الأخبار
أخبار إقليمية
محن سودانية مطار الخرطوم
 محن سودانية مطار الخرطوم
مطار الخرطوم قبل وصول جثمان الفنان محمود عبد العزيز


07-04-2014 08:14 AM
شوقي بدري


كتب احمد منصور مقدم البرامج في قناة الجزيرة اكثر من موضوع ، عن محن مطار الخرطوم . لقد كتبنا لاكثر من عقدين عن هذه المحن . ولقد عشت الذل والاهانة واللؤم في مطار الخرطوم . واظن ان الكثيرين قد عاشوا اضعاف ذلك.ويبدو انني دفعت بسبب بجاحتي ولماضتي في مطارات العالم خاصة اسكندنافية . قبل سنتين اخذ موظف في مطار الماني معجون الاسنات وبعض الاغراض من حقيبتي والقي بها في برميل ضخم . وقال بطريقة حاسمة اي حاجة اكثر من مئة سبتليتر هنا . فسحبت مقعدا وطلعت عليه وحاولت ادخال رأسي في فتحة البرميل العملاق . فهرع نحوي مزعورا . فقلت له انا كذالك اكثر من من مئة سنتليتر . فضحك هو وضحك الجميع . واعتذر لي بانه لم يكن لطيفا . وعزا الامر لعمله لعشرة ساعات متواصلة .

وبينما انا جالس في الكافتيريا ، اتي باحثا عني لانني قد نسيت بعد الاغراض منها ماكينة الحلاقة . وتمني لي رحلة سعيدة . وقبلها بفترة كنت مع سوداني آخر في طريقنا الي لندن واشتبك مع رجل بوليس متقدم في السن في مطار كوبنهاجن . وترك كل شئ وتفرغ لنا لفترة طويلة . والسبب انه عرف انا من مالمو ولمالمو احسن فريق كرة قدم في اسكندنافية . والرجل كان مريضا بكرة القدم . , وقام السوداني باثارته مقللا من فرق الدنمارك .والدنماركي يهاجمفريقنا . وتلك اول مرة يتوقف معنا رجال شرطةالمطار .

في الديمقراطية الاخيرة نزلنا من الطائرة في الخرطوم . وطلب منا ان نتوجه الي الجوازات لان رجال الجمارك كانوا مضربين . وبدأ الناس في الصراخ . فالبعض كان في طريقه الي مدني وبورسودان واماكن اخري . والبعض يحتج ويتشنج لان الادوية واكل الاطفال ومستلزماتهم في الشنط . ورجال الامن يتصرفون مع الناس وكانهم مجرمون . ولاني كنت احتفظ بملابس واحذية في المنزل لان وصول الشنط كان لبس تكسب او شختك بختك ، فتركت المعركة وخرجت .

وعرفت ان منظمة خيرية كانت تستلم كنتينرات ملابس مستعملة من اوربا ، كمساعدة لضحايا الجفاف . فقام بعض رجال الامن بمتابعة كونتينر بعد تخليصه . وبدلا عن المنظمة اتجه الكونتينر الي احد التجار . وظهر ان الحاوية مليئة بأحدث الملابس الاوربية . وكان استيراد الملابس والاحذية ممنوعا ، ولكن كل البوتيكات مليئة بالمستورد . واعتقل رجال الجمارك . فاضرب الباقون . وتلك احدي لعنات الديمقراطية . والناس كانت تقول ,, ديل يا يسرقوا يا يضربوا ؟.,, واضطرت الحكومة علي التراجع .

بعد ايام ذهبت الي المطار وتعرفت علي شنطتي. ولكن طلب مني ابراز التذكرة والكبون . فقلت انني لا اتذكر اذا كنت لا ازال احتفظ بهما .وانني مفروض ان اجد تفهما لانني حرمت من اغراضي بسبب غلطات الآخرين . وبكل صلف واستخفاف سمعت ,, ماعندك كبون مافي شنطة ، سامع ؟ ,, ولكن زميل المسئول كان معقولا وطلب مني ان اصف الاغراض في الشنطة . واذكر انني قلت له ,, في جزمة رمادية حتلاقيك وش ,, واطلق سراح الشنطة .

في1985 وقبل سقوط النميري ، ذهبت الي المطار في طريقي الي القاهرة لمقابلة مسئول شركة ال دي اتش ال التي كانت محظورة في السودان وبعد التشاور مع خالد حسن عباس وزير المواصلات وقتها سمح لها بمعاودة نشاطها . وكنت في طريقي للسويد بعدها . وتأخرت الطائره عدة ساعات كالعادة , وبعد الظهر ، كنا في طريقنا الي الطائرة . فانتهرني جندي جيش قائلا وانت جايي آ خر زول ليه ؟ فقلت له بما انو في زول اول حيكون في زول آخر زول . فقال زميلة والخواجية المعاك دي منو ؟ فقلت دي مرتي . فقال مرتك كيف ؟. فقلت مرتي كده وده ما بخصك . وطيارتكم دي ذاعوها تلاتة مرات كل مرة نقوم يرجعونا والمكرفون ده بشخشخ حكومتكم دي بتشيل رسوم مغادرة ما تصلحوا المكرفونات . وهنا تأتي مسئولة الطيران وتقول له . خلية يمشي انحنا متأخرين . فقال لها ده ما حيسافر . ده حيمشي الامن للتحقيق .

وحضر ظابط امن يرتدي بدلة سفاري مخططة بنتوء معين يخفي المسدس . وبدأ متاففا في كتابة بيانات . وحضر احد زملائه . فقام بكرفسة الورقة ، وقال لزميلة نمشي البيت نتغدي . ونادي علي احد العساكر طالبا اخذنا الي القاعدة الجوية . فطلبت منه ان اذهب الي الخطوط لاسترجاع كبونات التذاكر . فقال لي انت تاني ما حتسافر . فقلت له يمكن اهلي استرجعوا قيمة التذاكر تساعدهم في مصاريف المأتم . فتركني اذهب . ووجدت المسئولة علي وشك قفل المكتب . ورفضت الانتظار . فقلت لها انت دلوكت ماشة بيتكم ترتاحي انحنا مع الجماعة ديل يمكن ما نخلص . فتغير اسلوبها واعطتني الكبونات . وطلبت منها استعمال التلفون . وكنت استحضر نمرة العميد الطاهر محمد عثمان يس . فاتصلت به .وكان مندهشا لان تلفونه كان لايعمل كاغلب تلفونات امدرمان في ذلك الزمان , وتلك كانت ضربة حظ . وكنت قبلها بايام ضيف شرف في منزله في مدينة النيل في مأدبة عشاء . وفرح عندما عرف بانني في طريقي الي القاعدة ولست عند الامن .

واحضروا شاحنه مجروس تسلقناها مع شنطنا . ووجدت عقيدا اسمه ابراهيم بجسم رياضي في انتظاري طمأنني بأن سعادة العميد في طريقه الي القاعدة . وحضر الاخ الطاهر ومعه زميل الدراسة صلاح محمد عثمان يس طيب الله ثراه . وهم اخوة علي محمد عثمان يس وزير العدل في حكومة الانقاذ . واحضروا معهم اللواء قائد القاعدة الذي كان لطيفا . وطلب مني ان انسي الموضوع قائلا ,, ياخي العساكر ديل بس حسدوك علي بدلتك دي والخواجية ,,. والسؤال لماذ يتصرف في مطار عالمي جنود شبه اميين ؟؟
وبالرغم من اننا لم نأكل اي شئ منذ الصباح الباكر جدا ، ذهبنا في المغرب بعد اطلاق سراحنا لحجز مقاعد لليوم التالي . واكتشفنا اننا نحتاج لاذن خاص من الطيران المدني لان الخط حصر علي الخطوط السودانية والمصرية . وذهبنا في الصباح الباكر وقضينا اربعة ساعات في مكاتب الطيران المدني قبل الحصول علي الاذن .

تصادف في احد الايام وصول ثلاثة طائرات . وكان المطار كيوم الحشر. وشاهدت قسا بملامح جنوبية وله بسطة من الجسم وحباه الله بقامة طويلة . الا انه كان يقف والجميع يتخطونه . وهو لايريد ان يدخل المعمعة . فاخذت امتعته ووضعتها امام رجل الجمارك قائلا . بالله مشي لينا ابونا ده . فقام الظابط بتعليم الشنطة وسلة ضخمة في شكل كابدلو . وعندما وضعت عفشي طلب جوازي . وقام بدراسته ثم قال ,, كنت قايلك مسيحي لانك ساعت القسيس . بي طريقتو كان يقعد لي بكرة. فقلت له ده رجل دين يستحق الاحترام والناس مفروض تراعي انه ما حيكابس . فقال لي الناس في المطار بتكون في حالة جنون . وهذه حقيقة . بالرغم من ان الكل سيركب والكل حيطلع من المطار لكن الجنون حاصل .

لان اسكندنافية تسمح فقط للمسافر بابتياع اغراض في السوق الحر ، اشتريت اغراضا كثيرة في مطار الخرطوم . وبعد الدفع واستلام الاغراض طلبت اكياس بلاستيك . والرد كان ما عندنا . وعندما سألت اذا كنت سأحمل الاغراض في يدي ؟ كان الرد مخير . انا خلاص سجلت الوصل . فتذكرت اننا كن وكلاء المارلبورو . وكنا قد استلمنا 100 الف كيس كدعاية للمارلبورو قبلها بشهر واحد . ولان الحمارك طالبت برخصة استيراد ورسوم جمركية و ضريبة استهلاكية ... الخ فقررنا ان نترك الاكياس للاسواق الحرة . وستحصل الدعاية علي كل حال . ولكن عرفنا فيما بعد ان تلك الاكياس كانت تباع في السوق العربي . والاقاليم . وتركت الاغراض وذهبت الي الطائرة .

اقتباس من موضوع قديم

في آخر ايام نميري ذهبت الي حفل عائلي في ابو ظبي . وكان الحفل يضم كثيرا من اهل القطينة و المناسبة كانت حضور عروسة شقيق الوجيه ابراهيم كراسي والذي كان مسئولا في شركة جبكا التي يمتلكها بعض شيوخ الشارقة . وكان معي ابن اختي الدكتور المعز مالك . وكان فلفل الحفل الظابط محمد الجوكر الذي لم اقابله من قبل ، ولكني سمعت الكثير عنه . وكان اسمه يرد في كل الانقلابات .

وفجاة توقف الاخ محمد الجوكر من الرد علي الكثيرين الذين كانوا يمازحونه . وحدق في متسائلا ,, انت مش اديت الهندي كف يوم داك في المطار ؟ والقصة اننا حضرنا الي المطار منذ السابعة صباحا وكنا نقف في الحر . ولم يفتح الباب الا في الثانية ظهرا . وتدافع الناس كالعادة .وبعض السيدات يحملن رضيعا ويعلقن علي اكتافهن حقيبة ويسحبن حقيبة ضخمة ويتبعها رهط من الاطفال . فصرخت ,,يا رجال خلوا اخواتكم وبناتكم يخشوا اول وساعدوهم .,, وحاول احد الشباب ان يتجاهل كلامي ،فجذبته خارج الباب .

وقبل دخول النساء ، اندفع احد الهنود السيخ بعمامته المميزة . وبكل غطرسة اندفع الي داخل صالة الانتظار وجلس علي الكنبة الخيرصانية التي تحيط بالعامود . وعندما بدا الوزن ، تدافع الناس من جديد . فرددت طلبي الاول وتراجع الناس . ولكن الهندي اخذ شنطته وتعدي الجميع ووضع شنطته علي الميزان . ولم يحتج اي انسان .وطلبت منه ان يأخذ شنطته الي آخر الصف . السيخ عادة علي عكس الهنود اقوياء الاجسام لايدخنون ولا يشربون الخمر ويمارسون الرياضة . وهم محاربون ، ولهذا لهم حضور في الجيش الهندي . ولا يحلقون شعورهم . ولهذا اندفع الهندي مهددا ، وهو يهز قبضته امام وجهي . وعنما طارت عمامته ، قال بخنوع . اوكي سير .

وبينما انا اتفقد بعض الكرفتات ، في مطار الدوحة كان الهندي في مواجهتي وعندما رفع نظرة وشاهدني ، اصدر صيحة وارتجف وركض مبتعدا . وضحك بعض الحضور . حكومة الانقاذ هي مثل هذا الهندي اثبت خليل ابراهيم رحمة الله عليه جبنها .
عندما قلت للاخ محمد الجوكر ,, لماذ تسمحون لمثل هذا الهندي وغيره ان يهينوكم في بلدكم ,, كان رده ان الاهانة تحدث من الحكومة والمسئولين الذين يتفننون في اذلال السوداني وان الناس تعبت وبقي ما بيفرق معاها . وله الحق . لماذا يطالب السوداني باستخراج تأشيرة خروج من بلده ، طالما لا يحتاج لتاشيرة دخول . ولماذا تستمر هذه المهزلة في الديمفراطية ؟ ولماذا يستمر فرض الاتاوات وحلب المغترب في الديمقراطية ؟ وهل ستستمر هذه المهازل بعد كنس الانغاذ ؟؟

في نوفمبر 1982 كنت اقف في صف طويل داخل المطار ، لركوب طائرة اللوفتهانزا المتجهة الي فرانكفورت . ويأتي شاب مصحوبا بالماني في الستين من العمر . وتخطي الجميع ووضع تذكرة الالماني وجوازه امام المسئول قائلا ,, بلاي يا سمير مشي لينا الخواجه ده . وسمير المقصود كان شابا شاميا نحيفا وطويل القامة . يغطي شعر يده ساعته . طلبت من الشاب الذي كانت له لهجة مصرية ان يرجع الي نهاية الصف . الا نه غسلني بنظرة اشمئزار و,قال لسمير ,, خليك منه ده سوداني مهما يكون لابس قيافة ,, فقلت له ,, آآي انا سوداني لكن انتا لاقي تكون سوداني؟ وتردد سمير قليلا, فاقول له بانه اذا لم يرجع الالماني فانني حأقلبها . فيرجع سمير التزكرة والجواز قائلا ماعاوزين مشاكل يامحمود . وغير محمود اسلوبه . وان الخواجه ضيف ولازم نحترمه . فقلت له لانه ضيف لازم نوريه انو عندنا نظام واحترام . وسألت الالماني اذا كان يسمح بهذه الفوضي في المانيا ؟ الا انه نكس رأسه خجلا. وذلك الشاب انتظرني لساعات الي ان تأكد من انني متجه الي الطائرة وقال لي . حتكون ماشي المانيا تغسل الادبخانات . وضحكت .

[email protected]


تعليقات 35 | إهداء 0 | زيارات 26647

التعليقات
#1052107 [ابو عديلة المندهش]
3.00/5 (2 صوت)

07-05-2014 11:16 PM
يا أستاذ شوقى انت عندما تحدث لك مشاكل بالمطار يمكنك وبى تلفون واحد ان تأتى بأحد اصدقائك أو معارفك القدامى الذى يستطيع أن يحل لك مشكلتك . السؤآل : ماذا يمكننى أن أفعل انا و أمثالى من أهل العوض وناس قريعتى راحت الذين ليس لهم ضهر قوى يحتمون به ؟ عرفت دلوقتى نحن بنسكت ليه عن المطالبة بحقنا أمام اولئك الأجلاف من رجال الأمن والشرطة والجمارك ؟ لأنه بتصرف ارعن من اولئك البشر, يستطيع أن يمنعك من السفر ويبهدلك شر بهدلة التى قد تكون من عواقبها تأخيرك من السفر لمكان عملك أو دراستك وديك طبعا ما عندهم يمة ارحمينى إذا تأخرت عن موعد عملك .
لقد أصبح الشعب السودانى ملطشة لليسوى والما يسوى .


#1051971 [مطارشنو!!!قول ميناء بري!!كركرللطيران!!]
3.00/5 (2 صوت)

07-05-2014 05:02 PM
يعني شنوالماوسخان في البلد دي!!!اصلوالعسكر بتاعين الشرطه ذو المؤخرات المنتفخة لايجيون غير الذم واللدغ!!بعد السف وتقسيم الحوافز والايرادات بايصالات مضروة او باوارق او سكيتي كده!!وكان ما عاجبك اعلي مافي خيلك اركبو زي ما قاتلي مرة ملازم مفعوصة تعمل في قسم دخول الاجانب!!! وبالاضافة لاتساخ ياجبرا هناك غباء !!يضاف لسمعتنا!!!فالمطلوب من الاجانب وخاصة جديدة شوف جديدة دي عند الدخول!!!!! وكيف!!يدلك رجل الامن والملازمة السمسارة علي تاجر عملة امام البوابة!!!لتشتري الدولار بعشرة جنية!!!!!!!!!!ارايت!!! انه الفوضي وغياب العقاب!!!وانتشار ثقافة الفوضي والرشوة!!!والبشير بصراحة بقي اسد عجوز!!!!الكيزان نهبوا البلد واحاطوا انفسهم بمجموعة من العسعس الفاسدين لتامين انفسهم!!!!!وجوقة من الاقارب الفاسدين!!ودارنا خربة وكلو بياخد حقو!!فالحل ليس في 500نزيه فالبلد ملانة بالرجال!!لكن مرتشي الضرائب والجمارك والمرور لن يتركوا بوابات الخزائن الا لمن يقسم معهم!


#1051759 [zooool]
3.00/5 (2 صوت)

07-05-2014 10:45 AM
يا خي في إذلال اكثر من انك عند الخروج يمنحوك اورنيك لغير السودانيين ؟؟؟؟؟
معقولة ي زول خارج من بلده يمنح استمارة مكتوب عليها لغير السودانيين ؟؟؟؟


#1051758 [عبدالواحد المستغرب آشد الاستغراب!!]
1.00/5 (1 صوت)

07-05-2014 10:43 AM
المشكله يا ود البدرى إننا بعد (حكم إسلامى)لمدة ربع قرن لم يستطع القائمون على آمرنا من إيجاد مائة شاب يتحلون بروح الاسلام الذى نعرفه فنظام الانقاذ نجح فى تكريس مبداء (نفسى..نفسى) فى نفوس الجميع وصار الجميع جديدهم وقديمهم كما الاسماك البحريه والنيليه القوى يبتلع الضعيف وساد نوع من الهرج والمرج بين الناس والكل بات لا يفكر إلا فى نفسه ونحن عندما نسمع أن رئيس الدوله الذى ظهر فى إحدى البرامج التلفزيونيه ليتحدث عن ما يملكه من حطام الدنيا بعد حكمه للبلاد عقدين ونيف إنها عباره عن مشروع زراعى فى السليت وشقه فى أبراج النصر وقطعة ارض فى كافورى ثم يتضح بالدليل الذى لايقبل نفيه أن الرجل إمتلك لنفسه ربع اراضى العاصمه المثلثه!!وكذلك شقيقه الذى كان قد سبقه وضحك على دقوننا وهو يتحدث لاحدى الصحف فى محاوله منه لتبرئة ذمته من اقاويل المغرضين والحاقدين (اولاد الجزم!!)وقال إنه ألقى رحله مزمعه لضيق ذات اليد ثم نكتشف (بلاوى زرقه) إمتلكها آل حسن احمد البشير والتى لم تغادر منهم رضيعا ولاصبيا ولاكهلا ولاشيخا ولا حتى نسيبا إلا وكانت لهم قطع اراضى فى مواقع (إستراتيجيه موغله فى إستراتيجتها ولا يحظى بها إلا ذو حظ عظيم!!)ونحن عندما إطلعنا على الوثائق الدامغه لم نصدق وإنتظرنا تكذيبا او نحو ذلك ولكنهم عملا ببيت الشعر الذى تغنى به صديقك الراحل سيد خليفه (لو عايز تهجرنى من غير أسباب **اوع تصارحنى وخليك كذاب))آثروا الكذب على الصراحه ربما حتى لا نصدم ونتوكس !! والذى يحدث فى مطار الخرطوم لايختلف كثيرا عما يجرى فى بقية مرافق الدوله ألآخرى فاللصوصيه ضاربه بأطنابها كل مرفق وأظننى لن أضيف لعلمكم جديدا إن قلت فيهم (إن كان رب البيت بالدف ضاربا**فشيمة آهل البيت كلهم الرقص) فالجميع صاروا لصوصا وقادة بلادنا باتوا مكسورين وملطشه أمام أمثال احمد منصور وقريبا سوف تسمعون بأن إمتياز إدارة مطارات السودان قد آلت لدويلة قطر ولا حول ولا قوة إلا بالله..
ارجو من إدارة الراكوبه الموقرة إعادة نشر الحوار الذى تم بين عمر البشير والمذيع الطاهر حسن التوم وكذلك الحوار الذى نشر فى إحدى الصحف مع شقيق (الموكوس ) والصوره التى جمعته وزوجته والسفير !! عساهما تكونان ذكرى تنعش عقول الغافلين، الغفله التى يستخدمها هذا النظام المتوحش بنجاح منقطع النظير


#1051695 [أحمد عزيز]
1.00/5 (1 صوت)

07-05-2014 07:35 AM
العم شوقي بدري دائما يطرح نفسه سوبر مان و فتوة و كأنو طالع من فلم هندي .علي الرغم من بلوغه من العمر عتيا الا ان اسلوبه بنفس الركاكة و قصصه البطولية الوهمية بنفس الصياغة .كل ما يحمله هو اسم بدري و هذا الاسم عاني ما عاني فكثير من الجهلاء و الفاقد التربوي يستخدم هذا الاسم (بأستثناء البروف قاسم بدري و الاستاذة امنة بدري) كجواز مرور لتمرير افكار و اراء قمة في الغباء و تفترض فينا كل الغباء مثل قصصه عن امدرمان قديما .
فلا شوقي بدري و لا بابكر بدري يحق لهم الكتابة عن تاريخ امدرمان التي جاءوها وافدين كدراويش في خدمة المهدي


ردود على أحمد عزيز
Sweden [shawgi badri] 07-05-2014 01:44 PM
اين هي البطولات وانا اتكلم عن الذل والاهانة التي تعرضت لها . نحن في انتظارك لتكتب عن امدرمان لان بابكر بدري ليس عتده الحق لان يكتب عنها . ولماذا قاسم ما برضو قاسم جدوده جو امدرمان دراويش ؟؟ لم احسب يوما ان اسم بدري يميزني او يميز اي انسان . من آل بدري من كنت ارفض مصافحتهخم . الشارع في امدرمان لم يكن يهمه انت ود منو. لكن قدراتك وطرحك وتفاعلك مع الزمان والمكان . وكل زول في السودان قديما شايف نفسه مش اقل من الآخرين . والشارع لن يقبلك اذا حاولت الاعتماد علي اسم اهلك . وكل الناس سكنت بيوت الجالوس واكلت الويكة ما كان في فرق . افتكر انت عندك مشكلة ، انا ما عارفها .


#1051641 [خالد حسن]
1.00/5 (1 صوت)

07-05-2014 02:46 AM
انت طلعت من معمعة كلاب الامن البجم لانك بتعرف عميذ
اها المابعرف عميد يعمل شنو؟
دي مشكلة البلد دي انه بوت العساكر المغفلين دايس علي كرامتنا منذ اكثر من 60 عاما
فمتي نتخلص من هذه الابوات القذره


#1051639 [عادل]
1.00/5 (1 صوت)

07-05-2014 02:37 AM
"انت مش اديت الهندي كف يوم داك في المطار ؟" "لماذ تسمحون لمثل هذا الهندي وغيره ان يهينوكم في بلدكم"
اعرف من كتاباتك انك ناشط في مجال حقوق الانسان والعدالة الاجتماعية. لماذا ضربت هذا الرجل ولماذا قلت للجوكر قولتك تلك؟
اذا انت اردت ان تتنازل عن حقك لتلك المراة فليس من حقك اجبار الاخرين على ذلك. ولا انت مغيوظ من انو الراجل هندي؟ الكل يعرف نظرتنا للهنود يعني لو كان دا سعودي حاتتصرف معاه كدة برضو؟


ردود على عادل
Sweden [shawgi badri] 07-05-2014 01:26 PM
ان حقوق الانسان تعني ان ياخذ المظلوم حقه . واذا انت كنت تقرأ بتمعن ، لقرأت انني ارجعت الماني مسئول لدرجة ان معه مرافق يسمح له بدخول المطار ومكث معه لساعات يوفر له الراحة . واعطيته محاضرة في حسن التصرف الي ان نكس راسه . ومن هو السعودي ؟ هل هو اكثر من بشر ؟ سيكون الدينكاوي او النوباوي اقرب الي قلبي مثل الجعلي او الضنقلاوي لانهم ابناءوطني واحبابي . ولكن لن اناصرهم اذا اخطئوا في حق الآخرين .


#1051630 [ود البلل]
1.00/5 (1 صوت)

07-05-2014 01:58 AM
شوقي أولا بارك لي الجواز الجديد والذي استلمته بعد مشقة لا أحسد عليها.
المحيرني وجدت اسمي الأول مكتوبا بخط يد ردئ في مكان توقيع حامل الجواز.
وطبعا لم احتج ولن أحاول ذلك. علما بأن مكان التوقيع قد تم تغطيته بورق سلوفان.


ردود على ود البلل
Sweden [shawgi badri] 07-05-2014 01:33 PM
,¨ ود البلل لك التحية ومبروك الجواز . زمان جوازاتنا بتتكتب بالحروف الاتينية حسب مزاج الكاتب . مرة كاتبين لي حرف الامم الانجليزي بتلاتة اقواس ذي الدودة .


#1051623 [Quickly]
1.00/5 (1 صوت)

07-05-2014 01:22 AM
الاخ شوقي بدري بما انك اتبهدلتا من الامنجية ديل وهم من زمن نميرى حتى يومنا هذا كلهم فاقد تربوي وتربية شوارع لا اعرف هل هذا عن قصد ام مجرد مصادفة ؟!!


#1051601 [osmanaboali]
4.50/5 (7 صوت)

07-04-2014 11:50 PM
المشكلةعند السودانيين انهم لا يطالبون باي حقوق تخصهم ويتنازلوا عنها طوعاانا لا استطيع ان اتنازل عن حقي مهما كان الثمن فحصلت لي الكثير من المواقف ولم اتنازل حتى لو تاخرت قليلا او كثيرا مثال في السنة الاولى للانقاذ قدمت عن طريق ميناء بورسودان وعندما انتهيت من اجراءات الجمارك واخذت تاكسيا يوجد
بعد مسافة قصيرة من الميناءكشك شرطة للتاكد من الامتعة هل الذي في العربة صاحبها نفس الاسم على الامتعةفقط الشرطي اضاف مهمة اخرى اليه وهي تفتيش الامتعةوالمسافر يكون في حالة ضيق ويريد الخلاص فيقول له سائق الاجرة (اديه اي حاجة واخلص)فتدفع المعلوم واغلبهم من تجار الشنطة من مصر والسعودية والمغتربين عندما وصلنا سالني بتعالي انت صاحب الامتعة. قلت:نعم قال :افتحها حتى افتش عن ممنوعات .قلت انا اتفتشت ومررت على ثلاثة موظفين جمرك وحرس الجمارك. اصر على التفتيش ورفضت وقلن لست موظف جمرك واذا انت شاك اطلب الشرطة ونذهب للقسم وانا ما خايف وسوف احملك المسئولية الكاملة عن التاخير.وسوف اتقدم بشكوى حتى لماذا يعذب المواطن في بلده فبدا في التراجع انت فاكر البلد فوضى لازم نتاكد من صاحب العفش لانه يوجد حرامية كثير قلت له .:الفوضى هي ماتفعله والثورة قالت نحن من اجل المواطن وليس لك وتدخل سائق الاجرة وفض الاشتباك وذهبنا بعد تاخير نصف ساعة وقال لي سائق الاجرة لاول مرة يمر من هنا صاحب امتعة كثيرة جدا بدون ما يدفع .الشاهد من الكلام اذا كنت نظيفا لا تخف ربما تتاخر وتتهزا وربما لا تصل الى نتيجة ولكن اذا كل واحد لم يترك حقه اكيد في الا خر سوف يتغير الحال ومثال الامريكية السوداء التي رفضت القيام لرجل ابيض من مقعد الحافلة في عز الفصل العنصري انتصرت وانكسر القانون لانها اصرت وكذلك نحن لا بدع حقا لك وان كان صغيرا وحتى لو اخرك ومرمطك لان التنازل بداية ضياع الحق احسن نيتك وكن قانونيا وسوف تنتصر .هذا مثال واحد وهناك كثير من الامثلة .ابدؤوا باصغر الحقوق وعندما نجد احدهم على حق نقف معه في اي مكان وسوف تحصل انشاء الله كل الحقوق


#1051585 [منصور محمد صالح العباسي]
1.00/5 (2 صوت)

07-04-2014 11:19 PM
مطار الخرطوم المفتري عليه ماله وما عليه ؟؟؟؟؟علي الأقل مطار الخرطوم أفضل من مطارات عالميه كثيرة،،،انظرو مثلا الي مطا مقديشو ومطار يوغندا ومطار جوبا ومطار وبوركينا فاسو ومطار انجمينا ومطار تلس ،،،بالنسبة لهذه المطارات سالفة الذكر مطار الخرطوم يعتبر خمس نجوم ،،fife stars,,وأخيرا وليس آخراً لالوبنا ولا تفاح الناس ،،،وعاش السودان حرا مستقلا،،،


ردود على منصور محمد صالح العباسي
[ككو حليمة] 07-05-2014 10:59 AM
Five Stars

Saudi Arabia [jackssa] 07-05-2014 07:55 AM
... لكن ما حيرتني أخي منصور .. معقولا الا ..مقديشيو !!!!


#1051572 [ود نفاش]
4.00/5 (3 صوت)

07-04-2014 10:53 PM
كل ما قيل ويقال ليس بجديد لا تبسو ان كل شئ انهار حتى الاخلاق حتى الدين فنحن فى دولة القرامطه
كل ما ينشر هو صحيح ونحن لا حولة لنا ولا قوة يحكمونا ارذل السودانيين من وزراء وضباط و امن كلهم نا ضميرهم الا من رحم ومن رحم اعلم ان هناك بعض منتسبى الشرطة والامن يضعون الكارنية فى الاستقبال ويهجو الى الدهب او الى السوق هؤلائى الذين صحا ضميرهم
مرة وقفت لرجل شرطة مرور فبداء مستاءا قال لى تصور يا خال نقبض على شباب بعد الساعة الواحده صباحا فى موقف مخل بس يرفع الموبايل ثم يطلق سراحة بكل سهوله لا محضر ولا الله قال


كل شئ جايز فى عهد البشير البشكيررررررررررررر


#1051569 [ابو حسين]
1.00/5 (1 صوت)

07-04-2014 10:40 PM
المثل يقول الطلع من داره قل مقداره لكن الوجع يكون اكثر عندما تاتي الى دارك وتصدم بهذا التعامل في اول موطى قدم في المطار ولسان حالهم يقول التقيل قدام


#1051568 [سودانى واصيل]
3.00/5 (3 صوت)

07-04-2014 10:37 PM
الرائع د. شوقى بدرى
للاسف خرجت من الموضوع بحكى وحكاوى تقارب الاربعون عاما
وكنا نامل ان تعلق على مارواه الصحفى احمد منصور من ماسى وعذابات
بمطار الخرطوم .سؤال ؟ هل صحيح انك تسب الديانة الإسلامية للطالبات اللائى
يصلين فى ساحة الكلية ؟ صدمت حينما علمت بهذه المعلومة لاننى معجب ومفتون
بال بدرى الاسرة العريقة التى غيرت تاريخ المراة فى السودان وكون حفيد العلامة
الداعية والشيخ بابكر بدرى لايصلى ويمنع الصلاة فى الاحفاد كم ادهشنى واحزننى
هذا الامر ..واذكرك يا دكتور بعذاب القبر عذاب القبر اول ليلة لك فى القبر
قلبى معك وكم انا حزين لحالك اتمنى ان تعود ...


ردود على سودانى واصيل
Sweden [shawgi badri] 07-05-2014 03:24 AM
اول حاجة انا ما دكتور . وكلية الاحفاد انا ما حصل دخلتها . ولم يحدث في حياتي ان سبيت دين حتي لي طارة كلتش , ولا استعمل كلمات بذيئة حتي في طفولتي . لم اشرب خمر او ادخن ولا اشرب شاي او قهوة . تسمح تقول لي انت جبت الكلام ده من وين ؟؟ وبعدين هل انت ضمنت الجنة ؟؟ والموضوع هو شنو الانا طلعت منه ؟\


#1051531 [dont ask]
3.00/5 (3 صوت)

07-04-2014 08:39 PM
رمضان كريم والتحيه ياشوقي على الكتابه الشيقه (كلما تبعد عن الناس وتركز على روحك بتطلع لينا درر)
صاله المغادره بالمطار مابهوب ناحيتها الا من لم يكن من اهل الانقاذ ياشوقي،،، كل الكيزان بنساءهم واطفالهم وبامنهم وشرطتهم وجنجويدهم بمشوا طوالي لصاله كبار الزوار وبركبوا اخر ناس :)
البلد فيها الان طياره واحده هي طياره الريس لكن الريس مابقدر يطلع بيها ابعد من قطر فلذا مافي داعي نحتفظ بطيارات.
بعدين الناس الداير تطلع دي يعني يخلوها ساكت كده تمشى مايقلعوا منها اي حاجه باي مسمى تاشيره خروج.. دمغه جريح او دمعه مغادر .
والناس الزيكم الشايلين باسبورتات نضيفه كيفن يعني مايحسدوكم القاعدين في المطار وماقادرين يتفكوا لبرا.
الواحد فات منكم لغادي المرجعكم شنو ..اهلي.. ما تقولي كلام المسلسلات ده..رسل الضحاكات بصوره منتظمه وعند الحوجه وخلقتك دي مادايرين نشوفها!


#1051530 [im illminated]
4.00/5 (3 صوت)

07-04-2014 08:37 PM
التحية ايها الكاتب الكبير والسوداني الاصيل......
ياريت لو تصبح (محن سودانية) مقال ثابت ....


#1051519 [ِAburishA]
1.00/5 (1 صوت)

07-04-2014 07:09 PM
لك التحية اخ شوقي بدري.. وعجبني جدا الحوار أدناه..

فانتهرني جندي جيش قائلا وانت جايي آ خر زول ليه ؟
فقلت له بما انو في زول اول حيكون في زول آخر زول .
فقال زميلة والخواجية المعاك دي منو ؟
فقلت دي مرتي .
فقال مرتك كيف ؟.
فقلت مرتي كده.


ردود على ِAburishA
United States [Munir] 07-04-2014 10:38 PM
المصيبة في الأسئلةدي توضح ان الشخصية السودانية في البوليس هي نفسها من زمان ناس نميري فمافي زول يقول الناس إتغيرت هم نفسهم بشخصياتهم السودانين من يومهم حقارين وما بيحترموا العمل ولا المواطن بس الإنقاد وحكومتها جات لمعت الشخصية السودانية واظهرتها على حقيقتها وكده نلقى اول إنجاز للإنقاد عشان نقوم نصلح حالنا


#1051511 [زول سوداني]
1.00/5 (1 صوت)

07-04-2014 06:34 PM
لك التحية أستاذ شوقي ،،، لدينا جميعا حلم يراودنا وهو كيف يكون السودان كما نتمنى؟؟ فهل أفدتنا أستاذ شوقي بإجابة شافية في مقالة ضافية يكون فيها الجواب وذلك حسب مالديك من تجارب في الغربة الطويلة
ولك الشكر وتقبل الله منا ومنكم الصيام والقيام وصالح الأعمال


#1051502 [ود كركوج]
1.00/5 (1 صوت)

07-04-2014 06:17 PM
من سنتين حكي احد اقربائي يحمل جواز سفر اجنبي عن تعليق احد ضباط الجوازات في المطار (شافع بدبورة) قال له بكل لؤم وقلة ادب ومن دون اي مناسبة او سبب "والجواز السوداني عيبو شنو لما شايل ليك جواز اجنبي".


#1051498 [إسماعيل آدم محمد زين]
3.00/5 (2 صوت)

07-04-2014 06:11 PM
أخونا شوقي كلامك جميل،لكن المصريين ما يتدخلو !و ربنا يحفظك


#1051482 [عثمان خلف الله]
4.00/5 (7 صوت)

07-04-2014 05:37 PM
الشى الذى يبعث على الهم ان هذه القصص من حوالى 30 سنه ولا زال الحال هو الحال
يا ترى هل نحن امه غير قادرة على التطور


#1051455 [عمر]
1.00/5 (1 صوت)

07-04-2014 04:46 PM
يا اخوانا ما تبقو عاقلين شويه , بدل ما تعلقو عن مطار الخرطوم واحد فيكم يقولينا المصري ده الدخلو بينا شنو مطار معفن ولا زفت انت مالك ومالنا تدخل نخرتك في حاجات ما بتخصك ...
اخونا الzubair كاتب في الصميم وفي السليم ..


#1051446 [حسام]
1.00/5 (1 صوت)

07-04-2014 04:22 PM
الاخ - شوقي بدري - انت عمرك كم سنة شكلك راجل عجوز.


#1051431 [ودالشريف]
2.00/5 (3 صوت)

07-04-2014 03:44 PM
السودان عاوز قنبله نوويه فى كل شئ يوجد عدم الاحترام والله عندى تجربه مع شركة مارسلان الى الان كل ما افتكرها اصاب بالاشمئزاز ربنا يصلح حال البلاد والعباد يارب


#1051403 [Zubair]
2.50/5 (4 صوت)

07-04-2014 02:49 PM
Dear Shawagi, Although I do agree with most of the details in your article but let me share that it was totally disappointing,,, let us agree this issues are purely a Sudanese matter so should we write freely & whatever we feel can be expressed by any mean but never allow other to do so on behlf of us. Here I mean what so called Ahmed Mansur such people shouldn’t be allowed to raise any such issues.
Let me here tell you all this Ahmed Mansur didn’t write because he cares of our image or would like us to be a developed & ahead of many countries…not at all..! he has a certain message wanted to passed to the ruling authority in Sudan as he is not happy this time because he wasn’t welcomed as usual officially by the government. His main concern is that why should Sudanese government welcome the Egyptian president warmly…! This idiot what so called a journalist is playing a game on behalf of others. Let me here also ask a fear question is this his first time to come across Khartoum Airport..? No, but he use to be welcome properly by the officials while arriving & a very interesting escort while leaving a along with a sealed big envelope including some dollars as a cost of what he should write & do but this time he missed this opportunity & as he was in Sudan to interview Sadiq Almahadi there was no alots of entertainments done by the government towards the hero…even he was not recognized by many people at the airport so theses’ are his real intention to write.
I have also simple questions to Ahmed Mansur if happens to see my comments…
1. Can he please write & tell us about Cairo Airport & how the procedures out there are, how the migrations & police officers are treating people there.
2. How are the procedures at Doha international airport when you arrive via flight coming from Khartoum?
3. Can you tell a policeman in Doha airport a penny advice forget about meeting an officer with three stars (Captain) while there is a rush or peak hour.
4. Tell us how does it look in the all departments & it is affiliated in Egypt & how is the policemen treat others.
5. Tell us how the curoption is & how much police officers earn every day at Cairo International airport even during the period of your ex-president Morsi.
6. To be continued……………….


ردود على Zubair
Egypt [عبدالعزيز عبدالباسط] 07-04-2014 11:46 PM
مع انى ما بعرف انجليزى بس كلامك كويس جدا .....

United Kingdom [خضر عمر ابراهيم] 07-04-2014 08:22 PM
Zuhair
Please don't personalise the matter, and it is not just only you or a Sudanese national is allowed to point out about what had happened and happens in Khartoum airport,, everybody has the right to express his observation asa soon as it is a matter of international organisation as the airport and passed and crossed by international individuals, they have the right to demonstrate about whatever being shown or treated, they still represents international societies who may evaluate ours,,you have no right to say that Ahmed Mansour shouldn't express his point of view and experience at Khartoum airport?? Even if he is an Egyptian as you pointed, or from the brotherhood Islamic group, that will not waive his right to say and express what he experienced there,, all of us knew that he said the truth, and what had happened with him and other still happens everyday and always, and we should claim that no one just except us should say a word about..
All your questionnaire about what is going on at Doha and Cairo airports , Ahmed Mansour have nothing to do with,, and you should insert these issue into the core point and topic Mansour raised his awareness ,, your way as if you are trying to fade away the truth about what is running in Khartoum airport since 1969 and it is not something new, I myself experienced that since 1979 when I start my abroad trip until now for more that 35 years the treatment and the bureaucracy is the same.. And Showgi Badri expressed the pin points only,,
Why Zuhair we interfere and speak about everything and any thing specially belongs to others and say our opinions and claim our cross and disagreeing and to say whatever we want freely , and not accept any body to object or express his observation about something belongs to us???? Why we give ourselves rights to oposse others from our point of view , and do not accept or allow any one to say even a word about our mistakes, ،behaviours crossing the lines of treatment without humanity and etc..
We should let anyone bring out his observations about us and our organisation , specially like the national carrier, the entrances of the country, the ,
,treatment of the authorities, the time factors, how ,when, ,where, what, why, and the outcomes
Also, we must learn from our mistakes and the observations either from us or other people , and try to fix and maintain the mistakes , and indifferences and fill the gaps and the maladministration issues and rules that leads to what had happened and still occurred

Sweden [shawgi badri] 07-04-2014 06:27 PM
انا لم اكن اكتب عن احمد منصور . واحمد منصور يعني لي كل ما احتفقر . انا كنت اكتب من منطلق يوم جات الكتاحة كان في كيتا في العباسية . لكن ما كنت بكتب عن الكتاحة . شكرا علي الجهد الكبير .


#1051377 [adil a omer]
1.00/5 (2 صوت)

07-04-2014 02:01 PM
مطار العيكوره الدولى

اهو كلو بالنظر


#1051363 [الكلس]
3.50/5 (4 صوت)

07-04-2014 01:23 PM
تعرف يا عمنا شوقى المسألة فى الموظفين فى حكومة السودان بيمتازوا بكمية هائلة من عدم أحترامهم للغير ولأنفسهم أولآ!والشاهد أن مقال منصور بغض النظر عن دوافعه يحمل حقائق واقعية عن مطارنا الذى أُكلت الأموال المخصصة لبناء (مطار أمدرمان)مرتين وعلى مشهد ومرأى من كافة أفراد الشعب السودانى.المصيبة أن المبانى يمكن أن تبنى والمعدات يمكن أستجلابها وحتى الأكياس بتاعة النايلون ممكن تجى لكن البيجيب الأحترام لبعض منو؟ لى صديق يعانى من الأغتراب شبه الدائم فى الخليج وحكى لى بصدق كيف أنهمرت دموعه فى مطار البلد المضيف عندما مدأليه موظف الجوازات (بالجواز وأبتسامة وجملة ترحيب تعنى بانك فى وطنك )على خلفية المذلة والمهانة التى نالها فى عطلته الكذا سنويةوألتى دومآ يقسم على عدم تكرارها.


#1051346 [اليبي]
1.50/5 (4 صوت)

07-04-2014 12:45 PM
اديتني احساس انك زول فتوة و بتاع مشاكل و عامل فيها ما بتتهان ..طيب مالك مدخل راسك في برميل الزبالة عشان صباع معجون


ردود على اليبي
United Arab Emirates [ودالباشا] 07-04-2014 09:42 PM
ارجع اقرأ المقال تلقى فقرة سوف تستفيد منها وهى عندما ترك اغراضه التى اشتراها من السوق الحر ولم يعطوه اكياس بلاستيك ليحلق الطائرة تقولى صباع معجون وفعلا كما قالت بت ابوذيد الفهم قسم

Sudan [nagatabuzaid] 07-04-2014 06:44 PM
الفهم قسم يا ولدى هو دخل راسه فى برميل الزبالة ما عشان صباع المعجون استاذ شوقى قصد يدى الرجل درس وفعلا فهم الدرس مخو نظيف ديل ناس الاحفاد التعليم كده ولا بلاش المصيبة انت ما فهمت

Sweden [shawgi badri] 07-04-2014 05:11 PM
هل افتكرت انني كنت سادخل رأسي ؟؟ حاجة غريبة , هذه البراميل بفتحات صغيرة جدا وطويلة حتي لا تسترجع منها اي شئ . ويمكن ان تكون عطور غالية . اي شئ اكتر من عشر ليتر يصادر . علشان كدة الناس العارفة بتجيب معجون صغير او كلونيا صغيرة . القصد كان احراج الموظف لانه كان صارما في كلامه . اي حاجة اكتر من عشر ليتر تدخل البرميل . فتظاهرت بانني احاول الدخول في البرميل . حاول ان تقرا بتمعن .

United States [اسحق بولندا] 07-04-2014 04:09 PM
الفهم قسم ارجع اقراء الموضوع تاني وافهم السبب شنو


#1051338 [فكي حسن]
2.00/5 (3 صوت)

07-04-2014 12:18 PM
كتلتنا بالضحك يا عم شوقى. الظاهر دم الرباطاب غالب عليك. كل سنة وانت طيب وربنا يطول عمرك ونقرأ ليك دايما مواضيعك الشيقة ونقدك الجميل.


#1051326 [fanjari]
2.50/5 (4 صوت)

07-04-2014 11:51 AM
ده كله في الارض، لكن خدمات الجو كيف؟
احتج احد أصدقائي على قلة الاكل وكان جائعا فردت المضيفة (هوي يا اخوي نحن ما ضابحين)
امتلأت مخازن الأغراض بالحقائب ولم يدخل ثلث الركاب فصاح احدهم اين نضع اغراضنا فصاحت المضيفة(يعني اسوي ليكم شنو؟ اتقطع)


ردود على fanjari
Saudi Arabia [قاسم] 07-04-2014 04:29 PM
ههههههه والله منتهي المسخرة


#1051323 [Sudne]
2.00/5 (3 صوت)

07-04-2014 11:43 AM
رد لسنجك
حمامات شنو يازول دنيا رمضان
شكلك بتحب الانكسة زي ود الحافظ كدا


ردود على Sudne
United Arab Emirates [ودالباشا] 07-04-2014 09:49 PM
السناجك ديل معروفين طييانه


#1051305 [radona]
2.00/5 (3 صوت)

07-04-2014 10:48 AM
اليكم هذه القصة :
قبل 15 عام تقريبا وفي احدى سفراتي عائدا الى المهجر وبمعيتي اسرتي الصغيرة وكانت شركة الطيران سودانير لها المغفرة والرحمة وكنت قد قمت بتاكيد الحجز قبل 48 ساعة حسب اللوائح وتم الصاق ملصق ووضع ختم باللون الاصفر على التذاكر بان الحجز مؤكد.. وحضرنا المطار في الموعد المضروب ظهراولكن تم اخطارنا بان هنالك وقت جديد في الثامنة مساء وحضرنا في ال8 مساء ولكن اتضح ان الوقت الجديد 12 مساء باختصار في ال4 صباحا فتح الكاونتر وكانت دهشتي ان موظف الكاونتر قال لي الحجز ما مؤكد ولكني اجبته ماهذه اللصقة والختم ذو الحبر الاصفر فاستدرك الامر وتم وزن العفش ومشت الامور حتى صعودنا الطائر الميمون فاذا بصاحبنا موظف الكاونتر ياتي ونحن على ظهر الطائرة ليطلب منى ان اجلس احد افراد اسرتي مع الاخر لانه عنده شخص عايز يسفره فماكان منى الا ان اجبته بالرفض بل وقلت له هل من اجل هذا الشخص كنت تود الغاء حجز 5 تذاكر ليسافر هذا الشخص وتوعدته بانه اذا لم ينزل من على متن الطائرة فورا فانني ساشتبك معه في مصارعة حرة ولكنه كان من الجبن بمكان حيث انسحب بصورة فورية )
هكذا انهارت سودانير يعني كان هذا الموظف سيسفر ذاك الشخص وتكون 4 مقاعد خالية بسبب ذلك .. انه الفساد والافساد


ردود على radona
Sudan [nagatabuzaid] 07-04-2014 06:51 PM
الحركة دى كانت بتعملها شركة طيران خليجية مكتب الخرطوم والمسؤول سودانى والكرسى بمبلغ وقدره يعطلوك لواحد دافع ويا ما عانينا منها واحيانا كانوا يتفقوا يخفوا التذكرة الى ان تطير الطائرة ويتاكدوا ان زولهم الدافع سافر يقولوا ليك لقينا التذكرة


#1051279 [arah1999]
1.63/5 (4 صوت)

07-04-2014 09:41 AM
يا شوقي كنت متوقع منك تشوت حاجة عن أحمد بلال رغم إنه الغبينة فشاها عبد المنعم سليمان.


ردود على arah1999
Sweden [shawgi badri] 07-04-2014 02:20 PM
الضرب علي الميت حرام . لقد استعان الفرنسيون بالجنود الجزائريين في المستعمرات لانهم كانوا ملزمين ان يبدوا قسوة اكبر علي ضحاياهم لاثبات ولائهم لفرنسا . واستخدموا الجنود السنقاليين لمحاربة الجزائرين . هذا هو دور احمد البلال .


#1051278 [السنجك]
3.16/5 (7 صوت)

07-04-2014 09:34 AM
والله وانا صائم كل المقال ماعجنى غير انك ماشى تغسل الحمامات


ردود على السنجك
Sweden [shawgi badri] 07-04-2014 02:15 PM
العزيز السنجك لك التحية وتقبل الله صيامك وقيامك . اسعني ان في المقال ما اعجبك . ارجو ان توضح لي اكثر مما يعجبك وسأكثر منه . ببركةهذا الشهر الفضيل .

Saudi Arabia [كاكا] 07-04-2014 11:11 AM
طبعا المتعود على الاهانة والذل ما يعجبة إلا كلام الاذلال والاهانى


#1051276 [د. أ. أبو الليل]
2.63/5 (7 صوت)

07-04-2014 09:22 AM
شكرا الأستاذ الرائع شوقي بدري علي هذا السرد الشيق للأحداث التاريخية عنا موقفنا الدولي. وبالله هات بالمزيد عن هذا الموضوع المهم. للأسف حكومتنا مهدت كل الدروب، لكي يخرج المواطن السوداني من بلاده ويهجرها من دون رجعة "سياسة التهجير الأبدي". هذا واضح ليس فقط في المعاملة الضحلة والجلفة من موظفي المطار، وإنتشار الفوضي العارمة فيه، ولكن أيضا في التخطيط الإستراتيجي للفئة الحاكمة، حتي تهجر الخطوط الجوية الناقلة السودان، وتتجه إلي بلدان أخري، يسهل فيها التعامل المؤدب. هذا يعني إنعدام الوسيط الناقل، كما هو الحال عليه في توقف آخر الخطوط المتميزة عن العمل عندنا، كتوقف اللوفتهانزا الألمانية. وناس الإنقاذ "الأباريق" ممكن يخطر ببالهم شيء واحد فقط، وهوم: "الماعاجبوا يطير، ممكن يمشي يعوم"، علي وزن الماعاجبوا يلحس كوعوا، أو كما قال سيدنا الأهبل.

وهنا رسالتي لأهل النظام الهمجيين:

جينااااااكم-----زييييييي-----وزييييين!

أنحنا لمان نلقي الإحترام والتقدير من عساكرة مطار الخرطوم الدولي (موقف الخرطوم الدولي)، بنمشي نفتش عليكم في بلاد الغربة كمان. ننزل في كل المطارات الدولية، نحف من الموظفين والعمال بالمعاملة السمحة والأدب الجم، حتي ولو بلغة الإشارة، وحتي نغادر مطارات البلدان. ننزل مطار بلدنا السودان، نشعر بالأشمئزاز والجلافة، والواحد يشعر فينا، وكأنوا قتل زول قداموا، أو شايل ليه فطيسة في شنطتوا معاه. جااي من وين، سااكن وين، جااي ليه، معااك شنوا. ندخل بذنب يرافقنا ولا نعلمه، ونخرج بذنب يرافقنا ولا نعلمه. وفي الخروج تأتي المتاعب، تخرج حتي تخرج روحك وروح المعاك، لا نظام، لا أدب ، لا إحترام في المطار. أنت إنتظر هناك، مااشي وين، معااك منوا، مااشي ليه، داا جوازك، دي مااصورتك، أادخل التفتيش هنااك، أمششي أدفع الرسوم، جييب إصاال. والعجب لو كان معاك أولادك. في البداية لازم توري ناس المطار إنك شحاد ليهم قدام مرتك وأولادك. خلينا كل شي ليكم، خلونا الله يرضي عليكم في حالنا.


ردود على د. أ. أبو الليل
Saudi Arabia [ABOKRIEK] 07-04-2014 02:24 PM
شكرا د/ ابوالليل ذكرت جزء كبير من معاناة السودانيين فى مطار الخرطوم

Sweden [shawgi badri] 07-04-2014 02:12 PM
العزيز دكتور ابو الليل لك التحية . هل هنالك اهانة اكبر من يطلب من السود
ان يتحصل علي تأشيرة خروج من بلده . عندمل تعطيني جواز سفر وتأخذ ثمنه ، هذا يعني انك لا تمانع من سفري . لماذ نحتاخ لفيزة خروج . في احد المرات اوقفوني لان الجواز مكتوب بطريقة غير جيدة والجواز مقطوع زاوية اكثر من 90 درجة .



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية
تقييم
3.21/10 (12 صوت)




الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة