الأخبار
أخبار السودان
حكاياتي مع البوليس السوداني (النظام العام وبوليس السجون) والأمن السوداني
حكاياتي مع البوليس السوداني (النظام العام وبوليس السجون) والأمن السوداني


06-28-2015 01:45 PM
نجلاء سيد أحمد*

محاولات للخروج من الصمت ........حكاياتي مع البوليس السوداني ( النظام العام وبوليس السجون) والامن السوداني محاولات للكتابة عن تجربتي الشخصية حتي لا انساها مع مرور الوقت .. فيها الطرفة والحقيقة والانتهاكات.
واعاهدكم ان احكي بكل صدق وامانه و القصد هو التوثيق لمايدور خلف الاسوار والسجون ومايحدث من انتهاكات لحقوق الانسان ضد الناشطين تابعوني....

اول تجربة لي مع النطام العام ...كانت سنة 1996 وانا كنت عروس لي سنة واتذكر (زوجي) بخاري كان في السنة الاخيرة من كلية الأقتصاد بجامعة الخرطوم، واليوم كان اقتصاد لاعبة مباراة كرة قدم ضد شمبات.
حضرنا الكورة .. بعد الفوضى والهيصة وانتهت الكورة طلعنا ماشيين البيت، مافي مواصلات وكنا نسكن في الديوم الشرقيه الخرطوم كان معانا مازن اخو بخاري الصغير ونزار اخو أمين بشرى صاحب بخاري من الجامعة ونزار يسكن الصحافة، أها قررنا نمشي المشوار على أرجلنا.

لمن وصلنا ابوجنزبر قصاد نادي ناصر الثقافي (وزارة المالية حالياً) المشهد كان انا وبخاري ماشيين قدام والشباب الأثنين ورانا انا طرحتي وقعت من وقت التشحيع في الكورة + السخانة ومشي كداري ما اشتغلت بيها لمن قاصدنا النادي كان في عسكري قاعد حارس المبني قام نهرني ارفعي الطرحة يابت؟
انا عملت فيها ماسامعة وواصلنا مشينا ..
العسكري طلب من ناس مازن يوقفونا. مازن نادي بخاري وقفنا والعسكري جانا جاري وشايل سلاح قي يدوا قال لي قلت ليك ارفعي الطرحه في راسك يابنت.
انا: ما حارفعها _ اندهش من ردي قام طوالي قال لبخاري قول ليها ترفع الطرحة في راسها اتخيلوا بخاري ردوا كان شنو ؟
قال له انت ماسمعتها قالت مابترفعها؟
طوالي عرفنا بتاعين مشاكل قام عمر البندقية وفال لينا ارح الكبسولة ..
مشينا كلنا للكبسولة .
المشهد كان في ضابط قاعد لمن شافنا قال : للعسكري ديل مالهم؟

العسكري :قال له ابت ترفع الطرحة بعد قلت ليها ارفعيها قلت للزول المعاها يكلمها قام هو يقصد بخاري قال لي انت ماسمعتها قالت ليك شنو وقام اهان شرف الدولة.
الضابط بدون مايسمع اقوالنا طلب من العسكري يمشي يجيب بوكس ويحولنا للمقرن مقر ومحكمة النطام العام .....

في انتظار العربية العساكر جابوا صحن فول وعيش واحد منهم قال اتفضلوا اتعشوا.
بخاري طوالي قام علي الصحن حشى عيشة مداها لي قلت له موش عايزه قال لي ماحقنا قام أكل الفول بعدها البوكس وصل وبقينا قدام البوكس.

قدام البوكسي المشهد كان ... فتح العسكري الباب وطلب مني اركب قدام وطلب من بخاري يركب بالخلف وصاحبكم عايز يقعد معاي قدام بخاري تلب من البوكس وهجم علي العسكري قال له على جثتي كان تركب قدام معاها تركب معاي هنا وهي تكون براها قدام.
قام العسكري الاهبل طوالي عمر البندقية ووجهها على رأس بخاري وقال لبخاري اركب وانا حاحرسك بخاري طلب من مازن يمشي الداخلية وفي مرجع بتاع علوم سياسية بلقي فيه القسيمة حقتنا وتحركت العربة الي المقرن .... اها بعد وصلنا كانت الساعة 11 مساء مسلسل اوشين بادي (مسلسل ياباني ) ونحن داخلين الشمار حارق العساكر الفي الحوش واحد منهم سأل جايبهم بالمادة 152؟... العسكري لا مخالفة اوامر برفع الطرحة.

المكتب فخم وخلفه ضابط يجلس ويتابع المسلسل وهو بعاين علي التلفزيون قال ليه مالهم ديل؟ بعد العسكري حي الضابط قال له انا قدام المركز وديل كانوا ماشين في الضلام وكان ماسك يدها والطرحة واقعة من راسها وانا وقفتهم ماسمعوا الكلام ولمن حصلتهم قلت ليها ارفعي الطرحة رفضت وقلت لي الزول المعاها دا يكلمها ترفعها سيادتك قام اهان شرف الدولة ووسخ لي هدومي وقبقبني وقال انت ماسمعتها قالت ليك لا. وقام سب لي الدين سعاتك ...انا : مندهشة قلت له انت كضاب دا ما حصل خالص ...
الضابط نهرني قال لي انت تسكتي خالص انا ماسألتك
عاين لي بخاري قال له اها الحاصل شنو؟
بخاري حكي له الحكاية وفال له دي زوجتي ..

الضابط نسي الطرحة وقال لي بخاري لو ما عندك القسيمة تعبتوا معانا حنحولها لكشف طبي نتحقق من عذريتها ودا موضوع بجيب جلد وزني وفضائح ووووو وبعد المحاضرة الطويلة بخاري قال له انا رسلت اخوي يجيب القسيمة وهسع في السكة .
قال خلاص اقعدوا في الكراسي دي لحدي مانشوف كضبكم دا
انا كنت متابعه مسلسل اوشين قعدت احضر في انتطار مازن والقسيمة..
عدى زمن طويل ونحنا جلوس كما احسسته رغم مسلسل اوشين الممتع .. ظهر مازن و كل طلاب الداخلية ومعاهم القسيمة (الفاتورة) ذي ما في النكتة.

أدوها للضابط عاين ليها بتفحص ثم رفع راسوا موجه كلاموا لبخاري انت ماتبقي (ديك) كان تقطع في العسكري دا كف وكم شلوت. ادى بخاري القسيمة وفال للعسكري خليهم يمشوا ...

انا كنت زهجانة من كل المسرحية شديد واسهل حاجة العسكري يكضب فيك ومافي اي طريقة تدافع عن نفسك رغم ذلك جاني احساس بالنصر ...
وطلعنا ماشيين من المقرن كداري اخر ازعاج ونحكي الحصل لينا للزملاء ... انتهت التجربة الاولى نواصل .....في حلقة التجربة الثانية.


-------------
* نجلاء سيد أحمد ناشطة سياسية أجبرتها مضايقات جهاز الأمن على مغادرة السودان غصباً عنها وتعيش الآن مع زوجها وأطفالها لاجئة بأوغندا.






تعليقات 21 | إهداء 0 | زيارات 15888

التعليقات
#1294983 [محمد كركاب]
5.00/5 (1 صوت)

06-29-2015 04:37 PM
بسم الله الرحمن الرحيم
سلام يا نجلاء وسلام على بخاري وعليكم جميعا.
سلام يا بنت الكرام..سلام يا أم راشد ()...انت فخر للمرأة السودانية ، فخر للاهل والمعارف ، وفخر لي كل السودان ...ولي ناس بحر ابيض كمان!!!
نسأل الله تعالى ان يرفع هذا الظلم عن كاهل الشعب السوداني وان ينصره وان يجنب البلاد الفتن ...
تحياتنا لكم من بلاد الفرنجة!!! وحتما نعود.


#1294799 [badr]
5.00/5 (1 صوت)

06-29-2015 12:13 PM
ههههههههههههه حلوة ما تبقى ديك دي عجبتني شدييييييد


#1294693 [saif]
4.00/5 (2 صوت)

06-29-2015 10:19 AM
هههاى والعسكرى دة خلى شغلوا وقعد مباريكم للمقرن والشرطة ياهو دة شغلوا ؟+


#1294593 [عمر]
4.50/5 (3 صوت)

06-29-2015 07:55 AM
زنقه البشير في جنوب افريقيا جزء من ظلم العباد والبلاد...وسوف تتوالي العقوبات
وليس زنقه القدافي ببعيده فبعد اربعين عاما اتاه امر الله المنتقم فلا يامن مكر الله


#1294590 [إبراهيم خليفه]
3.00/5 (2 صوت)

06-29-2015 07:49 AM
حكايات شهرزاد فى عصر
الإنقاذ
سلامات يدفعه ليك وحشه ربنا يحفظ ليك اسرتك


#1294545 [كوكو]
3.00/5 (4 صوت)

06-29-2015 05:34 AM
لاجئة في اوغندا!!! ياللعار اوغندا بالله وصلنا الدرجة دي ملعون ابوك بلد.


#1294540 [حكم]
3.00/5 (3 صوت)

06-29-2015 04:30 AM
ذكرتينى قصة حصلت معاى مع عساكر ديدبان قدام السفارة التونسية
الدنيا ليل ومافى مواصلات وانا راجع من ميدان ابوجنزير لداخليات جامعة الخرطوم
نادانى العسكرى وهاك يا تحقيق جاى من وين وماشى وين؟؟ وليه ماشى بى كرعيك
وقعدنى فى الواطة وبقى يسألنى اسئلة غبية زى (فى زول بخلى المواصلات وبيمشى كدارى؟) ..
فى النهااااية .. قال لى قوم امشى .. نحنا زهجانين وحنقعد هنا للصباح وما عندنا موضوع ، قلنا نعملك موضوع

اما مسألة التهديد بالسلاح حصلت لى بعد سنوات مع عساكر تانين

اكون انا الغلطان ، المحومنى بالليل شنو ؟؟


#1294538 [محمود]
3.00/5 (2 صوت)

06-29-2015 04:10 AM
سبحان الله انا اليوم اتذكرتك
قلت استاذة نجلاء قدرو يسكتوها ولا الحاصل عليها شنو
العسكري ما مؤهل عشان يتكلم معاك في أشياء زي دي
بس انا عاتب عليك استاذة نجلاء
هل من الدين او من العرف او من عادات السودانيين
تمشي في الشارع وفاكة شعرك وكمان معاك زوجك وعاجبو المنظر


ردود على محمود
[عصام الجزولى] 06-29-2015 09:06 AM
قيم الدين والعرف تكتسب بالتربية والتنشئة وليس بأوامر من عساكر قلت عنهم أنت (غير مؤهلين ) للحديث عن هذه الاشياء ولا زالت الناس تذكر الفتاة الجنوبية التى لم يتجاوز عمرها 16 عام وكانت ترتدى بنطلون وتسير فى شارع الكلاكلة اللفة حاول أحد العساكر التحرش بها جنسيا ولما لم تستجيب له أرغمها على الذهاب الى مركز الشرطة وأتهمها بليس زى فاضح ؟؟ والان سمعت لولوة هذا العسكرى وكذبه وتلفيقه للتهم للاستاذة نجلاء فالاخلاق لا تكتسب بالقانون بل بالتربية من البيت والعساكر غير مؤهلين لتربية النساء لان فاقد الشىء لا يعطيه ثم ان كل النساء الاجنبيات من الدول الاوربية والاسيوية المقيمات بالسودان يكشفن شعرهن فى الشارع فلماذا لا تطبق عليهن الشريعة التى وصفها أمير المؤمنين عمر بن البشير بأنها مدغمسة ؟؟ ولماذا ازدواجية المعايير؟ أم اننا اذا سرق فينا الشريف تركناه واذا سرق الضعيف أقمنا عليه الحد ؟؟


#1294475 [الحلفاوي القرفان]
5.00/5 (1 صوت)

06-28-2015 11:59 PM
الي الامام ست نجلاء ..ونحن ساعون وجادون لوضع اسمك ضمن المرشحين

لجائزة نوبل ..عبر القنوات والمنابر العلميه ومنظمات المجتمع المدني

ويا ريت الحلقات دي نفسها تجمعيها وتصدريها في كتاب ...شان بعض الرجرجه

(مثل هذا الرفاعي المتخلف ) يشوهوا هذه الحلقات ....


#1294474 [معاويـــــــــــــــــــــــــــــــة]
3.00/5 (2 صوت)

06-28-2015 11:57 PM
نجلاء سيداحمد ارجل من رجال هى رمز للصمود والتحدى لكلاب الانقاذ تفو عليهم اينما كانو وليهم يوم يشوفوا فيهوا ان شاء الله سؤات اعمالهم لك التحيه والود ولزوجك الف تحية وانتى اشرف من الانقاذ ب اهلها كلهم ...............................


#1294402 [محمداحمد قمرالدين]
3.00/5 (5 صوت)

06-28-2015 09:11 PM
بسيطة يااستاذه كان ترفعي الطرحة وخلاص
غير العسكري العرف السوداني والدين بقول ارفعيها. حتي لو راجلك عاجباهو الفكرة كدا. غايتو جنس غايتو


ردود على محمداحمد قمرالدين
[عصام الجزولى] 06-29-2015 01:26 PM
الموضوع ما بسيط ياأستاذ محمد أحمد لانها عندما ترفع الطرحة استجابة لرغبة العسكرى تجعله يعتقد أنه هو المسوؤل عن تربية الناس فى الشارع والتربية لا تأتى بالوعظ والارشاد والاوامر العسكرية بل تأتى بالغدوة الحسنة والبنت المسلمة غدوتها نساء النبى وبناته ثم والدتها بعد ذلك وهذه البنت لوكانت متبرجة لما خرجت من منزل زوجها وهى تلبس الطرحة من أساسه ثم أن مسألة الاحتشام هذه نسبية بمعنى ان أحد العساكر قد يرى أن كشف الراس تبرج واخر يرى البنطلون للبنت تبرج وثالث يرى العباءة الضيقة تبرج ورابع يرى وخامس يرى أن الاسكيرت الضيق تبرج وسادس يرى أى لبس غير الثوب تبرج وهكذا والتربية قناعة داخلية تنبع من ضمير الفرد ولا تأتى بالتخويف والارهاب لان التخويف والارهاب يجعل الانسان ينافق فهذه البنت كان يمكن أن ترفع الطرحة ثم لما تبتعد من العسكرى ترميها مرة أخرى وساعتها تكون خافت من العسكرى ولم تخاف من الله


#1294385 [الرفاعي الكلس]
3.00/5 (4 صوت)

06-28-2015 08:31 PM
يااخت نجلاء الانسان المناضل انسان صاحب فكر صاحب قضية . انسان بدافع عن قضايا وبقدم حلول . لكن منظر بنت رامية طرحته وكاشفة شعرها وماشة في السوق بدون اي احترام لعادات وتقاليد البلد . بدون احترام للبشر الماشين في الشارع دا مااسمو نضال دا اسمو قلة ادب وعدم تربية ومابنقبل ابدا انك تكوني مناضلة وغدوة لي بناتنا . . قصتك دي ماعندها علاقة بالقضايا الوطنية . عليك الله ماتشوهي صورة النضال والمناضلين امام الناس . يعني لو قبضوا واحد سكران بطوطح في الشارع يعتبر مناضل ويكتب قصة . واي صعلوك قبضوه مع بنت مناضل . وست العرقي وبايعات الهوي بعد الثورة حايبقوا وزراء اوعلي الاقل اعضاء في البرلمان . يانجلاء الشعب السوداني بعاني من الغلاء والجوع والحروبات والفساد والنهب والرشوة والمحسوبية والقبلية والعنصرية والاقتصاد انهار والجنيه دق الدلجة والفشقة محتلة وحلايب شالوها المصريين والجنوب انفصل ودارفور في الطريق . وانتي بنت ماعندك ادب وراجلك زول وهم. والعسكري كان يقطع فيك كف اول حاجة تاني يتكلم معاك .


ردود على الرفاعي الكلس
[يا خبر بفلوس] 06-29-2015 11:50 AM
كلس شنو وكلام فارغ شنو البنت دي ارجل منك وصمدت في صبر وتحد لكل انواع القهر والتهديد والبلطجة وشفناها في اكثر من صورة وفيديو لابسة طرحة وتوبها حتى عنقها كاسي وقالت ليك لم تلحظ وقوع الطرحة من على راسها بسبب المشي لمسافة طويلة .. انت عايز ليك سبب تعاكس التيار العام الذي اشاد بصمودها وتحديها لكل انواع القهر ..

[عمر] 06-28-2015 11:27 PM
والله يا الكلس عفيت منك .. دا ما اسمو نضال دا اسمو قلة ادب وعدم تربية ويا هو دا السودان .


#1294368 [خالد]
4.72/5 (6 صوت)

06-28-2015 07:38 PM
سلام يا نجلاء سلام ، سلام يا بت الكرام ... ناس تشوف الطرحة ما تشوف مليونين من الضحايا و ما تشوف الجوع و المرض و الاطفال البيقروا في الواطة و كل اربعة في كتاب و الخنازير ولاد الكلب سووها قصور و احواض سباحة و مثنى و ثلاث و رباع ... غايتو لما قريت ما كتبتيه بكيت ... بكيت من القهر و الفخر ، قهر السراق القتلة و الفخر بيك يا رائعة ... سلام ليك و لي بخاري و وليداتكم و ان شاء الله ينزاح الكابوس و ترجعوا لدياركم و احبابكم بالسلامة ... انا ما بعرفك شخصيا لكن لو رجعتوا و أنا حي حاجيكم وين ما تكونوا ... ترجعوا بالسلامة .


ردود على خالد
European Union [تأشيرة خروج] 06-29-2015 01:29 PM
ياسلاااام ياخالد ريحتني شديد


#1294356 [د..الزهجان]
3.50/5 (3 صوت)

06-28-2015 07:10 PM
ونواصل الاستماع ..مسلسل رمضاني ..وكل حلقة اعملي ليها عنوان ..لك الله


#1294350 [Shah]
2.50/5 (4 صوت)

06-28-2015 06:52 PM
دى قصص من غرابتها وطرافتها لو جمعتيها فى كتاب كقصص قصيرة احتمال كبير تاخدى عليها جائزة عالمية خاصة مع اسلوبك الظريف فى السرد.


#1294349 [الديموستناره]
3.00/5 (3 صوت)

06-28-2015 06:48 PM
التوثيق مهم .. هو من ركائز وتجليات العقل المتفتح والمستنير.. تاريخك الفعلي معروف ياأستاذه نجلاء علي نطاق واسع لكن التفاصيل مهمه للتاريخ. نصدقك استناداالي هذه المعرفه لمن يتشكك، وهذا حقه ، أن يعطي الفرصة للمقارنة مع تجارب نساء اخريات .. ومن هنا ايضا اهمية اضافية لان يسجل الجميع تجاربهن بالتفصيل


#1294333 [[email protected]]
3.00/5 (2 صوت)

06-28-2015 06:00 PM
اسع يلعب الفرحه خالص!! طبعا ختيت نفسي مكانك وكنت هاخت الطرحه تلقائياً.


#1294325 [عبد الله]
3.00/5 (3 صوت)

06-28-2015 05:30 PM
شكرا استاذه نجوى
لكل فرد فى الشعب السودانى حكايه مع البوليس والامن وووالمسميات الكثيره . ولا بد وان طال الزمن العوده لارض الوطن فى يوم من الايام . امنياتى لكم بحياه طيبه


#1294323 [ود الغرب]
2.75/5 (3 صوت)

06-28-2015 05:29 PM
ومن لم يصانع في أمور كثيرة = يضرس بأنياب ويوطأ بمنسم
ومن يجعل المعروف من دون عرضه =يفره ومن لا يتق الشتم يشتم
ومن يكن ذا فضل فيبخل بفضله =على قومه يستغن عنه ويذمم
ومن هاب أسباب المنايا ينلنه =وإن يرق أسباب السماء بسلم
ومن يجعل المعروف في غير أهله = يكن حمده ذما عليه ويندم
ومن يغترب يحسب عدوا صديقه =ومن لا يكرم نفسه لا يكرم


#1294269 [إندستين]
2.75/5 (4 صوت)

06-28-2015 03:39 PM
تعرفى انتى الاجبرتك الظروف على مغادر السوان نحنا المقبورين داخل البلد دى بنحسدك جد


#1294236 [Asaad]
3.00/5 (3 صوت)

06-28-2015 02:32 PM
ليهم يوم من الكبير وللصغير فيهم نجلاء سيداحمد رمز للصمود وعدم الخوف. هانت يانجلاء



خدمات المحتوى


مساحة اعلانية





الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة