الأخبار
أخبار إقليمية
بروفيسور كمال أبو سن : راتبي في اليوم «16 ألف جنيه» يفوق راتب رئيس الوزراء البريطاني
بروفيسور كمال أبو سن : راتبي في اليوم «16 ألف جنيه» يفوق راتب رئيس الوزراء البريطاني
بروفيسور كمال أبو سن  : راتبي في اليوم «16 ألف جنيه» يفوق راتب رئيس الوزراء البريطاني


أعلن عن جائزة تبلغ «10» آلاف دولار لكل من يذكر أسباب وفاة المريضة «س».
10-27-2014 12:47 PM
الخرطوم: رباب حسن
كشف بروفيسور كمال أبو سن عن ارتفاع معدلات الإصابة بمتلازمة سرطان الكلى بالبلاد، بينما تبرأ من أية مسؤولية له في وفاة مريضة تدعى «س» بمستشفى الزيتونة، مرجعاً أسباب وفاتها لإصابتها بعدة أمراض، بعد «14» شهراً من عملية زراعة الكلى، مشيراً إلى أنها تحت إشراف اختصاصي الباطنية «ه»، وفي ذات الأثناء أعلن عن جائزة تبلغ «10» آلاف دولار لكل من يستطيع أن يذكر أسباب وفاة المريضة «س».

مؤكداً أن أسباب الوفاة طبيعية، وفي غضون ذلك أماط أبو سن اللثام عن راتبه اليومي وكشف أنه يبلغ «1500» جنيه استرليني ويعادل «16» ألف جنيه سوداني ما يفوق راتب رئيس الوزراء ــ على حد قوله ــ لكفاءته. واتهم أبو سن خلال مؤتمر صحفي عقده أمس جهات لم يسمها بتضليل الرأي العام حول قضية شطبه من المجلس الطبي التي وصفها «بالكيدية»، واعتبره بمثابة إعدام مهني، مبيناً أن أسباب فصله تمت للصالح الخاص وليس العام.

الانتباهة


تعليقات 45 | إهداء 0 | زيارات 20526

التعليقات
#1136642 [البرنس]
3.00/5 (4 صوت)

10-28-2014 03:35 PM
والله دكتور ابو سن دا لو ما كفء ما كان اشتغل في بريطانيا السنين دي كلها
بعدين المقصود معروف يا ناس .


#1136530 [اصيل]
1.00/5 (1 صوت)

10-28-2014 01:07 PM
رسونا على بر هل ابو سن اشاعة ساكت ولا الحاصل شنو
كل شء يهون الا تلاعب ممارسى مهنة الطب لان النتيجة معروفة موت احمر
نحن لايهمنا بدوك كم ان شاء الله يدوك الخزانة البرطانية كلها.نحن اهمنا امانة وشرف المهنة
والدكتور البهتم بمريضو ومتابعة حالتة بدقة اذا حدث اى مكروة بعد ذلك فالاعمار بيد الله
...لكن انت تعمل العملية وقبل المريض ما يفيق تسافر واتصلوا عليك فى المطار تقول يسفروا المريض مصر .والله دى تجارة ساكت ما مهنة الانسانية كما تقولون (اصلو انت الدكتور الوحيد فى العالم ما فى غيرك)
نحن شعب راعياهو العناية الالهية يحفظنا من الانقراض بممارساتكم الا اخلاقية فية
كل الا الطب يجب توضيح الحقائق؟
اصبح علينا اتنبن احزاب وطب نلقاه من وين ولا من وين


#1136519 [الفجري داك]
3.00/5 (6 صوت)

10-28-2014 12:59 PM
أبوسن رجل كفاءه وكل الكفاءات ،إبعدت وهذا موال الأنقاذ بالطالح العام وتدمير كل
السودان ،من مشروع الجزيرة والسكك الحديدية والخطوط السودانية والنقل النهري ،والتعليم ،والصحة والقوات المسلحة ،والشرطة وووووووكل الكفاءات ،إنتهت وهاجر من هاجر وأنقسمت الشطيرة والتخبط كل يوم وكل ساعة وكل صباح ،فالتدمير والكنس حالهم لأنهم حضروايدعون الأسلام مهطعين مقطعين جياع وأغرتهم الرئاسة كحال القذافي وسوف ياتي يومهم
وأنتهى السودان تجفف بالبشكير وأصبح رمل أنسكبت علية مياة وكانها لم تنسكب جفاف جفاف
وعدم احساس فكأن حواء لم تلد آخر ،فهؤلا ء حان وقتهم بعد ربع القرن هذا .فليستعدو
وأهليهم وأخوتهم ونسائهم بكل مايملكون فقد ضاق الشعب ويعرف كيف يعيد مجدة وسلطتة ويغرف كيف يأخذ حقه فالاستعدادواجب ومالنصر الا من عند الله .


#1136465 [تفتيحة لمن فضيحة]
2.91/5 (7 صوت)

10-28-2014 11:50 AM
ابو الزفت... يعني راتب يوم واحد يحل لي كل مشاكلي!!!!!


#1136443 [الشال قلبي وسلا]
2.00/5 (2 صوت)

10-28-2014 11:15 AM
الحقيقي انه الحق ما عليك الحق علي الاعلام الكيزانى اللي لمعك وطلعك في الكفر وعمل ليك قيمة وختاك في برج ومكان عالي ما بتستحقه لانه حواء السودانية والدة الوقت وفي سودانيين اميز واكفأ منك ومن غيرك ( صنيعة الاعلام والجرايد ) في داخل الوطن العزيز ولا خارج الوطن العزيز وشوفوا اى موقع يوريك عن كل المجالات التى برز فيها السودانيين من دون اعلام ولا منة ولا تلميع يعملون في صمت وتواضع من اجل اهدافهم النبيلة واضعين السودان في حدقات العيون ختاما اصلح الله حالك وهداك يادكتور


ردود على الشال قلبي وسلا
Saudi Arabia [اب عشرة زول نصيحة] 10-28-2014 01:15 PM
اللهم زده و اعطيه على قدر نيته ... لو عاوز كباب اعطيه و لو عاوز سلطات اعطيه و لو عاوز بابا قنوج اعطيه و كثرلو من المخللات اللهم بطخلو على قد نيته


#1136384 [الفونجي]
3.00/5 (8 صوت)

10-28-2014 10:02 AM
اللهم زده من رزقك و زد سائر المسلمين والمسلمات يارب العالمين يا أكرم الأكرمين .


ردود على الفونجي
United Arab Emirates [عابر طريق] 10-28-2014 10:49 AM
يا سلام عليك با الفونجي يا ابو قلب كبييييير وصافي لبن. دعوتك جميلة نسأل الله لك بمثل ما دعوت له وللمسلمين ويمتعك بالصحة والعافية ..يا رجل يا اصيل.


#1136307 [الخرطوم]
1.00/5 (1 صوت)

10-28-2014 08:39 AM
العساكر والاطباء الاتنين حرامية
العساكر بيسرقو الحكم ويتسلطو على الشعب
والاطباء بيقرو بقروش الشعب ويشردو يستغلو بره السودان، والفي السودان بيتكبرو على اولياء نعمتهم الصرفو عليهم وعلموهم


ردود على الخرطوم
Norway [حماميزو] 10-28-2014 10:26 AM
ابو سن بضحك في ابو سنين
يازول انت انتهيت في السودان وبريطانيا . والصحفيين قاعدين يكسروا ليك في التلج سااااي . مافي زول عاقل كدة تاني بجيك معروف بتعمل العملية وبتخندق طوالي للمطار التقول كاتب شيك .؟؟ وحاتك تاني إلا تعمل عمليات للحبش ؟؟


#1136294 [عمار مرس]
1.00/5 (1 صوت)

10-28-2014 08:21 AM
سبب وفاة المرحومة حاجة الزينة هو شجع الاطباء


ردود على عمار مرس
Norway [حماميزو] 10-28-2014 10:26 AM
ابو سن بضحك في ابو سنين
يازول انت انتهيت في السودان وبريطانيا . والصحفيين قاعدين يكسروا ليك في التلج سااااي . مافي زول عاقل كدة تاني بجيك معروف بتعمل العملية وبتخندق طوالي للمطار التقول كاتب شيك .؟؟ وحاتك تاني إلا تعمل عمليات للحبش ؟؟


#1136208 [عمدة]
2.44/5 (5 صوت)

10-28-2014 05:51 AM
كل ما أعلمه عن المدعو أبوسن أنه زرع كلية لصديقنا الراحل نجم الدين محمد نصرالدين عليه رحمة الله وبالمقابل قطع الحالب و(لبد) وحين ما ساءت الحالة جرى البحث عنه دون فائدة وفى الوقت بدل الضائع وبعد أن تسمم الجسد رد على اخوة المرحوم من صالة المغادرة بمطار الخرطوم (ناصحا) بارساله للقاهرة وشاء الله أن يتوفاه فى الطائرة!!!!!!!!!!!!!!. غدا سنسمعك تردد أنك أجريت العملية بنجاح وتركته فى عهدة الخفير أو البصير لربط الحالب !! !!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!


ردود على عمدة
Norway [حماميزو] 10-28-2014 10:27 AM
ابو سن بضحك في ابو سنين
يازول انت انتهيت في السودان وبريطانيا . والصحفيين قاعدين يكسروا ليك في التلج سااااي . مافي زول عاقل كدة تاني بجيك معروف بتعمل العملية وبتخندق طوالي للمطار التقول كاتب شيك .؟؟ وحاتك تاني إلا تعمل عمليات للحبش ؟؟


#1136188 [موجوع بالحيل]
2.88/5 (7 صوت)

10-28-2014 04:20 AM
ليس كل اللاطباء في السودان والاخصائيين يتبعون الحكومه انت يادكتور عندك مشكلة وفي لغط في عملك نحن العامه لا نفهم في هذه الاشكال كان بالاحري معالجت المشكلة في السودان من دون الذهاب الي بريطانيا والخديث عن الاسترليني نحن سودانيين ومفلسيين وعايشيين كلنا نكره الحكومة ولكن نتفق في الامانه العلميه وخلي الجدل في الجرايد انت دكتور ولا مدرب كورة شاغل الدنيا بمرتبي وشنو ماعارف


#1136168 [SUDANI]
2.75/5 (4 صوت)

10-28-2014 02:36 AM
ردى على دردوق
من المؤسف حقا ان تفتح الراكوبة ابوابها لانحطاط العقل والاخلاق بدلا من حمايتها حتى ولو قبلنا بقول ادارتها (ان المشاركات والاراء المنشوره لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها)-فان هذا القول لا يعنى تخلى ادارتها عن التمسك بالقيم والاهداف الساميه ونصرة الحق والعداله فى الوطن-والا كانت منبرا للهدم والارتزاق وبؤرة لشذاذ الافاق-وان لم تعتذر الادارة عن هذا الرد الذى يمثل الشذوذ فى العقل والاخلاق فاننى لن اطالعها او اكتب لها مرة اخرى-لاننى اعتقد جازما ان السمو بقيم العدالة فى الوطن لا يمكن ان يرجى من فاسدى العقل والاخلاق


ردود على SUDANI
United Arab Emirates [المشتهي الكمونية] 10-28-2014 11:17 AM
دردوق كلامه صح وانت عايز تثبت افتراءاتك في حق د ابو سن بأي طريقة ، اذن صاحب الغرض وليس دردوق وأحمد الله أن الراكوبة بتفتح أبوابها لأمثالك


#1136165 [DR SAME AL]
2.83/5 (7 صوت)

10-28-2014 02:18 AM
الي دكتور ابوسن


بعد السلام يااخي حرام عليك تجاري الرجل التاجر مامون حميدة مافي مفارنة بينك وبين هذا الحاقد الحثالة

انا تابعتك في مدني زمان وشفت علمك وكرمك مع 4 حالات حضرتها ...

نتمني ان يحرر السودان من هولا الصعاليك ويعود امثالك ونتمني ان نتحرر من الحكومة الفاسدة والمعارضة الراكدة الضعيفة بااجمعها وان يقود هذه البلاد من يحبها ويحب اهلها كلهم بدون تفرقة ويتقي الله.


ردود على DR SAME AL
Saudi Arabia [اب عشرة زول نصيحة] 10-28-2014 01:30 PM
معقول تكون دكتور ما اعتقد لانو اسلوبك عاجز كيف يكون البروف مأمون حميدة حثالة . لاتجعل غضبك يعمي بصرك و تنعت الرجل بما لا يستحقه . حتى لو اختلفت معه .. كن واقعيا و جادل بالاتي هي احسن ..
هداكم الله واصلح حالكم ...

Norway [حماميزو] 10-28-2014 10:27 AM
ابو سن بضحك في ابو سنين
يازول انت انتهيت في السودان وبريطانيا . والصحفيين قاعدين يكسروا ليك في التلج سااااي . مافي زول عاقل كدة تاني بجيك معروف بتعمل العملية وبتخندق طوالي للمطار التقول كاتب شيك .؟؟ وحاتك تاني إلا تعمل عمليات للحبش ؟؟


#1136156 [Esam Elamin]
3.00/5 (5 صوت)

10-28-2014 01:15 AM
كمال ابوسن طبيب فاشل ، كلف دافع الضرائب البريطاني ما تجاوز مبلغ 8 مليون استرليني كتعويض لرجل اعمال بريطاني في عملية نقل كليته لوالده ، اصيب المتبرع الشاب بمضاعفات كادت ان تودي بحياته ، فقام برفع دعوى ضد الفاشل ابوسن ، فقررت المحكمة تعويضه مبلغ 8 مليون جنيه استرليني ، والفاشل ابوسن ممنوع من مزاولة
مهنه الطب في بريطانيا ، قال 1500 جنيه استرليني قال .
وهاكم الرابط لفضيحة ابوسن في التلفزيون البريطاني http://www.youtube.com/watch?v=guC2SMjIHNA


#1136126 [لبني]
1.00/5 (1 صوت)

10-27-2014 10:58 PM
الراتب في الغرب بيقتل بالسنوي. للدكاترة تأمين ضد الحوادث والأخطاء بتقوم بتغطيه مثل هذه المشكلات. مرات الدكتور بيقول غلطان والتأمين بيدفع ومرات بيمشو للمحاكم.


#1136103 [ابو سن الكضاب]
3.00/5 (3 صوت)

10-27-2014 10:02 PM
يا زول 1500 جنية استرليني
انت قايل نفسك جوزية مورينيهو ولا شنو


#1136077 [SUDANI]
2.63/5 (4 صوت)

10-27-2014 08:40 PM
فى تعليقى السابق قلت ان الراتب المذكور لا ترضى به الممرضه فى اوربا وذلك لان الراتب فى اوربا يسلم شهريا وليس يوميا وبعد رجوعى للمقال مرة اخرى اكتشفت ان البروفسر يتحدث عن راتبه اليومى وهذا عكس المعروف فى اوربا وهو مبلغ ضخم لا ولن يحصل عليه الا اذا كان له مستشفى خاص به فى اوربا ويتمتع بشهرة عاليه ولذا يتوجب عليه ان يثبت صدق كلامه ليكسب ثقة المتعاطفين مع قضيته لان الهدف هو ابراز كل الحقائق قبل الحكم الصائب


ردود على SUDANI
Netherlands [دردوق] 10-27-2014 09:17 PM
منو القال الكلام دا !!!!!! ممكن عادي يضرب ليك راتب الاسبوع

و يقوم يقسمو ليك بعدد الايام !

شفتا كيف !!! انت قايل الدكتور دا قاعد يبع في طعميه !!!!!


#1136075 [Hussein Musa]
2.75/5 (5 صوت)

10-27-2014 08:37 PM
حقيقة الواحد في حالة صدمة من مثل هذا الحديث ولم اكن اتوقعه من الدكتور...ياخي ما في حد مشكك في كفاتك الطبية وفوق كل ذي علم عليم وجل من لا يخطي وخير الخطائين التوابين..الموضوع هو ليس دخلك في اليوم كم الامر ومافيه يتعلق بالامانة المهنية والاخطاء الطبية

وانت تعيش في بريطانيا تعرف جيدا حدوث مثل هذه الاخطاء وتعرف جيدا ان القانون لايتسامح او يتهاون مع من يرتكبون مثل هذه الاخطاء وخاصة اذا ادت لحالة وفاة..دا موت احمر..السؤال المهم والمحير لماذا يكون الطبيب السوداني في الخارج متفاني ومنضبط وحريص جدا ان لا يرتكب اي خطا بينما في السودان يتعامل مع ابناء جلدته بكل استهتار واستخفاف بارواح الناس وباذدراء وتهرب من المسؤلية...شئ محزن ومؤلمجدا...اصبحنا شعب محتاج ليقظة ضمئير...


ردود على Hussein Musa
Qatar [الخرطوم] 10-28-2014 08:31 AM
لانه مافي قوانين ممكن تسجنه وتسحب منه رخصتة الطبية، ده طبعا زاتو لانه مافي قانون رخصة مزالة المهن في السودان اصلا.

لو كان في قانون زي ده بيخلي اي واحد ما يمارس مهنتة الا برخصة معينة وجهة مختصة تشرف علي إصدار الرخصة وتجديدة كل فترة، وتجريم وسحب الرخصة من اي جهة او فرد اذا اخطأ، كان الاطباء ديل اشتغلو زيهم وزي اي مهني تاني، وكانو خافو على معيشتهم. لكن بلد رئيسة نفسه عسكري وبقى رئيس، اكيد الضب فيها حيغالط التسماح انه هو التمساح والتمساح ضب كمان


#1136073 [الكدمبس]
2.99/5 (10 صوت)

10-27-2014 08:34 PM
والله يا أب سن إنت غلبك التسوى ,, مره تقول ما عندك شىء وعاوز تبيع بيتك عشان تدافع عن نفسك ومره تقول راتبك أكبر من راتب رئيس الوزراء البريطانى ,, والله أنا ما سمعت إنك شلت الشربوت في الطيارة وإنت ماشى بريطانيا وقامت الباغه طرشقت والشربوت إدفق في الطياره ,, عرفت إنك زول ماعندك موضوع ,, وبتحب الشهره والاضواء والهدايا ,, بالله عليك الله خلاص أقطع وشك وريحنا ,,


#1136043 [SUDANI]
3.00/5 (4 صوت)

10-27-2014 07:16 PM
من المؤسف والمؤلم حقا ان تصدر مثل هذا التصريحات من اى فرد ينتمى لجهاز اهم ركائز مؤهلات كل العاملين به تنحصر فى التحلى بالانسانيه والتفانى بكل القدرات العلميه والاخلاقيه فى خدمة المريض وهوتصريح ملئ بالمتناقاضات وسؤالى الذى ارجو الاجابة عليه هو: من هو الطبيب البروفسر فى كافة اوربا الذى يقبل بهذا المبلغ الذى لا تقبل به الممرضه؟ واين هذا المجلس الطبى الذى لا يحترام ادنى واجباته نحو الشعب السودانى المغلوب على امره فى الكشف عن الاسباب التى دفعته لشطب هذا البروفسر الذى لجأ للجرائد لاشانة سمعته؟ ام هل ان افراده استلموا الجائزه المعلنه اواضعافها؟ ولماذا لا ينشر الاسباب العلميه لوفاة المريضه حتى لا يستفيد المتهم من عامل الزمن والاغراءت الماديه؟ ولماذا لا يفرض هذا المجلس نشر ابحاث البروفسرات الذى امتلاء به سجلهم الكترونيا من بعد ان ان كانوا لا يتعدون اصابع اليد الواحده قبل منتصف التسعينات؟ ولماذا يحجم هذا البروفسر عن اعلان رقم سجله الطبى فى فى انجلترا ليدعم به صدق لسانه؟ اما كان الاحرى به ان كان من الميسورين حقا ان يقوم ببناء مستشفى خاص به لا يكلف الفقراء شططا وهذا كفيل بالدفاع الصامت عنه ونجدته يوم لا ينفع مال ولا بنون؟


#1136040 [جربندي مسطول]
3.00/5 (3 صوت)

10-27-2014 07:03 PM
10000 دولار !!! تحدي و تشالنج في غير محلو .. كأني بك تريد ازاحة سبب موت المريضة ص عنك بسبب الاهمال و رميه علي اختصاصي الباطنية .. و بعدين هي شبعت موت و تحللت بالقبر .. يعني لو نبشنا القبر و جبنا جماعة ال FBI سوف يقفوا محتارين !!! صمتك أفضل من الكلام يا دكتور .


#1136009 [ابو محمد]
2.75/5 (5 صوت)

10-27-2014 05:53 PM
اتركو الراجل في حاله


#1136006 [عدلان]
3.00/5 (2 صوت)

10-27-2014 05:45 PM
الله يرزقنا جميعا بالحلال الطيب ويدينا العافية ويجعلنا ممن يحب الخير للناس ويعدنا عن الماديات وحب المال بشكل مبالغ فيه


#1135984 [جركان فاضى]
2.40/5 (9 صوت)

10-27-2014 05:12 PM
كل ذا نعمة محسود...والحسد فى العلم معروف تاريخيا لكل من درس فى جامعة الخرطوم عندما كانت جامعة...فكانت جامعة الخرطوم تعج باعداد كبيرة من الطلاب المجانين...كانوا هم الاذكياء ولكن حسدهم اساتذتهم واحبطوا طموحهم الاكاديمى فكانت صدمتهم كبيرة ادت الى جنون كثير منهم...وقد حدثنى احد عمداء كلية الاقتصاد ان هناك طالبا حصل على المرتبة الاولى فى الاقتصادفى السنة الرابعة غير ان الاساتذة استهدفوه فى السنة الخامسة فتخرج بترس مع الرحمة...أى والله هذا أسأل عنه يوم القيامة...فكيف يسمح له بالتخرج بالمرتبة الاولى وجميع الدكاترة حاصلين على المرتبة الثانية؟
اما فيما يتعلق بالبروفسير ابوسن فانه محسود ولاشك فى ذلك...وله الحق ان يقول ان راتبه كبير لانه ظلم...ويحق للمظلوم ان يفتخر


#1135979 [حسن]
3.00/5 (2 صوت)

10-27-2014 04:51 PM
هى كده الدنيا
فيها النوع الذى ده
والقصه كلها يمكن فهمها متى ما ادركنا النشاه والتربيه
وانت يا خينا مثال يتماها مع نتاج الانقاذ فما شزيت ولا حاجه


#1135969 [فكرى]
2.00/5 (4 صوت)

10-27-2014 04:17 PM
أسباب وفاة المريضة (س) هى مشئة الله بعد معاناة دامت «14» شهراً من عملية زراعة الكلى،التى أجريتها ..

إنجازاتك المهنية إن وجدت هى التى تدافع عنك فلا داعى للتخبط ..


#1135946 [متأمل]
3.00/5 (15 صوت)

10-27-2014 03:32 PM
يعني في النهايه ح تصرف منها شنو في اليوم
ما ياهو زينا ح تاكل خمسه عيشات وسلطه ووو
وح تلبس بنطلون وقميص زينا
وح ترقد في سرير وتتغطى بملايه زينا
وح تاكل ليك قطعتيين بسبوسه وفنجانيين قهوه وشاي زينا كده
اها وبعدييين يعني
وفي النهايه برضو زينا كده حفره في الارض تندفن فيها وخلاص
والقروش دي كلللللها تمشي ل اولادك
وانتهى الفيلم


ردود على متأمل
Sudan [عبد الله] 10-27-2014 06:48 PM
يا متأمل يا مرتاح انت بتاكل فى اليوم خمسه عيشات والله مفترى . فى ناس ما لاقين فى اليوم عيشه واحده خليك من خمسه . ومنو القال ليك فى لندن الغطاء بملايات .وانت كمان بتاكل بسبوسه . انت من الجماعه الظاهر عليك . خليك مننا نحن اطفالنا نسو حاجه اسمها بسبوسه يا مفترى .والحفره دى ما راجيه بروف ابو سن براهو ولكنها لكل انسان . واحسن يخلى لاولاده قروش عشان مافى واحد يفكر يبقى جبهجى

Sudan [Abood] 10-27-2014 05:22 PM
ان تذر ورثتك اغنياء خير من تذرهم عالة يتكففون الناس .... ربنا يذيدو ويدينا ... الراجل سألوه من راتبو وجاوب عادى يعنى وعلى الاقل بيستحقها لعلمو وفهمو واجتهادو ماعشان تمكين او فساد مصلح باسم الدين ... غايتو السودانين ديل اى شئ عندهم فيهو رائ سلبى حيرتونا والله

[جركان فاضى] 10-27-2014 05:00 PM
يمشى لى اولاده بس مش فى الوادى الاخضر


#1135943 [ابوركبة]
3.00/5 (8 صوت)

10-27-2014 03:30 PM
لقد ان الاوان لهذاالنرجسي المغرور ان يصمت
تحية اجلال لدكتور عادل رحمة الطيار بمستشفي ابن سينا ودكتورة منال بمركز احمد قاسم الذين يعملون في صمت دون زخم اعلامي وقد قاموا بزراع اكثر من 700 كلية بنسبة نجاح بلغت 100%
يقول المثل الانجليزي ان البراميل الفارغة هي التي تحدث ضجيجا
ننصح دزابوسن بتقليل جرعة الاسترويد


ردود على ابوركبة
Saudi Arabia [ابوركبة] 10-28-2014 10:51 AM
يا ابودردوق
فعلا ان الجهل مصيبة
في حلقة الاسبوع الماضي من برنامج صحتك بالتلفزيون السوداني استضاف بروفسر مامون د.عادل رحمة ودكتورة منال وقد تحدث الضيوف بوقار العلماء عن زراعة الكلي بالسودان وعرضوا نتائجهم بالارقام من دون غرور او ادعاء.....وهي نتائج باهرة....وليست هي من بنات افكاري
لا اريد ان انزلق لمستواك الفكري الضحل فيكفي رد الاخ سوداني عليك الموجود اعلاه

Netherlands [دردوق] 10-27-2014 08:39 PM
المفروض تصمت انتا . انت بتعرف احمد قاسم ووين ! 700 كليه

بنسبة نجاح 100% !!!!!!!

براميل فارقه صااااح زي براميلك الجبتها ! ما تتكلم في حاجه انت

بتعرف عنها حاجه !! لو سمحت اصمت ! اصمت !


مع كل التحيه للدكتور ود ابو سن .


#1135925 [طبيب بالمعاش]
3.00/5 (3 صوت)

10-27-2014 03:14 PM
هذا الحديث يخالف اخلاقيات المهنة ان كان حقاً قد ادلى بذلك.


#1135921 [سوداني]
3.00/5 (4 صوت)

10-27-2014 03:09 PM
انت مره تقول انا مفلس ولست بثري واضطريت ابيع شقتي الفي العمارات بسبب ضايقة مالية ومره تقول راتبي 16 مليون
اها نصدق ياتو كلام والاتنين مارقات من خشيمك ده


ردود على سوداني
Saudi Arabia [AHMED SALAH ALDEIN] 10-27-2014 06:35 PM
أماط أبو سن اللثام عن راتبه اليومي وكشف أنه يبلغ «1500» جنيه استرليني ويعادل «16» ألف جنيه سوداني ما يفوق راتب رئيس الوزراء - على حد قوله - لكفاءته
في اليووووووووم مافى الشهر ياسوداني


#1135917 [مكرام]
3.00/5 (5 صوت)

10-27-2014 03:07 PM
متي اصبح بروفسور?هل يمكن ان تمدونا بالبحوث التي قدمها?هل هو بروفسور انقاذي ام بريطاني?،بعد شوية بروفسور بلة الغايب


#1135890 [ماجد]
2.58/5 (7 صوت)

10-27-2014 02:42 PM
ربنا يحفظك يا ابو سن و يبعد عنك الكيزان الحاقدين


#1135870 [حسام عمر]
3.00/5 (4 صوت)

10-27-2014 02:25 PM
راتبك نستفيد منه شنو نحن عايزين كفاءات تخدم البلد


#1135867 [Osman]
2.88/5 (4 صوت)

10-27-2014 02:22 PM
والله كذاب
راتبك ياتو بعد منعوك من ممارسة المهن الطبية في بريطانيا، انت نسيت لمن كنت في دولة الإمارات قبل ثلاثة سنوات راكب ليك سيارة لينكولن مخلوع وفرحان بيها، خاف الله انت وامثالك الرجعتو البلد 100 سنة الي الوراء.
عندي ليك سؤال ارجو الاجابة عليه بكل أمانة (هل تستطيع أن تنام مرتاح البال)؟؟؟


ردود على Osman
Sudan [Hisho] 10-27-2014 07:49 PM
هل المفلس ينام مرتاح البال ؟؟؟؟؟؟؟؟ ياخى مالك ومال بالو لو بيدهو مليار كل يوم دى فارقة شنو


#1135861 [مصاب بمرض حامد]
3.00/5 (3 صوت)

10-27-2014 02:16 PM
الكراسابل...... ما شاء الله يعني لمن تجي السوق العربي تفك استرليني عايز ليك شوالات عديل كده


#1135853 [محمد مبروك]
2.50/5 (3 صوت)

10-27-2014 02:09 PM
عزيزى الدكتور ابو سن - تحية و احتراما.
قليلا" من التواضع. هكذا يكون العلماء الذين اختصهم اللة بقضاء حوائج الناس و اذا خاطبهم الجاهلون قالوا سلاما.
نسأل اللة ان يجعل الشفاء لكل من اتاك مريضا".


#1135842 [aldufar]
2.90/5 (9 صوت)

10-27-2014 01:48 PM
زاد الله في خيرك وكفاك شر اولاد الحرام .


معروف زبانية وزارة الصحة بالسودان هم السبب كلاب المؤتمر اللاوطني والخسيسين الفاسدين من لفق لكم تلك التهم وانتم بريئين منها براة ابن يعقوب .


ولكن نتمنى أن لا تبخيل على اهلنا بالعلاج اينما كانوا لضعف حالة اهلنا الصحية .

وكما اتمنى ان تساعدنا في بناء مستشفى راق بالجزيرة خاص لعلاج مرضى الكلى بمساعدة الخريين من اطباء بريطانيا وان يكون العلاج فيه بسعر رمزي والمعدم مجانا .

وان الله لن يضيع اجركم والثواب مدى الحياة .

وفقكم الله وكثر من امثالك لاسعاد اهلنا بالسودان ، ومتعك بالصحة والعافية انت وذريتك
واسرتك الكبيرة والصغيرة اينما كنتم وفقكم الله فانت كنز سوداني مثل الذهب كثر الله من امثالك .


ردود على aldufar
United States [ALI] 10-27-2014 06:57 PM
بناء مستشفي في الجزيرة!!!! هو الجزيرة بقي فيها زول ١٥ في المية مغتربين وال ٨٥ في الخرطوم.


#1135838 [Halim]
3.00/5 (2 صوت)

10-27-2014 01:43 PM
اولا اين يعمل هذا الرجل فى بريطانيا وماهى رقم التسجيل فى المجلس الطبى البريطانى وهو مفتوح للجميع للاطلاع على بيانات اى طبيب يعمل فى بريطانيا من اى مكان فى العالم لمنع الاحتيال وضمان سلامة المرضى حسب علمى وعملى فى انجلترا المرتبات تحسب بالأسبوع او الشهر وليس باليوم الا فى حالة العمال الموقتة
روانى لاعب مانشستير يونايتد يتقاضى 90 الف فى الأسبوع


ردود على Halim
Sudan [Abood] 10-27-2014 05:31 PM
وقت متاح للجميع ماتخش على الموقع وتورينا ليهو ....بالمناسبه المرتبات الاسبوعية دى فى بريطانيا اغلبتا ل لعيبة كرة القدم وده عشان الاتفاق الموقع بينهم مثلا اتفاق ب 20 مليون استرلينى وعقد 3 سنوات تقسم مرتبات اسبوعية للثلاث سنوات . الطبيب العمومى فى بريطانيا بياخد مابين 8 الف الى 12 الف شهرى وهناك حالات يذيد فيها المرتب كزيارة المرضى والاسر المسؤل عنها واهتمام الطبيب وتحسين حالة المشرف عليهم .اما الاخصائين فهذا يخضع لعقودات حسب الطبيب وتجربته فى العمل والجهة المتعاقد معها وسمعة الطبيب من حيث عدد العمليات الناجحه وووووووووو

United Kingdom [معتز قيلي] 10-27-2014 05:21 PM
روني راتبو300 الف إسترليني في الأسبوع


#1135835 [abuw ael]
3.00/5 (3 صوت)

10-27-2014 01:39 PM
ايه المناسبة لذكر الراتب فى ناس حيوانات ولصوص بيتقاضوا اضعاف الراتب الفرحان به دا بطل الغرور


#1135833 [صلاح فضل السيد حامد]
2.94/5 (6 صوت)

10-27-2014 01:37 PM
ياناس الراكوبة عارف إنكم ما ح تدوني تلفون دكتور أبو سن بس ياريت لو توصلوا ليه هذا السؤال !
عندي شقيقتي الصغرى 48سنة مصابة بالفشل الكلوي قبل عام ونيف وحاولنا بعد أربعة شهور من إصابتها بعمل زراعة كلية لها من بنتها وكل الفحوصات طلعت سليمة عدا شقيقتي وجد عندها أجسام مضادة حالت دون زراعة الكلية لها وسؤالي هو ؟ ماهي هذه الأجسام المضادة أوليس هناك علاج لها.
ولكم الشكر صلاح فضل السيد حامد 0554319357 مكة المكرمة.
وياريت لو رابطه على الفيس بوك.


ردود على صلاح فضل السيد حامد
Egypt [ادم عسكر] 10-27-2014 08:34 PM
خلافا لراى على انا افتكر الاجسام المضادة المقصودة هنا anti HLA cytotoxic anti bodies وهى اجسام مضادة ترفض الكلية المزروعة ويمكن محاولة تخفبفها قبل الزرع اما الاجسام المضادة التى تكلم عنها على فدى مفروض تكون معروفة من الاول بالنسبة لمريض القودبوتشر سندروم وتلقائيا المريض بكون استخدم العلاج الموصوف من قبل حتى يخرج من مرحلة الخطر قبل التفكير فى زراعة الكلى

United Arab Emirates [Hassan] 10-27-2014 07:42 PM
الاخ صلاح
تحية طيبه
أسال الله لاختك الشفاء العاجل شفاء لا يغادر سقما
نصيحة لله ورسوله:
أنا طبيب أخصائي-مقيم بالامارات
دكتور ابو سن للاسف الشديد ليس له تصريح للعمل بالسودان منذ البدايه لان المجلس الطبي رفض تسجيله كاخصائي جراحة مسالك بوليه من عقود خلت لكن نسبة للواسطات وتدخل الكيزان وتطبيل اعلامهم صارت له شنه ورنه في بلدنا الحبيب مثله مثل الكثير وأصبح مشهور بزرع الكلى وهو لا يفقه شيئ عنها. السودان ملئ بالاختصاصيين والاستشاريين لا تلقي باختك للتهلكه واعرف له الكثير من المصايب غير حادثةالحاجه الزينه مريضة الزيتونه لها الرحمة

الا هل بلغت اللهم فاشهد

United States [ALI] 10-27-2014 07:07 PM
الاجسام المضادة لغشاء خلايا الكلى
(anti glomerular basement membrane ab)











في اختبار الاجسام المضادة لغشاء خلايا الكلى يتم التحقق من وجود اجسام مضادة موجهة ضد الغشاء القاعدي (basal membrane) الخاص بكبيبة (glomerulus) الكلية.

في بعض الامراض الالتهابية التي تصيب الكلى يتم انتاج اجسام مضادة تهاجم الغشاء القاعدي للخلايا التي تبني كبيبة الكلية، وهي عبارة عن مجموعة شعيرات دموية (Capillaries) تتم فيها التصفية الاولية للمخلفات من الدم وارسالها الى النبيب الكلوي (Renal tubule).

هذا الجسم المضاد يسبب ضررا وخللا في وظائف الكلى.

قد يكون التهاب الكلى الناتج عن هذه الالية صعبا واحيانا مصحوبا ايضا بضرر يصيب الرئتين، عندها يعرف باسم متلازمة غود باستشار (Goodpasture's syndrome).

في حال وجدت هذه الاجسام المضادة في الدم لسنا مجبرين على اخذ خزعة (Biopsy) من الكلية للحصول على التشخيص، لكن ومع ذلك يتم احيانا اجراء هذا الفحص في سبيل تقييم توقعات مال المرض (Prognosis). معظم المختصين يوصون باخذ خزعة من الكلية.

علاج الاشخاص الذين يعانون من هذا المرض يشمل فصادة البلازما (Plasmapheresis)، كورتيكوستيرويدات (Corticosteroids) وسيكلوفسفاميد (Cyclophosphamide- دواء يعمل على تثبيط جهاز المناعة

Saudi Arabia [AKRAM] 10-27-2014 06:21 PM
اللهم اشفيها وعافيها


#1135829 [المستشار ابوعلي]
2.66/5 (6 صوت)

10-27-2014 01:30 PM
رجـــــــــــل بقامه وطن


#1135822 [عجيب]
2.50/5 (5 صوت)

10-27-2014 01:21 PM
ليست أخلاق علماء. رحم ألله علماء زمان.


#1135821 [ساهر]
1.50/5 (4 صوت)

10-27-2014 01:20 PM
تستأهل. لقد فقدنا عالماً فذا نتيجة لصراعات ومصالح فردية ضيقة. قمت بعمل (ششنة) بسيطة بتحويل هذا الراتب بالريال السعودي على الكرنسي كونفرت فبلغ 271478 ريالاً أي بما يفوق راتب أي من الطبيبين السودانيين (200000 ريال) لكل منهما، اللذين قيل أن متداخلاً سعودياً على برنامج تلفزيوني احتج على ضخامة هذا الراتب الذي يتقاضانه.

رغم ذلك، ما كان يجب على البروف الإفصاح عن راتبه، ولكن يبدو أنه كان زعلان علينا شوية يعني (شوفوا أنا برة كيف، وكيف أهنت بالداخل). نهدي هذا الراتب للكاتب الصحفي الطاهر ساتي الذي أقام الدنيا وأقعدها احتجاجاً على راتب رئيس هيئة سوق مال الخرطوم، وللحق فقد كان راتبه عادياً جداً بالنسبة للمنصب الذي كان يشغله خصوصاً وأنه استقدم من الإمارات التي فيها المرتبات ب (الكيلة والشوال).


#1135819 [كسار الثلج]
3.00/5 (3 صوت)

10-27-2014 01:15 PM
هذا يعني أنك شغال لوكم يا ابوسن.,هذه شغلة يترفع عنها الكثير من الأطباء الانجليز اولاد البلد وهي متروكة للاطباء الأجانب من هنود وباكستان ونيجيريين ومن لفّ لفهم.هذه شغلة رزق اليوم باليوم.


#1135817 [عبدالله جني]
3.00/5 (3 صوت)

10-27-2014 01:13 PM
ليس العيب أن تفشل ولكن العيب أن تكون رجل انتهازي وغير انساني وكاذب
استحي يا بروف


#1135811 [دقنة]
2.97/5 (9 صوت)

10-27-2014 01:05 PM
برا البوبار الكاتلكم ده ،،،، شي جايب لينا الجلا مافي !!!!!!


ردود على دقنة
Saudi Arabia [mahmoudjadeed] 10-27-2014 06:19 PM
بوبار ونص .. ما هكذا يا سعد تورد الابل .

Saudi Arabia [منتظر] 10-27-2014 03:04 PM
ياخي هذا مو بوبار هذا شخص شاعر بالظلم والقهر ولازم ينفس عن نفسه ،، قول الله ينجينا جميعاً من كيد الكائدين .

Saudi Arabia [ساهر] 10-27-2014 01:30 PM
ولا بوبار ولا حاجة. شخص يدافع عن نفسه لذا لابد من إيراد بعض التفاصيل السرية حتى يقوي دفوعه.



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية
تقييم
2.38/10 (6 صوت)




الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة