الأخبار
أخبار السودان
كلام خارم بارم
كلام خارم بارم


04-14-2014 12:10 AM
الهادي هباني

اتصل بي أحد أصدقائي الأعزاء ساخرا و قال لي ((الجماعة صادروا أعداد جريدة الميدان و منعوها من النشر و لا زالت الأعداد المصادرة بحوزتهم و أعلنوا بدون خجل أو حياء (أنو ده ما حصل). و مليشياتهم هاجمت الطلاب الاتحاديين بجامعة النيلين بالعصي و السيخ و السواطير و أشبعوهم ضربا و أذيً و قالوا (ديل ما نحنا ،،، ديل مجموعة مجهولة الهوية)). و في الشمالية قتلوا المواطن عبيد إدريس بالرصاص الحي وأصابوا آخرين و قالوا التقرير الطبي أثبت أن أسباب الوفاة أزمة قلبية نتيجة اختناق ناجم عن الغاز المسيل للدموع الذي استخدمته الشرطة في فض الاشتباك و أن ذوي القتيل تفهموا القضية وتسلموا الجثمان وقاموا بدفنه ،،، (إلي آخر الخبر المحزن)). و قال (و هو يقرأ هذه الأخبار المثيرة للسخرية) بأنها قد ذكرته بقصية أدروب الذي يعمل غفيرا لأحد مخازن الدقيق في ميناء بورتسودان و هو قاعد يشرب في القهوة و يستمع إلي الراديو (و المخزن مليان بالدقيق) و قد كان يستمع لجماعتنا في الراديو يحمدون الله و ملائكته التي حملت لهم ليلا كميات كبيرة من الدقيق في ساحات الجهاد و الفداء في النيل الأزرق من حيث لا يعلمون مما ساعدهم علي سد جوعتهم بالعصيدة و اللقيمات مما كان خيرا لهم و ساعدهم علي تكبيد العدو بهزيمة نكراء في أحد المعارك المشهودة قرب الدمازين ،،، فقام أدروب علي حِس الخبر بليلو داك باع الدقيق الموجود في المخازن كله و نام في عنقريبو قرير العين ،،، الجماعة جو اليوم التاني و لقوا أدروب بشرب في قهوة الصباح و المخزن خاوي علي عروشه ما فيهو ريحة دقيق واحدة سألوه (و ينو الدقيق) فأجابهم بكل هدوء و سخرية يحسد عليها (ملائكة نص الليل تجيب قندرانات تشيل تودي دمازين علي طول). لم أتمالك نفسي من الضحك و أجبته ،،، أزيدك من الشعر بيت ،،،

فقد جاء في الراكوبة اليوم نقلا عن سونا خبر عن انطلاق (المشروع السودانى للكربون) حيث أعلن دكتور عبد العظيم ميرغنى المدير العام للهيئة القومية للغابات عن انطلاق المشروع السودانى للكربون فور هيكلته من الناحية الادارية خلال شهر ابريل الجارى مشيرا فى تصريح (لسونا) الى الاتفاقية التى وقعتها الهيئة مع وزارة المالية والاقتصاد الوطنى مؤخرا لتمويل المشروع مضيفا أن المشروع يموله المرفق العالمى للبيئة بمبلغ أربعة ملايين دولار بالإضافة لتمويل منظمة الايفاد الذى يعادل مبلغ عشرة ملايين دولار. وقال أن المشروع يعد الأول من نوعه فى السودان مشيرا الى أنه يهدف الى تخفيف الآثار البيئية السالبة عامة والقطاع النباتى والغابى على وجه الخصوص مضيفا أن المشروع يساهم فى تهيئة البيئة المناسبة لعمليات الاستزراع الغابى بامتصاصه للغازات السامة المنبعثة من البيئة والتى من شأنها أن تؤثر على هذا القطاع. ونوه سيادته الى أن العون الأجنبى فى مجال الغابات كان قد انقطع لفترة من الزمن وعاود منذ العام 2009م مضيفا أن هذا المشروع يعتبر المشروع الثالث الذى يتم تنفيذه بواسطة المساعدات الخارجية .انتهي التصريح ،،،

علق أحد قراء الراكوبة الرائعين تحت الاسم المستعار (كوز موية فاضي) علي الخبر بسخرية و تهكم لذيذ مفاده (بعد خراب سوبا جاى تقول كربون ما ادراك ما كربون. هى الغابات الجيش خلى فيها حاجة. بس فقط اعمل ليك مأمورية وتعال جنوب كردفان ابدا من الابيض لحدى كادقلى ابتداءً من الدلنج تلقى جنبات شارع الظلط كلها شوالات فحم سايمنها ناس الجيش يعنى خلااااااص الغابات انتهت لو ما لحقتو سويتو ليكم قانون يحميها العساكر خوفو ناس الغابات عديل و شغالين قطع يومى و فى كل ساعة. الغريبة العساكر الشغالين فى الفحم ديل الضباط الكبار مفرغنهم عديل عشان يشتغلو لصالح الضباط .شوال الفحم التكلفة بتاعتو كلها عشرين جنيه يبيعو فى الخرطوم بمية و خمسين شوف الربح دا كيف و بعدين مافى حاجة اسمها رسوم لا لا يا حبيبى منو البقدر يوقفم فى نقاط التفتيش عشان يسالم من الرسوم). انتهي التعليق اللذيذ ،،،

و كما قدم صديقنا (كوز موية فاضي) الدعوة لسعادة الدكتور لجولة في شمال و جنوب كردفان أدعوه أيضا لزيارة للنيل الأزرق عشان يتفرج علي القرود في الدندر قاعدة قدام القطاطي و خالفة رجلينا ما لاقية ليها شجرة تطلع فيها ،،، قال كربون قال ،،،

خبر آخر مثير للدهشة ورد في الراكوبة اليوم مفاده تصريح السيدة الكريمة وزيرة التنمية الاجتماعية بالخرطوم دكتورة أمل البيلي أن (الفقر وراء الظواهر السالبة بالمجتمع) تذكرت قصتين ،،،

الأولي قصة سرير بروكرست بطل الأسطورة اليونانية المعروفة تاريخيا بأسطورة (سرير بروكرست) الذي كان يسير بحسب الأسطورة متجولا حاملا علي ظهره سريراً يجبر كل من يقع في مصيدته (بعد ضربه و تعذيبه و تجريده من كل مقتنياته) الاستلقاء عليه فإذا كانت الضحية أطول من السرير بتر رجليها و إذا كانت أقصر منه شدها و مطها حتى تتساوي مع طول السرير). إنها نفس قصة المشروع الحضاري (يرحمه الله) بعد ما قضوا فيه علي الأبيض و اليابس في بلادنا مطوه و قصقصوه و لحدي اليوم ما قادرين يجيبوا المقاس.

الثانية قصة واحد لم ليهو في واحد مسكين ضربوا و شال قروشه و قطَّع ليهو أصابعه كلها و خلي ليهو أصبع واحد بس. لاقاه بعد فترة حالته شلش معلم الله و رسوله لابس ليهو عراقي و سروال و شايل ليهو حقة تمباك في جيبه الشمال قال ليه (أمورك كيف؟) رد عليه (زي ما انت شايف) قال ليهو (يا زول أحمد الله ال خلي ليك أصبع تنخس بيهو أضانك و حقة تمباك تتقل بيها جيبك) ،،،

جاءني في زيارة عائلية ظريفة جدا قادما من السودان ابن أخي و صديقي اللذيذ إبراهيم الشهير ب (جِدو) و أهداني قارورتين من العطر الجميل لي و لزوجتي و قد كان معي (أيضا في زيارة عائلية) ابن أختي الظريف الصادق و هو صديق لإبراهيم أيضا (و قد جاء أيضا لملاقاته بعد غيبة طويلة). شكرت جدوا علي العطر و سألته ماذا أحضرت لصديقك و ابن عمتك الصادق فأجابني بسخريته و بديهيته المعهودة (لا ما تشيل هم جبت ليهو حاجة بتشبهه (أربعين كيس تمباك). لم أتمالك نفسي مرة أخري من الضحك ،،،
لكنني ضحكت كثيرا و اكتشفت غلاوة الصادق علي صديقه و ابن خاله العزيز جدو بعد اكتشافي لأنه (أي التمباك) هدية أغلي من العطر عندما قرأت خبر الراكوبة اليوم عن حرائق التمباك في دارفور و قلق التجار و هواجسهم و مخاوفهم الشديدة بتراجع تجارتهم وانهيارها في أي لحظة و تسبب تلك الحرائق في زيادة أسعار (التمباك) و إبداء مجموعة كبيرة من متعاطين التمباك عن قلقهم المستمر من الزيادات الأخيرة بينما أكدوا صعوبة الإقلاع عن تناول التمباك إذا ما اضطرتهم الظروف لذلك.

و يبدو أنهم في حاجة ماسة لزيارة المشير لهم لحثهم علي الإقلاع عن التمباك بعد نجاح زيارته الأخيرة لشرق السودان قبل أكثر من شهر تقريبا لمشاطرة أهالي الشرق في تدشين مشروع إقلاعهم عن التمباك و البن في لقاء صاخب مليء بالتهليل و التكبير في مشهد أشبه بحلقات الظار. دستووووووووور

دقولك يا بشير
حق قولك يا بشير

أحمد البشير الهدندوي
توبه توب حرير الهدندوي

[email protected]






تعليقات 19 | إهداء 0 | زيارات 11151

التعليقات
#973930 [خويلد سليمان]
1.00/5 (1 صوت)

04-15-2014 12:06 PM
كنت منتظر موضوع الصورة في السرد الجميل قلت في نفسي الجنس اللطيف بقي كييف من ودعماري وود الريح وسلطان الكيف ولا شنو ... لكن الظاهر دايرين الفكه عشان المواصلات لو لقت واحدة زميلته في البص معلمه الله الا حق البص القي يدها موضه حديدة من المسلسلات المصريه كل واحد يدفع حقوا حليل زمن علي الحرم ما تدفع ... دمت بخير


#973925 [الكان زمان]
1.00/5 (1 صوت)

04-15-2014 12:03 PM
بالمناسبه ناس الحكومه كلهم بسفو...........و بسفو تمباك


#973791 [محمدين]
1.00/5 (1 صوت)

04-15-2014 10:00 AM
غريبة لكن!!! مافي ولا واحد علق على البنتين الوافقات صف من أجل الحصول على الكيف وكدا!


#973296 [nagatabuzaid]
1.00/5 (1 صوت)

04-14-2014 10:23 PM
رد على جنرال زمان
السيدة الاولى نمرة واحد سميت ام الفقراء وليس ام المؤمنات


#973262 [نكس]
5.00/5 (1 صوت)

04-14-2014 09:31 PM
استغفر الله اولا - يحكي احد مصاطيل الفريق نكتة مفادها انو ابليس رسل اولادو لبني كوز توسوس قال ليم وسوسو للريس دا ما يدي البترول للامركان يدي الصينيين اهو مننا وفينا قوم ياجوج - رجعو قالو ليهو ما لحقناه لقينا باعو وقسمو القروش -طيب وسوسو للريس خلي يجوع المسلميين ديل شوية -رجعو قالو ليهو ما لحقنا لقينا كتلم -طيب وسوسو ليهو يخلي الشباب مدمنيين - رجعو قالو ليهو ما لحقنا لقيناه زوجهم الحور العين ووزع ليهم جنات في الكامليين -عمك ابليس زهج وطلع للسماء ودق الباب ------ شنو يااخوانا -انتو رسلتو ابليس تاني الارض ولا شنو


#973010 [AburishA]
5.00/5 (3 صوت)

04-14-2014 04:05 PM
لك التحية اخ هباني...

** خارم بارم مفيد جدا...حرّم بينا لدلالات عميقة... خذوا الحكمة من الكلام (البارم خارم)..

** غايتو ما عارف.. لكن التمباك لو عدم...صدقوني سفافين التمباك ما تقولوا لي تحالف قوى المعارضة ولا الجبهة الثورية.. ديل بغتسوا ليك حجر النظام في يوم ونص !!! رغم اني ما بسف لكن تضامنا معهم بخت لي سفة بمنديل...
ديل شعارهم.. السفة او الشهادة.. وما عندهم لعب..
لك المودة..


ردود على AburishA
European Union [AburishA] 04-15-2014 03:41 PM
هع هع هااااع يا بت ابزيد...دي رهيبة جدا..الشعب يريد اسقاط النظام بسلاح ود عمارى التمام!!

** يا نجاة لو سمعوكي ناس النظام بكرة البلددي كاها يملوها كونتينرات تمباك ومجانا...
** الشئ لابشيلوهم من الكرسى ما دايرنوا....
** وبيني وبينك هم زاتهم بسفوا.. وبموتوا في (السف)! ديل سفوا البلد..لك خالص الاحترام..

[nagatabuzaid] 04-14-2014 09:43 PM
طيب لما عارفين سلاح التمباك الفتاك ودوره الناجع فى اسقاط الحكومة القاعدين ليها شنوا

يلللللا هوب تحت شعار الشعب يريد اسقاط النظام بسلاح ود عمارى التمام


#972799 [المشتهى السخينه]
0.00/5 (0 صوت)

04-14-2014 12:19 PM
فى هذا المقال خفيف الظل اريد ان اشرك معى القراء والمعلقين لنختار اعظم ثلاثة شخصيات فى تاريخ السودان الحديث ..من وجهة نظرى .. الامام المهدى ..اسماعيل الازهرى .. محمد وردى ..اما اسوا مائة شخصية من وجهة نظرى وليكملها معى المعلقين من وجهة نظرهم بالطبع .. الاسوأ عمر البشير الاسوأ على عثمان .. ابراهيم شمس الدين ..جعفر نميرى .ابوالقاسم احمد ابراهيم .اسماعيل الحاج موسى ..سبدرات .. على شمو .. تيتاوى .حسن الترابى .احمد هارون . القاضى المهلاوى ..المكاشفى طه الكباشى .المشير سوار الدهب ..نافع على نافع ++اسحاق احمد فضل الله ..على كرتى ..صلاح قوش .. الفريق عطا المولى .. حسين خوجلى ..التجانى السي سى ..دانيال كودى ..تابيتا بطرس ..الحاج ساطور ..موسى هلال .. حميدتى ..عبدالرحيم ..والى الجزيرة الحالى نسيت اسمه ..عصام احمد الشير .. صابر محمد الحسن . عوض الجاز ..عبدالرحيم حمدى ..احمد ابراهيم الطاهر ..واصلوا معى ...


ردود على المشتهى السخينه
United States [زهجان من الضبان] 04-15-2014 08:25 AM
اعظم شخصية انجبها السودان على مر العصور هو العملاق محمد وردي
اما المهدي فقد بدأ دعوته بكذبة
و الازهري ما انتظر الحلة لحدي ما تنجض خطفها نية

[nagatabuzaid] 04-14-2014 09:47 PM
الثور الاسود وشيخة الظار

European Union [ابومصطفي] 04-14-2014 07:19 PM
الطيب مصطفي -- فاطمه شاش -- يوسف كبر-- وداد بابكر-- جعفرالصافي-- علي كوشيب98

United States [باسطة] 04-14-2014 06:44 PM
المشتهي السخينة حرام عليك ياخي ، إنت نسيتني و لا شنو في القائمة الثانية ؟؟
طبعاً أنا بعتبر نفسي أول الدفعة و ذلك للأسباب التالية .

1 - لم أستطيع أن أمنع إنقلاب 1989
2 - لم أستطيع أن أحافظ على الديمقراطية للمرة الستين
3- لم أمنعهم من تقسيم السودان
4- لم أمنع تدمير مشروع الجزيزة
5- لم أكن أعلم أن خط هيثرو ضاع
6- لم أمنع بيع و تخصيص كثير من مصالح الدولة و مؤسساتهاالخدمية
7- لم أمنع قتل الأطفال و النساء و حرق القرى و تهجير المدنيين في دارفور و كردفان و النيل الأزرق
8- الشرفاء و المناضلين الأبرياء لم أحول دونهم و السجون و المعتقلات و بيوت الأشباح و الكلاب
9- لم أمنع إحتلال الفشقة و شلاتين و حلايب
10- قمت بإهداء شابه ظريفة كيس تمباك

عازه قومي كفاك عازه غطي قفاك

European Union [أبو احمد] 04-14-2014 01:18 PM
حرام عليك من معلوماتى والشفته فى بلدنا هؤلاء يعدموا فورا
ود الميرغنى
ود المهدى
و الترابي
مصطفى عثمان اسماعيل خالد المبارك
و البابين


#972513 [بريش منصور]
5.00/5 (2 صوت)

04-14-2014 08:41 AM
(ملائكة نص الليل تجيب قندرانات تشيل تودي دمازين علي طول). هذه هى العقلية التى تحكمنا اليوم، وما هنت يا سوداننا يوماً علينا، كيف وأنهم يحسنون ويوطدون علاقاتهم مع إيران على حساب السعودية ودول الخليج ، ومادروا أن مواطنيهم المغتربين بدول الخليج وبالسعودية لا تخطؤهم العين بينما لا يوجد من السودانيين بإيران إلا اليسير، وعلاقاتنا بالسعودية ودول الخليج يربطها الكثير الكثير غير اللغة والنهج السنى والتاريخ الممتد ولكن الشكوى لله فلا حياة لمن تنادى ، وكذلك يوطدون علاقاتهم بأفريقياالوسطى وتشاد وهما دولتان أكثر فقراً منا بينما يعكرون صفو العلاقات مع الجارة مصر ويسبون دولة عظمى كأمريكا، لا أدرى بأى عقلية تدار البلاد ، وماهى المصلحة من هذه المعادلات الخرقاء فى السياسة الخارجية، والمعلوم فى السياسة أنها لعبة المصالح فبالله أى مصلحة للشعب السودانى فى معاداة أمريكا والغرب والمنظمات الدولية!!!!!وأى مصلحة فى تعكير العلاقة مع السعودية ودول الخليج والجارة مصر!!!!بل وأى مصلحة فى تبنى القضية الفلسطينية نيابة عن أهلها الذين يفاوضون الكيان الإسرائيلى ليل نهار ونيابة عن الدول العربية وجامعة الدول العربية التى تهادن وتتنازل وتتفاوض، وأقولها صراحة ما مصلحة الشعب السودانى فى معاداة إسرائيل وإرسال السلاح الى غزة!!!


ردود على بريش منصور
[نادر التاج أبو حموش] 04-14-2014 12:01 PM
كلام منطقي وجميل،،،لكن من يفهم؟؟؟؟ فأنت لو خاطبت الدواب لفهمت أو الحيطان لأستوعبت ما تقول أخي بريش منصور،،،تحياتي،،


#972459 [nasrmo]
5.00/5 (1 صوت)

04-14-2014 07:58 AM
الحل الوحيد كل واحد يبقى عشرة على بيته ومزرعته اصلا شكلها حنقسمها بيت بيت ومزرعة مزرعة
لاننا لم نحترم هذا الوطن والاخوة الكيزان تجار الدين سيسخطنا الله بافعالهم لاننا في القرن العشرين وماذال حثالة الامةيشترون باسم الله ثمن والله نهانا عن ذالك في كتابه الكريم

قولو حسنا الله ونعم الوكيل --حسبنا الله ونعم الوكيل ---حسبنا الله ونعمالوكيل


#972433 [Abdo]
5.00/5 (5 صوت)

04-14-2014 07:38 AM
كثيرا ما طلبنا الإكتفاء من سرد وقائع لإثبات حالة أصبحت في حكم المعلوم بالضرورة و هي الحكايات و المواقف و كل الصور التي تفضح حال ناس لا تهمهم الفضائح و وجوههم أصبحت من غير مزعة لحم من كثرة تسول ما في أيد خلق الله الجوه و البره و كتبوا بإذن الله عنده من الكذابين من كثرة الكذب و تحريه .
طلبنا الإكتفاء و في حالة عدم الإكتفاء يجب ردف كل مقال بوضع إقتراح عملي للحل لا ن نتيجة كثرة هذا السرد إماتت قلوب المتلقي كما مات قبله قلب المحكي عنه .
و انا من هنا بدعو لإستعمال سلاح ماض بإذن الله و هو أضعف الإيمان و لكنه من أقوى الأسلحة ، فكلنا يعلم بأن دعوة المظلوم ليس بينها و بين الله حجاب ،لذلك فإن سلاحي الآني الذي أدعو لإستعماله هو سلاح الدعاء ، لذلك أطلب من محرري الراكوبة وضع دعاء ثابت موازي لشعار الراكوبة يدعو على الظلمة و من شايعهم و كل مرتكبي الموبقات في حق السودان و اهله من الضعفاء كما يدعو لتعجيل الفرج عليهم ، هذا الدعاء سيدعو به كل من إطلع عليه ، كما سيذكر من قرأه بالدعاء دبر كل صلاة على هؤلاء الظلمة الفجرة الكذابين أكلي و سارقي حقوق الشعب المعنوية منها و المادية ، الذين إعتادو الكذب في كل شئ ، اللهم عليك بهم و عجل بالنصر و بالفرج و أكشف الغمة عن اهلنا و بلدنا ، أجعلوا لكم شعار عبارة عن دعاء سيدخل في قلوبهم الرعب و يهيئ لكم مخرجا و يجمع كلمتكم ضدهم بإذن الله .


ردود على Abdo
[أبو الكلس] 04-15-2014 06:41 AM
يا عبدو أويد اقتراحك وأضيف عليه الإكثار من الدعاء عليهم ليلة الجمعة وخاصة عند الثلث الأخير ( يعني قبل أذان الفجر بنحو ساعتين ) .

يا ناس الراكوبة رجاء استجيبو لهذا الإقتراح

[نادر التاج أبو حموش] 04-14-2014 11:55 AM
والله إقتراح أكتر من رائع،،،بارك الله فيك أخي عبدو،،فلازم يا إدارة الراكوبة تنظروا للمقترح دا بعين الإعتبار ،،،نسأل الله التوفيق لنا وأن يجعل كيد كل ظالم في نحره إنه سميع قريب مجيب،،،،،


#972378 [الجقرم]
5.00/5 (1 صوت)

04-14-2014 07:03 AM
خبر آخر مثير للدهشة ورد في الراكوبة اليوم مفاده تصريح السيدة الكريمة وزيرة التنمية الاجتماعية بالخرطوم دكتورة أمل البيلي أن (الفقر وراء الظواهر السالبة بالمجتمع)

ابيدوهم احرقوهم بيعوهم اى حاجة
انتو بتغلبكم حاجة انتو بتخافو من الله
عاااادى شوفو طريقة ارجعوا لامراء المؤامرات والدسائس ( على عثمان, نافع , الجاز , اسامه و و و )
ابيدوهم يخلو لكم وجه السودان

اللهم انت اعلم بحالنا
اللهم انهم لا يعجزونك
يا قوى يا متين


#972360 [الفريد]
0.00/5 (0 صوت)

04-14-2014 06:47 AM
ماذا يفعلن هؤلاء النسوة الشابات أمام محل التمباك؟ هل السفة إنتقلت عدواها للبنات بعدما كانت حصراً على الأولاد؟ أم هذا سودان الإنقاذ ياهادي.


ردود على الفريد
European Union [عبدو] 04-14-2014 06:47 PM
شمشرة بالصباح وكتمات بالليل
دي يحلوها كيف غير التمباك

European Union [سوداني متابع] 04-14-2014 05:29 PM
يمكن لي أبوها , أو حاجة شاي دايرة فكة , بقيتو انتو زاتكم زي الكيزان

[Quickly] 04-14-2014 01:30 PM
الحبوبات بسفن التمباك انت نسيت ولا شنو؟!

United States [حيرتونا] 04-14-2014 09:20 AM
لا لا يالفريد نفترض حسن النية ... شكلهم بيسألو ليهم من مكان وعايزين بتاع الدكان يوصفوا ليهم


#972332 [كجرو]
5.00/5 (1 صوت)

04-14-2014 06:12 AM
أها نسأل الوزيرة دور الاغنياء شنو ( سبحان الله يخربوها ويرموها في غيرهم )


#972302 [البجاوي]
0.00/5 (0 صوت)

04-14-2014 05:20 AM
؟


#972289 [هدهد]
5.00/5 (1 صوت)

04-14-2014 04:43 AM
أدروب حارس المستودع هذا هو الشخص الوحيد المؤهل لمقارعة هؤلاء الأفاكين أى بمعنى الكذاب يجب أن تقابله بكذبه اكبر من كذبته حتى يصاب بصدمة . المصيبة الكيزان بعد وصفهم ان القرود حاربت معهم والشجر كبر وهلل معهم وشهداءهم ماتوا يتبسمون وتخرج رائحة المسك من اجسادهم !!!!!!!! المصيبة الكبرى بعد كل هذه الاكاذيب والوهم طلعوا مهزومين .... كيف ياكوز تهزم وانت تحارب معك الملائكة والقرود والشجر !!! والله ذلك البرنامج الذى كان يسمى بساحات الفداء كان كله وهم وإفك وخداع وغش باسم الدين وكان من ورائه ذلك الشيطان المارد الذى يدعى اسحاق فضل الله .... وقد جلب ثروة طائلة من هذا الدجل والغش ومات كثير من الشباب وراء هذا الوهم والكذب واعتبروا ان الموت بينهم والجنة وطبعا الكذب دربو قصير ... سرعان ما صرح شيخهم الترابى زاعما ان كل ما حصل بالجنوب كب ونفاق سياسى ليبس الا ومن مات هنالك تعتبروا فطائــــــس !!!!!!!!!!!!!!!! سبحان الله الواحد الاحد الاخوان المسلمين طلعوا اخوان منافقيـــــن .لعنة الله عليهم .


ردود على هدهد
[nagatabuzaid] 04-14-2014 10:09 PM
هم كان نصيحين شن لم الملائكة معالقرود ؟

United States [باسطة] 04-14-2014 11:32 AM
سلام يا هدهد
المشكلة الشيخ رجع تاني من القبر


#972276 [ودالباشا]
0.00/5 (0 صوت)

04-14-2014 03:44 AM
كلامك سمح بالحيل

بس المحيرنى جد جد البنيا ت الواقفات قدام محل العمارى ديل ....! يكون مرسلينهن


ردود على ودالباشا
United States [باسطة] 04-14-2014 06:47 PM
يا ود الباشا ديل بيسألوا عن محل المكوجي الجديد بعد ما رحل من هنا و كده

European Union [جنرال زمان] 04-14-2014 12:24 PM
يا ود الباشا يا أخوي قالوا الحرايق الحصلت أثرت علي منتوج الصعوت العماري الفاخر يعني السعر حيطير السماء وأهو الشابات ديل قالن يلحقن يشترن ليهن كم شوال ويخزنوها وكدا يعني بزنس قبل ما حاجة وداد وأم المؤمنات الكوزات فاطمة يحتكرن السوق وكدا!!!! (معليش يعني سؤآل بسيط إنت ود الباشا للعماري الفاخر بتاع لو ما فاطر ما تخاطر، عنده أي صلة بيك وكدا ولا بس تشابه أسماء؟ مع تحياتي لك)


#972256 [ود جبل حلة]
5.00/5 (1 صوت)

04-14-2014 01:43 AM
شدني قول وزيرة الرعاية الاجتماعية ان الفقر وراء الظواهر السالبة بالمجتمع



خدمات المحتوى


مساحة اعلانية





الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة