الأخبار
أخبار إقليمية
هضربات قسرية - قصيدة جديدة للشاعر هاشم صديق
هضربات قسرية  - قصيدة جديدة للشاعر هاشم صديق


06-26-2014 02:56 PM


هضربات قسرية

هاشم صديق

****
تلقي (خرابة )
ما تلقي ( الوطني )
تلقي ( الوطني )
ما تلقي ( خرابة )
تتلفت حاير
تلقي ( الشعبي )
جادع إيدو
ويقلّب صُلبو
تقول لي روحك
أريت ( الشعبي )
( ده ود التابا ) .
.................
البلد إتلحست
محل ما تقبّل
تلقي ( النقة )
محل ما تعاين
تلقي حرابة
ومسطول في الشارع
يهتف ويصرخ
- فكيتو الصادق
فكو الموية .
فكيتو الصادق
إعتقلو السوق
ماعندو ( فرامل )
أو طايوق
جاري عجاجو
تقول كترابة .
أدونا رغيفة
أو تعريفة
أو خلونا
نخش الغابة
نصبح نحنا
( نوير ) أو (دينكا)
وانتو تكونو
ديوش جلاّبة
..............
فكيتو الصادق
فكو إيدينا
مما جيتو
لعبتو وجُطو
و ( بشبش ) ( جوكر)
في الكوتشينة
محل ما نقبلّ
نلقي حرامي
محل ما نعاين
نلقي إضينة
حرقتو قَمِحْنَا
شلتو سَمِحْنَا
وجبتو الشينة
إسلامكم كافر
فضايح جُملة
بتملا دفاتر
سويتو بلدنا
مجاعة ومِحنْة .
...............
البلد إتلحست
جنت وبركت
سياسة نخاسة
الثروة انبرشت
دخلت وسكنت
جيب الخاصة
والشعب تعيس
يجري يناهد
ما وصل الميس
ماهية حول
ما فاتت فول
أو ( عيش )
في كيس
أحلامنا بهية
نصحا نلاقي
عروس الثورة
هي ( بت ابليس )
...............
الدنيا إتماصت
جنت وطشت
( الفن إتلجن )
الوطن إتمحن
لا فن
لا كورة
( فنان الثورة )
صِبِح ( ماسورة )
والحرية
قصية عصية
ريحة شية
لا تضوق لا تشوفها
لا تحلف صادق
شفت خروفها
( حوار الوثبة )
شمار في مرقة
وعجين
لي ( كِسرة )
ما بعمل طَرقة .
..................
فكيتو الصادق
فكو حصارنا
أدونا إذن
لهتاف
أو مرْقة
كفاية كضب
وغباش ولعب
( الوثبة ) وهم
سيفا خشب
( حصانها حمار )
ووعدوها شمار
وغباشها الدرقة .
.................
مليون شاعر
وما مرقت زفة
مليون خُطبة
ولا خاطر رفّ
جوادنا يبرطع
وما شاف اللفة
السُلطة عقيمة
ربع القرن
وما جاتا ( الدورة )
الفين ( جيفارا )
ولا كبر شارع
لا انفجرت حارة
لا ( هبت ثورة )
...............
مليون ( لبوة )
رافعات كرعينن
للمال والسُلطة
والليل متمحن
في ( معرص )
أُسطي
دعارة شطارة
وعريانة ( الضروة )
سبحان الدايم
شعار الدولة
الدين والتقوي
و ( لباس ) الوالي
ما غطي العورة .
................
البلد اتلحست
طشت وجنت
محصولنا الرسمي
الغُنا و ( الرَهَزي )
وفي رمضان .
لو ترفع طوبة
أو تدخل فجأة
حصير راكوبة
تلقي مقنقن
( ود فنان ) .
.............
محصولنا الرسمي
غُنا رمضان
( قناة كاكومة )
( قناة كركوبة )
( قناة كتلونا )
( قناة مرضونا )
غُنا وألحان
بالكوم وأطنان
برامج تهرج
والكل تيمان .
...............
و( قناة برجوبة )
مذيعة السهرة
( حاجة عجّوبة )
وضيف الحلقة
دكتور ( راكوبة )
معاهو مُغني
( لؤي ود هوبة ) .
دراما الشاشة
مسيخة عواره
بعد ما مشينا
وقلنا وصلنا
رجعنا نترتر
وقعدنا بركنا
لا فن
لا بصاره
دراما غبية
لا بتهبش هم
لا بتروي قضية
تورجِق وتشخُر
تقول حنفية .
يا حليل المسرح
والحرية
هموم الأمة
والثورية .
..............
تلقي ( خرابة )
ما تلقي ( الوطني )
تلقي ( الوطني )
ما تلقي ( خرابة )
تتلفت حاير
تلقي ( الشعبي )
جادع ءايدو
ويقلّب صُلبو
تقول لي روحك
أريت ( الشعبي )
( ده ود التابا ) .
..................
البلد اتلحست
محل ما تقبلّ
تلقي ( النقة )
محل ما تعاين
تلقي حرابة .
ومسطول في الشارع
يهتف ويصرخ
- فكيتو الصادق
فكو الموية
فكيتو الصادق
إعتقلو السوق
ما عندو ( فرامل )
أو طايوق
جاري عجاجو
تقول كترابة .
................
أدونا رغيفة
أو تعريفة
أو خلونا
نخش الغابة
نصبح نحنا
( نوير ) أو( دينكا )
وانتو تكونو
ديوش جلابة .
______________________
24 يونيو 2014


تعليقات 21 | إهداء 5 | زيارات 9833

التعليقات
#1046741 [محمد]
0.00/5 (0 صوت)

06-28-2014 01:09 AM
محل ما نقبلّ
نلقي حرامي
محل ما نعاين
نلقي إضينة

المنتفعين من الإنقاذ هولاء هم الخطر الحقيقي علي السودان.


#1046425 [ZA HAGAN]
0.00/5 (0 صوت)

06-27-2014 04:19 PM
This is the true sitiuation we are in , you have summed it all up , bravo my my freind .


#1046173 [ابو فاطمه]
0.00/5 (0 صوت)

06-27-2014 09:20 AM
عشت ابدا نصيرا لاهلك الغبش الذين تتحدث بلسان حالهم وتعكس واقع مرير عن حال بلادنا الذى اوصلنا له الاسلاميين ومن ناصرهم ولكن دائما وابدا دوام الحال من المحال وستنقلب الدنيا عليهم ولو بعد حين.


#1046124 [مصباح]
0.00/5 (0 صوت)

06-27-2014 08:04 AM
في كلمات قليلة جداً
رجل وطني ومبدئي وشجاع وذو شاعرية فذة ويمتلك ناصية الكلمة
لك التقدير والتحية أستاذ هاشم


#1046102 [بدون لولوه]
0.00/5 (0 صوت)

06-27-2014 07:17 AM
فكيتوا الصادق
فكونا كمان


#1046009 [علا]
4.00/5 (2 صوت)

06-27-2014 12:22 AM
متعك الله بالصحه والعافية ، انبل واجمل من تبقى من مبدعين بلادنا. بك ومعك سنعيش حلم الحريه والكرامه والسلام .كل سنه وانت بالف خير وعافيه.


#1045989 [Amin]
0.00/5 (0 صوت)

06-26-2014 11:17 PM
غايته دي بسجنوك فيها

هي بلا الخرابات الجاب الخراب شنو


#1045878 [faisalmukhtar]
5.00/5 (2 صوت)

06-26-2014 06:54 PM
ياهاشم اخوي الخرابه موجوده وال موجود لكن من وين ليك بالمروه اتوفرت الخربات وال وانعدم البشد الحيل فلعنة الله علي من قتلوا حلنا ونسال الله اي واحد قتل حيلنا ربنا يقتل حيله واصلوا حيلهم هو اصلا مقتول


#1045848 [خالد حسن]
0.00/5 (0 صوت)

06-26-2014 06:07 PM
الله يديك العافيه شاعرنا العظيم ويطول في عنرك وتشوف الكيزان مكنوسين
ورحم الله حميد ومحجوب شريف ووردي ومصطفي سيد احمد


ردود على خالد حسن
European Union [الكنزي] 06-26-2014 10:17 PM
تسمح ليه يااخ خالد ان اضيف ليهم شاعر الرمزيه عمر الطيب الدوش


#1045846 [محمد]
0.00/5 (0 صوت)

06-26-2014 06:06 PM
صوره حقيقية لواقعنا المرير لنري الي اين قادت الانقاذوتجار الدين البلد والمشكلة انه ما في امل لصلاح الحال بل ان الاسوء لم ياتي بعد


ردود على محمد
United States [الدنقلاوي] 06-27-2014 08:14 AM
الأسوأ لم يأتي بعد ... وسيأتي يا أخوي محمد، إلا إذا .... لا أدري


#1045838 [خالد]
0.00/5 (0 صوت)

06-26-2014 05:57 PM
بلهف قراءتها وليتنى لم اتعلم القراءه
لكم كنت احبك يا هاشم ويا خساره
ذاك نصر اخر للكيزان ان وصلنا لهذة الدرجه من الاسلوب
عفا فما زلت انظر لهاشم صديق لذا لا استطيع ان اكمل


ردود على خالد
United States [ود الحبيب] 06-26-2014 08:19 PM
هاشم صديق شاعر كبير ولا زال كبير نعم اللالفاظ غير لائقه بقامة الاستاذ ولكن لكل مقام مقال وشرزمة المجرمين الاسلامين وهم لا يعرفون شي عن الاسلام شئ لا تنفع معهم الا هذه الالفاظ واكثر
ديل يخلو اي مبدع يطلع من شعورو ويقول اكتر من كده


#1045837 [باحث عن وطن]
0.00/5 (0 صوت)

06-26-2014 05:53 PM
حقا دا الحاصل في البلد دي الصورة الحقيقية لوضعنا الحالي


#1045816 [كسار الثلج]
0.00/5 (0 صوت)

06-26-2014 05:28 PM
يالها من شاعرية مفرطة تتدفق قافيتها في جملة لا تزيد عن ثلاثة كلمات. هذه هي عبقرية الشاعر في أبهى صورها.


#1045812 [محمد الطيب]
0.00/5 (0 صوت)

06-26-2014 05:25 PM
الاستاذالشاعر هاشم صديق شكرا لك وانت تحمل هموم الوطن والمواطن منذ الستينات وحتي اليوم ،لم تتزحزح قيد انملة عما تؤمن به ، وانت علي استعداد لتحمل تبعات كل ذلك ..ولن استاذنا الجليل الشعب السوداني تصاديةفصار لا يكترث لغير الهم الاول والاخير بالنسبة له وهو لقمة العيش.


#1045810 [مفجوع]
0.00/5 (0 صوت)

06-26-2014 05:20 PM
التجية والتجلة لشاعرنا الكبير هاشم صديق وإن شاء الله تحيي القلوب الكتلوها الكيزان ...


#1045807 [نبض التعب]
0.00/5 (0 صوت)

06-26-2014 05:19 PM
لله درك يا أستاذ هاشم .. دوماً هكذا أنت تعكس لنا أوجاعنا وآلامنا لمرآة إبداعك الصادقة والواقعية ، حتماً سيخرج علينا (الجداد) من قفصه (الأمني) ليقول لنا أن القصيدة هابطة وموغلة في الإسفاف ولا تشبه شاعرنا الفخيم ، وهم في قُرارة أنفسهم يعلمون أن هاشماً الصديق إستخدم المفردات اللائقة بهم ، فلكل مقام مقال ولكل فساد أدوات تليق بهما .. شكراً نبض الشعب وقلبه الخافق بالحرية والديمقراطية والعيش في سلام وأمان وكرامة .. و ... ماشين في السكة نمد.


#1045789 [الغلبان]
0.00/5 (0 صوت)

06-26-2014 05:07 PM
تورت نفسنا ثاني يا ود صديق ويا اكتوبر نحنا العشانا ثواني زمان اه يا بلد


#1045738 [الوتقيق]
0.00/5 (0 صوت)

06-26-2014 04:10 PM
الاستاذ هاشم صديق شاعر و هو يجسد في قصيدتو دي الحاصل علينا اثبت للناس انك مازلت مبدع وشكرا


#1045728 [لتسألن]
0.00/5 (0 صوت)

06-26-2014 04:01 PM
إبـــــــــداااااااااااااااااااااااااااااااااااااااع.


#1045718 [هجو نصر]
0.00/5 (0 صوت)

06-26-2014 03:50 PM
في حريات كان هناك من يداوم علي كتابة رباعيات ساخرة تحت اسم (ود ضحوية) ثم اختفي واسال الله الا يكون قد اصابه ما اصاب الذين (خرجوا ولم يعودوا) واحدي رياعياته المعبرة كانت :
مجنونا تسوقو كراعو قبل الراس
ما لاموه عرّش بيتو قبل الساس
لاكين الفريد في جنو يا جُلاس
الحرروا الاسواق وسجنوا الناس


#1045694 [ود الكوتش]
0.00/5 (0 صوت)

06-26-2014 03:19 PM
فكيتو الصادق
أبدعت يا أستاذ هاشم وربنا يحضرك الأحسن من ناس الدوره



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية
تقييم
6.25/10 (4 صوت)




الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة