الأخبار
أخبار السودان
ازار سيدنا عمر ودستور عمر
ازار سيدنا عمر  ودستور عمر


01-05-2015 06:49 AM
شوقي بدري

بعد ثورة الطلاب العالمية في اوربا والتي بدأت في باريس 1968 ، تكون وعي طلابي او شبابي في كل العالم. وكانت هنالك مجموعات فكرية وسياسية ضخمة . منهم البروفوكس والباسفيست والهيبيز والتروتسكيون والماويون والوجوديون والفوضويون والشيوعيون اللينيون والماركسيون.... الخ وكانت حلقات النقاش لا تنفض الا لتنعقد من جديد .

وفي جامعة لند كنا نحسم التروتسكيين . ونفند نظرية الثورة الدائمة . ونناقش الديالكتيك والقيمة الزائدة البسيطة والمركبة وان الامبريالية اعلي مراحل الرأسمالية وحرب فيتنام .... الخ وكان بعض الطالبات وهن من تركن مقاعد الدراسة في المدارس الثانوية قبل سنه او سنتين . يعمدن الي محاولة افحامنا بما تعلمن في الثانويات عن الاسلام .وكنا نقول للسويديين ان الاسلام قد دعي للاشتراكية والديمقراطية وحقوق الانسان وكان متطورا جدا في عصره. ولم يكن الاوربيون يعرفون ان الاسلام مكمل لليهودية والمسيحية . وان المسلم يعتبر غير مسلم اذا لم يؤمن بسيدنا المسيح والسيدة مريم العذراء . والي اليوم يستغرب الاوربيون عندما نتكلم عن ايمان المسلم بالمسيح وبقية الرسل.

ولكن يبقي في فهمهم ان المسلم هو انسان شهواني لايهمه غير الجنس والمال وملئ البطن . فالاتراك الذين حكموا جزء كبيرا من اوربا ، لم يهتموا الا قليلا بالعلوم والادب والفن والطب والتراحم والشفقة . ولقد طوروا فقط مقدراتهم القتالية ومارسوا النهب والاغتصاب .

واذكر انني كنت احكي لهم عن سيدنا عمر ابن الخطاب الذي اتي لبيت المقدس وهو بسيط في ملبسة وزاملته . ورفض ان يصلي في كنيسة النصاري . وهذا محلل له . وكان يخشي ان يطالب المسلمون من بعده بملكية الكنيسة . وان مفاتيح كنيسة القيامة ، تحتفظ بها عائلة مسلمة , لان المسيحيين اختلفوا في من يمسك بالمفاتيح . وبما ان خليفة المسلمين قد امن الكنيسة ، فالمسلمون الي اليوم امناء علي المفاتيح .

كنا نحكي لهم عن الاسلام الحقيقي . وكيف ان اقوي رجل في العالم في ذالك الزمان الخليفة عمر بن الخطاب رضي الله عنه في عام الرمادة لم ياكل لعام كامل سوي خبز الشعير مع الزيت حتي ازوق لونه . وكان يصلح ازاره وكانت بالازار سبعة رقع .
الشئ الوحيد الذي امتلأ بالرقع عند عمر البشير هو الدستور . ودلوكت عملوا ليه 18 رقعة . ودي البداية . ومحافظ الجزيرة كان يصوم يومين في الاسبوع وكان يبسط موائد الافطار المترعة لحاشيته . وافسد المعني للصوم . ولا يجتمع الكيزان حتي لمناقشة التقشف بدون بسط الطيبات . وحتي في هجرنهم الي الله في بورسودان ظهروا وهم يفتكون بالاسماك البحرية والسلات والمخبازة .

هذا القانون الذي صار مليئا بالدبر ، يعطي البشير الحق في تعيين الولاة وشاغلي المناصب الدستورية والقضائية الاخري ، وقيادات القوات المسلحة والشرطة والامن . ويعفيهم وفق احكام الدستور . واول مرة اسمع بي برلمان يصوت علي كل شئ الاجماع . طيب جايبنكم ليه ؟؟

جماعة الترابي شربوا من نفس الكاس الكان بيشربوه للناس . ولهذا حردوا وتركوا البرلمان . السؤال ليه ما استقالوا . والترابي عارف انه ده الاسلوب الكان بيستعملوا زمان . يضوقوا الناس الفلوس . ودلوكن لو الترابي قال ليهم استقيلوا حيرفضوا . دي شبعة بعد جوع . والترابي عامل خط رجعة كالعادة بكرة النظام يقع ، يقول انتو شفتونا طلعنا من البرلمان . ذي مسرحية سقوط نميري .طلع ذي الشعرة من العجين .

وين الشريعة الغير مدغمسة ومظعمطة الكان البشير بيتكلم عنها . اسي الحاصل ده دخلوا شنوا بالاسلام ؟؟ يا يكون سيدنا عمر غلطان او يكون عمر بتاع الانقاذ غلطان . لان هاذين متضادان . فرق السما والارض . اذكر ان رئيس فولتا العليا .. بوركينا فاسو ,,في الستينات كان مستلم 6 وزارات . طيب البشير ما كوش علي كل حاجة .

المشكلة انو الجيش بقي بيعمل زغللة للكيزان . وهم عارفين الضربة بتجي من الجيش . ولصعوبة ايجاد المعادلة صار البشير لا يثق الا في الكاكي . واول مرة في العالم في زول لابس كاكي وهو في العقد الثامن من عمره . الا مارشال المديرية ,, مجنون كان بيلبس لبس مارشال في الخمسينات ويتواجد في مديرية الخرطوم ,, والجنجويد او الدعم السريع هم الانكشارية . ولانهم تنظيم ولد سفاحا فلم يكن هنالك الا ان يقوم الامن بتبنيه . وكان عطا هو القابلة القانونية . وحميتي قال ,, انحنا الجيش وعندنا البلف نقول اقبضوا الصادق يقبضوا الصادق . هنا لا يسعني الا ان اعلن اعجابي بعبد الرحمن الصادق . وهو رجل صادق وله قناعة لا تتزحزح. ولهذا لا يتأثر حتي بمرمطة الوالد وتلتلته . له اعجابنا ونخلع القبعات . فهذا وضع غير مصدق .

لقد اهتزت صورة المسلمين كثيرا . وحكومة السودان وتجويعها وبطشها بشعبها يحير البشر . ولكن اخبار الاغتصابات في السودان . وبيع الايزيديات وسبي النساء قد جعل الاغلبية تنظر الي المسلمين كوحوش . ونسمع حتي من يتعاطفون مع المسلمين ، ما هذا الهوس بالجنس عند الرجال المسلمين ؟؟؟

قديما كان الطالبات السويديات يعرفن ما درسوه في المدارس الثانوية عن الاديان . ويتذكرون ترجمة لآية من سوره البقرة . والترجمة السويدية . تقول ان المراة ماهي الا مزرعة للرجل ، يدخلها عندما يريد وكما يريد . وكن يأتين بالكتاب لتأكيد كلامهم . واذكر انني في اول اجازة قد سألت البروفسر مالك بدري عن نفسير الاية التي تقول في الحقيقة . ,, فان نساؤكم حرث لكم فأتوا حرثكم اني شئتم ,, صدق الله العظيم . والتفسير كان ان المهاجرين عندما اتوا الي المدينة كانوا يريدون ان يمارسون الجنس بطرق مختلفة مع نسائهم . وكان نساء المدينة يستلقين علي ظهورهن فقط . وكان عند اهل المدينة اقتناع ان المراة اذا استلقت علي بطنها ، يولد الطفل وهو احول .

ولهذا نزلت الآية . والترجمات قد تغير المعني . ويمكن توضيح الخطأ . ولكن من المؤكد ان اعمال حكوماتنا التي تتمسك بقشور الاسلام تجعل الناس تنفر من المسلمين . وليس هنالك تفسير مقنع بالنسبة لنا ، ناهيك عن الآخرين . تصويت نايجيريا التي كان يحكمها المسلمين في ديمقراطيتها في مجلس الامن، دليل علي كره وخوف الناس من اسلام بوكو حرام . وزعيم بوكوا حرام والكثيرون تخرجوا من مدارس الانقاذ . ان ما تمارسه الانقاذ ليس باسلام ،انه هوس فقط .

[email protected]






تعليقات 7 | إهداء 0 | زيارات 3491

التعليقات
#1182752 [محمد احمد]
0.00/5 (0 صوت)

01-06-2015 11:06 AM
عم شوقي سلام جد جد مشتاقين الحقيقه تعلقت بك لربطك بين ثقافتين البندر والريف وقرات كل مقالاتك بنهم شديد وخاصه احمد دريج والان ابو عيسي شكرا شوقي محمد احمد سنجه الامم المتحده


#1182269 [ود الكوتش]
0.00/5 (0 صوت)

01-05-2015 02:37 PM
ذكرتني يا عم شوقي قصه حصلت في مسجد الحي في خطبة الجمعه،القصه حصلت قبل الانتخابات الفاتت بمده بسيطه الامام في الخطبه داير يقنعنا انه أمير المؤمنين والصحابي الجليل المبشر بالجنه عمر ابن الخطاب في وجه شبه من ناحية حكمه و حبه للاسلام بعمر البشير "بشه" المبشر بدخول محكمة لاهاي ، غايتو الخطيب ما خلا حاجه وشويه كده ويقول لينا جراله حسنه الناس ديل تيمان في أزمنه مختلفه ،الطريف في الموضوع أحد المصلين غلبتو شديد الحكايه وما استحمل قام وقف على حيله وقال للخطيب " استغفر الله يا راجل استغفر الله" وقام طلع من المسجد وبعد ثواني قاموا اتنين وراهو وبالجد أنا فكرة المرقه كأنه الرجل قراها فيني لكن قلت لنفسي أنا جاي أصلي لرب العباد العايز يقوله خطيبنا أعتبره ونسة كوز، البشير ماسك حبل الاسلام ده في خطاباته عشان ماعنده شئ تاني يتكلم عنه بمعنى لا شغل العطاله لا وحد الشمال والجنوب لا بقينا من مصاف الدول الصناعيه لا لا لا لا ...الخ أكتر من 25 سنه وما عمل شئ نافع ويتفاخر هو و جماعته بالكباري وشوفنا الهوت دوق والبيتزا!! التقول اللجان الشعبيه في الأحياء بتوزعها لينا ، ما أي شئ بقروشنا والسودانيين من قبل حكومته بعرفوا أي ماركه في أي حاجه اذا السوداني ما سافر بكون في الحله زول مغترب او اغترب لكن البشير زول مستغرب ولا يفقه شئ لا في العسكريه لا في رئاسه، تركيا في 12 سنه بقت دوله اقتصاديه عظمى ، حمارنا ده في ربع قرن شئ سمح وزين الناس تتذكره بيهو مافي


#1182210 [توتو بن حميده آل حميده]
0.00/5 (0 صوت)

01-05-2015 01:07 PM
إقتباس:
((هذا القانون الذي صار مليئا بالدبر ، يعطي البشير الحق في تعيين الولاة وشاغلي المناصب الدستورية والقضائية الاخري ، وقيادات القوات المسلحة والشرطة والامن))

طيب إذا كان القانون يعطي عمر بشير الحق لفعل كل هذا - فمن الذي اعطى عمر بشير الحق ليحكم السودان؟ الصادق المهدي صناديق الاقتراع فوضته لحكم السودان وكذلك محمد عثمان الميرغني وغيرهم لم يأتوا بليل ولم يستولوا على شيء بقوة السلاح بل عن طريق الانتخاب الحر المباشر- الاجابه طبعا معروفه هو لم ينتخبه احد غير الكيزان اللصوص الحراميه النفعيين وإذا كنت شجاع يا عمر بشير كما تدعي فدع الامر يتم عن طريق الانتخابات الحره النزيهه بدون غش وخداع ودغمسة الكيزان عليهم اللعنه والله سوط واحد ما تلم فيه لأنه جوقة اللصوص والمطبلاتيه الكيزان عليهم اللعنه سينفضون من حولك - ستفوز إنشاء الله بعدد 35 مليون سوط عنج كردفاني أصيل وكل مواطن يجي يفش غبينته فيك الى ان يتقطع سوطه ليتم بعدها تسليمك لأهالي دارفور اولئك الذين لهم معك حساب خاص - بلاش لاهاي بلاش كلام فارغ....


#1182200 [نيض التعب]
5.00/5 (1 صوت)

01-05-2015 12:59 PM
(الشئ الوحيد الذي امتلأ بالرقع عند عمر البشير هو الدستور) .. ولا تنسى الكذب والحلف بالله و (طق الطلاق) .. الشئ الوحيد الصادق عند البشير هو الرقص .. عمر ده في الرقيص أصلو ما بيعرف يكضّب ..


#1182038 [Kudu]
5.00/5 (2 صوت)

01-05-2015 08:30 AM
رائع عمنا تعطرنا دائما من كل بستان زهرة..


#1182022 [عبوودى]
5.00/5 (1 صوت)

01-05-2015 08:10 AM
لكن فاتت عليك انو الصادق المهدى سبب المشاكل دى كلها


#1181995 [عادل الامين]
3.00/5 (1 صوت)

01-05-2015 07:15 AM
الملك عبدالله خادم الحرمين الشريفين جمع علماء السلفية وقال ليهم شوفو حاجة جديدة تضع الاسلام في مكانه السامي في مستوى العصر..وخلفان قال ما داير اخوان مسلمين في الامارات اطلاقا.. وانصار الله ينظفو في اليمن بالبالدوزر ..و الرئيس السيسي رئيس مصر قال لي ناس الازهر يا تجيبوا لينا ثورة دينية ولى نشمع الازهر بالمشمع الاحمر...ونحن في السودان حيطة الجالوص المذبلة بي عفطت بقر دي ما دايرة تقع ترحينا عشان تخرج كنز الغلامين اليتيمين محمود محمد طه-الثورة الثقافية - وجون قرنق-السودان الجديد ..عشان يستعيد السودان مكانته الريادية وحضارته الاخلاقية في العالم..عليك الله احتفل مع السويدييين في 18 يناير بالفكرة ووريهم موقعا فيها قسم الانجليز مقنع جدا للسويديين..وعلى كل السودانيين وفي كل العالم ان يحتفلو بالفكرة الجمهورية بنت السودان "الاصيل"..خلاص انتهى الفجر الكاذب وجاء زمن الوعد الحق



خدمات المحتوى


مساحة اعلانية





الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة