الأخبار
أخبار إقليمية
أي مسؤول في (راسو) ريشة
أي مسؤول في (راسو) ريشة


10-16-2014 01:20 AM
كمال كرار

أي مسؤول عنده عمارة أو شركة أو عربية (همر)،حرامي إلي أن يثبت أن مرتبه الذي يأخذه من (الشباك)،ساوي ثمن أملاكه المليارية.
وأي مسؤول في المؤتمر الوطني أمامه ألف علامة استفهام إلي أن يعرف الشعب السوداني أين ذهبت ال 80 مليار دولار وهي عائدات تصدير البترول في حدها الأدني منذ 1999 وحتي يوليو 2011 .

أقسم ال 80 مليار علي 40 مليون مواطن (بمن فيهم سكان جنوب السودان) وسيكون نصيب كل فرد 2000 دولار،يعني 18 مليون جنيه بالقديم في الوقت الراهن .

وأي مسؤول في اتحاد الكرة،(غير مسؤول)،طالما أنه (دق سدرو)،وقال لاتحاد الكرة الأفريقي نحن علي استعداد لاستضافة البطولة الكروية حتي لو انقرض الشعب السوداني من الإيبولا ،وعشان خاطر الدولارات جهزنا المقابر والحفّارات .

وأي كلام تقوله وزارة المالية عن دعم المواد البترولية اسمو (كلام فارغ)،ولكنه صدي صوت (سيدها)صندوق النقد الدولي،طالما كانت الوفود تهاجر لواشنطون وتقبض الدولارات ثم تعود بالطيارات .

وأي رئيس يفوز في انتخابات (مضروبة) تنظمها مفوضية (زوووبة)معناها ما عندو شعبية،أو جاء للسلطة عبر البندقية،أو مطلوب في محكمة دولية .
وأي حوار لا يفكك(الإنقاذ)،معناها نيفاشا(ناقص) قسمة السلطة والثروة (زائد)بعض أحزاب الفكة ،وبالتالي مضيعة وقت وإطالة عمر الشمولية .

وأي(كوز)في أي مؤسسة حكومية يحول مرتبه بالكامل إلي البنك،ويعيش علي الحرابيش ومعناها الرشوات والعمولات .
وأي زول ما عنده(شغلة)،يعينوه مسؤول (الكمبيوتر) في أي بعثة حج ما فيها ولا حتة كمبيوتر،فيستمتع بالريالات،والإكراميات،ثم ينتظر البعثة الجاية في قادم السنوات .

وأي سادن يقول المؤتمر الوطني يصرف علي مؤتمراته من موارده الذاتية،أسألوه عن عائدات الذهب والكهرباء والزكاة،وعن الأموال المنهوبة من الخزينة بشهادة المراجع العام،والكلام تحتو كلام .

وأي تصريحات جوفاء عن الإستقرار الاقتصادي،هي دعاية سياسية وعادي بالزبادي .
وأي زول يسمع كلام الكيزان عن التقشف،والحصار والذي منه،يقلب الصفحة عشان يشوف مباني الأمن الفاخرة،والمصفحات والمجنزرات،التي تقتل الطلبة والطالبات .
وأي صندوق إسمو(رعاية الطلاب)يقول إن داخليات البركس آيلة للسقوط،لازم يكون كاذب طالما كانت هذه الداخلية صامدة من زمن غردون باشا،مثلها مثل القصر الجمهوري ،وإلا فليهدم القصر الجمهوري لتأكيد الإدعاءات الجوفاء .
وأي حالم باستقرار سعر الجنيه مقابل الدولار،فلينظر إلي الميزان التجاري بين السودان والدول الأخري،ليعرف أن الدولار سيصل إلي 10 جنيهات في الأيام القادمة .

وأي(فعل ثوري) جاد ضد الإنقاذ يطيح بها خلال 24 ساعة،ويغلق صفحة كالحة عمرها 25 عاماً،ويفتح للسودان آفاقاً جديدة من الحرية والديمقراطية صوب الإشتراكية والعدالة الإجتماعية،(أحيّ متين أشوف الخرطوم .. لا لا يا قروية )،والمغالطنا يسأل العنبة الرامية فوق بيت ناس (سعدية)

[email protected]


تعليقات 6 | إهداء 0 | زيارات 3820

التعليقات
#1127746 [طاعون يصيب الكيزان]
5.00/5 (1 صوت)

10-16-2014 05:57 PM
قوموا الي كنس الكيزان


#1127396 [خالد حسن]
5.00/5 (1 صوت)

10-16-2014 09:31 AM
سعديه منو؟
ايام والله ذكرتنا الغنيه بتاعت ( احي متين اشوف الخرطوم .. لا لا ياقرويه)
حليل الفن والثقافه .. الكيزان دفنوا الانسان حيا مايدفنوا الفن
اهم حاجه اخراج الدين من السياسه .. العلمانيه هي المخرج


#1127379 [kakco]
5.00/5 (1 صوت)

10-16-2014 09:18 AM
ايه هذه المسخرة والكلام الفاضي البتقول فيه ده حريقة فيك وفى قلملك والحكومة والمعارضة لو انت صاح احمل سلاح زي رجال الانقاذ واطلع الشارع واقلع الحكومة زي ما قال نافع وتعال صلح البلد الكلام المائع ده هو الوصل الناس للهاوية الحين المعارضة بتفاوض عشان الحكومة تسلمها ليهم بارده ، السودان ده ما بنفع بالعناصر الشايفيه ده بدليل جربناهم حزبا حزبا وفردا فردا وهم نفسهم ابناهم واجيالهم القادمة سيتداولون السلطة الي يوم القيامة المسحوق المواطن هذا الذي اصبح يمثل 75% من المشكلة الحل دم الي الركب ومليون شهيد وقتيل داخل الخرطوم عشان البجي بعدهم يعرف فى دماء سالت والناس تمشي صاح او تموت جيف مثلها مثل القطط والكلاب وشعب استكان هذه المده كلها خليه انشاء الله مش يجوع انشاء الله ياكل القرضاء ويحلق امات طه

الحل ---- السلاح الشارع الموت نار مولعه عشان بعدها نرسي قواعد متينه
اوربا امريكا المانيا لم تقم عشان فلان وفلان قامت اساس متين من جماجم وعظام بشرية
حتي الدولة الاسلامية بنيت علي اساس متين وقامت علي مبدا عظيمة ولا يخفي عليك رفعها صحابة بواسل استشهدوا بداية الفتوحات وبالتالي لم تكن المساله بقدر كل هذه المفاوضات والشي البحصل فى السودان الحين

موتوا كرام او عيشوا جنباء تكتبون وتتكسبون من الصحف وتخفون الحقيقة


ردود على kakco
[سوداني] 10-16-2014 11:28 AM
اتفق معك


#1127366 [محمود ود احمد]
5.00/5 (1 صوت)

10-16-2014 09:12 AM
الله يحقق ليك امنيتك وتشوف الخرطوم بس لامن تجى لازم تزورنا فى بيتنا فى كافورى جنب مسجد النور والبيسأل ما بتوه دارنا قريبه ليههه


#1127309 [رانيا]
5.00/5 (1 صوت)

10-16-2014 08:33 AM
غايته عنده إبتسامات ما طبيعية أبدا


#1127252 [عيادي]
5.00/5 (1 صوت)

10-16-2014 06:57 AM
وأي زول يقرا كلامك دا الضحك بشرطو



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية
تقييم
1.00/10 (1 صوت)




الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة