الأخبار
أخبار السودان
حرم عبد الرحيم محمد حسين : علاقته مع البشير اخوة وصداقة ومحبة..ووجوده في المناصب لكفاءته
 حرم عبد الرحيم محمد حسين :  علاقته مع البشير اخوة وصداقة ومحبة..ووجوده في المناصب لكفاءته


ابنتي مهندسة راقية و مستواها عالي تسمى عابدة، ولايمكن تلبس حاجة زي دي،
06-28-2015 12:59 PM
الخرطوم :حنان الطيب

السيدة سارة سيد محمد سيد احمد حرم والي ولاية الخرطوم الفريق عبدالرحيم محمد حسين خريجة كلية التربية جامعة الخرطوم، نالت درجة الماجستير في العام6991 عملت بقسم المناهج بإدارة تعليم البنات بوزارة التربية والتعليم الاتحادية حتى العام 2012م، من مواليد كرمة البلد.

التقتها (آخر لحظة) في الإفطار الرمضاني بمنزل الأستاذة سامية أحمد محمد بحي المطار التي درجت على إقامته سنوياً لكافة قيادات المرأة بمختلف مواقعهم ووظائفهم، وخرجت بهذة الافادات من حرم الوالي السيدة سارة .



٭ رمضان داخل منزل الوالي؟....

- حياتنا عادية وأكثر من عادية مثل اي بيت سوداني أقوم بطهي واعداد وتجهيز الوجبات الرمضانية بنفسي بمساعدة بناتي.. و تحتوي المائدة الرمضانية على القراصة بملاح الويكة التقلية الحمراء يومياً الطبق الرئيسي بجانب الفول سلطة الروب والبليلة والبلح والمشروبات الابري الحلو مر وغيره من المشروبات البلدية.

٭ ماهي الأكلة المفضلة للفريق.. وعلاقته بالمطبخ...

- القراصة بملاح التقلية وهو (ما فاضي) لدخول المطبخ نسبة لاعبائه ومسؤولياته..

٭ هل تقومين بعمل الابري...؟

- نعم أجيد صناعته وأقوم بعمل الخلطة بنفسي و (الابري حقي لا يعلى عليه) وهو من المشروبات الأساسية والمفضلة في هذا الشهر الفضيل .

٭ مما تتكون الاسرة؟ ..

- أم لأربع بنات وولدين اكملوا مراحلهم الجامعية وجميعهم متزوجون.

٭ لديهم علاقة بالسياسة....؟

- أبداً ليست لديهم اي علاقة بالسياسة كلٌ مشغول بعمله ووظيفته

٭ الأغاني التي يستمع اليها أو يدندن بها .؟

- كما ذكرت بأنه مشغول نسبة لاعبائه والمسؤولية التي تقع على عاتقه، وبالتالي ليس لديه وقت فراغ للاستماع للأغاني أو حتى مجرد الدندنة بها..

٭إذا وجد وقتاً فيما يستثمرة ..؟

- لو جد الوقت يستغله في قراءة القرآن الكريم ولكنه حريص على قراءة كل الصحف اليومية ومتابعة الأخبار في كل القنوات....

٭ الأشياء التي تضايقه...؟

- أكثر مايضايقه شيئان عندما يكون يقرأ في القرآن ويقطع عليه أحد القراءة اوالتلاوة وأيضاً في حالة إيقاظه من النوم .

٭ هل له علاقة بالرياضة.. الفريق الذي يشجعه..؟

- ليست لديه علاقة بالكرة ويشجع الهلال ولا يعرف عنه شيئاً...

٭ الفريق يعرف الرطانة .... ؟

- طبعاً كل كلامنا بالرطانة على طول في البيت الأولاد الكبار بفهموا وأحياناً تستفيد منها في مواقف معينة (الأسرار) إذا كان هناك أمر ما ولا نريد توضيحه للأبناء.

٭ مناصب الفريق غيرت في تعاملك مع الجيران والمعارف والأهل؟...

- أبداً لم اتغير نهائياً في التعامل مع الجيران والأهل والمعارف ولم أشعر في يوم من الأيام بانني زوجة مسؤول وإنما زوجة ضابط فقط...

٭ هل تقومين بالخروج مع الوالي دون رسميات بالزيارات والمجاملات الاجتماعية؟..

- للمجاملات والزيارات أو المناسبات يخرج لوحده لأنني مشغولة بالمنزل، ولذا أصبحت مجاملاتي ضعيفة ونادراً ما أخرج ولا اتذكر آخر مرة طلعت معه دون رسميات هو يذهب لاي شخص.

٭ لا تميلين للبس للاكسسوارات الكثيرة.. عكس ما ظهرت به إحدى بناتك في مواقع التواصل الاجتماعي..؟

- بناتي أيضاً ليس لديهم حب في لبس الاكسسوارات وكل هذه والصور مفبركة في الواتساب والفيس بوك، وهي ليست بنتي وما ( عندنا حاجات زي دي ).

٭ صورة الفيس بوك قيل إنها علياء عبدالرحيم محمد حسين ولابسة كمية من الاكسسوارات.. تعليقك على ذلك؟

- أولاً ليست لدي بنت تسمى علياء، علياء اسم صيدليات الجيش، الناس قالت إنها ملك للفريق عبد الرحيم عندما تزوجت بنتي سموها علياء محمد وجابوا ليهم امرأة لابسة اكسسوارات سموها كمية من الدهب (أنا المرة الكبيرة) لا اقبل لبس هذه الكمية من الدهب، ابنتي مهندسة راقية و مستواها عالي تسمى عابدة، ولايمكن تلبس حاجة زي دي، عندما سافرت لشهر العسل لم تلبس إلا الدبلة فكل هذة الاشياء كما ذكرت مفبركة وغير صحيحة

٭ مايقال عن الفريق في مواقع التواصل وتحديات الولاية.... على علم بذلك؟

- نحن على علم بذلك، ولكن لا نعيرها اي اهتمام ولاتسبب لنا اي نوع من المضايقات، لأنه كلام فارغ وحتى الفريق لا يهتم بذلك، ونعتقد أن الشخص في العمل العام مستهدف ويمكن أن (يقولوا فية اي كلام ) فاذا كان سيد البشرية الرسول صلى الله عليه وسلم لم يسلم من الكلام (فنحن ولا اي حاجة).

٭ يقال ان هناك نوع من البذخ والترف في زواج ابنائكم ؟

- ما يقال كذب وعارٍ من الصحة تماماً زواجهم يتم بصورة عادية وأكثر من عادية

٭ ألم يشعر الفريق أول بأن المنصب الجديد إبعاد له ...؟

- على الاطلاق ليس له ابعاد وعندما (شالوه) قال انا جندي في حكومة السودان لخدمة البلد (محل مايختوني بسد اي فرقة) و(لا اقدرأن اقول اي شيء)

٭ ماذا أخذت منكم المناصب وماذا أعطتكم....؟

- لم تعطنا اي شيء بل أخذت كل شيء، الاستقرار الراحة والبيت الذي يكون فيه الاب موجود في كل لحظة، والمشاركة في اي شيء، وأحياناً كنا (لا نشوفوا) ليوم أويومين خاصة الستة سنين الأولى، والسنة الأولى لثورة الإنقاذ من اسبوع لاسبوع

يوم الجمعة لساعات، والخمس سنوات لتغيير ملابسه...

٭ يقال إن سر بقاء الفريق في الحكومة لصداقته بالرئيس...

- هي علاقة اخوة وصداقة ومحبة ووجوده في المناصب لكفاءته واستطاع اثبات وجوده وكفاءته في المناصب التي تولاها، فالبيان بالعمل ونجح وليس لاي شيء آخر.

٭ رسالة للذين يروجون للشائعات في مواقع التواصل الاجتماعي..؟

- تدل على العمل بالفارغة، وعدم وجود موضوع، وأفضل لهؤلاء أن يقوموا بعمل أشياء تنفعهم في الدنيا والآخرة.

اخر لحظة
image






تعليقات 30 | إهداء 0 | زيارات 39796

التعليقات
#1646707 [حفيد تور شين]
0.00/5 (0 صوت)

05-24-2017 08:33 AM
احترموا المكونات الاسرية فى السودان ..
تكلموا على الرجل كسياسي وليس كاب حول بناته..


#1612846 [سودانى اصيل]
5.00/5 (1 صوت)

03-14-2017 02:30 PM
ردود الزوجة كلها كضب فى كضب ما باقى الا تقول ان زوجى هو رسول وانحنا بنعينو على امور الدعوة. ليكم يوم يا كيزان يا قتلة يا مجرمين.


#1597556 [عبدالله]
0.00/5 (0 صوت)

02-12-2017 10:49 AM
اتقي الله في قولك واصدقي القول فيوم القيامة يفر المرؤ عن امه وابيه وصاحبته وبنينه فلا ينفعك عبدالرحيم وانما ينفعك صدقك ولا يزال الرجل يصدق وتحرى الصدق حتى يكتب عند الله صديقا ولايزال الرجل يكذب ويتحرى الكذب حتى يكتب عند الله كذابا



فأنتي قد كذبتي القول يا ست اسأل الله ان يغفر لك واستغفري الله لذنبك استغفر الله الذي لا اله الا هو الحي القيوم واتوب اليه


#1596744 [alwatani]
0.00/5 (0 صوت)

02-10-2017 04:21 PM
يناس تزوج ود النو من القطينة بنت عبدالرحيم

اولا بزخ :بالجد" الزول فى صنية والفواكه والتحلية والسمك كلها من بره وحدث ولاحرج

تم تعين والده فريق وقائد تقريبا"والد العريس" للقوات البرية ولم فات عبدالرحيم فات النو


اذن كلام الاستاذه خارم بارم زيها وزى الاساتذة الاصبحوا سياسين الكذب ملازمهم اين ماحلوا " شاهد عيان "


#1294824 [adil a omer]
0.00/5 (0 صوت)

06-29-2015 12:33 PM
بتقصد الكفاءه فى الرياله قوة 100 لتر فى الثانيه


#1294765 [ابودعد]
0.00/5 (0 صوت)

06-29-2015 11:38 AM
سؤال يا حنان انت الوداك هناك شنو اوع تكوني منهم؟؟؟


#1294757 [ليدو]
0.00/5 (0 صوت)

06-29-2015 11:25 AM
بالله دة زول ياكلوا معاه قراصة في صحن واحد ؟؟؟؟؟


ردود على ليدو
United States [خالد] 06-29-2015 02:14 PM
والله مش في صحن واحد في بيت واحد ما ممكن لأنو طراشك مضمون 100%

European Union [برعي] 06-29-2015 12:24 PM
بدوه صحنو براهو ،هاهاها
لو اكلت معاهو تكون قراصة بي بزيق وريالة هاهاها


#1294756 [دنيا]
0.00/5 (0 صوت)

06-29-2015 11:25 AM
إستعدى كدى لإرسال القراصة بملاح التقلية إلى لاهاى أصلو قعاده هناك حيطول


ردود على دنيا
[AL KIRUN] 06-29-2015 06:26 PM
Sorry... Isn't you.. wrong people > I'm looking for Rania.. wherer's she


#1294709 [أحمد فقيرى]
0.00/5 (0 صوت)

06-29-2015 10:33 AM
الحمد لله إنه بشجع الهلال . وفعلا الهلال يستحق التشجيع من أمثال عبدالرحيم محمد حسين , لأنهم فى نفس مستوى الضحالة . و أكرر شكرى و حمدى لله إنه ما مريخابى , وطبعا مستحيل عبدالرحيم محمد حسين يكون من الصفوة .


ردود على أحمد فقيرى
[bluenile] 07-01-2015 08:27 AM
يعنى الفرق شنو البشير هارب حوهانسبرج مريخابى مبروك عليكم !!!!!

European Union [محمد] 06-29-2015 01:41 PM
حياتك كلها مافى غير المريخ والكورة هو لو ماالحكومة المريخ ده كانت بقى فريق ولا لقى ناس تشجعو


#1294702 [kola]
0.00/5 (0 صوت)

06-29-2015 10:30 AM
المهم دايرين انجازات في الخرطوم وما دايرين وعود ووعود ليها مئات السنين


#1294690 [عمر حسن]
0.00/5 (0 صوت)

06-29-2015 10:17 AM
والله الاستاذة دافعت دفاع مشروع عن رب اسرتها مثل ماتفعل كل امراة سودانية ولكن انصحها بالاستماع للنقد الايجابى .


ردود على عمر حسن
[AL KIRUN] 06-29-2015 06:29 PM
If... they know that they will never eating the bloody money


#1294671 [naselhalfiya]
0.00/5 (0 صوت)

06-29-2015 10:05 AM
دي الاولي وين الثانية و عندها كم جني!!!


#1294653 [كتاحة امريكا]
5.00/5 (1 صوت)

06-29-2015 09:36 AM
ووجوده في المناصب لكفاءته


#1294610 [kmk]
0.00/5 (0 صوت)

06-29-2015 08:22 AM
اجمل ما فى الحوار انه بشجع الهلال


#1294591 [بدونيع]
0.00/5 (0 صوت)

06-29-2015 07:52 AM
ياموسي خدمه بلادشنو انت يازول نايم من زمن حكومه عبودياجماعه زول فيكم يصحي الداقس ده [بلد بقت كلهادراويش]


#1294575 [معاويـــــــــــــــــــــــــــــــــــة]
0.00/5 (0 صوت)

06-29-2015 07:33 AM
فعلا سقوط الصحافه والاعلام وايضا سقوط من يستضاف ومن يسال عنه


#1294363 [محمدعباس]
4.88/5 (5 صوت)

06-28-2015 07:30 PM
((بمنزل الأستاذة سامية أحمد محمد بحي المطار )) .

سمحة المقدرة , بمنزلها بحى المطار عدييييييييل ؟؟
و ناس الحى الأصليين أصبحو يسكنو فى العشوائيات فى أطراف الخرطوم و بحرى ..
دُنيا فرندكس يا ناس أبو العلا و عبد المنعم محمد و باقى الرأسمالية الوطنية ..


ردود على محمدعباس
[سامية] 06-29-2015 11:56 AM
منو القال ليك حي المطار بسكنو ناس أبو العلا و الرأسمالية يا برجوازي؟ حي المطار جزء كبيييير منه كان من زمن الانجليز لكبار الموظفين في الدولة وكان جزء منه كبير لأساتذة جامعة الخرطوم ومازال هناك من يسكن حي المطار من أساتذة الجامعة

انتو بتتكلمو ساي. أسأل في الأول وأعرف الحاصل قبل ما تكتب


#1294316 [عبدالواحد المستغرب اشد الإستغراب!!]
5.00/5 (2 صوت)

06-28-2015 05:22 PM
بصراحه ردها الآخير تستحق عليه الثناء (فعلا نحن شغالين بالفارغه يا بت ابوكى!!)اما بقية الاسئله عباره عن آكلشى شوفناها فى كل المقابلات ولا إعتقد إننا كنا متوقعين منها كلمة تقولها فى لحظة صدق مع النفس عن ابورياله والهباله والعواله بتاعتو !! والشىء الإكتشفناهو من خلال الحوار أن (مدام ابورياله)كانت تشغل منصب مهم فى ماتسمى بوزارة التربيه والتعليم وماعندى كلمه اقولا غير (إذا عرف السبب بطل العجب!!) وعلى قول الراحل حسن مصطفى فى مسرحية مدرسة المشاغبين (هو التعليم باظ من شويه!!)!! إلا ..يامدام أخبار الحريم التانيات شنو؟!!.


#1294312 [nagatabuzaid]
4.50/5 (3 صوت)

06-28-2015 05:12 PM
يا اخر لحظة مقابلتكم دى عبيطة وبايخة واسئلة سطحية انها استاذة ومن جيل غير اساتذة هذا الزمن السطحيين ولذلك هى بتعرف تتكلم شوفوا جنس الاسئلة دى علاقته بالمطبخ اكسسوارات ما بعرف شنو ؟؟ والمنصب الجديد ابعاد له تفتكروا حتقول لكم ابعاد له ؟ لو كنت مكانها ما كنت جاوبت على اسالتكم ولكتبت لكم اعد بالخط الاحمر ترى كيف كانت ستكون اجابة بعلها ان وجهت له ؟؟ هناك حريم نجيضات انجض من بعولتهن


ردود على nagatabuzaid
[AL KIRUN] 06-29-2015 12:43 AM
Tell us then : what the best question it could be > especially you know the jouranlism in Sudan is tied, isn't unchained


#1294308 [ســـــارى الـلــيـــل]
4.50/5 (2 صوت)

06-28-2015 05:01 PM
صبرنا على بعلك دا ما بينفعنا دنيا و أخره يا وليه ؟
الحمد لله اتهى االموضوع على كدا ما سلرحتى بينا قلتى اللمبى رجل المهمات الصعبه ؟
هاها ها ها دنيا دبنقا ........


#1294297 [ابو حمدي]
4.50/5 (3 صوت)

06-28-2015 04:40 PM
بعيدا عن السياسة انت بت بلد وراقية وشرف لكرمة البلد


ردود على ابو حمدي
[جيفارا] 06-28-2015 07:00 PM
احييك


#1294292 [ود الزين]
4.25/5 (3 صوت)

06-28-2015 04:33 PM
دي زوجة عبد الرحيم ولا الصوارمي الكلام كله نفي في نفي


#1294289 [ابراهيم]
3.38/5 (4 صوت)

06-28-2015 04:16 PM
4 بنات و2 اولاد ابارك وازيد واخلي .. يس سؤالي كيف كلهم شغالين وكل بيت في السودان فيه 2 و 3 خريجين جامعيين عاطلين عن العمل. جماعة الانقاذ كل واحد عنده 4 نسوان وجيش من العبال وكلهم يتم تعيينهم في وطائف حكومبة شركات النهب المسلح وغيرهم اشرب من موية البحر. مجرد ملاحظه !!!!!


ردود على ابراهيم
European Union [جنو منو] 06-29-2015 08:32 AM
أفضل من فردته .. أنتج ..!!


#1294281 [التمساح]
4.50/5 (3 صوت)

06-28-2015 03:59 PM
والى ولاية الخرطوم بالنظر,,,, أبو ريالة
معرسة زول عويييييييير عديل كدا


ردود على التمساح
[أب راسن غليد] 06-29-2015 09:40 AM
هههههههههههههههههههههههههههههههههههههههههههههههههههههههههههههههههه


#1294279 [babo]
2.00/5 (3 صوت)

06-28-2015 03:59 PM
خليه يوفر لينا موية بس وما عايزين نشوف خلقته


#1294260 [اللمبى ابوريالة]
4.00/5 (3 صوت)

06-28-2015 03:24 PM
"أكثر مايضايقه شيئان عندما يكون يقرأ في القرآن ويقطع عليه أحد القراءة اوالتلاوة وأيضاً في حالة إيقاظه من النوم ."
القران وعرفنا لكن حكاية النوم دى فيها انة الاصح : "عند ايقاظه من النوم وهو مريل"


#1294215 [موسى]
5.00/5 (5 صوت)

06-28-2015 02:04 PM
نسأل الله في هذا الشهر الكريم أن يعينه على خدمة البلاد والعباد .... ويجعل نيته خالص لوجه الله .....


ردود على موسى
United States [بركل بدر] 05-24-2017 06:33 PM
شنو شنو شنو يا موسى كدي قول كلامك ده تاني


#1294196 [ابراهيم1£2]
3.63/5 (5 صوت)

06-28-2015 01:48 PM
زوجة الفريق تستحق ان تكون هي والي الخرطوم ، يبدو من المقابلة انها دبلوماسية اكثر من مطلوب المحكمة الجنائية عبد الرحيم حسين


ردود على ابراهيم1£2
Canada [zozo] 03-17-2017 08:52 AM
I think this interview has been arranged by some ghost writers and the ghost
writers , reporters and journalists can not address a press conference ,let us see her on live interview and then we can decide about her diplomacy , ability and capability , other wise birds of a single feather flew together , in other word the mother of ordinary dog is the female fox


#1294178 [أنصاري]
3.50/5 (4 صوت)

06-28-2015 01:35 PM
كفاءته "بالنظر"..!!؟


#1294176 [جنرال زمان]
4.00/5 (3 صوت)

06-28-2015 01:35 PM
ونحن ذنبنا شنو في نهار رمضان الحار؟؟؟ والبنت مهندسة راقية يا عالم واسمها عابدة ،، وحلو مر الأم لا يعلى عليه؟؟؟ جداً ... واستفدنا شنو هسع غير أنه الرطانة في غرفة النوم !!!!!! بس سامية شلوفة دي ساكنة في بيت حيكومة في حي المطار على أي أساس يا ناس؟؟؟؟ عاشت الانقاذ وطز في أي زول حكاية بقت أكثر من مقرفة ومملة .... سير يا سلفا خلينا نخلص بس



خدمات المحتوى


مساحة اعلانية





الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة