الأخبار
أخبار إقليمية
مواطن يفتح النار على طبيب في مستشفى بحري
مواطن يفتح النار على طبيب في مستشفى بحري
مواطن يفتح النار على طبيب في مستشفى بحري


08-31-2015 09:20 AM
الراكوبة - الخرطوم فتح احد المرافقين النار على المدير الطبي المناوب؛ بمستشفى الخرطوم بحري؛ واطلق الرصاص - أيضاً - عل اثنين من الممرضين؛ حينما اخبروه بوفاة أحد اقربائه المرضى بالمستشفى.
وقال الناطق الرسمي باسم وزارة الصحة بولاية الخرطوم الدكتور معز عمر بخيت؛ في تعميم صحفي تلقته (الراكوبة)؛ إنه في تمام الساعة التاسعة من مساء (الاحد) الموافق 30.اغسطس 2015؛ تعرض المدير الطبي المناوب لمستشفي بحري التعليمي؛ واثنين من كوادر التمريض؛ لاطلاق رصاص داخل عنبر الباطنيه رجال.
وقال بخيت "حدث ذلك بعد ان تم استدعاء الطبيب لتقييم حالة احد المرضى؛ لكنه تيقن من وفاة المريض بمجرد ان شرع في معاينة حالته؛ ولذلك قام بإبلاغ احد اقارب المريض؛ بخبر الوفاة فما كان منه الا ان قام باطلاق الرصاص تحت اقدام الطبيب والممرضتيين مما اصابهم برايش.
واكد البيان ان افراد التأمين بالمستشفي تمكنوا من احتواء الموقف؛ وقبضوا على مطلق الرصاص والذي كان يلبس ملابس مدنية؛ وتم اقتياده إلى قسم الشرطة وتم تدوين بلاغات في مواجهته.
واشار معز الى ان الطاقم الطبي بمستشفي بحري نفذوا وقفة احتجاجية؛ على اعتبار ان الحادث كان الاخطر علي الاطلاق في تاريخ الاعتداء علي الاطباء؛ والذي لم يتجاوز الاشتباك بالايدي في المرات السابقة.
واضاف: نشكر الجهات الأمنية المختصة التي هرعت لمكان الحادث واحتوت الامر،؛ وأعلنت وقوفها مع الأطباء.واضاف البيان: "نحن في وزارة الصحة نناشد الجهات الرسمية المسؤولة للحد من هذه الظاهره التي تؤثر علي تقديم الخدمة الطبية تجاه المرضي.


تعليقات 42 | إهداء 0 | زيارات 22170

التعليقات
#1332840 [لفافات الصبر]
0.00/5 (0 صوت)

09-02-2015 12:10 PM
ايا كانت المبررات والدوافع ايها السادة فنحن لسنا فى غابة , دا عمل استعراضى لا غير لانه لو كان فعلا حزين وتاثر بموت قريبه لكان اصابهم مباشرة لانه غاضب وحزين ولكنه تعمد التصويب تحت اقدامهم , المشكلة والسؤال فى انو هل اى نظامى مؤهل لانه يحمل سلاح ؟ الكل اصبح يستعرض بالطبنجة ويضعها فى مكان فى كمر البنطلون لتبدو ظاهرة نظام انا فى الامن وكدة .


#1332233 [ali]
0.00/5 (0 صوت)

09-01-2015 11:34 AM
غلطان الدكتور القاعد لسه هناك عليكم الله جنس المعلقين ديل امه يقعدوا ليها


#1332125 [الحاوي النقراوي]
0.00/5 (0 صوت)

09-01-2015 09:29 AM
اكاد اجزم بان الطبيب قال للمرافق : جايبين لي جنازة اعمل ليكم شنو ؟؟ هكذا ردود اطباء زمن الحرامي المامؤن حميضة


#1332040 [سوداني]
5.00/5 (2 صوت)

09-01-2015 07:07 AM
الزول دة بالرغم من تصرفه الغير مقبول الا انه ناتج لاستفزاز من الطبيب او من بعض الطاقم الطبي فهو اراد به ان يرسل رسالة لهؤلاء الاطباء بان يحسنوا سلوكهم مع الخلق والدليل انو مافي حد من الطاقم اصيب من الطلق الناري وعلي الاطباء وطاقم التريض ان يحسنو ا التصرف مع المريض واسرته واتركو ا الاستفزاز والاستحقار فانتم بشر ومعرضون للمرض ايضا
ودمتم جميع بالصحة والعافية واتوسل الي الله ان يحفظ الشعب السوداني من شر الفتن


#1331963 [الداندورمي.]
0.00/5 (0 صوت)

08-31-2015 11:08 PM
والد معز حسن بخيت أخو حاجه هديه
والدة أبو ركبه يعني خاله ،،،ديل العائله المالكه يا،،،دكتور الزهجان.


#1331873 [اسحق]
0.00/5 (0 صوت)

08-31-2015 06:46 PM
وقال الناطق الرسمي باسم وزارة الصحة بولاية الخرطوم الدكتور معز عمر بخيت؛
الصحيح معز حسن بخيت ولا اظن ان الدكتور معز عمر بخيت هو المقصود .


ردود على اسحق
[د.. الزهجان] 08-31-2015 10:19 PM
معز حسن قريب الوزير ماشي بالبركةاتخرج بقي اخصائي وناطق وكوز ومدير .. ولسه بيدرس يعني طالب ...حكمتك يارب


#1331854 [sama]
3.00/5 (3 صوت)

08-31-2015 05:46 PM
لازم يكون في سبب قوي جدا دعي هذا الرجل لاستخدام السلاح وقد يكون الاهمال كالعادة...طبعاء المدير الطبي لم يتوقع ولم يخطر بباله ان هذا الرجل يحمل معه سلاح...فهم متعودين علي الاهمال وترك المرضي لوحدهم وعدم مراعاتهم الي ان يتوفاهم الله في السرير و يخطرون اهاليهم بكل بساطة بالوفاة بدون ذكر السبب الحقيقي لها و يكتب في شهادة الوفاة سبب اخر غير الاهمال يكون مقنعا للاهل والاقارب الذين في بعض الاحيان لا يفقهون شيئا ولايستطيعون فك القلم .... ناس الله في بلد الله.... ياخذون الجنازة و يبكون وكان الله يحب المحسنين...هم متعودون لمثل هذا النوع من اهالي المرضي...وهذا الرجل الذي لا اجد له عذرا في حمل السلاح و في داخل عنابر المرضي ومهما يكن السبب...لكنني في نفس الوقت لا الومه علي الدرجة التي وصل اليها من الغبن والغضب مما جعله لا يفكر في عواقب فعلته التي قام بها فهنالك سبب قوي دفعه لذلك


#1331810 [منصور]
5.00/5 (1 صوت)

08-31-2015 04:24 PM
طبعا هذا العسكري احد افراد الجنجويد "اسمهم الحكومي: الدعم السريع" و باكر يا ناس العاصمة يبدأ موسم الاغتصابات !! نصيحة: كل واحد يحضر سلاح للذود عن عرضه.


#1331804 [QUICKLY]
4.50/5 (2 صوت)

08-31-2015 04:17 PM
الدولة الوحيدة في العالم التى يتباهى منسوبي الامن بمسدساتهم أمام العامة
تشوف الشئ دا في المستشفيات في الوزارات والاسواق عادي عينك ياتاجر وأصبح الآن التهديد والأرهاب علني لتمشيةأمورهم يشنق الطبنجة في كمرة البلطلون ويتعمد أظهارها وسط الخلق ومفتكرها رجالة !!
زمن أب عاج لايُعرف الشخص انه يعمل في جهاز الامن أو الاستخبارات ولا حتى من أهل بيته
الآن كلهم فاقد تربوي وهذة تصرفاتهم التى تشبههم ,,, لسه ياما حنشووف!


#1331795 [ود قلبا]
4.50/5 (2 صوت)

08-31-2015 03:58 PM
البلد دي اي ضابط وعسكري وامنجي نافخ ريشو وابقي ليو الا يطير وأغلبهم حرامية


#1331788 [غريب]
5.00/5 (1 صوت)

08-31-2015 03:42 PM
قالو الكابوي ده ضابط برتبة نقيب يلا شوفوا لينا الباقي


#1331775 [ALIIIIIIIIIIIIIIIIIIIIIIIIIIIIIIIIIIIIIII]
5.00/5 (8 صوت)

08-31-2015 03:25 PM
الزول ده اصلا جا داخل بالسلاح للمستشفي كيف اساسا البواليس العورة البرة المسمين روحهم شرطة تامين ديل والله العظيم هم ذاتهم عاوزين ليهم زول يامنهم عالم فاقد تربوي واخلاقي وبعدين طبعا تلاقي الزول الفتح النار عسكري ولا ضابط شرطة ولا ضابط امن عامل فيها قومة وقعدة طبعا الكلب وعايز يوري فيها انو مغتاظ خلاص وطبعا تلاقي المدير الطبي دخل في نقاش حاد في تقديري عساكر المستشفي عارفين انو الزول ده اصلا جا داخل بالمسدس وطبعا رتبة كبيرة وخافو منو وحصل ماحصل مع المدير الطبي وتوتة توتة خلصت الحدوتة... اصلا يجب تدريب الدكاترة علي كيفية معاملة المرضي وكيفية اخبار ذويهم بالاخبار السيئة لتلافي المواضيع الذي دي وثانيا ياحبذا لو الدكاترة خلو الونسات والامور الفارغة لزوم البرستيج الفارغة بتاعتهم دي والذي منو وانتبهو لشغلهم بكون احسن ..غايتو بنصح الدكاترة ياخذو كورسات في الجودو والكاراتيه والجيجتسو لزوم الحماية وكمان احسن كلو دكتور يشيل ليهو مطوة طويلة عريضة ويكون داسيها ويستخدمها عند اللزوم ده الشغلانة كترة اووووي ياجدعان ههههههه


#1331768 [زول خارج بلدي]
4.75/5 (4 صوت)

08-31-2015 03:16 PM
أصبح اقتناء السلاح من أسهل الأموروصارت الأسلحة بمختلف أنواعها على قفا من يشيل. حتى في القرى، بامكان أي كائن من كان الحصول على السلاح حتى لو لم يضطر اطلاقا الى إستخدامه، مما ساعد على تفشي الفوضي والخراب وجعل استخدامه سهلا وميسرا بمناسبة وبدونها. في إحدى مناسباتنا حاول أحد العساكر والذي يجاور شقيق صاحب المناسبة التعبير عن شعوره باطلاق رصاصات في الجو، بالرغم من عدم اجادته استخدام أو ترويض هذه الآلة الفتاكة، فارتد رصاصة إلى قلب زوجة أحد أقربائي التي كانت تحاول اخذ اطفالها ومغادرة مكان الاحتفال بمناسبة الزواج الى منزلهم، فتوفت المسكينة (رحمها الله ) بعد ان قضت يومين في المستشىفى.
لا ألوم من يسخدمون السلاح بصورة غير مسترشدة فحسب بل لا يمكن ان نشتثني بعض الأطباء أو الدكاترة من أن يكونوا عرضة لإرتكاب حماقات أو إتيان استفرازات تجعل الاشخاص غير الحليمين أو العصبيين أو من يعانون من أمراض نفسية يقدمون على ما قدم عليه هذا المرافق.
حكي لي خالي الذي كان يعمل طبيبا في مستشىفي الخرطوم قبل ما يقارب الأربعين سنة، وهاجر بعدها الى المانيا ثم الى دولة الإمارات ثم أمرييكا حيث تجنس وعاد فاستقر في دولة الامارات التي يعمل بهاحتى الآن، ذكر أنه ذهب الى مستشىفي الخرطوم لزيارة احدى قريباته التي كانت طريحة الفراش الأبيض والاطمئنان على صحتها. وشاهد هناك إمرأة تحاول الاستفسار من طبيب عن شىء مكتوب على ورقة، فتجاهلها الطبيب ولما أصرت السائلة على أن تجد ما يشفي غليلها ولعل أحدا من العاملين في الجهاز الطبي يتكرم بمساعدتها، فوقفت نتيجة للتجاهل غير الآدمي محتارة، تقدم الخال نحوها واخذ منها الورقة شارحا مضمونها. قال الخال إن هذا الموقف استفزه كثيرا وجعله يخرج عن طوره ويقول أنا إشتغلت في الخرابة دي قبل اربعين سنة، وفي زمننا لم يكن التعامل أبدا هكذا، لقد انعدت المروء والانسانية لديكم، ويجب أن يعلم أي طبيب قبل أن يمسك سماعة الكشف أو القيام بأي عمل أن مهنته عملية إنسانية قبل كل شىء وأنه على من لا استعداد له في التعامل مع المرضي باخلاق ومهنية وانسانية عاليه، الابتعاد عن ممارسة هذه المهنة الانسانية. وقال أن التعامل مع الممرضين والممرضات أفضل كثيرا من الدكاترة وتستحقون، أي الممرضات، أن يُطلق عليهم ملائكة الرحمة.


#1331752 [ابو ألنجا]
3.00/5 (2 صوت)

08-31-2015 02:56 PM
واشار معز الى ان الطاقم الطبي بمستشفي بحري نفذوا وقفة احتجاجية؛ على اعتبار ان الحادث كان الاخطر علي الاطلاق في تاريخ الاعتداء علي الاطباء؛ والذي لم يتجاوز الاشتباك بالايدي في المرات السابقة.

طيب اثناء الوقفة الاحتجاجية دي .. مات كم واحد من العيانين ؟؟؟



نحن في وزارة الصحة نناشد الجهات الرسمية المسؤولة للحد من هذه الظاهره التي تؤثر علي تقديم الخدمة الطبية تجاه المرضي.


،،،،، انا اقترح عسكرة المستشفيات ذي الجمارك ،،،،،،،


ردود على ابو ألنجا
[جيفارا] 09-02-2015 10:53 AM
علي مااظن يكون عبيط

[مدحت عروة] 09-01-2015 12:29 PM
وانا اؤيد افتراح ابو النجا لان عسكرة اى شىء هى البتطور البلد وتخليه من اقوى دول العالم هسع شوفوا مصر والسودان وسوريا والعراق وليبيا واليمن اى كل الدول الحكموها عسكر كيف متطورة وفاقت العالم اجمع فى كل المجالات وشوفوا الدول المحكومة بالمدنيين والديمقراطية كبف متخلفة وشعوبها ما لاقين ياكلوا وكل يوم غرقانين فى البحر بقصد الهجرة الى سوريا والسودان ومصر وليبيا وهلم جرا والشعوب المتخلفة وما لاقين ياكلوا هم شعوب المانيا وامريكا وبريطانيا وايطاليا وسويسرا وهلم جرا ما انا قلت ليكم مافى غير الحكومات العسكرية هى البتنفع وتطور البلد والديمقراطية ماىبتنفع بس كلها سكر وعربدة وتخلف مثل شعوب اوروبا الغربية وامريكا!!!!
كسرة:ايه رايكم فى التعليق ده ما انفع اكون قيادى كبير فى المؤتمر الواطى آسف الوطنى؟؟؟؟

[سوداني بس] 08-31-2015 05:19 PM
أنت أهبل ولا عبيط


#1331742 [firdoaalboshra]
3.00/5 (2 صوت)

08-31-2015 02:40 PM
ياخى هو عشان مات فى المستشفى قدام عينو اطلق الرصاص وهواصلا عيان وبكونو جابو للمستشفى زول موت::: طيب الشباب البى عافيتهم وقتلوهم عينك عينك والودهم الجهاد بالغصب وناس الجريف وشهداء سبتمبر ديل هلهم ما عندهم مسدسات ولا شنو؟ بالله خليكم منطقين وخلو الحقد المهنى دا يعنى الطبيب معقول اقدر ينقذ ليهو زول ويأخر ::: بعدين انتو من زمن الممرضات البياكلو فى اللبان هسا ديل حاملات شهادات عليا :: بس عينكم فى الفيل وتطعنو فى ضلو :: شوفو الاهمال سببو منو وشنو والمستشفيات الحكومية السحب البساط من تحتها منو؟ ولا ما عندو منطق ياهو بطلع مسدسه


#1331718 [ابو الكلام]
5.00/5 (3 صوت)

08-31-2015 02:03 PM
ما هو حسين خوجلي عديل قاليكم ممكن تشاكل الطبيب وتطربه وتركله في بلدك لكن يستحيل على المغترب ان يفعل ذلك في بلاد الغربة - يعني حرية تعبير وكده.


#1331690 [سوداني بس]
5.00/5 (4 صوت)

08-31-2015 01:22 PM
طيب لما عندك ( مسدس ) وضابط أكيد !!! خليك راجل وعاين للفيل - بدل الأطباء المساكين ( اللي راتبهم ما بيكفي فطور صحن فول ) يا **** يا منحط يا جبان , وجه مسدسك (( للكبير )) يا عواليق .


ردود على سوداني بس
[أب راسن غليد] 09-01-2015 12:12 PM
كنت ناوي اشتمك لانو لسانك زبالة لكين قريت ليك كم تعليق ليك لقيتك حمبرة ساي .. تعلق و تجي راجع تصوت لي روحك :) ..


#1331684 [جردل موية]
5.00/5 (2 صوت)

08-31-2015 01:13 PM
انتو لسع شفتو حاجة


#1331659 [أب راسن غليد]
2.63/5 (7 صوت)

08-31-2015 12:42 PM
أكاد أجزم بأن المريض تعب و قريبه بحث عن الطبيب المناوب الذي إتضح انه كان "نايماً" و لم يفتح باب المكتب و ده غير "شكشكة" الممرضتين و طريقة كلامهم المستفزة ده لو ما كان بيلوكن في لبانة ... المهم الحمد لله الجات على الرايش .. المرة الجاية الوقفة ما بتحلكم .. صلحوا الخدمة الصحية و إتعلموا تتعاملوا مع المواطنين اهلكم بإنسانية اكتر .. بلى يخم وزارة الصحة على الكادر الطبي على الناطق الرسمي!


ردود على أب راسن غليد
[أب راسن غليد] 09-02-2015 10:08 AM
الكادر الطبي سوداني (بس!) طبعاً الكادر الطبي دي حتعجبك ..لانك عايز توحي للناس انك طبيب!! انت بالكتير واحد من الامنجية السايكوباتك البيقيفوا في الباب و بيحموا الناس يخشوا.. و في الحالة دي برضك تعمل حسابك من الرايش :).. ((ملحوظة: السودانين ما بقولوا دجاجة .. بقولوا جدادة .... و...... (بس!)))

[سوداني بس] 09-01-2015 02:52 PM
أنت يا ( أب راسن غليد ) أمنجي ولا دجاجة الكترونية ؟؟؟

أنت عارف راتب الطبيب كم ؟؟؟؟؟ يا وسخ يا زبالة

تفوووووو عليك وعلي بشيرك - ابوكم لا أبو الكلب

[أب راسن غليد] 09-01-2015 12:23 PM
في مستشفى مدني مرة كنت مرافق لاحد الاصدقاء و حوالي الساعة 2 صباحاً .. جاءت اسرة معاهم شابة شكلها كانت تعاني من تسمم .. كانت بتستفرغ بطريقة مقلقة.. اها وينك يا الطبيب المناوب .. شكلو مشي الميز "ياخد لو غمدة" و الممرضة زعلانة انو صحوها من النوم سمعتها بتهمهم و تقول (يقعدوا الليل كلو يرمرموا و يجوا هنا يكرهونا).. اها شن رايك يا سودني بس ؟ اظنك لو قريب الشابة دي و كان معاك مسدس ما كنت قصرت!

[العوض] 08-31-2015 08:21 PM
اصبت طوحال الحقيقة نفس الكلام كنت بكتبوا اي طبيب بتاع امتياز جاي يتعلم فى البشر ونحنا عندنا الدكتور او الطبيب يفتري على المرضي واهل المرضي والله الواحد فيهم تقول ما مولود فى السودان مره في مستشفي البلك وديت ولدي عيان والله الطالبه بتكشف على ولدي وبتراجع فى تقارير في الموبايل وتاني واحد فلسطيزي برضوا بتعلم والله دا لو بقا دكتور مايمشي تاني في الارض وهو لاجئ وماخد منحه من الحكومه السودانيه ودارس بي حق الشعب وقاعد يفتري واحد من الشباب والله كان داير يقطعوا لكن مسكوه العساكر.
اي دكتور او طبيب مفتري ياخد حقو طوالي وما يفتري على الناس

[سوداني بس] 08-31-2015 05:20 PM
وعليك يا صعلوك يا ( أب راسن غليد )

[nagid] 08-31-2015 02:18 PM
وعليك كمان


#1331647 [أبوالكجص]
5.00/5 (8 صوت)

08-31-2015 12:20 PM
لا حول ولاقوة إلا بالله .. أهكذا بلغ الناس عدم التسليم بالقضاء والقدر. لنفترض أن المرحوم توفى تحت الرعاية الطبية فهل هذا يعني أن نطلق النار أو نعتدي على الطبيب!!! هنالك قنوات يجب إتباعها إذا وُجِدت أخطاء طبية سببت الوفاة... إنها الفوضى بعينها التي لم يشهد لها الوطن مثيل من قبل ودا كلو بي سبب الحكومة التافهة دي التي منحت افراد حرية التصرف كما يريدون فلا حساب ولا عقاب لمن يرتكب الخطأ وبهذا أصبح الكل يقلد المخطئيين المحميين على غرار (ما فيش حد أحسن من حد).. أها جاطت ياحكومة فلا أظن أنكم ستفلحوا في كبح جماحها.


#1331633 [الراصد]
5.00/5 (2 صوت)

08-31-2015 12:01 PM
الشرطة (تتاجر) في منح المواطنين تراخيص حيازة السلاح مقابل رسوم مادية (مسمومة)... والنتيجة ان اي انفعال من قبل اي مواطن سيكون حواره بالنار... فالمال والترخيص (التجاري) لا يكفي لحمل السلاح ان لم تسبقه تربية عسكرية مشددة تجعل من اطلاق النار اااااخر الخيارات المتاحة... (كل) العوائد التي تتحصل عليها الشرطة في مقابل منح المواطنين السلاح لاتساوي تكدير الامن (بطلقة) واحدة من مسدس مواطن غاضب... فهل يفقهون ???????????


#1331621 [شجرة التبلدي]
5.00/5 (3 صوت)

08-31-2015 11:44 AM
قبضوا على مطلق الرصاص والذي كان يلبس ملابس مدنية؛
++++++++++++++++++++++++++++++++++++++
بمعني انه امنجي او عسكري لكنه يلبس ملابس مدنية؟؟؟؟
والشي الثاني الطاقم الطبي بالمستشفي بس نفذوا وقفة احتجاجية؛ على اعتبار ان الحادث كان الاخطر علي الاطلاق في تاريخ الاعتداء علي الاطباء....والله تستاهلوا المرطة يا دكاترة الهنا


#1331619 [ود نقذو]
4.25/5 (5 صوت)

08-31-2015 11:43 AM
أكيد الراجل شعر بالإهمال الواضح الفاضح وقام بالعملية الجهنمية. حقيقة أنا كل ما زرت صديق من الاصدقاء التعبانين ، راقد في المستشفيات الحكومية ، الاحظ الاهمال في فترة الزيارة القصيرة. الاهمال أولا يأتي من الطبيب ثم يليه الممرض. أطباء المستشفيات الحكومية ، يمكن القول بأن جميعهم أصبح مستبد ومتعجرف ومتكبر وبليد. وأنا ما عارف إيه السبب. هل قلة الامكانيات أم ماذا.
كان في الزمن الجميل ، الطبيب السوداني علامة تجارية معروفة ، العلم والادب والذوق والانسانية وشيء مقدس وفخر للجميع. أما بعد وصول إبن بربر مأمون حميدة إلى الخرطوم ، مسخ كل جميل ، وأنبت القبح وطرد الفضيلة من المستشفيات. وخرج من جامعته الداعشيات ورمى بالطب في مزبلة التاريخ في سبيل حفنة دولارات وضعها في جيبه ظانا هكذا يسعد الانسان.


ردود على ود نقذو
[العوض] 08-31-2015 08:23 PM
انت صاح يامعلم

[ابو جاكومه] 08-31-2015 01:32 PM
يا ود نقذو كل الاداريين من الكيزان الذين لا يفقهون شيء وشغلهم كله عنتريه ودمار وعدم مبالاه لأنهم عندهم رتب أمنيه حتى وكيل النيابه عنده رتبه أمنيه شوف المهازل وصلت لي وين يا كافي البلاء


#1331616 [قهران]
4.75/5 (3 صوت)

08-31-2015 11:36 AM
الزول ده كان ما شاف ليهو تقصير ما جاء المستشفى شايل مسدس. يعني الزول ده حالف على الجماعة ديل قبل وفاة قريبو. يعني يا دكاترة ويا ممرضين ما تستخفوا بأرواح المرضى وما تنسوا القسم وما تنسوا سودانيتكم اللي اتلطخت واتمرمغت في التراب وما تلخبطوا الكيمان والزول ده كان قاتل ومجرم كان الدكتور والممرضات لحقواأمات طه... غايتو ده تنبيه قوي لأي دكتور وممرض للقيام بالواجب على الوجه الاكمل ونص وخمسة.


#1331605 [على حسن]
5.00/5 (4 صوت)

08-31-2015 11:28 AM
لا بد ان الامر فيه شى آخر وأصلا لايمكن ان تكون الروايه بهذه الطريقه لايمكن لشخص عاقل ان يطلق النار ولابد من سماع الروايه من كل الاطراف وهذا الناطق بإسم وزارة الصحه سوف يقول الكلام الذى سوف يؤمن جانب الوزاره وكلنا يعلم تردى الخدمات الصحيه فى كل مستشفيات الدوله


#1331604 [صبري فخري]
5.00/5 (2 صوت)

08-31-2015 11:28 AM
نحن في وزارة الصحة نناشد الجهات الرسمية المسؤولة للحد من هذه الظاهره التي تؤثر علي تقديم الخدمة الطبية تجاه المرضي.

وزارة الصحة تتحمل العبء الاكبر ... اين التعليم الطبي المستمر ... الوزير ومن معه لا هم لهم غير العكننة .. لماذا لا يدرس ال comminication skills


ردود على صبري فخري
[سوداني بس] 09-01-2015 02:54 PM
ال u في ( كومنيكيشن ) يا سعادتك نسيتها !!!

[zoal fahim lakin ma dr] 08-31-2015 08:46 PM
لما تكتب الانجليزي صاح تعال اتفاصح الزول دا لو ما عاني من غطرسة الأطباء والاهمال ما كان اطلق النار


#1331602 [omer]
5.00/5 (7 صوت)

08-31-2015 11:24 AM
ما يحدث من اعتداءات متكررة سببه الصحافة الرخيصة فهي التي شحنت المواطنين ضد الاطباء بتصيدها وانتقاءها لاخطاءهم بصورة تحريضية مستمرة وليست تصحيحية كما تفعل الصحافة الراشدة مما ساهم في خلق جو عام من عدم الثقة والتحفز لدي المواطن تجاه الطبيب واذا حدث قدر الله و توفي شخص او حدثت مضاعفات متوقعة فان السبب جاهز عند المواطن وهو اهمال الطبيب والحل هو في الاعتداء عليه وضربه وليس طريق القضاء.
اتقوا الله يا صحفيين و يامواطنين في الاطباء - والله لو تعلمون ما يعانيه الاطباء لما فكرتم للحظة في الاعتداء عليهم.
ومن يتحدثون عن ان الاطباء اصبح همهم المال فهؤلاء يتحدثون عن كبار الاطباء اصحاب العيادات وليس صغار الاطباءالمخلصين ,المسحوقين , المتواجدين في المستشفيات ويتم الاعتداء عليهم .
ملف الاطباء والله العظيم فيه ظلم كبير واجحاف في حق الطبيب وعدم تقدير لتضحياته وخدماته الجليلةالتي يقدمها للمحتاجين والمعوزين , والله لو شفتو كيف ان صغار الاطباء يجتهدون ويبرعون في ممارسة التسول ( الشحدة ) من زملاءهم لتوفير علاج او عمل تحاليل معينة لمريض لايملك المبلغ المطلوب ( وما اكثر هؤلاء في المستشفيات ) لرفعتم لهم القبعات تقديرا واجلالا .
ضغط العمل ( النفسي ) علي الطبيب والله اكبر مما تتصورون ( حتي لو بشوف ٥ عيانين فقط في اليوم )لان عملهم يرتبط بصحة الانسان وحياته, واي طبيب في الدنيا تجده وقت فراغه وعند ذهابه للنوم تجده دائم التفكير في مرضاه ويستعرض حالتهم مع نفسي خشية ان يكون قد اخطأ في تشخيصم او علاجهم او لم هذا غي المشاورة الدائمة مع زملاءه بخصوص الحالات التي مرت عليه .


ردود على omer
[ابومحمد] 08-31-2015 04:43 PM
راجع احدى المستشفيات الحكومية وتكلم مع اي من الكادر الطبي العامل داخل هذا المرفق الحكومي وسترى كيف يرتفع ضغطك من المعامله السيئة البذيئة التي سيعاملونك بها ..


#1331600 [المتغرب الأبدي]
5.00/5 (2 صوت)

08-31-2015 11:23 AM
في النهاية ح يطلع نظامي ولا بتاع أمن
وح يطلع منها زي الشعرة من العجين ..


#1331596 [المجداع]
5.00/5 (3 صوت)

08-31-2015 11:18 AM
تكررت حوادث ضرب الاطباء مؤخرا ، طبيبة سودانية تتعرض للضرب في مستشفى بجنوب السعودية وطبيب بمستشفى الحصاحيصا وطبيبة أخري بالفاشر . اطباء جيل الانقاذ تنقصهم المهنية وشرفها ، لا يؤدون دورهم على اكمل وجه مع المريض وكانه شئ يجب التخلص منه وتنقصهم الكياسة في التعامل مع مرافقي المريض لا نستبعد استفحال الوضع اكثر فاكثر . الطب مهنة إنسانية في المقام الاول ويجب على عديمي الانسانية عدم مزاولتها . مرافقي المريض هم الاكثر تاثرا ويجب التعامل معهم بحكمة . اللهم أشفي مرضانا ومرضى المسلمين واصلح حال اطبائنا ومشافينا


#1331567 [ابرسي]
3.00/5 (2 صوت)

08-31-2015 10:36 AM
لاتعليق


#1331560 [الداندورمي.]
5.00/5 (3 صوت)

08-31-2015 10:32 AM
فلاحتكم في الدكاتره ما،،،كان تطلق الرصاص
في رأس الأفعي .


#1331549 [المتجهجه بسبب الانفصال]
5.00/5 (2 صوت)

08-31-2015 10:25 AM
اشتكى من ضعف التمويل الحكومي
الصندوق القومي للتأمين الصحي: (76%) من الصرف على الصحة من (جيب) المواطن
الخرطوم : إيمان جكسا/أسماء سليمان أقر المدير العام للصندوق القومي للتأمين الصحي د. طلال الفاضل المهدي، بافتقار المستشفيات با..

شوف الخبر التحت الخبر ،،، الناس ضاقت والله في ناس بشوفوا اقربائهم بموتوا بمرض يمكن علاجه او عملية لم تتم في وقتها قد تنقذ الحياة،، الاطباء ما عندهم ذنب والحكومة هي التي رفعت ايديها من العلاج وعملتو تجاري زي الفنادق بمستوى النجوم،، حرام والله وهم اقل شيء يتعالجوا في الخارج ،،،


#1331547 [أنصاري]
5.00/5 (2 صوت)

08-31-2015 10:23 AM
القوات غير النظامية جنجويد ( أمن/ شرطة/ جيش/ قوات حميدتي) الكل يحمل السلاح والكل غير منضبط ..و الأبرياء من الأطباء.. والممرضيين .. والفنيين.. والمدنيين دائماً هم الضحايا ..

قصور التدريب .. وإنعدام العقيدة.. والفوضى الضاربة (وجنجودت الدولة).. من جنجويد.. لهي من أهم أسباب الكارثة.


#1331546 [مستغرب فيك ي بلد]
5.00/5 (1 صوت)

08-31-2015 10:23 AM
بلد الفوضي والاستهبال
بعدين والله بلدنا دي ماشا علي وين ما تعرف
يعني في بعض الدول والله لا تستطيع ان تعرف دا في الامن
الا لما تمشي تقابلوا في وحدتو
وحتي السلاح مافي زول بشيلي معاه
عشان ما تحصل حاجات زي دي ابدا
بعدين هو بتاع امن شايل سلاح دي وين دي بتحصل
ناس الامن لو فعلن ناس امن ما مفروض اشيل معاه اي شي
غير عقلوا وعلمو ومنطق وتحليلو للامور
المشكلة ناس الشرطة شايلين طبنجات
ناس الجيش شايلين طبنجات
ناس ابو جلابية شايلين طبنجات
جماعة ابو قردة شايلين طبنجات
ناس سيسي شايلينو برضو
وتقريبا كل بني كوزون شايلنو
لزوم الاحتياطي
مش لانو خايفين من الحرامية
لانو مافي غيرهم حرامي
وخايفين من تليب غلط
من جماعة نافع ولا طه ولا قوش ولا ود ابراهيم
والله الا ناس قريحتي راحت القاعدين ف الصقيعة
مع انو الحل ساهل وبسيط
لكن مافي زول بقول تلت التلاتة كم
يعني لو اي ضابط ولا عسكري في اي وحدة خلص
من شغلوا اسلم سلاحو قبلما اطلع من مكانو
ولا بكون هو السلاح قاعد معاه كدا ساي سايبة
وبعرف هناك وحدات معينة وبسيطة يستدعي وجود السلاح
لكنها بسيطة وبكون عندما مستلم اسلحة في موقع العمل
لكن هسه الشغلانية جايطا
في عساكر ولا نافذ يكون عندو عرس ولا مناسبة بقوم
امشي محل شغلو واسلتم من صاحبو ولا من جهازو
عشان اتفشخر بيه كدا
واذا اصلوا ف نظام ولا جهة رقابية مفروض تحاكم نوع ديل طوالي
لكن بقت كلمة الاجهزة الامنية مع ناس بني كوز ديل ضعيفة
ها ساي بتجيب اجلهم
والله المستعان


ردود على مستغرب فيك ي بلد
[sama] 08-31-2015 06:08 PM
صرنا يا اخوي بقدرة قادر مثل اليمنيين ما في زول في اليمن وما بحمل سلاح كأنك في حرب طول العام


#1331533 [نبض التعب]
5.00/5 (1 صوت)

08-31-2015 10:13 AM
منْ أطلق الرصاص ضابط بجهاز الأمن برتبة عقيد وأمر الغسكري النبطشي بالوقوف بعيداً وعدم التدخل والإستدارة نحو الحائط وقد نفذ العسكري الأمر!!.
يبدو أن الطيبي المسكين رفض (الحوار البشيري) فقام الضابط كلب الحراسة بإعلان الحرب علي الطبيب بعد أن (أذن) له السفاح الرقاص بذلك!!
اللهم جنب بلدنا شرور البشير الحقير وكيزانه وكلابه


#1331531 [ارفع راسك انت سوداني]
5.00/5 (1 صوت)

08-31-2015 10:08 AM
اللهم جنب بلادي الحبيبة الفتن ماظهر منها وما بطن


#1331524 [shah]
5.00/5 (3 صوت)

08-31-2015 10:02 AM
هل الأطباء ينالون تدريبا على كيفية التفاهم مع المرضى و المراجعين بخصوص المعلومات الغير سارة مثل خبر الوفاة أو خبر التشخيص بمرض قاتل؟
هذه الناحية من أكثر الأسباب للخلاف و المشاكل المرصودة عالميا بين الأطباء و المرضى و الشكاوى ضدهم.


#1331521 [د/ نادر]
4.97/5 (9 صوت)

08-31-2015 09:59 AM
الي زملائي الاطباء
اولا يجب علي الطبيب ان يهيئ نفسه للتعامل مع المرضي والمرافقين باعتبارهم ليسوا في وضع طبيعي وعليه ان يجلس معهم ويشرح لهم الحالة بوضوح وبلغة مبسطة ولو حالة ميؤوسة منها يجب توضيح ذلك للمريض الكامل الاهلية وذويه من المرافقين مع اعطاء قليل من الامل ( ارجع الي مهارات التواصل)
And to how break bad news
بعض الامور المستفزة للمرضي والمرافقين علي حد سواء
1- الانشغال بالمكالمات التلفونية رغم وجود المرضي والمرافقين واحيانا يكون الحديث مع الجنس اللطيف والذي يكون واضحا من قسمات وجهه.
2- تناول القهوة والوجبات ببرود وبهدوء اثناء وجود مرافق منزعج من حالة مريضه (قد لا يعرف عن الحالة وعلي الطبيب طمأنته بكل هدوء وان لم يكن كذلك عليه ترك القوة والافطار جانبا والهرولة نحو المريض واعطاء الانطباع دائما للمرضي بانك مهتم بأمرهم لان نظرتهم وتقيمهم للآمور يختلف عنا.
3- ان لا يستخدم الطبيب العبارات السوقية كبقية الموظفين من قبيل داير شنو - كدي اقيف برة - يازول اطلع برة .......
4- التعامل مع جميع المرضي علي قدم المساوة
5- واخيرا عملنا مع جنسيات مختلفة وفي بلاد مختلفة لن تجدو اكثر احتراما من المريض السوداني علي الاطلاق


ردود على د/ نادر
[التشيلاوي] 09-01-2015 08:11 AM
أنت فعلا دكتور ونادر كمان وإنت كده ... عيادتك وين يا دكتور؟

[سودانى طافش] 09-01-2015 07:46 AM
والله يادكتور نادر ماعرفنا البؤس والشقاء والهوان الذى كنا نعيشه وعدم تقدير حياة الأنسان وسؤ أطبائنا إلابعد خروجنا من السودان وسأحكى لك قصة عشتها بنفسى فأنا أعيش فى كندا فى منطقة ولنسميها قرية نائية وفى الثالثة صباحا تدحرجت زوجتى من أعلى السلالم داخل البيت لأسفلها وهى مابين نائمة وصاحية أستيقظت على صراخها وعندما حملتها وجدت أن رجلها مكسورة فطلبت الأسعاف وأثناء شرح حالتها وأنا أجيب على أسئلة مركز الأسعاف عن حالتها ورفم بطاقتها عرفوا من ملفها الأدوية التى تستخدمها وأى نوع من الأدوية لها حساسية ضدها ونتيجة اخر فحص طبى روتينى لها وبالطبع يتم إرسال هذه المعلومات لسيارة مباشرةوالتى كانت قد وصلت وأنا أتحدث فى التلفون وأنظر من وصل فى سيارة الأسعاف , سائق الأسعاف وهو ممرض RN وهو خريج جامعى أربعة سنوات بالطبع إضافة لدبلوم ( إسعاف ) وأيضا يركب معه ( طبيبة) شابة يبدو أنهامتخرجة حديثا وهؤلاء الأطباء عملهم فقط ( الأسعاف ) وهم يركبون فى سيارات و(هليكوبتر ) الاسعاف , حتى الأسعاف فهو ثلاثة أنواعAMBULANCE) ..( PARAMEDIC)PATIENTS TRANSFER
وبالطبع لاأريد أن أقارن بين الخدمات الصحية فى السودان وهنا ولكن كان التعامل بينى وبين الطبيبة فى غاية الرقة والانسانية حتى أنها أقترحت من الافضل البقاء مع الأطفال فى البيت والاأزعج نفسى بالذهاب معهم مع ملاحظة بأنها كانت مشغولة بالتحدث فى التلفون ولكن مع طبيب ( الطوارئ ) فى المستشفى !

[د.. الزهجان] 08-31-2015 07:34 PM
في كل المستشفيات السعودية . اي دكتوراو ممرض بيكون مراقب اما بالاجهزه او بمسول وما بيكون في اياهمال مافي تلفون ولا واتساب
شوف مستشفياتنا .اما تلفون او خلط .والمرافق هو المسول من مريضو ..

[sama] 08-31-2015 07:18 PM
لك التحية الدكتور نادر علي هذه النصائح لزملائك من الاطباء...يوجد هنالك فرق كبير جدا بين عمل الطبيب في داخل السودان وخارجه . في الخارج نجد الجدية والاهتمام والعناية الزائده بالمرضي و قد يكون ذلك ناتج من بيئة العمل وتوفر الاجهزة الطبية الحديثة ال (medical equipment) والمعينات الطبية الاخري بالاضافة الي توفر الكوادر الطبية المساعدة من ممرضيين وممرضات مؤهلين يقومون بدورهم علي اكمل وجه مما يبعث الطمأنينه في نفوس المرضي و مرافقيهم هذا غير المرتبات والحوافز العالية....اما بعض الاطباء في السودان فانا اعتبرهم سبهلليين لاخر درجة (اسفه لهذا التعبير لم تسعفني اللغة في ايجاد كلمة بديلة) مشغولين بالمكالمات الهاتفية وهموم الحياة ،، يضحكون مع الممرضات ،،، يستلقون في المكاتب،،،، يشاركون الممرضات في صحن الفول،،، وعلاج المواطن كأنه شيء لا يعنيهم،،،،، اما الممرضات فحدث ولا حرج حنة متقوشة مع دخان مع مشية الهوينة في ممرات وعنابر المستشفي وبعض المفردات السوقية وفي بعض الاحيان يمارسن مهنة البيع والشراء داخل المستشفي من ثياب لي ملايات وعطور و انشغال بالصناديق (الخته) وانشغال بالاسعار والغلاء ،،،كل هذه الممارسات تسلب الكثير الكثير من هيبة الطبيب والممرضة ،، الطبيب في السودان لديه فرصة كبيرة لاكتساب المهارات الطبية قد لا تتحاح لاي طبيب يعمل في الخارج ، ففي الخارج يعمل الطبيب علي طريقة ال (defensive medicine) ليكون علي بر الامان خوفا من ارتكاب اي خطا يوديه في ستين الف داهية لا يستطيع ان يتدرب في المرضي علي كيفه كما لدينا نحن في السودان فبعض الاطباء شغالين شغل ثقيل في المرضي يخطئون و يصيبون،،، يقطعون ويبترون وينشرون العظام في بعض الاحيان بدون بنج،،، يفكون ويربطون،،،،،،،يخيطون ويحلون في بعض الاحيان ابرة واحدة وبدون تعقيم،،،، يفلقون ويداون،،، مافيش اي حد بساله كلهم شغالين يغطوا لبعضهم البعض وما خفي كان اعظم الكلام دا كله تدريب في اهلنا المساكين الماجايبين خبر الدنيا.


#1331519 [wad edduiem]
5.00/5 (1 صوت)

08-31-2015 09:56 AM
اناافتكرت ناس التامين ديل ناس مصلحة التامين ،،، مش الامن ،،، الصحفى ده كان بدك حصة العربي والانشاء


#1331518 [أنا السودان]
5.00/5 (3 صوت)

08-31-2015 09:52 AM
ما شاء الله..
ما قصروا ناس وزارة الغفلة
أعلنوا وقوفهم مع الأطباء
وناشدوا المسئولين الحد من هذه الظاهرة
كتر خيرهم..يعملوا أيه أكتر من كده..

هذا زمانك يامهازل فامرحي


#1331514 [انقاذي سادرفي فساده]
4.38/5 (5 صوت)

08-31-2015 09:49 AM
عودة ديجانقو


#1331504 [:::بيكو:::]
4.44/5 (6 صوت)

08-31-2015 09:40 AM
بس مما كلموه بوفاة قريبو فك النار؟؟؟
ده الحاصل كلو؟؟؟؟
There is something


ردود على :::بيكو:::
[Abdo] 08-31-2015 11:26 AM
I agree with you , there is somthing missing

[omer] 08-31-2015 10:53 AM
يعني حيكون حصل شنو غير كده ؟ مثلا حيكونوا الاطباء اعتدوا جنسيا علي قريبه المتوفي ؟؟؟؟؟
ماهو كل من هب ودب بيعتدي علي الاطباء بسبب وبدون سبب بس الزول دا المرة دي جابا كبيرة واستخدم سلاح , زمان الاعتداء بكون لفظي او باليد وفي حالات قليلة تستخدم العصا .



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية
تقييم
9.50/10 (2 صوت)




الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة