الأخبار
أخبار السودان
هذا ما حدث لي داخل مقر القنصلية السودانية بجدة.. رباطة القنصلية السودانية بجدة يعتدون علي المهندس اسعد التاي
هذا ما حدث لي داخل مقر القنصلية السودانية بجدة.. رباطة القنصلية السودانية بجدة يعتدون علي المهندس اسعد التاي


03-04-2015 09:16 AM
م.اسعد بابكر عمر التاي.


1- توجهت لجدة لعمل جواز لابنتي المولودة قبل خمسة شهور و استخراج جواز الكتروني لأمها بدل القديم المنتهي ..
تأخرت في استخراج الجوازات طيلة الفترة الماضية لأن الجواز الالكتروني لم يكن متاح في جدة.. والرياض زحمة شديدة.. غير مشاكل الشبكة.. ممكن تسافر بعيلتك و تلقى الشبكة طاشة.. انتظرت الى ان وصل وفد من الجوازات لجدة ..
استأذنت رب العمل في الغياب ليومين لبداية الإجراءات.. كل الإجراءات بتاخد اكتر من يومين حسب ما سمعت.. قلت اعملها على مرحلتين .. تحركت مساء الثلاثاء 24/فبراير 2015.. هدفي ابيت في سكن جنب القنصلية عشان الصباح اقيف في الصف بعد الفجر حسب ما اوصاني اهل العلم....وصلت مكة منتصف الليل.. أديت سنة العمرة حتى الرابعة .. و واصلت لجدة التي وصلتها عند الخامسة.. فضلت الف وادور بحثا عن القنصلية المنقولة حديثا من موقعها التاريخي وسط البلد لحي النزهة شمال جدة.. بعد الاستعانة باﻷصدقاء في الفيس وخرائط قوقل وتلفونات وصلت القنصلية سبعة ونص.. متاخر نصف ساعة عن الموعد الموصى به.. وجدت جمهور المواطنين مزدحمين خارج المبنى و يفصلهم عنه الاسفلت.. حتى الصف لم يبدأ.. الاسرة كانت في حالة من التعب لا توصف بسبب السفر الطويل و العمرة.. طفلتين واحدة تلاتة سنة و التانية خمسة أشهر وامهن .. قررت انزلهم في الفندق المجاور القنصلية وارجع احصل الصف عشان استلم الارانيك.. وبعدها اجيبهم يكملو بعد يكونو ارتاحو شوية.. طلعتهم الغرفة ورجعت القنصلية.

2- لقيت الجماهير لسة منتظرة.. طبعا اجراء استخراج جواز المولودة يتطلب رقم وطني.. خرج موظف طلب من الجماهير المحتشدة انو فقط من يحمل رقم وطني في يدو وعايز جواز يقيف في الصف.. اما العايز رقم وطني جديد يجي بكرة لانو اليوم ارانيك الرقم الوطني خلصت.. وقفت في الصف بغرض استخراج جواز الزوجة لأنها عندها رقم وطني جاهز.. لما دخلت استلم الاورنيك طلبت اورنيك لجواز المولودة .. قالو لازم اخلص الرقم الوطني اول.. طيب ادوني اورنيك رقم وطني للمولودة قالو كل يوم بتطلع 100 اورنيك الصباح.. اليوم خلصت.. قلت ليهو أنا جيت سبعة ونص الناس محجوزين بالخارج و مافي توزيع اورنيك.. قال لي الناس بتحضر من تلاتة صباحا والتوزيع بيتم بعد السادسة مباشرة.. أثناء استلامي اورنيك الزوجة حدثت مشادة بين مواطن و أحد الموظفين اقسم بالله أنا قمت بتهدئة المواطن وابعاده عن الموظف الذي كان يحرس مدخل الكاونترات... كنت حريصا للغاية على ضبط اعصابي و الاكتفاء بالمشاهدة ونقل صورة لما يحدث داخل القنصلية التي كنت اسمع عن سوء المعاملة اللتي يجدها المترددين عليها.. حتى انني وفي اطار ضبط النفس والبعد من المشاكل لم ارفض صراحة دفع الجنيه لزوم الاورنيك الذي يتم الزام المواطنين بدفعه بصورة غير قانونية.. و قدمت للموظف ورقة فئة خمسمائة ريال فقام بارجاعها لي و اعطاني الملف الاصفر على مضض .. بعد تعبئة اورنيك الزوجة بشق الانفس في الصالة الصغيرة المزدحمة توجهت للكاونتر لتقديمه.. وجدت صف .. سالت الواقفين .. دة صف الجوازات؟ قالو دة صف التسجيل لاورنيك الرقم الوطني الحيتوزع بكرة.. (لاحظ انو تم توجيهي بالحضور له غدا الساعة الثالثة.. يعني كان حالقى ال 100 اورنيك محجوزة).. المهم وقفت في الصف..

3- قدام كان في مشادة بين مواطن وموظف ..اتضح لاحقا انو عسكري بملابس مدنية كان يقوم بتنظيم الصف (اسمه شمس الدين).. الموظف احتد مع المواطن .. تعلي صوتك ما تعلي صوتك الموظف قال ليهو نحن طريقتنا كدة .. و عاجبانا.. وانا واقف في مكاني قلت للموظف ((انت مهمتك خدمة المواطنين ديل.. وما بيجوز ليك تكورك فيهم و تسيء حتى لو اساءوا ليك وكوركو فيك ..وأنت جيت هنا بالواسطة (أنا طبعا واقف بعيد منو أشرت ليهو باصبعي بكلمة انت) جيت هنا بالواسطة و بتصرف بالدولار من قروشنا عشان تخدمنا بادب.. ما عشان تكورك فينا وتنهرنا)).. موظف من داخل الكاونتر لابس بدلة زرقاء (لبنية) صاح.. يا زول نزل يدك..

قلت ليهو ما بنزلا..
يازول قلت ليك نزل يدك ..
مااااااااااااا بنزلا .. اها ..(رفعتها فوووووق) .. ..

4- جا طالع من جوة ومعاهو شمس الدين وموظف تالت.. يازول اتفضل معانا جوة عايزنك.. قلت ليهم جدا.. مشيت معاهم و يدي ما زالت مرفوعة.. وهم يدفرو فيني.. ويحاولو ينزلو يدي.. وانا رافعها.. دخلوني غرفة مكتب عبارة عن فصل دراسي مليان أدراج عليها ارقام جلوس.. دفعوني داخل الغرفة و بدأت الحفلة...
صفع على الوجه والراس..
مع الشتائم (انت عامل فيها صعلوق؟؟.. عامل فيها ارجل من الناس دي)..
طااااخ طاخ..
لم احاول ابدا الرد او حتى تفادي الصفعات... واكتفيت بالضحك.. وطلبت منهم الاستمرار في الضرب ..
بتضحك مالك؟ بضحك مبسوط من البتعملو فيهو دة .. انا من زمان بسمع بالحركات دي كويس اني شفتها..
عايز تعمل لينا فيها مجنون؟ طااخ طاخ
اقعد تحت ..
ما بقعد..
اسقطوني ارضا .. لم احاول القيام من الأرض..
شلاليت..
قوم فوق
ما بقوم

وقفوني .. قلت ليهم اضربو على كيفكم.. بعد تخلصو قولو خلصنا.. وبعدها حتشوفو.. بدأت الحفلة بثلاثة.. الموظف صاحب المشكلة مع المواطن (شمس الدين.. الملحقية العسكرية).. و الموظف صاحب البدلة اللبنية الطلع من جوة الكاونتر (اسامة..المكتب الفني.. ضابط صف بجهاز الامن..الشكابة) .. وتالت كان موجود داخل الفصل مشغول برص مصاحف.. بدون ما يعرف اي شئ ترك مصاحفو و انضم ليهم اداني كفيني تلاتة وخنقني من رقبتي مع الشتم ثم انصرف لمصاحفه.. كل شوية يخش واحد .. الكلب دة مالو.. طاخ طاخ.. كف كفين ويطلع.. بعضهم يكتفي بالشتائم .. الاساءات اللفظية .. يا كلب.. يا وسخ.. عامل فيها راجل.. الليلة رجالتك دي بنوريك ليها.. قليل أدب.. الواحد تلقاهو قدام السعودي زي الفتاة يجي هنا يقل ادبو ..
5- أثناء ذلك اخدو كل ما أحمل وبعثروه على الأرض و تفحصوه .. الشهادات.. محتويات المحفظة من بطاقات وأموال و صور .. و طبعا الموبايل.. حرص صاحب البدلة اللبنية على حمله ومحاولة فتحه ..

طلبو مني الجلوس على الأرض رفضت.. اجلسوني بالقوة.. قلت ليهو لو رجال كلكم وروني اسمائكم.. تاني انهالو ضربا .. احدهم طويل يرتدي بدلة بيجية بيضرب فيني قلت ليه .. انت لو راجل قول اسمك منو؟

طاااخ.. اسمي أمير
أمير منو
طااااخ ..أمير الطيب
الطيب منو
طااااااخ ...انت عايز تتحرى معاي يا كلب ..
(هذا الامير موظف استقبال من الطاقم المحلي)

استمر مسلسل الضرب والشتم لمدة ساعة تقريبا وأنا ملتزم الصمت.. لم ارد على أي سؤال
كانوا يقلبو في الأوراق .. كان أكثرهم شراسة في الضرب الاساءات هو صاحب البدلة اللبنية (أسامة) ..
أثناء تقليب الأوراق.. انت مهندس يا صعلوق .. اكيد مزور الشهادات يا راعي يا مقطع .. انت متزوج دكتورة؟ هسة انت في بت عاقلة بترضى بالزيك؟

قي لحظة كانو مجلسني على الأرض و ظهري للحائط .. اسامة جالس في درج في مواجهتي.. يضرب في الوجه و راسي يصطدم بالحائط .. و يرفع رجلو يوشك ان يضربني ببطن الجزمة اللابسة في وشي .. كان زعلان بصورة عجيبة..
انضم ليهو واحد تاني (لم يذكر اسمه ولكنني احفظ ملامحه جيدا)

نزل عينك
ما بنزلا
طاااااااااااااااخ... نزل عينك
مااااااااااااااااااااااااابنزلا
و يسختو باصابع ايديهم في الوجه.. نزل عينك.. وانا احمر ليهم .. ماااااااااااااابنزلا

لما كتروها قلت ليهم انزل عيني منكم انتو حريم؟؟؟!! كاد اسامة ان ينفجر.. و رفع رجله اوشك ان يضربني ببطن الجزمة في وجهي.. الواحد هسة يديك كدة يطلع (.....)

و صدرت منه اساءة لامي لم يكملها.. قلت ليهو عايز تقول لي ........ موش؟ قال لي حتعمل شنو يعني؟ قلت ليهو أنا بعتبرك قلتها يا كلب.. قسما بالله ما بنساها ليك ليوم الدين..و اسائتك لامي حتدفعا تمنا غالي جدا .. قال لي هي امك ولدت ليها ولادة نافعة؟
واحد بيقلب في الاوراق قال ليهو الزول دة منكم من الجزيرة .. الجزيرة تجيب زي العفن دة؟
اكتر من ساعة و هو والجماعة بيشتمو .. انت وسخ.. قليل أدب.. مزور شهادات.. يا راعي..انت مفتكر نفسك حتخوفنا؟ .. نحن محميبن بقانون دولي ..
وقالو بالنص ((نحن ممكن نحرقك عديل مافي زول بيقدر يسالنا))..

و هسة حنعمل ليك خطاب للسلطات السعودية ترجع السودان ترحيل تقعد مع اهلك يا كلب.. يا مقطع .. يا وسخ .. .. مواطنين قليلين أدب عندهم فهم انو نحن عبيد ليهم.. وهم نفسهم عبيد للسعوديين... الواحد تلقاهو قدام كفيلو زي الفتاة يجي هنا يقل ادبو علينا ويعمل فيها راجل
امير كان مشغول بتقليب الأوراق .. فجاة لكز اسامة واشار ليهو لورقة .. كانت شهادة الرقم الوطني بتاعتي..
المهنة/قوات مسلحة متقاعد .. هنا أمير انسحب.. واصل اسامة و الباقين.. عسكري هارب.. مزور شهادة مهندس.
اقيف حيلك.. ما بقيف.. يوقفوني بالقوة.. اجلس ما بجلس .. يجلسوني بركل القدمين لاسقط.
لما يوقفوني و يبعدو شوية طوالي بجلس على درج..
قوم من الدرج.. ما بقوم.. يقومو يرموني ..

أخيرا طلب مني اسامة مرافقته لاعلى لمقابلة نائب القنصل.. طلعنا مكتب كبير فخم فيهو واحد لابس بدلة وكرفتة.. و امامه لوحة تعريف (نور الدين عبدالوهاب/ نائب القنصل).. اول دخلت عاينت في ملامح وجهو ..وجدتها لا تكاد تبين من شدة صرة الوش ..كان زعلان جدا.. أول دخلت جلست في اقرب كنبة.. المرافق طلب مني الوقوف.. قلت ليهو ما بقيف.. نورالدين طلب مني الجلوس في الكرسي قدام مكتبو .. جلست .. مالك يازول مشكلتك شنو؟ مافي حاجة .. الحصل شنو؟ قلت ليهو مواطن جيت أعمل اجراءات دخلوني مكتب ضربوني و اهانوني و شتموني. المرافق قال ليهو الزول دة عمل جوطة في الصالة و أنا طلعت اهديهو قام ضربني في رقبتي قدام المواطنين.

الكلام دة حصل يا زول؟
قلت ليهو أنا ما حاحكي ليك الحصل.. انزل الان الصالة اسأل المواطنين.
قال لي أنا بساال فيك انت.
المرافق قال ليهو الزول دة قال هو ارجل من الناس دي كلها.
قلت ليهو يا كذاب.. انت قلت لي انت عامل فيها ارجل زول في الناس دي؟
أنا قلت ليك أنا اقلاهم رجالة....بس ارجل منك... وهسة بقول ليك قدام نائب القنصل دة زاتو أنا ارجل منك .. نور الدين قال لي يا زول اتكلم بأدب؟
قلت ليهو هو لما ضربني و شتمني واساء لي بلفظة (.............) دة الأدب؟
قال لي خليهو يقولا ليك هسة قدامي عشان افصلو ..
قلت ليهو ما بيقدر يقولا لانو جبان و كذاب ..
نايب القنصل قال لي انت زول قليل أدب.. قوم اطلع برة..اعملو ليهو خطاب للأمن السعودي و خلوهم يجو يستلموهو يمشي الترحيل.. نزلت تحت .. سلموني للعسكري السعودي الموجود امام المبنى .. العسكري اتصل برئاسته لارسال عربة الدورية .. حضرت العربة الاولى بها عسكري واحد...

بعد انتظار طلع ليهم أسامة.. اتكلم مع العسكري على جنب.. ثم جاني أنا بعيد من العسكري قال لي انت زوجتك وين.
قلت ليهو زوجتي وين يا كلب؟ انت مالك ومالا.
قام نادى العسكري السعودي قال ليهو اها شايف؟ الزول دة مصر على موقفو .. نادى ليهو الدورية للترحيل مسافة نجهز الخطاب.
السعودي قال لي ايش فيك..الرجال جا قال خلاص هم متنازلين عن القضية وخلاص .. تاني ايش سويت؟
قلت ليهو الزول دة جا سألني عن مكان زوجتي.. وأنا رفضت أ وريهو.
قال لي هو عايز يساعد عيالك و يجيبهم لك.
قلت ليهو زول يضربني و يشتمني و يسيئ لامي و يجي يقول لي زوجتك وين وأنا ماشي على سجن؟ زي دة الزول بيستامنو على عيالو؟ ..

العسكري طلع الجهاز اتصل بالدورية قال لهم بعد اتنازلو .. الرجال مصر .. ابعتو الدورية .. وصلت عربة دورية فيها ملازم أول .. حكيت ليهو الحاصل .. قال لي نحن ممكن نعرضك على الادعاء لو عندك دعوى عليهم و متهمهم بانهم ضربوك.. قال لاسامة هل ضربتوهو .. أسامة قال ليهو مافي اي زول مد عليهو يدو ..
دخل أسامة لاكمال اجراءات الخطاب وأنا ركبت عربة الدورية ..

طبعا طيلة هذه الفترة الموبايل كان مع أسامة.. في أول حفلة الضرب كان يرن وأسامة شايلو وما بيرد.. يعد وقفو من الضرب وقالو يسلموني الأمن السعودي طلبت منهم الموبايل عشان اتصل بزول يتولى أمر العيال رفضو. طبعا طيلة الفترة دي العيال كانو نايمين في غرفة في فندق قريب و مفتاح الغرفة معاي و جوازاتهم وكل اوراقهم الثبوتية معاي و هم ما جايبين خبر و ما عندهم رقم تلفون لاي قريب في جدة عشان يتصلو بيهو .. في اللحظة ديك تفكيري كلو كان مركز عليهم.

بعد مسافة من الانتظار في عربية الدورية طلع اسامة و قال للضايط انهم عايزني جوة. دخلت جوة لمكتب ضابط شرطة بزي مدني (العقيد اوالمقدم/مبيوع). اتكلم معاي كتير كلام من نوعية كلام الخير والايمان داك.. و قال انهم ما عايزين بقطعو عيشي وووووو .. كان بيتكلم معاي عن اني غلطان و هم ما عايزين يضروني و قال حيكتبوني تعهد بأني ما اتعرض لجماعتهم و اعتذر ليهم عن خطاي بحقهم أنا طبعا التزمت الصمت تماما و ما اتكملت لا سلبا ولا ايجابا (التفكير كان العيال المقفولين في الفندق) .. اخرجوني من مكتبه لمكتب رئيس قسم التحقيقات.. (عقيد شرطة/محمد ادريس)..وكان من الذين زاروا غرفة الضرب و شارك بالشتائم وخرج.. كان جالس معاهو شخص يرتدي بدلة كاملة.. محمد ادريس واجهني بسيل من الاساءات والشتائم (قليل ادب .. صعلوق .. عامل فيهو شفت .. عايز يحرض الجمهور) .وأنا صامت .. طبعا الصمت كان تقدير موقف عشان العيال ..
والتفت محمد ادريس للشخص الجالس .. (الزول دة عسكري تبعكم...يكون هرب بعد انضرب في العمليات عامل راسو الكبير دة.. واشار لاثر اصابة قديمة في جبهتي) .. سالني الرجل الجالس عن رتبتي و دفعتي... انت تقانة؟ نعم.. انت كنت في بورتسودان؟ نعم .. انت الاتناقشت مع الفريق حاج احمد؟ .. يازول الفريق حاج احمد البيوديني اتناقش معاهو شنو؟ انا مجنون؟
العقيد شرطة قال ليهو الزول دة بتاع سوابق في الجيش وللا شنو؟

قال ليهو غايتو في واحد اتناقش مع حاج احمد في بورتسودان وطردوهو..
قلت ليهو انا ما اتناقشت مع حاج احمد (و لم اقل الا الصدق).. انت تكون قاصد دفعتي ع.ع.ش.
التفت العقيد شرطة للرجل الجالس (والذي لم يكن سوى الملحق العسكري.. العقيد/الفاضل حميدتي .. الدفعة40) .. وقال له ..ياخ الزول دة لئيم بشكل و عندو كبر راس.. اتخيل الجماعة دخلوهو المكتب ما عايز ينكسر ليهم كلو كلو.. طلعوهو للعميد نور الدين برضوا تلائم عليهو.
العقيد حميدتي تجاهل او لم ينتبه لعبارة (ما عايز ينكسر ليهم).. هل ادري عمدا ام غباءاً.. فقد كانت تحمل الكثير...
المهم في مكتب مدير التحقيقات تم طبع وريقة بها اقرار بعدم التعرض لاعضاء البعثة بالشتم و الاهانة والمشاكسة (والله مكتوب المشاكسة) أو اثارة الجلبة والصخب داخل مقر الصالة .. وقعت على الاقرار و سلموني متعلقاتي و اوصاني محمد ادريس بالذهاب للصالة وان هناك توجيه للشباب بتخليص اجراءاتي .. لكنني خرجت عبر البوابة الكبيرة المخصصة للعربات توجهت الى أسرتي رأسا ..
.
.
ملحوظة: ثبت لي بما لا يدع مجالا للشك ان ما حدث لي لم اكن مقصودا به في شخصي كاسعد التاي... فلم يصدر منهم ما يشير الى معرفتهم المسبقة بي...وهنا تكمن الكارثة.. فذلك يعني ان هذا هو السلوك العادي لموظفي بعثتنا الدبلوماسية تجاه اي مواطن عادي من رعاياهم.






تعليقات 143 | إهداء 1 | زيارات 40403

صفحة 1 من 3123>
التعليقات
#1276856 [الدهمشي]
0.00/5 (0 صوت)

06-01-2015 01:49 PM
على الطلاق حاجات تقص القلب وحرم حقو الواحد اخش القنصلية احرقا كلها على الطلاق رحمه من الله ماكنت حاضر معاك يوما كان شفته شي يسر قلبك


#1236657 [الكردفاني العدييييييييييييييييييييييييييييييييييييييل]
0.00/5 (0 صوت)

03-29-2015 08:28 AM
يا ......... راكوبة ..... لماذا تحجبون رأي ..... ان رأي ان المهندس اخطأ اذ لم .... يريهم العين ....... الحمرا ..... وليكن ما يكون ... اما حكاية ... السرديب ... فهذه حكاية ... اخرى للسرد .... والفجيعة ..... (( لا احد يمتطي ظهرك ... اذا لم تحنه...).

اللهم عليك .... بعصابات الارجاس ..... اقطعهم ..... تك ......
اللهم عليك .... بعصابات الارجاس ..... اقطعهم ..... تك ......
اللهم عليك .... بعصابات الارجاس ..... اقطعهم ..... تك ......
اللهم عليك .... بعصابات الارجاس ..... اقطعهم ..... تك ......
اللهم عليك .... بعصابات الارجاس ..... اقطعهم ..... تك ......
اللهم عليك .... بعصابات الارجاس ..... اقطعهم ..... تك ......
اللهم عليك .... بعصابات الارجاس ..... اقطعهم ..... تك ......
اللهم عليك .... بعصابات الارجاس ..... اقطعهم ..... تك ......


#1236651 [MUNIMOBEIDA]
0.00/5 (0 صوت)

03-29-2015 08:25 AM
نهنئك على الصمود وعدم الانكسار كما شهدوا هم وهذا فخر لكل سودانى .ويحزننا سلوك أناس يجب اختيارهم بمعايير تربوية وأخلاقية تليق بمن تحملوا مشاق الغربة اماعدم الوثوق بممثلى الوطن فى مقار السفارات على العروض مؤشر على وصولنا لقمة الانحطاط فانتبهوا يا اهل الخارجية .


#1234689 [شلاقة]
0.00/5 (0 صوت)

03-25-2015 09:43 PM
المهندس المحترم كان الله في عونك فعلا تعامل الحكومة كلها تعامل استعباد واسترقاق للمواطن السوداني وهذا الوضع قديم ومستفحل في ممثيلي السلطة وبالاخص العساكر كلهم فاقد تربوي وهذا معروف ولا نقشاش فيه لكن المشكلة الكبيرة في الشعب الارعن الرضيان بي الاهانه ومتنطش وحصلت لي شخصيا مواقف لا تعد ولا تحصى شبيهة بموقفك اخرة مرة كنت في بورت سودان وكان في عسكري لابس مدني بدفر لي في عمك عمرو ستنين سنة قمت قلت لي الواقفين في الصف اتكلمو مع الزول دا قام عمك زاتو قال لي خليهو نحنا على سفر بعد شوية خلصت وقامو رجعوني مكت تاني المهم جيت بي قريب من الصف ماشي المكتب المجارو وفجاة صاحبنا الدفر الزول جا جاري علي مفتكر انو انا داير ادخل في الصف قام دفرني بي قوة وانا نحيف قمت ضربت في قائم حق مظلة لم اتظلتا كلي ودمي نزف وحالتي بقت مبهدلة الصراحة من الغضب بقيت ذي المجنون قمت عليهو واضاربنا لي رب السما البعك البعك والنبذ دور والفرجة حلت لي جماعة الصف علي الطلاق حسيت انو في واحدين نسو السفر ونسو الباخرة زاتو دايرن الفرجة بس بعد شوية جا ضابط ساقنا الاتنين وكالعادة انا الغلطان المهم وصلت الباخر اخر زول وعمك الدفرو اول زول استقبلني والباقين وراهو لي الشمارات حتى العوئل اتشمشمو شعب غريب شمار بس طبعا قلت دي اخر مرة بي الباخرة نجرب المطار جيت بالمطار وكان الوصول ستة صباحا وكانو الموظفين في غاية الرقي بس ما كنت فاكر انا الروقة دي من سيجارة الصباح بعد الشاي واللقيمات المهم رجعت برضو بالمطار والم ليك في واحد حق جوزات قال لي يا زول وين الجنسية قلت لي في البيت دا الجواز قالي تمش تجيبا اسي يا زول الطيارة بتفوت وانا جاسف حق التذكرة دا بي تعب قال لا قلت لي لا لا انا الطيارة دي بركب فيها طلعت جوالي داير اتصل علي سعلوك اكبر منو والصعلوك دا قريبي وانا عارف تعاملو ذيهم وكم مرة بقول لي داما كلام رجال كون تحقر النا س بس عندو عادي لما وصلني المطار وكورك لي في كم عسكري ما علينا المهم طلعت الجوال قالي ما تتصل قلت لي بتصل قام قال لي بتاع امن سوقو وديني غرفة طلعت الجوال اتصلت بي صاحبنا رسل لي مقدم في المطار جا ساقني ونهزر اب بدلة وبتاع الجوازات يعني بي العربي ما عندك واسطة اتا ابن ستة وستين ......؟ سلام غرفتونا زاتو


#1231331 [شاشا]
0.00/5 (0 صوت)

03-21-2015 09:11 AM
توقيت مناسب للاعتداء على المواطن السودانى .. الانتخابات على الابواب .. يا سودانيون .. يا مغتربين .. كما تكونو يولى عليكم ...


#1231144 [سفارة جبانة]
0.00/5 (0 صوت)

03-20-2015 09:10 PM
اخي واخو كل السودانيين الشرفاء [م.اسعد بابكر عمر التاي] اولا احيييك تحية الابطال رغم الضرب ورغم الاهانة احي صمودك واحي فيك شجاعتك واحي فيك تمثيلك لكل شريف ونضيف.

ولكن يعيب على السودانيين الذين كانوا متواجدين أن يقفوا معك ويساندوك فمشكلتك مشكلة كل سوداني ومشكلة كل زول نضيف وعفيف.

كنت اتمنى لو كنت موجودا لكي اشاركك كل هذه الالام والمحن، ماذا لو تجمهر كل السودانيني الموجودين بأن تخرج وإلا يكسروا القنصلية على رؤوس هؤلاء الكلاب الضالة حثالة البشر المنتفعين وقود الانقاذ الجياع والضايعين والمرضى النفسيين


الذين كانوا موجودين في ذلك اليوم لماذا تركتم اخاكم ولم تقوموا بتكسير السفارة على رؤوسهم هولاء الاوعاذ


#1230381 [ربيع]
5.00/5 (1 صوت)

03-19-2015 10:28 AM
يمهل ولا يهمل


#1230375 [ربيع]
0.00/5 (0 صوت)

03-19-2015 10:25 AM
اتمني لك العدالة الغائبه اخونا التاي وثق بان الله سيجعل لك فرجا بهزا الاامر
.لكن الواحد بلوم المراجعين بالقنصليه ، المفروض كان يكون لهم موقف ايجابي حتي يحدث تاثير عام


#1228472 [ابو ايمن]
5.00/5 (1 صوت)

03-16-2015 08:41 PM
ههههههههه عفوا للاههههههه بس للمعلوميه انتو فى السعوديه وشغالين كويس واوركم واضحه (نحن) هنا فى السودان شغل مافى وامورنا ما واضحه وبناخد بالجزمه القديمه


#1227359 [اشيقر اشيقر]
5.00/5 (1 صوت)

03-15-2015 09:06 AM
الحل واحد فقط وهو تركيب كاميرات مراقبة تعمل ليل نهار لمعرفة ما يحصل ما بداخل القنصلية
وبالنسبة لتحصيل القروش بدون ايصال امفروض الحكومة تنسى حاجة اسمها ايصال وتعمل خدمات الكترونية
(دا اذا عايزين حل)


#1226496 [adil mohyeddin]
5.00/5 (1 صوت)

03-13-2015 04:48 PM
احيانا الواحد لسانه بيعملا فيهو :
فى اواخر التسعينات سالنى مقدم شرطة فى مطار الخرطوم :معاك نقد اجنبى ؟ قلت لا!قال بس انتا حا تعمل ترانزيت فى القاهرة ؟قلت وكمان حا اتخلف يومين!قال :اها حاتتصرف بى شنو؟اجبت بعفوية :اهلى فى مصر اكتر من اللى فى الخرطوم!!غضب الضابط وقال :انتا ماسودانى؟قلت:انا من شندى يلا شوفنى سودانى ولا نيجيرى!غضب الرجل واستعدعى فرد ابيض البشرة جرجرنى الى التفتيش الشخصى وتم تجريدى من الثياب سوى الجزء الاسفل !!ولم يتردد ذلك الغبى حتى فى الامساك بذكرى وجرجرته !قال ايه يمكن لافى حوله دولارات !عندها قلت :على ايه؟خلعت الشراب واخرجت منه مائة دولار ومائة جنيه مصرى !طلب منى الضابط كتابة تنازل عن المائة دولار بينما ارجع لى المائة المصرية فقلت:اشمعنى دى مانقد اجنبى ولا السودان لسع جزء من مصر؟قال الضابط :يازول ماتتلاءم هسع بفوتك السفرية !!المهم اننى لحقت الطائرة وطارت ال100دولار


#1226240 [braveheart]
4.00/5 (6 صوت)

03-12-2015 09:12 PM
عندما يدفع جميع السودانيين ثمن الحرية والكرامة فقط حينها يستحقونها تلك الكرامة والحرية التي قاتل من اجلها الجنوبيين ويقاتل من اجلها ابناء غرب السودان ونكسنا عنها رؤسنا نحن الشمالييين ما اقتعت به تماما لايمكن ان يسمعوا صوت الآمنا ما لم نزيقهم طعم الالم الحقيقي تماما مثلما حدث في ليبيا للكلب معمر القذافي
عندها فقط نعود سودانيين كما كنا
وعندها فقط نعيش بكرامة


#1224221 [عبيد الله]
4.00/5 (6 صوت)

03-10-2015 09:23 AM
عيب عليكم كلكم من السفير للغفير . مادام ديل الاسمهم دبلوماسيين بيعملوا كدا !!! طيب ناس سوق الحمير يعملو شنو؟؟؟؟ ضبح وسلخ ؟ . نفترض انه غلطان عليكم أين الدبلوماسية ؟؟؟ انتم في سفارة واجهة لبلد . كل شوية متصلين بالشرطة السعودية . يوم واحد سمعتو بسفارة دولة راقية جابت الشرطة لمراجع من مواطنيها وكمان غلطانين عليه . ياخ والله كرهتونا كلمة دبلوماسية دي زاتها والغلط الكبير ماعليكم رغم شناعة ماحصل منكم الغلطة على الجابوكم هنا واختاروكم للمناصب دي .وزي ماقال محمد أحمد محجوب ( كل شئ يحتل في السودان غير مكانة فالمال عند بخيلة والسيف عند جبانة ) وقيس على ذلك .قال دبلوماسيين قال .


#1223696 [احمد عوض ابراهيم السيد]
4.00/5 (5 صوت)

03-09-2015 02:29 PM
السلام عليكم ورحمة الله وبركاته بعد التحية العطرة والسلام :احب ان انوه ان هؤلاء الشرزمة والاوغاد لا يمكن ان يكونو موظفين دولة (بعثة دبلوماسية ) بل هؤلاء مجموعة من عصبة لا اقل من الذين موجودن في ارض الوطن معليش حاتكلم بالدارجي لانو والله العظيم موقف لا يسكت عنو حتى اذا طالت السيوف الرقاب ياخ ما ممكن نحنا في الغربة نتبهدل ونتبشتن منهم ومن غيرهم الكرامة وين السودانيين الاصليين وين وين وين ؟؟؟؟؟؟؟؟؟؟؟ حتى اذا كان غلطان دا ما اسلوب زول شغال في بعثة دبلوماسية مهما كان نهائي ما اسلوب ياخ كفاية السرقة الللي قاعدة تحصل قدام عيونا ونحن ساكتين كمان سرقة وقلة ادب ياخ ممكن خلاص ما عاوزين اي بعثة دبلوماسية كفاية انكم بعتو المقر القديم وما عارفين لغاية حسه قروشو مشت وين
والسلام عليكم ورحة الله وبركاته


#1223471 [ظلال النخيل]
5.00/5 (6 صوت)

03-09-2015 10:47 AM
بلطجية وشبيحة ورباطة اوكلت اليهم المهام القذرة dirty work من تجسس على السودانيين في الخارج وتهديدهم ضاربين بعرض الحائط الغرض من التبادل الدبلوماسي وخدمة للرعايا


#1223331 [nany]
5.00/5 (3 صوت)

03-09-2015 08:41 AM
والله بس الله يكون في العون والله ديل كلاب انا واحد من خريجي الهند برضوا السفاره في الهند كانت معاملتهم زفت مع الطالب وديل هم شويه صعالق بس ليهم يوم


#1222307 [halffaa]
3.00/5 (3 صوت)

03-07-2015 11:51 PM
المراجعين اللي دافع لهم الممهندس التاي للاسف طلعواا اي كلام !!!!! اقل شئ كانوا يساندوه ويطالبوا بيهوو بفك سراحو من كلاب امن السفارة الخايبة لعنت الله عليهم وعلى من انجبوهم


ردود على halffaa
[الغاضبة] 03-13-2015 05:29 PM
كلامك صح... وهذا ما لاحظته في الشعب السوداني، بقى دلاقين ساااكت لا يهتم لأي شخص مهما حصل له، لاحظت ذلك عندما أذهب إلى المغتربين، منتهى الذل ولا احد يكترث .... كان الله في عوننا شعب جباااااااااااااان


#1222030 [الوافر]
5.00/5 (1 صوت)

03-07-2015 01:38 PM
ليس هذا المطلوب من موظفي القنصلية بل أنهم أتوا لخدمة المواطن وتذليل الصعاب له مهما حصل منه ولكن للأسف تجدهم متجهمي الوجوه كأنك أتيت لتتسول عليهم وإعتدائهم عليك ناجم عن الفاقد التربوي في البيت قبل التدريب والتأهيل في العمل وعليك أن تتابع الأمر حتى رئيس الجمهورية وأعتقد أن كثير من المواطنين تعرضوا لمثل هذا الإرهاب والعنف لكنهم لم يستطعوا التعبير عن ما حدث لهم من أي منبر وكان يمكن أن تكلف أي سوداني شهم برعاية أسرتك لحين عودتك وتواصل مع الشرطة السعودية إدعائك على أن يركب معك خصمك في الدورية طالما هم موظفي بلدك وطلبوا لك الدورية وأغلبهم عساكر أمن ليس لهم حصانة دبلوماسية وحتى لو لهم حصانة دبلوماسية عموما لا تترك الإعتداء عليك وسب والدتك يضيع سدى وفي حالة عدم رد إعتبارك طال الزمن أو قصر أن تأخذ حقك بيدك


#1221958 [ودالمطر]
0.00/5 (0 صوت)

03-07-2015 11:17 AM
والله بقينا مابنعرف من هو القاضى
هل هوالذى يعاقب بعد الحكم أم الذى يعاقب قبل الحكم ....ناس نسوا الله فأنساهم أنفسهم
ناس دعتهم قدرتهم لظلم الناس فنسواقدرة الله عليهم.
ولكن واضح أنت الغلطان من خلال سردك للقصة تدخل فيمالايعنيك وتتهمهم بالواسطة وترفع يدك عليهم :كأنك تربى فى أطفال حقو تهدى نفسك شوية وبعدين يامهندس ماهم ناس زيك عاوز تقلل من شأنهم عشان ترفع شأنك ولا شنو؟
ماهكذاتصيرالامور ....وهذلايعنى أن يضربوك .
أسوأمافى الظلمة إنهم شبكة بعدالضرب يرسلوك للمسؤول ويعمل ليك فيها الشريف الرضى ومايقدريسأل الضربوك لأنه لوحاول بكرة إحتمال يكون فى الشارع
لاتغضب لاتغضب لاتغضب


#1221406 [تينا]
5.00/5 (1 صوت)

03-06-2015 12:40 PM
شكرا جزيلا على مرورك المشرف أخى (((سارى الليل))) وكل ما قلته صحيح وذى ما قلت نحن هاهنا منتظرون والنشوف ءاخرتا وربنا يستر ... تحياتى


#1221357 [عبدالله ود جبارة]
4.00/5 (2 صوت)

03-06-2015 09:43 AM
المشكلة أن الناس ديل عائشين على أموال المغتربين ورغم ذلك يهينوهم. مثل هذه المعاملة مع قوة العين لا يتمتع بها إلا الذين ينتمون للجنس الثالث، لا هم رجال ولا هم نساء. حتى أطفال المايقومة لم يجند منهم في جهاز الأمن سوى المفعول بهم عند الصغر ليكونوا في المستوى الأخلاقي للكيزان


#1221342 [sudamibi]
4.75/5 (4 صوت)

03-06-2015 09:06 AM
ﺑﻘﺪﺭ ﻣﺎ ﺍﺳﻌﺪﺗﻨﺎ ﺑﺎﻟﻨﻘﻞ ﺍﻟﺪﻗﻴﻖ ﻟﻠﻮﺍﻗﻌﺔ ﺑﻘﺪﺭ ﻧﺎ ﺍﺣﺰﻧﺘﻨﺎ ﺑﺎﻟﺴﻮﺀ ﺍﻟﺬﻱ ﺗﻌﺮﺿﺖ ﻟﻪ... ﻟﻴﻌﻮﺿﻚ ﷲ ﻭﻳﻘﺘﺺ ﻟﻚ ﻭﻟﻴﻌﻮﺿﻨﺎ ﷲ ﻓﻲ ﺩﺑﻠﻮﻣﺎﺳﻴﺔ ﺍﻟﺪﻓﺎﻉ ﺍﻟﺸﻌﺒﻲ ﻭﺍﻟﺠﻨﺤﻮﻳﺪ... ﻫﺬﻩ.. ﺍﻟﻤﺼﻴﺒﺔ ﺍﻧﻪ ﻻ ﺍﺣﺪ ﻳﺤﺘﺮﻣﻨﺎ ﻭﺣﻜﻮﻣﺘﻨﺎ ﺗﻔﻌﻞ ﺑﻨﺎ ﻫﺬﺍ.. ﻭﺑﺘﺎﻉ ﻫﻮﻟﻨﺪﺍ ﻳﻠﻮﺡ ﺑﺎﺷﺎﺭﺓ ﺑﺬﻳﺌﺔ ﻭﺳﻔﺎﺭﺗﻨﺎ ﻓﻲ ﻣﺼﺮ ﻭﻟﺒﻨﺎﻥ ﻻ ﻳﻬﻤﻬﺎ ﻇﻠﻢ ﻳﺘﻌﺮﺽ ﻟﻪ ﻣﻮﺍﻃﻦ.. ﻭﺳﻔﺎﺭﺗﻨﺎ ﻓﻲ ﺍﻟﻬﻨﺪ ﺗﺮﻓﺾ ﻟﻠﻤﺴﺎﻋﺪﺓ ﻓﻲ ﺟﺜﺔ ﻣﻮﺍﻃﻦ ﺳﻮﺩﺍﻧﻲ ﻣﺤﺠﻮﺯﺓ ﺑﻤﺴﺘﺸﻔﻰ ... ﻭﺳﻔﺎﺭﺓ ﺍﻟﺴﻮﺩﺍﻥ ﻓﻲ ﻟﻠﻨﺮﻭﻳﺞ ﺗﺘﺠﺴﺲ ﻋﻠﻰ ﺍﻟﻼﺟﺌﻴﻦ ﻣﻨﺎ.. ﻭﺳﻔﺎﺭﺓ ﺍﻟﺴﺠﻢ ﻓﻲ ﻟﻴﺒﻴﺎ ﺗﺘﺒﺮﺃ ﻣﻦ ﺍﻟﺴﻮﺩﺍﻧﻴﻴﻦ ... ﻭﺗﺘﺮﻛﻬﻢ ﻧﻬﺒﺎ ﻟﺮﻋﺎﻉ ﺍﻼﺭﻫﺎﺏ ... ﻭﺍﺭﺯﻕ ﺍﻟﻨﺎﻫﺎ ﻳﻜﻮﻥ ﻣﻠﻬﻤﺎ ﻟﺰﺭﻕ ﻛﺜﺮ ﻭﻳﻈﻬﺮﻭﻥ ﺩﺑﻠﻮﻣﺎﺳﻴﺘﻨﺎ ﻛﺼﻌﻠﻮﻙ ﻣﺮﺍﻫﻖ ﻣﻜﺒﻮﺕ ﻣﻊ ﻛﻮﻧﻬﻢ ﺍﺯﻭﺍﺝ ﻭﺁﺑﺎﺀ.. ﻛﻴﻒ ﺧﺮﺝ ﺍﻟﻤﻴﺖ ﻣﻦ ﺍﻟﺤﻲ... ﻫﺬﻩ ﺍﻟﺪﺑﻠﻮﻣﺎﺳﻴﺔ ﺑﻌﺪ ﺩﺑﻠﻮﻣﺎﺳﻴﺔ ﺍﻟﻤﺤﺠﻮﺏ ﻭﺍﻣﺜﺎﻟﻪ؟؟؟؟؟؟؟؟؟؟؟؟؟؟


ردود على sudamibi
United States [Samona] 03-06-2015 07:34 PM
تحيه للمهندس الشجاع. لكن سؤال للعارفين هل من سلطه(زفاره) السودان او اي سفاره اخري ان تامر السلطات السعوديه بابعاد اي مقيم عن اراضيها؟ انا شخصيا خثيا استبعد ان تكون لديهم هذه السلطه


#1221251 [Atef]
4.75/5 (4 صوت)

03-05-2015 11:53 PM
حمداً لله على سلامة ألأولاد...
أولاً عزيزي...دفعت رشوة بعد ثلاث ساعات من خروجك من بيت الله...عجبي
ثانياً...تركك لأطفالك بدون أي أوراق ثبوتية أوسيلة إتصال أو رقم تلفون مُعين...لم يكن به شي من ألحصافة... مع علمك بامكانية حدوث أسوء من هذا في ألسفارة...أو في ألطريق لا قدر ألله.
ثالثاً...تدخلك في مالا يعنيك... وعدم معرفتك بقدر نفسك عرّضك للإهانة وألضرب...وأنت أدرى بلابسي ألأخضر، وكثيرا منا مريض بداء ألمنصِب في أرض ألحيوان ...
أسعد...كثيرا من ما نحسبه رجاله، شهامة... وصفات حميدة...، يُحسب في حضارات ألآخرين تخلف، غباء، بداوه جهل...، مالا ندري لا ينفي وجود ما لا ندري.
عدم معرفة ألكثيرين منا بحقوقه ألمدنية وكيفية ألمطالبة بها كأفراد وجماعات، وطرق ألمطالبة بها في كثير من دول ألشتات، ماجعل لصوص ألكيزان ووسخ ألسودان في سفارات ألسودان يفعلون بك وألآخرون كل هذا.....
تأبى الرماح إذا أجتمعن تكسرا وإذا أفترقن تكسرت آحادا ......إحترامي


#1221242 [حموري]
5.00/5 (2 صوت)

03-05-2015 11:05 PM
نريد مقطع فديو تعريفي للقنصليه من الداخل ويرفع علي اليتيوب لنري باعيننا تعامل بقايا قوات الدعم السريع مع المواطنين


#1221239 [ابووعد]
3.00/5 (1 صوت)

03-05-2015 10:50 PM
لا حول ولا قوة الا بالله . الباشمهندس دا لو ما اسرته المسجونة فى الفندق كان ارتكب جريمة قتل لاحد خنازير السفارة هذه . بالله ممكن حد يتصور نصل لهكذا وضع لاحظ دا موقع دبلماسى .

ولاتنسى العبارة ياخى خليك دبلوماسى اى هادى رزين مؤدب وقور !!!!!!


كان الله فى عون دبلوماسيتنا التى اعتلاها شذاذ الافاق الساقطون اخلاقيا واجتماعيا .


ردود على ابووعد
United States [150150] 03-06-2015 05:59 PM
في السفارة السعودية هذه أحد موظفيها وربما السكرتير الثالث اسمه عمار أحمد بابكر من اولاد الجزيرة عندما كان طالبا في الجامعة كان يتجسس على طلاب كليته والجامعة وكان من الطلاب المعروفين بالانتماء لجهاز الامن .. وعندما تخرج تم الحاقه بالخارجيه فقط لان لغته الانجليزيتة ممكن تقول انها فوق الوسط --- ولكنه دميم الخلقة .


#1221191 [ابوصلاح]
2.35/5 (7 صوت)

03-05-2015 08:51 PM
هؤلاء اطقال المايقوما وهم اختارهم بعناية ليكونوا اكثر حقدا على المجتمع وعلى المتضر ان يجمع شمله واهلة وان ينتقم منهم بطريقة داعش زى ما عملوا ناس سنار عندما ازلوهم ناس الامن قتلوا واحد وعشرون منهم وهم نيام بحبل شنقا بحبل الغسيل والى يومنا هذا الفاعل مجهول لانو من امن العقوبة اساء الادب اما ان نتشتكى فسوف لن تجد اذانا صاغية


#1221105 [عابد مختار المختار]
5.00/5 (5 صوت)

03-05-2015 06:31 PM
بصراحة تعامل موظفوالسفارة للمقيمين سئ جدا جدا و اغلبهم شرطة وتعامل الشرطة مع الجمهور معروف فى كل الدنيا والمفروض موظفوالسفارات يكونوا على الاقل خريجين ما قبل الانقاذ حيث يستطيع الواحد يسير امور دولة ناهيك عن سفارة وهذه مسئولية حهاز المغتربين وليس وزارة الداخلية فكل خريجيها افكارهم موجهة للتعامل مع المجرميين وليس تقديم خدمات للمقيمين


#1221098 [ملتوف يزيل الكيزان]
4.00/5 (4 صوت)

03-05-2015 06:22 PM
كل منسوبي الانقاذ و الامن يفتقدون الى ادنى درجات الرجولة. لانهم يشذذون من صباهم عند تجنيدهم في كرخانة الاخوان المسلمين.
المعروف لكل صغير و كبير ان بريطانيا و امريكا دايرين يفرضوا وجود اللاسلام السياسي " الاخوان المسلمين" في حكومة ليبيا كما كانوا يريدون فك مرسي من السجن و تسليمه حكم مصر. هذا الكلام يؤكد ارتباط الكيزان منذ الازل مع الاستعمار البريطاني الامريكي. و نقول ليهم بلاش عبط و محاولة الكذب و الكذب هو دينكم.


#1221078 [تينا]
2.50/5 (4 صوت)

03-05-2015 05:53 PM
شيىء غريب وعجيب يا ربى فى اللحظة ديك فاكرين انو دا واحد من المساكين الفى المملكة المستغلنهم و(((بلغفوا))) فى شقاء عمرهم صيفهم وشتاهم وكمان كل يوم والثانى طالع لينا المدعو حاج ماجد سوار بيفكرة جديدة (((لمكاوشة))) اكبر قدر عندنا من حصاد غربتنا ولا ناسين ؟! لكن يا أخ التاى بصراحة حيرتنى حكاية قلت خليت (((البلطجية))) ديل يضربوا فيك وانت ساكت رغم انهم صحيح كتار لكن ليه ما حاولت تقاومهم ما عارفة فكرتك كانت شنو فى الحتة دى ... سامعة قبيل فى الأخبار قالوا الجماعة شكلوا لجنة للتحقيق (((فى ضرب مواطن فى قنصلية جدة))) ان شاءالله يبقى صحى ما تبقى الحكاية كلام ساكت لمداراة فضيحتهم ! ربنا ينصرك وحسبنا الله ونعم الوكيل ...


ردود على تينا
[abusamar] 03-07-2015 03:04 PM
من المستحيل مقاومة هذا العدد الكبير كما أن أي مقاومة قد تكون نتيجتها قتله أو إعاقته طيلة حياته وإعطاؤهم تبريرا مقبولا لمافعلوا فالقانون يقف مع الموظف دائما ولو رفع أي شخص يده على موظف حتى لو لم يلمسه فسوف يتم فتح بلاغ ضده تحت مادة اسمها (اعتراض موظف أثناء أداء عمله) ولن يصدق كلامه أحد وهذا أمر معروف إضافة إلى أن هذا الرجل الشجاع بمعنى الكلمة والمظلوم بكل ما في الكلمة من معنى ترك أسرته بالفندق ومعه المفتاح وهذا خطأ كبير والحمد لله ان الله ستر وسلمت الأسرة من مخاطر كثيرة والحمد لله أولا وأخيرا فقد لطف بهذا المواطن وأسرته...أما المؤسف حقا فهو الا يتدخل أحد من المغتربين الموجودين حفاظا على أنفسهم(في الغربة تموت الشهامة والمروءةومعظم خصال الخيرالتي عرفناها عن العرب لأن كل واحد خايف على نفسه)وطريقة أخذ المشاكس بعنف من بين مجموعة كبيرة في مثل هذه المواقف معروفة لأن نتيجتها تظهر فورا بين الموجودين (دق القراف خلي الجمل يخاف) لذا لم يتدخل أحد ...لذا تصرفه بالسكون التام كان خيرا وسببا في نجاته ونجاة هذه الأسرة...فعليه أن يصبر ويحتسب ولا يضيع عند المنتقم الجبار حق مهما طال الزمن ... اللهم أرنا الحق حقا وارزقنا اتباعه وأرنا الباطل باطلا وارزقنا اجتنابه ...(وَلاَ تَحْسَبَنَّ اللّهَ غَافِلاً عَمَّا يَعْمَلُ الظَّالِمُونَ إِنَّمَا يُؤَخِّرُهُمْ لِيَوْمٍ تَشْخَصُ فِيهِ الأَبْصَارُ (42) مُهْطِعِينَ مُقْنِعِي رُءُوسِهِمْ لاَ يَرْتَدُّ إِلَيْهِمْ طَرْفُهُمْ وَأَفْئِدَتُهُمْ هَوَاء (43)....هذه الآية الكريمة فيها عزاء لكل مظلوم على وجه الأرض ...ولن ينصفه أحدسوى الله سبحانه وتعالى...فليفوض أمره إلى الله.
)

[ســــــــارى اللـــيـــــــل] 03-05-2015 09:52 PM
الخبر مؤكد و اللجنه ستبدأ التحقيقات مع البلطجية و لكن السؤال الذى نفسه ؟
هل ستكون هناك شفافيه و نزاهه و احقاق الحق للمظلوم الاخ التاى ؟
كم من لجان تم تشكليها و لم تصدر اى احكام او تقديم اى متهم او فاسد للعداله و من قدم للقضاء كان لرأس النظام حق السبق باصدار عفو رئاسى و يا كثرهم و منهم من سقك دماء ابرياء و لك فى الشهيده عضية لها الرحمه مثالا و هتك العروض و منهم من اعتدى على المال العام و منهم و منهم ؟
نحن ها هنا منتظرون نتيجة التحقيق


#1221069 [عثمان حسن]
2.00/5 (1 صوت)

03-05-2015 05:37 PM
الاخ / التاي للاسف لا استطيع ان ادلي بدلوي لان الطرف الاخر غير موجود فلا بد ان نستمع للطرف الاخر وحينها لكل حدث حديث .


ردود على عثمان حسن
[braveheart] 03-08-2015 05:33 PM
يعني عاوز تقول شنو غلطان العمود ؟؟؟؟؟؟؟؟؟؟؟


#1221059 [hassan]
4.75/5 (3 صوت)

03-05-2015 05:10 PM
ابسط حاجة ممكن يعملوها المغتربين الذين كانوا بالقنصلية ان يشهدوا بان الرجل لم يعتدى على اى مسئول بالقنصلية كما ورد فى القصة وان يقفوا معه و اوجه له رسالة بان لا يكتفى بهذه الرساله وان يفتح بلاغ ويعمل كل الفحوصات التى تثبت عملية الاعتداء بالضرب وهى عملية ساهلة جدا واثار التمزق ستظل موجودة لعدة ايام عليك بالاسراع فى الاجراءات القانونية


#1221013 [ود النيل تمساح]
3.75/5 (3 صوت)

03-05-2015 03:35 PM
لالا برافوا علي الراجل وقف وقفة قويه ووصل رسالته
لو اصلا عندنا تعقيب او عتاب نعاتب الناس الواقفين لكن الرساله وصلت
والراجل راعي لظروف اولاده ونعروف جهل المراة السودانيه بالقانون
هسه لو كان هو واثق من انها حتسك الموضوع حتي الجهات العليا السعوديه لكان الراجل صمد حتي النهايه
لكن هو عارف وراهو فاضي ويكفي تخازل الناس الواقفين


ردود على ود النيل تمساح
[حمد] 03-05-2015 07:46 PM
ياريت يهتم التحقيق بحكاية ال2 ريال التى يتم تحصيلها من دون مستند
لما كان السودان دولة محترمة وليس فاشلة كان تحصيل اى جنيه من غير مستند بيقود للنيابة مباشرة ويسمى تحصيل مبالغ من المواطنين لمصلحة خاصة ويعتبر سرقة
بس فى 2 ريال دايرين تحقيق
يكمن اسعد ما قال كل الحقيقة
بس حكاية 2 ريال من غير مستند دى اكيد بعرفوها كل الناس الزارو القنصلية
طبعا فى ناس كتار حيقول ليك انتا بس همك 2 ريال لا القصة ما قصة 2 ريال القصة قصة السرقة والنهب بالاكراه والتجنيب الذى هو سرقة عينى عينك


#1221008 [mr.black heart]
4.25/5 (3 صوت)

03-05-2015 03:21 PM
انا بغلطك أنت يا باشمهندس كان من اول أساءة أقرب شخص ليك تركبو بي اي مصيبة وماتفكوا الا بي عاهة مستديمة انت زول مغترب وعندك قروش اي ضرر بتثببوا ليهو ممكن تدفع ليهو قيمتو زي الكلب الجربان قدام اجعص محكمة موجودة هنا والموضوع لو اطور لي قدام تقدم لجوء سياسي لأمريكا عشان تاني تجي تركبهم بدون زيت ديل اصلا نظامهم كده مابنفع معاهم نظام تاني غير كده


#1221003 [هيثم]
2.88/5 (9 صوت)

03-05-2015 02:56 PM
والله زعلان على الناس في الصف .. ولا واحد وقف مع الزول
النخوة انعدمت مننا للدرجة دي


#1220998 [اب طابوزه]
4.00/5 (2 صوت)

03-05-2015 02:53 PM
جاء فى الاخبار ان وزارة الخارجية شكلت لجنة للتحقيق في هذه القضية ..
المهم يا باشمهندس لا تصالح ابدا مع هؤلاء ولا تنازل لانك اصبحت تمثل كل المغتربين هنا فى السعودية ولو تنازلت سيستمر هذا العنف الغير مبرر ضد الكل ..

ارجو ان تصدق الخارجية وتكون قد اشعلت شرارة تحرق كل الفساد فى تعيين الموظفين فى القنصليات والسفارات خارج السودان ..


#1220975 [المنصور]
5.00/5 (2 صوت)

03-05-2015 02:03 PM
قبل اكثر من كم وعشرين سنة عندما خرجت من السودان في المطار كان بيني وبين اصدقائي مداعبة ومناكفة وقالو لي هربت من المواجهة ضحكت وقلت ليهم والله انا متخارج وشمتان في الشعب السوداني خلو الكيزان يطلعوا ....

وللاسف في الغربة وجد المغتربين جلهم كانوا يهللون ويكبرون مع الكيزان واقول يستاهل المرقود وعاش ابو هاشم ولن نصادق الا الصادق وهي لله وتم تررم ولا زالت الشماتة مستمرة


#1220968 [LAHV;]
4.13/5 (6 صوت)

03-05-2015 01:56 PM
تأثرت وغضبت كثيرا لك .. العساكر وكثير من السودانيين عندما يكون الواحد في موضع تعامل مع جمهور وله سلطه هذا أسلوبه حتى غفير الاسبتاليا بعمل كده أمشي المرور المغتربين توثيق شهادات الخارجية إستخراج شهادة ناس الجوازات المطار ناس الجمارك ... إلخ
الملاحظ عند الناس التي تشاهد الحدث كل واحد يعمل فيها رايح ويقول أنا عايز أقضى شغلتي وما يهمني البحصل مع إنه أي واحد فيهم معرض لنفس الذي حصل . وعشان كده بانذلوا ويتهانوا وهم ساكتين في السفارات وفي المغتربين ، بالله الذي تعرض له كاتب المقال لو الناس الواقفين في الصف وقفوا معاه وتضامنوا معه كان ممكن يحصل ده، في إحدى المرات مشيت المغتربين ولقيت واحد بدفروا فيه عساكر بعنف ، سألت أحد الواقفين الزول ده مالو قال البنت الفي الشباك ضيعت له الإيصال وهو مصر على أنها ضيعته جاءه عسكري من الداخل قال ليه يازول تكلم بأدب قال ليه أن ما قليل أدب خلي البنت دي توريني الإيصال ضيعته وين ، قال لي إتلموا العساكر عليه وإنت شفت الحصل . وسألته الناس الواقفين ديل مافي زول قال حاجه قال مافي حد تكلم .
هل تتوقعوا إنه تخلصوا من نظام الكيزان بمثل هذه الانهزامية والجبن .


ردود على LAHV;
United States [nagatabuzaid] 03-05-2015 07:47 PM
صدقت فيما قلت واصبحنا شياطين خرس واتبدلنا


#1220966 [ISMAT]
4.00/5 (2 صوت)

03-05-2015 01:54 PM
أندهشت جدا لتعليق الاخ حامد عوض والذي قال فيه :-
( يا ناس السعوديه ما تشدو حيلكم شويه وقومو كفتو اولاد ال**** ألأمنجيه الكيزان .... ولا أقول ليكم من أين أتيتم أنتم وليس هؤلاء ؟ )
نقول لك اننا اتينا من وطن كان حدادي مدادي وكان مشهور بحوبة أهله وصفاتهم التي لا تشبه أي شعب في روعتها ة أصالتها ورغما عن ( كان ) هذه إلا أنه لا زال فينا شيئ منها .. أما قولك ( يا ناس السعوديه ما تشدوا حيلكم شويه) زاد دهشتي فمن يسمع ذلك يقول إنكم تمارسون شد الحيل هذا صباحا مساءا .. حيلنا خليهوا .. أبقي عشرة انت علي حيلك ..


#1220949 [المؤمل خير]
5.00/5 (2 صوت)

03-05-2015 01:21 PM
غالبية كلاب الأمن يختاروهم من بين أصحاب العاهات الأخلاقية في الصغر !


#1220944 [الــســيــف الــبــتــار]
3.57/5 (5 صوت)

03-05-2015 01:08 PM
لك الله اخونا أسعد و صبرك و جلك و تحملك لهؤلاء الفاقد التربوى و البلطجيه وحسالة القوم انما يدل على صبرك و تقديرك للموقف من سلبات و ايجابيات و مالات أخرى سوف يكون مرددوها عليك اولا و سببا فى قطع رزقك ؟
الحساله هذه محصن فى السودان و يمتلك حصانه دبلوماسيه بموجب اتفاقية فيينافى 1961م ؟
يتمتع بموجبها الدبلوماسى بحقوق و لا يقع تحت طائلة القانون المعمول به فى الدوله المعتمد لديها و لا يلاحق قضائيا او جنائيا او جزائيا ؟
ويشمل أسرته و المرافقين له و العاملين لديه ؟
فى حالة ارتكاب جرم مشهود يبعد من الدولة المضيفه و يحاكم فى دولته ؟
ولذلك يا عزيزى لا رجاء يرتجى و لا لن تستطيع أن تنال حقك من هذه العصابة لا فى السودان و هو الحاضن و المصدر لهؤلاء السفله و لا فى السعودية التى تلتزم بالاتفاقية نصا و مضمونا .
و عليه أوكل امرك لله و أكثر من الدعاء عليهم و ربنا ينصرك عليهم أن شاء الله .
ولا تأخذ حقك بايدك عند عودتك الى ارض الوطن سالما و تبقى الشغلانه ثأر ليس الا ..


#1220940 [سعد بركات]
4.38/5 (5 صوت)

03-05-2015 01:02 PM
لا حول ولا قوة الا بالله والله ما حدث لك يا اخ التاي شئ مؤسف جداً وشئ يندى له الجبين ولكن الأكثر أسفاً وخذياً هو موقف هولاء السودانيين الذين كانوا موجودين بهذا المكان وشاهدوا ما حدث هولاء أكيد ليس هم السودانيين الذين نعرفهم هؤلاء يمكن ان يكونوا تربية الإنقاذ أو مجموعة من اللاجئيين الذين تحصلوا على الجنسية السودانية في هذا الزمن المأزوم ما حدث لك يا اخ التاي هو ما يعانية هذا الشعب السوداني منذ 25 سنة والموقف الذي وقفه الحاضرون بالقنصلية هذا هو نفس الموقف الذي اعتاد عليه الناس في السودان موقف الخذي والعار والانكسار وهو بإختصار الذاد الذي تتغذي منه الانقاذ وزبانيتها وزمرتها لذلك اعتقد اننا نستحق ان تحكمنا الاتقاذ الى يوم القيامة لانه كما جاء في الحديث لا يغير الله ما بقوم حتى يغيرو ما بأنفسهم أو كما قال فطالما نحن على هذا الحال من الخنوع والخضوع والزل والمهانة فإن الانقاذ ستكون جاثمة على صدورنا حتى نتغير انظروا كيف استطاعت الشعوب من حولنا أن تثور وتنتفض لكرامتها وعزتها وكيف انهم تحدوا اعتى الدكتاتوريات واستطاعوا ان يقهرومها بعد ان بذلوا دماءهم وارواحهم فداء لذلك وكان لهم ما أرادوا أما نحن و على الرغم من اننا لا نعيش مثل البشر ونعاني أبشع صور المعاناة في حياتنا اليومية لدرجة ان حياتنا أصبحت لا معنى لها ولكننا رغم ذلك نخاف ولا نواجه ولا نستطيع ان نتجرأ بمجرد عبارة الرفض والله هذا هو الذل بعينة وهذه هي عبودية أخر الزمان تحكمنا عصابة خسيسة خبيثة ونخضع لها نحن طايعين ومنقادين دون حتى ان نحتج على ذلك ولا حول ولا قوة إلا بالله


#1220906 [همت]
4.50/5 (3 صوت)

03-05-2015 12:00 PM
هؤلاء الذين ضربوا التاي بضعة كلاب من كلاب البشير. سيضربوا المزيد والمزيد من الناس وحيجيهم يوم ويضربوا واحد ويرجع لهم شايل رشاش يرسلهم جميعاً إلى جهنم رأساً بإذنه تعالى ونسأل الله أن يلحقهم البشير نفسه وعاجلاً


#1220905 [حسن على الحسن]
5.00/5 (3 صوت)

03-05-2015 11:58 AM
مثال حي لحماقة السوادنة التي يتحدث عنها العرب
لاي شيئ انتصر هذه البطل لكرامته التي اهينت حسب وصفه وهي بالفعل كذلك لم يذرك لنا انه رفع دعوة للسلطات للتحقيق في الأمر ويعتقد من اعتدوا عليه انهم علموه الادب عشان عامل راجل وكل هذه سمات تخلف السودانيين بجيمع فئاتهم لا بد ان نعيد منظومة القيم التي تحكم علاقاتنا و نتعلم من الشعوب الاخرى بعض سمات التمدن والتحضر وهي ما نسميه جبن وتخاذل في منظومة قيمنا الحالية والتي هي بدوية بل فيها ـاسوأ سمات البداوة
الكل خاسر في هذه المواجهة المؤسفة لله درك يا سودان


#1220899 [كاره الكيزان محب السودان]
3.50/5 (3 صوت)

03-05-2015 11:40 AM
هذه المأسأ ليست نموذج لتعامل السفارات السودانية مع مواطنيها فحسب بل هو نظام الدول ونظام الحكم الفاسد الذي سطى على دولة السودان بقوة سلاح عسر عصابة الجبهة الاجرامية.

للاسف هذه الحكومة (العصابة) القاشمة قد ملكت لك منتسبيها احساس ان البلد بلدهم هم وباقي الموطنين رعايا ليس لهم حق إلا ما يتفضلون به هم علهيم. لذا تجد كل من هو تابع لهذه الحكومة الغاشمة يحمل هذا الاحساس ويتعامل مع الآخرين بموجبه.

ولا نقول ان السودانين قد عرفوا هذه الجماعة وما تحمله تجاهمم ولكن نقول ان الشعب السوداني قد أصابه الجبن والوهن ولن يقدر على تحرير وطنه من عصابة الجبهة الاجرامية ولصوص المؤتمر البطني. والبركة في أبطال الجبهة الثورية الميامين وأن كنا نعيب عليهم طريقة نضالهم العقيمة. فبدلا من تفجير منطاق هؤلاء الخونة اللئام فإنهم مازلوا يصرون على مقاتلة جيش العصابة في حدود مناطقهم مما يعرض أهاليهم إلى نيار طائرات العدو الغاشم.


#1220874 [سودانى بحب بلده]
4.50/5 (3 صوت)

03-05-2015 11:11 AM
والله والله يا جنابو اسعد لا بد جاييك يوم وتسعد تذكر عبارتى دى كويس

سبايا نحن في هذا الزمان الرخو
لَمْ نعثرعلى شَبَهٍ نهائيِّ سوى دمنا
ولم نعثر على ما يجعلُ السلطانَ شعبياً
ولم نعثر على ما يجعل السَّجانَ وديّا
ولم نعثر على شيء يَدُلُّ على هويتنا
سوى دمنا الذي يتسلَّق الجدران....


يرونه بعيدا ونراه قريبا


#1220858 [كوز متخفي]
3.50/5 (3 صوت)

03-05-2015 10:55 AM
رغم كثرة الردود والتعليقات، إلا أن الغضب الشديد والقهر المؤلم الذي شعرت به، جعلني اكتب لعلي أفش شيئاً من غبينتي.
العاملين في القنصلية في جدة ليسوا إلا حثالة من المنحطين عديمي الأخلاق، وهذا هو دين الكيزان من قمة السلطة إلى أصغر كوز حقير حاقد على السودان والسودانيين. هؤلاء السفلة تم تربيتهم تربية خاصة وغسل عقولهم بطريقة خاصة، فماتت بدواخلهم كل قيم الدين والانسانية، ووجب قتلهم حتى لا يكونوا فتنة للمسلمين في السودان والعالم الاسلامي.
إنني من هذا المنبر أدعوا كل السودانيين للزود عن دينهم وقيمهم وأخلاقهم النبيلة وأن يتخلصوا من هؤلاء السفلة الارهابيين المتشددين المتطرفين وأن لا تأخذكم فيهم رحمة أبداً لأن هؤلاء وأمثالهم هم أعداء الدين وأعداء الأمة الاسلامية وأعداء الشعوب الحرة في كل بقاع العالم.


#1220856 [ضروس]
0.00/5 (0 صوت)

03-05-2015 10:55 AM
قمة الفوضى ....
*****************************
لا افْتِخارٌ إلاّ لمَنْ لا يُضامُ ********** مُدْرِكٍ أوْ مُحارِبٍ لا يَنَامُ
لَيسَ عَزْماً مَا مَرّضَ المَرْءُ فيهِ ********** لَيسَ هَمّاً ما عاقَ عنهُ الظّلامُ
واحتِمالُ الأذَى ورُؤيَةُ **********************جانِيـه غِذاءٌ تَضْوَى بهِ الأجسامُ
ذَلّ مَنْ يَغْبِطُ الذّليل بعَيشٍ *****************رُبّ عَيشٍ أخَفُّ منْهُ الحِمامُ
كُلُّ حِلْمٍ أتَى بغَيرِ اقْتِدارٍ****************** حُجّةٌ لاجىءٌ إلَيها اللّئَامُ
مَنْ يَهُنْ يَسْهُلِ الهَوَانُ عَلَيهِ************* ما لجُرْحٍ بمَيّتٍ إيلامُ
ضاقَ ذَرْعاً بأنْ أضيقَ بهِ ذَرْعاً*********** زَماني واستَكرَمَتْنِي الكِرامُ


#1220851 [Ayman]
4.00/5 (2 صوت)

03-05-2015 10:50 AM
حسبنا الله ونعم الوكيل
لا تخف ياتي يوم وتقتص فيه منهم حقك امام الله
بس للاسف الشديد كنت سلبي جدا في التعامل معهم
ما جعلهم يتطاولوا ويضربوك
لو رديت العنف بالعنف كانوا علموا لك الف حساب
صدقني
هم ما في السودان القانون ما يحميهم
ولو طلعت قسم الشرطة فتحت بلاغ فيهم كنت اخدت حقك
الله يسامحك فرط في حقك


#1220833 [مجدي الحاج - الرياض]
4.25/5 (3 صوت)

03-05-2015 10:36 AM
طبعا الرد الحكومي لا يمكن أن يكون قدر المأمول بقدر ما يكون التغطية علي الخبر من الاعلام...بلا ونحن قادرون أن نشعللها زيادة كلما أطفأوا هذه القضية بالطريقة التي ترضينا..وقريبا سترون أحراق السفارة والقنصلية باللي فيها ..فقط لتعرف الحكومة مدي تهاونها في قضايا رعايها ..بدلا من الدفاع عننا في المحاكم ولدي الحكومات كممثلين لنا ...ولكن وللأسف كللللهم من سفيرهم لقنصلهم فقط مغتربين مثلننا...ليتنا رعايا دول أمثالنا في الاقتصاد الفلبين الهند الباكستان...كل البشر في الخارج تحترم المواطن السوداني الا هؤلاء الاوباش القادمين من الادغال...وكما ذكرت ستجدون قريبا ممن يجيدون البلطجة يا بلطجية...


#1220830 [السودان الوطن الواحد .]
3.75/5 (3 صوت)

03-05-2015 10:34 AM
يا باشمهندس الحق لا يسقط والحمدللع اطمأنيت على عيالك يجب أن تستمر فى رفع الشكوى ضد هؤلاء الأوباش حتى نعرف حدود القانون كما أن الإقرار الذى وقعتك لا يمثل لك ادانة لأنك وقعته تحت تأثير معروف اجتماعى وإدارى قانونا يجوز إعادة النظر فى الإقرار وإذا ثبت أنه كان تحت تأثير ظروفك الخاصة يعتبر لاغى ويعاد فتح الملف من جديد ومعرفة اصل القضية ومن هو الجانى الحقيقي ومنْ اعتدى على منْ لا تترك حقك فقضيتك أصبحت قضية رأى عام وهى قضية كل المهاجرين وستساعدك مواقع التواصل الإجتماعى للوصول إلى الشهود الذين حضروا الواقعة ... استمر


#1220815 [hamed]
2.25/5 (6 صوت)

03-05-2015 10:26 AM
هنا ... من المفروض في مثل هذه المواقف يجتمع السودانيين ويقدموا عريضة بما حصل مع الشهود والأدلة ويقدموها للقضاء السعودي ... والمعروف في القضاء السعودي لا يسمح ابدا بمد اليد والضرب واستعمال القوة ... وأنا متأكد من أنه سوف ينصف المضرر ...


#1220812 [كماتل عبيد]
4.25/5 (4 صوت)

03-05-2015 10:24 AM
يعني انت ماعارف ان النظام دا بيتعامل مع المواطنين كدا...؟ كل الوسخ دا هو ماعند النظام للمواطنين في كل سفارات السودان...انتظر بعد زوال النظام واتسد واذا لم تاخذ حقك منهم واحد واحد...يبقي كلام صاح..انصحك بالمساهمة مع شعبك لاسقاط نظامهم القضية ليست شخصية كما قلت بنفسك


#1220790 [Abu sami]
4.50/5 (4 صوت)

03-05-2015 10:06 AM
قرأت كلامك و لكن للأسف النهايه كانت مخزية جدا . لم أكن أتوقع أن توقع على تعهد من طرفهم . صمته و فطرته على بصله يا زول. هم خوفوك باترحيل لكن تأكد أنو السلطات السعوديه اكنت ح تحقق و تأخذ ليك حقك.


ردود على Abu sami
United States [مراد حماد] 03-08-2015 11:51 AM
يا أبو سامي والله الباشمهندس أتى بما لم تستطعه الأوائل.
أنا متأكد في ناس كتار أخدوا العلقة وما سمعنا بيهم
الحمدلله إننا الآن سمعنا
وفي إنتظار النتيجة

United States [nagatabuzaid] 03-05-2015 08:15 PM
لا يا ابو سامى الزول ده بعرفهم وبعرف اساليبهم فخاف على اسرته فاتختار الضرر الاخف وكشفهم ربنا يعينوا ويعين جميع السودانيين على رباطة القنصليات العزاء على القنصليات والسفارات

European Union [ود النيل تمساح] 03-05-2015 03:32 PM
لالا برافوا علي الراجل وقف وقفة قويه ووصل رسالته
لو اصلا عندنا تعقيب او عتاب نعاتب الناس الواقفين لكن الرساله وصلت
والراجل راعي لظروف اولاده ونعروف جهل المراة السودانيه بالقانون
هسه لو كان هو واثق من انها حتسك الموضوع حتي الجهات العليا السعوديه لكان الراجل صمد حتي النهايه
لكن هو عارف وراهو فاضي ويكفي تخازل الناس الواقفين

[حسن جوكر] 03-05-2015 11:23 AM
الظاهر عليهو قل ادبه عليهم كتير وعشان كدا رضخ.. تاني ما تمشي ليهم


#1220779 [عمار]
4.25/5 (5 صوت)

03-05-2015 09:56 AM
والله انا بحمد ربي ليل نهار اداني جواز اوربي والله اكرم وافضل من الجواز السوداني مليون مرة , انا كفرت بالسوادنين ودينهم المؤتمر الوطني


ردود على عمار
[الغريب] 03-25-2015 06:23 PM
ما دام بقيت أوربي قاعد تسوي معانا شنو في الراكوبةوداير شنو باخبار السودان وانت كفرت بالسودانيين ولست منهم. ناس عندها عقد

European Union [West Yorkshire] 03-05-2015 02:59 PM
مبروك حليت مشكلتك وانا حليت مشكلتي بس في قرابه أربعين مليون نسمه ديل منو البحل مشاكلهم تعليقك يدل علي جهل فكري متفشي في جميع اعضاءك حتي قلبك والله أعلم.


#1220772 [البشير الكزاااااب]
3.00/5 (3 صوت)

03-05-2015 09:52 AM
والله الانقاذ دي دايره تمول انتخاباتا من عرق المغتربين الغلابه حسبي الله ونعم الوكيل ربنا يرينا فيكم يوم


#1220757 [albatar]
3.50/5 (3 صوت)

03-05-2015 09:33 AM
حسبي الله ونعم الوكيل


ردود على albatar
[ابولجين] 03-08-2015 09:54 AM
حسبى الله ونعم الوكيل ديل عبارة عن صعاليك

[ابواية] 03-06-2015 10:02 AM
نعم حسبنا الله ونعم الوكيل..
ادعو عليهم اخي اسعد التاي فانك مظلوم ودعوة المظلوم ليس بينها وبين الله حجاب..
اللهم انا نسألك بكل اسم هو لك، سميت به نفسك، او انزلته في كتابك، او علمته احدا من خلقك، او استأثرت به في علم الغيب عندك ان تأخذ منهم حقنا وحق عبدك اسعد التاي في الدنيا قبل الاخرة
اللهم ياقادر أرنا فيهم عجائب قدرتك ..اللهم ياجبار يامنتقم انتقم منهم في الدنيا قبل الاخرة ..
اللهم دمرهم اللهم دمرهم اللهم اللهم دمرهم.

[التار] 03-05-2015 09:54 AM
اهم حاجة تحفظوا اشكالهم واسماءهم عشان الحساب ,, مهما طال الزمن الحكومة حتزول بتراجلوا هسي وبعدين يبقوا ذي النسوان , يعني هم ارجل من كتائب القذافي البقوا يتجرسوا ذي النسوان بعد سقوط الفرعون بالعود ,,


#1220738 [سامي]
2.50/5 (4 صوت)

03-05-2015 09:15 AM
لاعذر فى ضرب اي انسان في القنصلية نفرض الراجل دا هسه مات . كمان فى المملكة العربية السعوديةقطع رأس .قطع رأس على طول مفروض تشتكي وبمحامي وتأخذ حقك منهم فى السعودية . انتو قنصلية والله عصابة مفروض تتطولوا بالكم وتشتغلوا 24 ساعة مش بتصرفوا من قروش المغتربين ديل .


#1220719 [الدبلوماسية]
4.63/5 (4 صوت)

03-05-2015 08:56 AM
إن الدبلوماسية ليست مبررة من العمل الجنائي ما قام به هؤلاء من حيث الاتهام إنه عمل جنائي يحاسب عليه الشخص الذي فعله من هنا هناك جهتين للابلاغ الاولى شكوى لخارجية البلد المضيف لاحالة الامر لجهة الاختصاص لدى وزارة الداخلية للبلد المضيف والثانية إبلاغ عمادة الدبلوماسيين في نفس البلد بما حصل وهناك قانون يسحب صفة دبلوماسي حتى تتم المحاسبة بالصورة القانونية التي تلزم لكل طرف حقوقه

فالدبلوماسي من المفترض ان يحترم نفسه قبل الاخرين من المفترض من طرفهم إبلاغ قسم الشرطة المسؤوله عن حماية السفارات والقنصليات قبل الضرب من طرفهم اذا كانوا هم يعلموا ويعرفوا كلمة دبلوماسية فهؤلاء اولا أساءوا لكلمة دبلوماسي من هنا يجب توكيل جهة قانونية تعلم وتعرف العرف والقوانيين الدبلوماسية فهناك كتب كثيرة تشرح قوانيين الدبلوماسيين .والدبلوماسية ليست وظيفة مهابة حتى تحمي صاحبها ليقوم ويعمل عمل جنائي بل في حالة قيام صاحبها بذك يكون عقابه اكثر من الشخص الغير دبلوماسي لان عقاب الجاهل يقل عن عقاب الشخص المتعلم العالم بالشيء من هنا امر قضيتك ينقسم الى 3 اضرار الضرر الاول الضرب اذا كان ورد وبتقرير طبي الثاني الشتم اذا ثبت ذلك بشهود والعقاب الثالب وهو قيام الدبلوماسي نفسه للوصول لدرجة أعراض الغير للاهانة والضرب هذه نفسها عقوبة تؤدي لسحب الوثيقة التي يحملها هذا الدبلوماسي يجرد منها ومن ثم المحاسبة فيجب ان لا تكون الدبلوماسية مطية للتكابر والتعالي على الناس هناك جهات متخصصة تبحث على مثل هذه الانتهاكات من قبل المسئولين الدبلوماسيين حتى يحاسبوا ويكونوا عبرة لغيرهم


#1220713 [أسمر جميل فتان]
3.32/5 (7 صوت)

03-05-2015 08:53 AM
يا شعب يا سوداني يا طيب

خارج الوطن أو داخل الوطن ... لا تخاف من قولة الحق الموت واحد والرب واحد والكاتبه الله بيجيك بيجيك!!!

الراجل اذا في (عشرة) رجال بس دخلوا وراهم والله العظيم ما كانوا سوا ربع العملوه معاك!!! ونسوا انو حتى لو أسعد غلط في النهاية هو اخوك وممكن (تكون) في مكانه واذا غلط اجبروه على الاعتذار واسحبوه بهدوء الي الخارج ولكن تفكير غريب يعني لو بس رفعتوا صوتكم على الراجل السحبوه للداخل انا متاكد انو كان حايهدي الموضوع !!!! لانو الموضوع حايمشي في اتجاه اخر!!!


الجبن ما بيحلكنا والخوف ده لمتين واتذكروا كلاب الامن ديل في النهاية اقل من عدد الشعب السوداني

يعني احسب موظفين السفارة كم والمراجعين كم!!! يعني ممكن المراجعيين ياكلوهم ويقرمشوهم كمان

الله يلعن ابو ده جواز البيخلي الواحد يتشتم ويلعنوه بالطريقة دي!!!


#1220693 [Negro]
4.25/5 (4 صوت)

03-05-2015 08:34 AM
ما حصل لك يالأخ (تاي الله ) مؤسف جدا ولك أن تتخيل ديل عملوا شنو في بيوت الأشباح لناس أبرياء وعزل ودائما بتاع الأمن عندما يكون في السلطة بيعمل فيها ما في راجل مثله ويستغل السلطة لأبعد حد في إهانة الناس ولكن(الأيام دول ).........وبرضو يا (تاي الله) ممكن يكون ده إمتحان من الله عشان تعيد حساباتك وإحتمال عندما كنت عسكري زي ما ذكرت في مقالك .....راجع نفسك إحتمال تكون قمت بإهانة شخص قبل كده أو اسأت ليهو لذلك ربنا( يمهل ولا يهمل وكما تدين تدان) ما شفت القذافي ربنا إنتقم منه كيف؟؟؟ لأنه أساء لشعبه وأهان الكثير من الغلابة والمساكين فأرجو أن تكون حادثتك هذه تذكرة من الله .......راجع حساباتك .....أما الجماعة العذبوك ديل فليهم يوم ولزعيمهم البشير ميعاد في الدنيا قبل الآخرة........آمين فدعوة المظلوم لا ترد.



خدمات المحتوى


صفحة 1 من 3123>
مساحة اعلانية





الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة