الأخبار
منوعات سودانية
عمر محمود خالد : لا بعرف جوع لا عطش وممكن أصوم الدهر كلو
عمر محمود خالد : لا بعرف جوع لا عطش وممكن أصوم الدهر كلو


07-09-2014 11:18 PM
الخرطوم – نصر حامد

الدكتور عمر محمود خالد, رجل متعدد الاهتمامات والمواهب, يعرفه الكثيرون كعاشق ولهان بالمريخ, نظم فيه أجمل القصيد ودوزن في حضرته أجمل الكلمات مثلما يعرفه الناس كطبيب نطاس قدم الكثير للمواطن السوداني عبر البرامج التلفزيونية التي قدمها من أجل الصحة والعافية للمشاهد السوداني, وقبل هذا وذاك عرف الناس الدكتور عمر محمود خالد كشاعر مجيد غنى له العمالقة أغاني من الوزن الثقيل مثل (خمسة سنين) و(حلم الأماسي) وغيرها من الروائع, حل ضيفاً عزيزاً على (اليوم التالي) عبر حوار رمضاني تفضل مشكوراً بالإجابة على جميع تساؤلاته كما سنطالع كل ذلك عبر سطور هذا الحوار:

في البداية حدثنا عن أول محاولة صيام؟

محاولاتي بدت بدري شديد, أول مرة حاولت أصوم كان عمري 8 سنة لكن المحاولة ما استمرت لأكتر من نص النهار.

هل كنت تخدع الأسرة وتدعي الصيام؟

محاولاتي بدت بدري شديد, كان عمري تمانية سنة وحاولت أصوم لكن الحكاية ما استمرت لأكتر من الساعة 12 نظهراً.

حصل مرة كنت فاطر وغشيت ناس البيت وعملت فيها صائم؟

أيوة, كان عمري 10 سنة وجيت من المدرسة وكنت صائم بالجد لكن لقيت روحي عطشان شديد, مشيت على الزير وما خليت موية باردة وعملت فيها صائم لي حدي الأذان.

كانو مصدقين انك صائم؟

طبعا, أنا من أسرة متدينة وجدي شيخ المسيد عشان كده حكاية صيامي كانت كذبة مقبولة جداً ومشت في الناس عادي وكانوا بقولو شوفتو الود الصغير ده من هسي صائم.

برنامجك شنو في رمضان؟

برنامجي في رمضان تعبد كامل, بصلي الصبح حاضر, بعد داك بنوم وما بصحى قبل الساعة 9 صباحاً, على طول بمشي العيادة أو المستشفى وبرجع لي البيت الساعة 2 ظهراً ولو لقيت في وقت بيكون في تواصل مع الرياضيين أو الشعراء.

بتفطر وين, في الشارع ولا في البيت؟

لما كنت ساكن الثورة كنت بفطر في الشارع لكن هسي بعد رحلت حي الشاطي افتقدت بشدة العادة الجميلة دي, كل الناس هنا بتفطر جوة البيت لو طلعت الشارع حاتلقى نفسك براك.

وجبات بتحبها في رمضان؟

بحب العصيدة شديد.

مشروب؟

الليمون.

بتصلي التراويح وين؟

في جامع الحي.

وبعد التراويح؟

عندي خمسة أخوان وخمس أخوات في أم درمان, أفضل فرصة الزول يتواصل معاهم الشهر الفضيل وافتكر انو دي أحلى حاجة في رمضان.

عنك نشاط ثقافي في نادي المريخ في رمضان؟

طبعا, أنا لي 30 سنة في اللجان الثقافية بنادي المريخ وما حصل مرة غبت من لجان المريخ الثقافية وأفضل فترة نشاط ثقافي في الأندية في رمضان طبعاً.

بتحب تشاهد ياتو برنامج؟

بحب أشاهد برنامج أغاني وأغاني بفضائية النيل الأزرق وبتعجبني شديد طريقة السر قدور في تقديم البرنامج.

لما تكون جيعان ولا عطشان بتعمل شنو؟

بالمناسبة, أنا عندي مقاومة للجوع والعطش ما عند أي زول, نهائي لا بجوع لا بعطش وممكن أصوم الدهر كلو والحكاية دي طبعا محيرة زوجتي جداً.

حصل صمت برا السودان؟

كتير جداً, صمت في السعودية ومصر وكانت عندي تجربة اغتراب قاسية جداً في ليبيا أهدتني أغنية (خمسة سنين) لكن في النهاية طبعاً رمضان ما عندو أي نكهة في أي بلد غير السودان.

في تغيير في برنامجك في رمضان؟

طبعاً, تغيير كلي, بحاول اتقرب الله ما استطعت سبيلا في الشهر الفضيل وبقاطع ليالي الشعر والغناء وبحرص على صلاة التراويح وتلاوة القرآن الكريم.

شيء بتفتقدوا في رمضان؟

القهوة بعد الإفطار.

شيء تجده في رمضان؟

مواصلة الأرحام.

عمل تحرص على القيام به في رمضان؟

زيارة جدي الشيخ الطيب.

موقف طريف؟

كنت في برنامج تلفزيوني قبل أسبوع من رمضان اتصلت بي مرة على الهواء مباشرة وقالت دايرة رخصة إفطار ليها ولي راجلا عشان عندهم ملاريا وأزمة ومشاكل في المعدة, طبعاً في السودان في ناس بتجرسوا من الصيام وبحاولو يعلقوها في رقبة الطبيب عشان يقول ليهم افطروا لكن نحنا بنمرق منها وبنقول للزول صوم لو شعرت انك ما قادر أفطر.

بتحب تقول لي قراء (اليوم التالي) شنو من النصائح؟

بقوليهم رمضان كريم وتصوموا وتفطروا على خير وأقول لهم صوموا تصحوا, فقد أثبت الطب الحديث أن للصيام فوائد كبيرة لصحة الانسان وهو بمثابة تخسيس مجاني للذين يعانون من البدانة فقط أنصح بعد الإكثار من تناول الأكل بعد الإفطار حتى لا يعود ذلك على صاحبه بنتائج عكسية

اليوم التالي


تعليقات 10 | إهداء 0 | زيارات 4820

التعليقات
#1055612 [اخ تقرصو]
0.00/5 (0 صوت)

07-10-2014 09:50 PM
"عمر محمود خالد : لا بعرف جوع لا عطش وممكن أصوم الدهر كلو"
طيب مادام كده ماتصوم وتغور من وجوهنا خاصة فى الحفلات


#1055442 [حمورابي]
0.00/5 (0 صوت)

07-10-2014 03:30 PM
ناس الانقاذ مصنفنه حركة شعبية عشان كده خلوا كلاب الامن تلهث وراه لغايت ما عكشوه وشالوه من التلفزيون القومي وركبوا محله مامون حميدة الباحث عن المجد والشهرة بعد امتلات جيوبه بالاموال
بس الناس


ردود على حمورابي
United Arab Emirates [KKambalawi] 07-10-2014 10:43 PM
ماتنسي يا حمورابي أنو هو بفعلته تلك, أداهم فرصة ذهبية لضربه.


#1055380 [zozo]
5.00/5 (1 صوت)

07-10-2014 02:02 PM
دكتور عمر دا عمرى لا شفتو ولا بعرفو لاكين من كلام الناس عنو دا معناه زول كويس و قديماً قالوا ألسنة الخلق أقلام الحق
له التحيه


#1055353 [الحدقنو]
0.00/5 (0 صوت)

07-10-2014 01:22 PM
ياحزين جدا ليه انت حزين جدا ؟ رمضان كريم وكل عام وانتم بخير . فعلا دكتور عمر شهم جدا جدا وما ذكرته من مثال دليل على ذلك. الراجل ما قصر معاكم وللا شنو؟


ردود على الحدقنو
[حزين جداً] 07-10-2014 02:53 PM
عزيزي الحدقنو لك تحياتي . حزين جداً لأن السودان أرض وزراعة وثروات معدنية وخامة الإنسان

السوداني نفسه ميه بالميه . ولا زال شعبي السوداني يعاني ويتألم ويتوجع . وهذا هو سبب حزني .

بالنسبة للدكتور الإنسان حاشا وكلا لم يقصر معي في شئ .بل فعل الواجب وزياده وياليت كل الناس

في قامة وشموخ وأخلاق دكتور عمر . شكراً على مرورك الرائع .


#1055323 [جوك]
0.00/5 (0 صوت)

07-10-2014 12:41 PM
دكتور عمر.. كيفك
لقد حاولت مرات عديدة مقابلتك دون أن يسمح لي القدر بذلك.. وأنا أحدالمعجبين ببرنامج صحة وعافية وما شايفو في رمضان وأوعى يكون السبب السؤال داك في آخر حلقة قبل رمضان.. وأهم حاجة أنا من دفعة ناس (س. ك.)وكنت قايل الشاعر القام بتأليف القصيدة المشهورة من ناس الآداب.
الكلام كتير يا جوك وخليهو لما أديك طلة في السودان عقب عودتي النهائية في ذوالحجة المقبل. تحياتي.


#1055305 [ساهر]
0.00/5 (0 صوت)

07-10-2014 12:17 PM
أغار جداً من الأطباء ، ليس لنجاحهم المهني، ولكن لأنهم يفوزوا دوماً بقلوب المعجبات اللائي لا يعرننا أي اهتمام في حضرتهم. ومن مازاد في حسرتي على عدم دراسة الطب، أنني لا أدخل عيادة أو مستوصف أو مستشفى أو صيدلية وألوك كلمة انجليزية حتى يناديني الجميع ب (يا دكتور).

- جمع دكتور عمر خالد ودكتور المعز البخيت، الطب+ الوسامة+ الشعر ففازوا بقلوب العذارى وزادوا من نيران غيرتنا عليهم.

- دكتور شخصية موسوعية حلوة الطلة، لا تملها أبداً، خلوق ومهذب.

- دكتور معز نفس الشيء. لهما التحية.


#1055283 [orass]
5.00/5 (1 صوت)

07-10-2014 11:55 AM
متعك الله بالصحة والعافية دكتور عمر محمود خالد - يا رجل يا جميل .. بنحبك أخ وطبيب وشاعر ورياضي وكل عام وأنتم بخير.


#1055193 [ابو الدفاع]
0.00/5 (0 صوت)

07-10-2014 10:31 AM
الدكتور قال لابجوع ولابعطش .. السبب من مكيف لمكيف كدي امرق ليك مشوار كداري نص ساعة شوف جنس العطش


#1055170 [حزين جداً]
5.00/5 (1 صوت)

07-10-2014 10:11 AM
هذا الإنسان يعجز اللسان عن وصفه بطيبه ... إنسان في غاية الذوووق والتواضع . لا تمله إطلاقاً .

لقد قابلته شخصياً .كنت أعاني من إرتفاع في الضغط وقلت له فضلاً دلني على طبيب شاطر ... على طول

قال لي دكتور :الطيب الوسيلة .

وفعلاً دكتور الطيب وجدته إنساناً ذكياً متقناً عمله وفياً مخلصاً . وأصبحت جميع أسرتي تتعالح عنده

حتى تاريخ اليوم . وله التحية .

دكتور عمر قابلته أسرتي بالتلفزيون وحينما رأي أن الوقت ربما لا يجدوا مواصلات أوصلهم بسيارته

حتى الثورة وتبفي لهم مشوار قليل ثم حلف عليهم وأعطاهم عشرة جنيه للركشة . قلت لهم ماكان

يزيدها شوية ...!!!؟؟

ولدكتور عمر التحية ويكفيه فخراً أن إبتسامته لا تفارقه . وله التحية على برنامجه الناجح

صحة وعاقية . ونسأل الله أن يمتعه بالصحة والعافية ويبارك في عمره .


#1055051 [السفير]
5.00/5 (1 صوت)

07-10-2014 04:48 AM
دكتور عمر محممود خالد انسان فى غاية الروعة ولا يمل ابدا...رمضان كريم ومتعك الله بالصحة والعافية.



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية
تقييم
0.00/10 (0 صوت)






الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة