014 09:02 AM
احسن ياهو الفضل يعملو اتحاد ويكون ريسو حمادة نت وفرفور وقرقور وبتن القلعة .................


#971399 [التويت]
5.00/5 (1 صوت)

04-13-2014 08:54 AM
نعم الفنان رسالة .. ومعظم الفنانين الذين ذكرهم الاستاذ / محمد ميرغني
ماعندهم رسالة واضحة .. بل عندهم جمهور يليق بهم وعلى شاكلتهم..
وانا ارجو من هولاء الفناين ان يقدموا ما يقنع الجمهور
لانهم سيحملون الراية بعد هذا الجيل الفذ ..


#971340 [أبوقرجة]
3.00/5 (3 صوت)

04-13-2014 08:14 AM
يسلم لسانك يا أستاذ محمد .. ودا بحصل لاننا عاشين في زمن الانحطاط ... الخلقوا ناس الجبهة الإسلامية ... بقى الانحطاط في كل شيء ... أكيد الغناء بيتأثر بذلك


#971168 [قطع]
5.00/5 (2 صوت)

04-12-2014 11:57 PM
يا جماعه والله الزول ده كلاموا صاااااح ما فيو كلام
هسه عليك الله عاين صورة ندي القلعه دي والله بس تقول طاؤوس
مليانه الوان زي الوان الطيف ده شنو الخمج ده


#971143 [khalid a. m.]
5.00/5 (3 صوت)

04-12-2014 11:16 PM
والله العظيم كلامك صاح عن ندي القلعة ..


ردود على khalid a. m.
European Union [اشرف عثمان] 04-13-2014 11:17 AM
الخطا فى كلام محمد ميرغنى ليس نقد فن ندى القلعة وسميرة بل نقدهن شخصيا والاساءة للجمهور
فنان محترم يعرف رسالته لا يمكن ان ينزلق هكذا فالفن وعى ولكى يودى الفنان رسالته لرقى المجتمع لابد ان يرتقى هو



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية
تقييم
5.00/10 (1 صوت)






الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة