الأخبار
أخبار إقليمية
وزارة العمل تحظر الفطور الجماعي للموظفين
وزارة العمل تحظر الفطور الجماعي للموظفين


منعت الخروج إلى المناسبات أثناء الدوام
02-13-2015 11:45 PM
الراكوبة – الخرطوم حظرت وزارة العمل ذهاب موظفي القطاع العام الى الافطار في جماعات، وهددت بمعاقبة من يخالفون ذلك، وذلك في اطار ما اسمته بالإجراءات الصارمة تجاه موظفي الدولة المخالفين لمنشورات الوزارة الأخيرة الرامية لضبط الخدمة المدنية فيما يتعلق باستراحة زمن الفطور، والصلاة، والخروج للمناسبات الاجتماعية أثناء ساعات الدوام.

وقالت وزيرة العمل اشارقة سيد محمود في برنامج "مؤتمر إذاعي" باذاعة امدرمان إن المنشور الأخير لضبط الخدمة المدينة يمنع منعاً باتاً ذهاب الموظفين إلي تناول وجبة الفطور في جماعات واضافت "ممنوع الذهاب كجماعات إلي الفطور حتى لا يجد المواطن أو مدير المؤسسة المكاتب فارغة ومن أخذ الأجر حاسبه الله بالعمل"، وأوضحت أنه بعد الساعة الحادية عشر يمنع ذهاب الموظف إلي الفطور وحددت الزمن بنصف ساعة فقط يأخذه الموظف في الفترة ما بين دخوله المؤسسة حتى الساعة "11" الساعة، وأشارت إلي أنهم طالبوا المؤسسات بتوفير "بوفيهات وكافتريات" بالمؤسسة لتوفير وجبة الفطور بأسعار معقولة حتى لا يضطر الموظف إلي الخروج من المكاتب إلي أماكن بعيدة تضيع الوقت.

وقطعت اشراقة بإن المنشور يشمل وقت الصلاة أيضاً وقالت "علي الموظف أن يذهب لأداء الصلاة في وقتها المحدد ويرجع فوراً إلي مكتبه"، وأشارت إلي أن المنشور يطالب بوجود موظف بديل يسد غياب زميله أثناء استراحة الفطور أو حتى الصلاة، وشددت علي أن القرار يمنع منعاً باتاً الخروج إلي المناسبات الاجتماعية أثناء ساعات العمل الرسمية فرادي أو جماعات، ومنع الزيارات الخاصة أيضاً أثناء ساعات الدوام. وشددت علي أحكام الرقابة في المؤسسات والوحدة الإدارية ومعاقبة المخالفين


تعليقات 22 | إهداء 0 | زيارات 7080

التعليقات
#1208657 [الفونجي]
5.00/5 (1 صوت)

02-15-2015 11:13 AM
خبر جميل مع إنو أتى متأخر سنين كثيرة وعانى من تأخيرو ملايين كثيرة .. لاكين كما يقال أن تأتي متأخر خير من أن لا تأتي .


#1208410 [سوداني سناري]
5.00/5 (1 صوت)

02-15-2015 12:22 AM
ألف تحية للوزيرة.
الخدمة العامة محتاجة لإصلاح شديد وكل خطوة في الطريق الصحيح مطلوبة.


#1208355 [عادل احمد]
5.00/5 (2 صوت)

02-14-2015 09:37 PM
خليتو السرقة والنهب والنصب والفساد وقعدوتو للفطور . ولكن ( ما لا جرح بميت ايلام )


#1208238 [ابوماجد]
5.00/5 (1 صوت)

02-14-2015 06:24 PM
الفطور العملى سندوتشات خليكم من الخمج اى مصلحة يكون فيها بوفيه يحضر سندوتشات الفطور ويوزعها ليهم كل فى مكتبو ياكل ويشتغل شغلو .


#1208161 [بيكانتو]
0.00/5 (0 صوت)

02-14-2015 03:24 PM
هى ماعارفه بأخوانا - قولوا ليها الفطور ده بدون جماعة نفطر كيف
اولا - مجموعة بتمشى تحجز طاولة
وثانيا - مجموعة ييقنصوا للصحون
ومجموعة للسلطة و الدكوه و لو فيها فرصة (عتى او أتى )
ومجموعة للزيت و الجبنة
و مجموعة للرغيف

يعنى عمل جماعى


#1208156 [محمد الامام على]
0.00/5 (0 صوت)

02-14-2015 03:17 PM
الما فاهماهو الوزيره انو الموظفين ديل بيمشو من المكاتب عشان يفتشو حق الفطور ده بالنسبه للعزابه والمزوجين بيمشوا يفتشوا حق الفطور وحق الملاح يعنى البمشى فى سمسرة والبشى يكوس زول يدينو والبشوف ليهو نجره وووو وسبل كسب العيش بقت كتيره مازى الدرسونا ليها زمان فى الجقرافيا


#1208150 [jafar]
0.00/5 (0 صوت)

02-14-2015 03:02 PM
أها يا ست اشراقة والموظفة العاملة فيها مشغولة بالموبايل دى حتملو فيها شنو؟ وقبل كل شى رجعوا لينا القروش النهبتوها مننا بالايصالات المزورة


#1208104 [سامي]
0.00/5 (0 صوت)

02-14-2015 01:54 PM
ادهوهم نصف ساعة فطور وصلاة الساعة 12 وخلاص هو فى فطور والله قروش فطور . بلا لمه


ردود على سامي
United States [omer] 02-14-2015 09:19 PM
(صلاة الساعه12 ) انت يا زول ما قاعد تصلي والا شنو ؟ استغفر وصلي كان ربنا يتوب عليك ..


#1208068 [اوشي]
0.00/5 (0 صوت)

02-14-2015 01:21 PM
شوفي يااشراقة الحكامة عايزة كمان تهزمي لينا مشروعنا الحضاري؟ اول حاجة نحنا من الصباح عندنا (تلاوة) من الساعة سبعة ونص صباحا لحدي الساعة عشرة والفطور خلينا (الفتة) بناكل سندوتشات لكن بنلبس سفنجاتنا من الساعة اطناشر ونجهز لصلاة الظهر البتبدا الساعة واحدة وتنتهي اتنين ونص .. وانتي لو (مرا) قولي لينا ما (تتلو) ولا ما (تصلو) عشان نكلم ليك عبد الحي يوسف وتلحقي صاحبك (كرمنو).


ردود على اوشي
European Union [محمد الامير] 02-14-2015 03:33 PM
ثقافة محجلة تتحجج بالدين والصلاة عشان ماتشتتغل الدين قال العمل عبادة ولا رايك شنوو بالجد ماحصل مشيت مكتب اقضي خدمة فيهو والا لقيت امثال هؤولاء شغلة مابتحتاج نص ساعة تقعد فيها اليوم كلو والسبب انك منظر ديل يفطروو ويشربو الشاي اخجلو علي نفسكم


#1208066 [اوشي]
0.00/5 (0 صوت)

02-14-2015 01:19 PM
شوفي يااشراقة الحكامة عايزة كمان تهزمي لينا مشروعنا الحضاري؟ اول حاجة نحنا من الصباح عندنا (تلاوة) من الساعة سبعة ونص صباحا لحدي الساعة عشرة والفطور خلينا (الفتة) بناكل سندوتشات لكن بنلبس سفنجاتنا من الساعة اطناشر ونجهز لصلاة الظهر البتبدا الساعة واحدة وتنتهي اتنين ونص .. وانتي لو (مرا) قولي لينا ما (تتلو) ولا ما (تصلو) عشان نكلم ليك عبد الحي يوسف وتلحقي صاحبك (كرمنو).


#1208060 [سيد السودانى]
5.00/5 (1 صوت)

02-14-2015 01:06 PM
فلعلا ولله امراة حديدية والناس ما عرفين انو مشاكل السودان فى التسكع الماليهو سبب هل يعقل انو الانسان يفطر ساعتين وفطوره فول وبصلتين


#1208003 [عارف البحر]
0.00/5 (0 صوت)

02-14-2015 11:49 AM
الاصلاح الاداري عملية ادارية معقدة ومستمرة وفقا لمجموعة حزم قانونية ومالية وتدريبية وغيرها من الحزم الرقابية -الخ لاينم الاصلاح بالمناسبات وعندما يصبح الخلل سلوكا وعرفا


#1207998 [عصمتووف]
3.00/5 (3 صوت)

02-14-2015 11:40 AM
بنفطر غصبا عنك وعن العينك و ب الصحن نحن الطيب سيخة ما خفنا منه نخاف من ذوات الشقوق


ردود على عصمتووف
[Hassan] 02-15-2015 07:37 PM
حقو لما تتكلم تنتقي ألفاظك ولا تكون انت رجل غير مسئول

United States [مستغربة شديد] 02-14-2015 08:47 PM
كلامك صاح يا الحفيد وانا موظفة واامن على كلامك دا ونحنا محتاجين انضباط في حاجات كتيرة .... والوزيرة قبل ماتطلع قرار الفطور ويبقى نافذ المفروض توفر لينا الفطور ذاااااتو ... لانه بالجد كل واحدة مننا بتجيب حاجة ...واحدة بتجيب الطماطم وواحدة الدكوة وواحدة البصلة وواحدة بتجيب البهارات وواحدة كسرة وفي حالات نادرة رغيف ....لو قلنا ممكن نعمل ساندوتشات بالعيش اها لما ما يكون في حق العيش ونجيب كسرة حنتصرف كيف...يعني كل واحدة تاخد نصيبها في كورتها ولا شتو وبرضو كمان قالوا ما تاكلوا في المكتب ....يعني نشيل كورتنا ونزازي بالحوش ولا شنو الحل؟؟؟؟

European Union [عصمتووف] 02-14-2015 05:25 PM
محمد الامير
حفيد جوارح الصحراء
وغيرهم
اكون معااااكم واضح
توجد حقوق وواجبات بين المخدم والمستخدم لعلمك العامل او الموظف بداية فطورة بعد الساعة الحداشر ونص ومرات اتناشر ومرات بعد صلاة الظهر اطلب منكم الفطور ب احدي الوزارات لتعرفو سوء الخدمة والقذارة ثانيا غالبة عمال البوفية واصحابة علي علاقة لهم بالمهنة العطاءات تحت تحت تجدوها باسم المديراو قريبة او زوجتة او لجمعية القران الكريم او النقابة انا ك موظف يكلفني الفطور اكثر طلب الفول م بين 8و10 والبلدي 15 جنية وب الداخل 7 جنيهات فول قشره وزيت سئ جربكوس ولا مكنه ما معروف لو مرض العامل ولا الموظف سوف تتعطل اكثر من اسبوع وبعدين المواطن ياتيك بعد قفا الخزينة او اوراقة ناقصة او او او ولا تنسوا الواسطة من فيكم يقبف ف الصف يعني ب الواضح لو تريدون خدمة مكتملة علي الدولة السماح بتوريد الرسوم عبر البنوك لكل الوزارات وسبق ان قلنا القرار يشمل المكاتب التي تتعامل مع الجمهور وزيادة العاملين عليها وتقفل ف نهاية اليوم وغالبيتنا نفطر لعلمكم ف الدكاكين نظام الشيرنق وليس عوضية سمك ولا الربيع ولا بيت السماية افيقوا شوية ي مافهمين حاجة
ب المناسبة انا موظف سابق

United States [Sarah] 02-14-2015 04:11 PM
نوعك دا اولى به الصالح العام
العمل قيمة انسانية ومسؤولية اجتماعية

والله الزيك دا خسارة يكون بيعمل في وظيفة عامة

European Union [محمد الامير] 02-14-2015 03:28 PM
انت الزيك ده لمن يفطر ساعتين بعطل ليهو قرابةالعشرة اشخاص وديل عندهم مصالح يتتعطل وبترتب عليها تعطل ناس تانيين وبعدين الموضوع ماموضوع خوف الموضوع انك في موضع خدمة للمواطنيين لكن العيب ماعليك نظام الخدمة كلو فاسد ومتسيب وحقنا يوم القيامة ناخدو منكم

European Union [حفيد جوارح الصحراء] 02-14-2015 01:48 PM
الحكاية ما هي رجالة , الحكاية امانة و اخلاق و مبادئ , لا يوجد في العالم ما يسمي بزمن الفطور اثناء العمل فالعالم كله يفطر مند السادسة صباحا يبدا العمل من السابعة الي الساعة الثانية عشر ظهرا بدون توقف ثم يعقب دلك ساعة راحة لأجل الغداء و اداء الصلاة ثم العودة للعمل هدا النظام لو تم تطبيقه لانصلحت الخدمة المدنية و بعدين الله ما كتر الا الخريجين العاطلين عن العمل أي موظف غير منضبط يجب فصله من الخدمة و تعيين اخر , حقيقة يوجد تسيب و اهمال في الخدمة المدنية هل تعلمون ان عدد ساعات العمل الفعلية في اليوم في السودان بلغت عدد واحد ساعة فقط


#1207993 [مسطول]
3.00/5 (2 صوت)

02-14-2015 11:37 AM
يا جماعة الحكاية شنو الوزيرة دي اليومين ديل شابكنا الفظور وما ادراك ما الفطور !!
التقول نحنا في روضة !!


#1207856 [الحقيقة المرة]
3.00/5 (5 صوت)

02-14-2015 08:48 AM
الوزيرة لو عايزة تنفيذ القرار بصورة صحيحة مفروض تعمل أرقام هواتف مباشرة في رئاسة الوزارة لإستقبال شكاوي المراجعين في أي وقت من ساعات الدوام...


#1207851 [babo]
5.00/5 (2 صوت)

02-14-2015 08:46 AM
في كل دول العالم مافي حاجة اسمها وقت الفطور وعلى كل شخص يعمل في القطاع الحكومي أو الخاص تدبير امور فطوره قبل ذهابه للعمل وتخيلوا اضاعة كل موظف نصف ساعة يوميا في الفطور فستجد أن ما لا يقل عن خمسة ملايين ساعة يوميا تهدر ...


#1207834 [امير]
4.25/5 (3 صوت)

02-14-2015 08:11 AM
هذه الممارسات اصبحت جزء من الموروث الشعبي والعادات والتقاليد ولا يمكن التخلص منها ولا يجب ذلك . وهي ما يمزنا عن شعوب العالم قاطبة .
إليكم نماذج على سبيل المثال وليس الحظر :

1- في شهر اغسطس 2014 كنت مغادرا عبر مطار الخرطوم شاهد ضباط وضباط صف وجنود الشرطة في منطقة الجوازات متجمعين على صحن فول كبير وجميع الكاونترات خالية عدا واحد فقط وصف طويل من المغادرين ورائحة الفول والبصل تعطر المكان .

2- في شهر يوليو 2013 كنت في المغتربين مدني لا يوجد ولا موظف واحد رجال ونساء لاكثر من ساعتين سوى بائعة الشاي التي اخبرتنا أن الجميع معزومين سماية

3- خروج الموظفين لعزاء ود عمة مرة الزميل فلان والتوقيت له اهمية كبرى وقت الفطور ( طبعا بسيارة المصلحة ) .

حاجة مخجلة


ردود على امير
[ابونجيب] 02-14-2015 05:25 PM
فعلا ياامير شيء مخجل ممرت بنفس الموقف


#1207811 [السهم]
2.94/5 (6 صوت)

02-14-2015 07:29 AM
ما عندك موضوع .. اتلمى على الدقير واحمد البلال .. شبهينا واتلاقينا

نحن مشكلتنا لم تكن في الفطور ولا الصلاة ولو اخذ ساعة في الفطور ما مشكلة ولكن المشكلة في خُلق العمل والرغبة في العمل والاعتراف بأن المواطن على حق جاء يبتغى خدمة من الدولة توفرها الدولة عن طريق موظفين وليس ان يكشر الموظف فيك واذا ناقشته ترك القلم وقال ما بشتغل ؟ اعمل الداير تعمله؟

مشكلتنا في الابواب المغلقة بحراس امن (هدف)التابعين للمؤتمر الوطني ؟ ولن تدخل وتقابل مسئول مهما كانت الظروف ولا يجتجب المسئول الكبير جدا عن أي مواطن او طالب حاجة



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية
تقييم
1.00/10 (1 صوت)




الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة