الأخبار
أخبار السودان
عاوزة ليها كلام؟
عاوزة ليها كلام؟
عاوزة ليها كلام؟


05-02-2015 05:41 PM
الفاتح جبرا

طقس من الطقوس اليومية التى إعتدت عليها منذ سنوات لا أعرف كم عددها .. أن أقوم بعد توصيل الأولاد للمدارس أن أغشى(كشك الجرائد) أشتري صحيفتين سياسيتين .. ما أن أدخل إلي المنزل حتى أتوجه (للراكوبة) التى تفتح علي المطبخ حيث أضع الصحيفتين على أحد الأسرة وأدلف إلى المطبخ لأصنع كوب قهوتى الصباحية !
درجت جارتنا الحاجة (صفية) على شرب القهوة الصباحية معي بين الحين والآخر طالبة مني أن اقوم بقراءة الأخبار الهامة لها إذ أنها أمية (جيل ما قبل المدارس) ، ما أن حملت فنجانى القهوة ووضعتهما بيننا على التربيزة الحديدية وأمسكت بعدد الأمس من صحيفة التيار والذي يقول ( الإتحادي يطالب بنائب الرئيس ورئاسة البرلمان ووالي الخرطوم) حتي صرخت بصوت عال :
- خلاس الإنتخابات إنتهت وعاوزين يتقاسمو الكيكة !!
- (الحاجة صفيه في إستغراش) : هم عندهم عيد ميلاد وللا شنو؟؟؟
- والله يا حاجه ده مش عيد ميلاد ده مووولد عدييييل !
- مولد النبي محمد؟
- لا لا ده مولد وصاحبو غايب !
- عليك الله أقرأ ليا الخبر :
- الخبر بيقول ليك يا حاجة (علمت التيار من مصادرها إنو الحزب الإتحادي الأصل بزعامة السيد محمد عثمان الميرغني
- (مقاطعة) : ديل مش ياهم ناس (الفتة لو حارة؟)
- (مواصلاً) : طالبو المؤتمر الوطني !
- (مقاطعة) : ديل مش ياهم ناس (أنتا أمشي القصر رئيس وأنا بمشي السجن حبيس؟)
- (مواصلاً) : أها يا حاجه بقولو ليك الجماعة ديل طالبو المؤتمر الوطني يديهم موقع نائب الرئيس ومنصب والي الخرتوم وكمان رئاسة البرلمان !
- إنتا يا أخوي زمااان مش أداهم منصب (مساعد رئيس جمهورية) عملو لينا بيهو شنووو ! تتذكر لمن كنتا بشرب معاك في القهوة ووريتني صورتو !!
- بتذكر يا حاجة بتذكر خلاس أقيفي لحدت هنا ...(مواصلاً) : أها يا حاجة بيقولو ليك في مشاورات (سرية) بين (الطرفين) عشان يحددو ناس (الفتة لو حارة؟) يشيلو ياتو (وزارات) وناس (أنا بمشي القصر رئيس وأنا بمشي السجن حبيس؟) يشيلو ياتو وزارات !
- (مقاطعة) : وإشمعني مشارورات (سرية) هي الحاجه دي ما بتهمنا ؟؟ وللا ده سر بيناتم براااهم .. والله ذي ما قلتا يا أستاذ ياهم قاعدين يتقاسمو في الكيكة وبالدس كمان !
- (مواصلا) : أها يا حاجة الخبر بيقول ليك ناس (أنا بمشي القصر رئيس وأنا بمشي السجن حبيس؟) إعترضو على حصة ناس (الفتة لو حارة؟) لكن ناس (الفتة لو حارة؟) قالو ليهم تعترضو شنوووو .. حقو النقولو ليكم تدونا ليهو هسه كان ما أنحنا كان الإنتخابات دي نجحت ؟ ما عملنا ليكم ليها (زخم) وعضضنا ليكم بي مشاركتنا دي (الشرعية) وكده
- يعني معني كلامهم ده عاوزين (التمن) ؟
- بالحيل ... والله ياهو ذاااتو يا حاجه عاوزين التمن !
- يعني هسه باقي ليك يا استاذ الناس ديل عاوزين التلاته مناصب دي عشان يطورو البلد !
- يا حاجه تلاته مناصب شنووو البيطورو بيها البلد .. والله دي (ويندوز) ما تطورور
- طيب ما كان واحد فيهم يترشح لرئاسة الجمهورية !
- ههههههه دي يا حاجه ما الفتة الحارة ذاااااتا
- كيفن ... هم ما (حزب معارض) !
- شوفي يا حاجه ناس (الفتة لو حارة؟) ديل أنا لا بعرفهم معارضين وللا موالين لكن عمرنا ما سمعنا لينا بي واحد منهم طلع في مظاهرة وللا أخد ليهو سوط سوطين وللا عيونو دمعت من البمبان !
- يعني ما عندهم خطورة على الحكومة ؟؟
- خطورة شنوووو يا حاجة ... والله (قرفنا) دي أخطر على الحكومة منهم
- طيب ما عشان كده ح يدوهم (وزارات ومناصب) قدر خطورتهم !!
- ودي يا حاجه عاوزه ليها كلااااام !!

كسرة :
ناس (الفتة لو حارة) ديل لو عملو للواحد (عصابة سوداء) في عيونو وودوهو الحارة 97 وفكوهو هناك وقالو ليهو أرجع (الجنينة) بي (قوقل أيرث) GOOGLE EARTH ما يقدر يرجع !!
- كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)+(و)+و+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و)+(و)+و+و
fatih.jabra@gmail.com






تعليقات 13 | إهداء 0 | زيارات 9659

التعليقات
#1259003 [julgam]
0.00/5 (0 صوت)

05-03-2015 04:58 PM
ياود جبره أخبار عنتره الوقع البحر شنوووووووووو؟. ياخى حيرتنا فيه ،وقطعت قلبنا بأحزاب الفته والفكه،،


#1258767 [جملون]
0.00/5 (0 صوت)

05-03-2015 10:35 AM
الحاره ما مرقت ست الدوكه ما .....


#1258702 [محمد علي]
0.00/5 (0 صوت)

05-03-2015 08:57 AM
ما شاء الله يا جبرة .. يا دوب الناس وعت بقت تعرف منو الكان ماكل بى عقولهم حلاوة..

جل جلال الله ..
النوبة ترنُ .. وترنُ
والدرويش الشبعان فتة يرجحنِّو
والحيران للشيخ يصهلو ويحنِّو
ولما كبرو وعرفوا الحقيقة
بقوا يصرخو ويدمدموا ويجنِّو

حي .. حي.. حي.. الله حي
وي ... وي..أكلو السجار ني
قلب المريسة مي مي ..


#1258660 [محمد]
0.00/5 (0 صوت)

05-03-2015 07:58 AM
والله يا أستاذ أنا قايلك بتتكلم عن جنينتنا ال في دارفور لمن جبتا سيرة Google Earth !!!! أنا ما نسيت الجنينة ال في بحري !!!!


#1258648 [جنو منو]
0.00/5 (0 صوت)

05-03-2015 07:50 AM
جماعتك خلوا اكل الفته وقلبوا كيك عديل كده والله محن كيكيه ياجبره .. !!


#1258610 [البصير أبو حمد]
0.00/5 (0 صوت)

05-03-2015 07:17 AM
غايتو يا جبرا بعد كلامك دا .... ودعناك الله والرسول


ردود على البصير أبو حمد
United States [nagatabuzaid] 05-03-2015 10:45 AM
فال الله ولا فالك يا البصير ابوحمد ان شاء الله استاذ جبرة محفوظ برعاية الرحمن

[المجنون] 05-03-2015 08:57 AM
حزب عملاق

يتقدمه اقزام


#1258568 [احمد المسيري]
0.00/5 (0 صوت)

05-03-2015 05:59 AM
زمن ناس الفته الحاره وتأليه مشايخهم وبوس ارجلهم باعتبارهم يقدمون صكوك الغفران قد ولي مع انقراض جيل الستينات والخمسينات الناس عقلت وفهمت الناس ديل مجرد ارزقيه موائد بمظله دينيه .
نقطه سطر جديد



ناس الفته ام توم ديل الله ياخذهم اخذ عزيز مقتدر ديل سبب بلاوي السودان


#1258411 [nagatabuzaid]
4.50/5 (4 صوت)

05-02-2015 06:56 PM
حاجة صفية دى مش ياها زولة حلااااااااااتو لما شافت ود الميرغنى الصغنتوت لما ادوه مستشار فى القصر ؟ عليك الله يا استاذ جبرة وريها صورتو بعد بقى مدبلغ كان تعرفوا ؟ اكيد ما حتعرفوا . هم الناس ديل من يدخلوا القصر بتدبلغوا كلهم مالهم ؟ ماتقول لى فتة حارة فى القصر ديل بياكلوا كلاب ساخنة بامر الريس هوت دوق رئاسى


ردود على nagatabuzaid
United States [nagatabuzaid] 05-03-2015 10:41 AM
الكرام ابو احمد وود الطريفى تقبلا تحياتى وتشرفت بمداخلتكما

[الطريفي] 05-03-2015 08:27 AM
ههههههههههههه دي قلبت فيها الهوبة عديييييل . تعليقاتك موضوعية ودايما اكون حريص علي قراءتها.جمل قصيرة ومعبرة الله يديك العافية وينصر شعبنا الغلبان ان شاء الله .

European Union [AbuAhmed] 05-03-2015 02:29 AM
ابدعت يا نجوده


#1258408 [ود الشريف]
1.00/5 (1 صوت)

05-02-2015 06:47 PM
هههههههههههههه الله يديك العافية يا عمنا والله ناس الفتة الحارة دى الفيهم اتعرفت من زمان ولاد ايسكريم وبيرقر مابيعرفو القراصة ولا حتى الفتة الحارة ديل راحت ليهم عديل ويا حليل زمن ناس سيدى ده كان زمان اسي ان نزلو براهم مايفوزو قال نطالب يطالبو شنو هم عندهم كرامه عشان يحترموهم ولا يدوهم مقام ديل ولاد لندن ما ولاد السودان قومو لفو بلا سيدى بلا وجع راس


#1258405 [حكم]
5.00/5 (1 صوت)

05-02-2015 06:32 PM
ناس (الفتة لو حارة) ، ابوهم الكبير مرة ساقوه بالعربية ماشين مدنى

قالوا لما العربية فاتت سوبا .. قال ليهم السودان دا بلد كبير خلاص

تقول لى ناس "روضة الحنان" يرجعوا من الحارة 97


#1258396 [الدرب الطويل]
5.00/5 (3 صوت)

05-02-2015 06:07 PM
هههههههه.. حلوة حكاية الحارة ٩٧ دي..
بس كان تخلي حاجّة صفية دي تكمل تساؤلاتها عن (حلاتو) المدغلب.. انا ذاااااتي نفسي اعرف الولد مساعد الصاج دا مشى وين؟ يا ربي مستمر في وظيفتو وبياخد مرتب عاااادي؟..



خدمات المحتوى


مساحة اعلانية





الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة