الأخبار
أخبار السودان
المعارضة : لاسبيل لاي اصلاحات في نظام البشير غير اسقاطه وتكوين حكومة انتقالية وعقد مؤتمر دستوري قومي شامل
المعارضة : لاسبيل لاي اصلاحات في نظام البشير غير اسقاطه وتكوين حكومة انتقالية وعقد مؤتمر دستوري قومي شامل



لن ندخل في اي حوار يبقي على النظام
10-20-2015 05:27 PM
الخرطوم..بكري خليفة

اعلنت احزاب المعارضة انها لن تدخل في اي حوار يبقي على النظام في الحكم عبر التسوية السياسية واتهمت الاتحاد الاوربي والترويكا والاتحاد الافريقي بالسعي لانجاز تسوية سياسية مع الحكومة وابقاءها في الحكم ودللت على ذلك بقرارات الاتحاد الافريقي رقم (456) و(539) وشددت على انه لاسبيل لاي اصلاحات فيه غير اسقاطه وتكوين حكومة انتقالية لمدة اربعة سنوات لتكوين دولة مدنية ديمقراطية وعقد مؤتمر دستوري قومي شامل وقال سكرتير الحزب الشيوعي السوداني محمد مختار الخطيب في ندوة "ومازالت الثورة مستمرة"بدار الحزب الاشتراكي الديمقراطي الوحدوي بالخرطوم بحري امس الاول "مصالح المجتمع الدولي مربوطة بمصالح النظام الحاكم وبقاءه في الحكم عبر تسوية سياسية تتمثل في الهبوط الناعم"وانتقد بشدة البنك الدولي وقال انه يشرف حاليا على اقتصاد البلاد ويسعى لتدميره وكشف عن رفضهم للدستور الذي تصنعه النخب في الغرف المغلقة وهاجم الحوار الوطني الحالي بشدة مؤكدا انه طرح لكسب الوقت ووصفه بــ(المخجوج) وجزم بأن المعارضة لن تدخل في اي حوار يبقي على النظام مهما كان ضغط المجتمع الدولي واضاف "التغيير ليس بالتمنيات وانما بالتضحيات من الشعب والمعارضة في وقت وصف فيه رئيس حزب البعث القومي كمال بولاد الاحزاب التي انشقت من الحزب الحاكم بانها "معارضة غير حقيقية" وقطع بانها لن تضم الى مركز المعارضة وزاد قائلا"هؤلاء يمكن ان ننسق معهم وهناك فرق بين التنسيق وتوسيع وعاء المعارضة والحوار الان صراع على كراسي".







تعليقات 5 | إهداء 0 | زيارات 2709

التعليقات
#1357937 [الطلطلي الكريزي العتيبي العربي]
0.00/5 (0 صوت)

10-21-2015 08:22 AM
هذا الصح والحل لنهضة السودان البشيؤ وبشار لاوجود لهما ببلديهما والحل واحد سلطة إنتقالية بوجودهما ثم يغادرا الحكم مع إعطاءهما الحصانة والحماية حتى الموت وغير ذالك هراء


#1357787 [naeem hafiz]
0.00/5 (0 صوت)

10-21-2015 12:36 AM
صمت الناى
أهزوجة درب واحد , لآتشعب الدروب.
شعر نعيم حافظ
صمت الناى , وغاب الغناء فى الدروب والمشارف والذرارى ,والقفار
والبلدات والضهارى,والاريت والسفارى,وصمت الدوبيت , والتوية, والنم والتمتم , والشتم, والمسدار,والناى وتقابةحوار "مجذوب" المرجحن, وقديل العذارى ,
وسقطت الهجن ,
فى حاوية المجوون والجنوون,
فاصمتوا واجمعووا الصفووف.
أجمعوا الصفوف ,
علوا الهمم, دون تراخ او وهن ,
فالنفير والآئتلآف ,
والتضامن والتعاون , والثقة , ونبذ الآختلآف,
صفات الريادة الفطن,
والرائد لآيكذب أهله,
لآيساوم مجد شعبه,
مع الكذاب , الخواف , المداهن, المرائى ,, فرجة فرجة,
المداهن؟؟؟..زنقة ,,زنقة ,,.............................خائن شعبه.
أجمعوا ألصفوف ,
وحدوا ألصفوف , لآمر الوطن ,
وأحكوا للصبايا فى ألآيام القادمات,
مع قهوة الظهيرة , او فى حكاوى الف ليلة وليلة , او حواديت ود النمير القصيرة,او الطويلة
أو "المك "فالمك فى التراب الخبئ , حى
او "الواثق" فى أحتضار الآبوب , يختبئ ,او "الحى" فى الخرز والسهوم والنجووم والتلآلئ والنجوم والمجئ , او" الشريف الآمير"الهميم السخى
او العود احمد , المكى لسدوم,
أن كان ينبغى؟, وينبغى
و وأحكوا للصبايا فى ألآيام القادمات,
بانا مكنا فى الوطن ,
واصابنا الفساد والآتلآف, وخراب الذمة والوهن,
وصرنا التندر بين الآمم , جراء المصاب,وليل المحن
قيثارة الساقية , تنادى ,"
ألله من هذا الخراب,
الله آه من هذا الخراب!, ألله آه من هذى المحن!
من العرق المهدروالجناح المهيض يسرى,
من الضنك المبتسروالقهر البربرى ,
من الغشامة فى كنف السبى المشترى ,
من الغشاوة , وتهريج " الله أكبر"المفترى,
من الفتق والرتق المزدرى, من الشطح والتهويد , والتحويط,
على التباسات واوهام بلة المفترى؟؟!!
الى متى الرزء بهذا العطن ؟!
الى متى الصمت على هذا العفن؟!
الموت والتقتيل , وكسر العقاب,
الحبس والبطش والتعذيب فى سوح البلآد المرجحن
فقد أنقضى زمان هذى الحكاوى والحواديت ,
فى الزمان الحرون,
فى ألآيام الخوالى,
أيام العهر والقهر والفساد والكف الخئون,
من يختبئ فى هذى الجرارالخبيئة الخبيثة ,وموج السفلى وألآعالى,
يفقد العقل وسوبا,والزوجة,والولد,
والساقيةوالبلد,
لن يصمد للدفق أو الرفد , أو الصمد!!
يبيع التراب!!
يضيع عقاب البلد؟؟؟
ياللشجن,ياللحزن!
نوفمبر 3 2014


#1357778 [أبراهيم عثمان]
5.00/5 (1 صوت)

10-20-2015 11:54 PM
إنتو ما عاجبكم اتحاد اوربي ولا ترويكا ولا اتحاد الافريقي ولا بنك دولي ولا حوار ولا كيزان وما شايفين في الدنيا ناس غيركم.. يعني ما أريكم إلأ ما أري.. شوفو هنا أقول ليكم سر: أول حاجة حيعملها البشير بعد الحوار الوطني والتوافق علي دستور دائم للبلد هو تجميد وإغلاق كل الاحزاب الكرتونية التي لا تهش ولا تنش ولا تخدم قضايا الوطن.. والبشير زاتو قال: (ما ممكن البلد يكون فيها 100 حزب، كتيرة خالص ومفروض تتقلص).. الاحزاب بقت شغلانة ذي الاستثمار والواحد عنده مليارات بدل يعمل ليهو مدرسة خاصة أو مستشفي تخدم الوطن يقوم يمشي مسجل الاحزاب يعمل حزب في يوم واحد عشان يشتم ويكورك براحتو ويعمل فيها بطل.. أها هسع الصحفي عثمان ميرغني زاتو داير يعمل حزب وبكرة نسمع بحزب ودالجبل وحزب أسامة داؤود وحزب حسنين وأولاده وحزب كلثوم وبناتها وبعديها حزب الكلاكلة وحزب عطبرة وحزب سقط لقط الديموقراطي المُتحد.. وكلهم دايرين يكايدو الحكومة ويعطلو حركتها وبس.. الرافضين الحوار ديل لازم يعملو حسابهم لأنهم حيكونوا لقمة ساهلة للحكومة بعدين وحتطلع قرارات لقفل الأحزاب الغير فعالة بالطبلة والمفتاح ذي ما عملوها في 89 بكل سهولة.. والبشير مستعد يعلن حالة الطوارئ لمدة شهر في البلد وينزل الدبابات في الشوارع عشان المهمة دي تمشي ذي الترتيب ومافي زول حيقدر يكح كحة ساي.. وبصراحة العسكريين زهجوا خلاص من الساسة المدنيين الما بيعرفوا الإنضباط ديل.. وبالمناسبة مافي جهة حتقيف معاكم لما الحكومة تكابسكم لا أمم متحدة ولا أمريكا ولا إتحاد أفريقي ولا آسيوي ولا يوناميد.. ولو إشتكيتو لأي جهة حيقولو ليكم: نحن قلنا ليكم حاوروا الحكومة وأنتو قويتو رأسكم براكم.. قال حنسقط النظام قال! تسقطوهو كيف وبشنو؟ كل حزب فيهو 15 نفر جالسين في دار الحزب يشربوا الشاي والقهوة ويتحدوا في الحكومة بجيشها وأمنها وشرطتها بكل وقاحة.. أنتو شرطة العمليات الشهيرة بـ (أبوطيرة) دي كفيلة إنها تطيركم طيران صاح.. بالموية والبمبان والعصايات بس.. وكل واحد حيعضي جلابيتو ويطلق ساقيه للريح.. لكن الحكومة صابرة عليكم وشغالة تكتيك إستراتيجي.. وأهم بند في التكتيك الاستراتيجي ده هو: خلوهم يكوركو ويشتمو علي راحتهم عشان العالم يتأكد إنو في حريات تمام في البلد!!


ردود على أبراهيم عثمان
[فدائى] 10-21-2015 12:45 PM
تظ فيك وفى الحكومه وتانى تظ لو ما حاولتوا مجرد محاوله عشان تعملوا اى واحده من الكلام القلتو ده

[مدحت عروة] 10-21-2015 12:39 PM
كلامك صاح يا ابراهيم عثمان فعلا العسكريين مافى احسن منهم لادارة البلاد هسع عاين الدول المحكومة بالعسكر والاحزاب القوية المنظمة زى العراق وسوريا والسودان ومصر وليبيا واليمن وهلم جرا ما شاء الله عايشة فى رخاء واستقرار وامن وسلام وتطور وشوف الدول المحكومة بالساسة المدنيين مثل بريطانيا والمانيا وامريكا وسويسرا والسويد وفرنسا والهند وهلم جرا كيف عايشة فى فقر وتخلف واضطرابات وشعوبها راكبين البحر عشان يجوا يهاجروا للدول المحكومة بالعسكر مثل الدول المذكورة اعلاه هسع انت ما شايف الالمان والبريطانيين مالين المعسكرات فى السودان وسوريا وهلم جرا وياخذوا فى الاغاثات ده غير الماتوا غرقا فى البحر اى زول عنده مخ عارف انه الديمقراطية ودولة القانون ما بتنفع بينفع الحكم العسكرى القوى والاحزاب العقائدية القوية خاصة الاسلاموية !!!!
كسرة:اهدى هذا الرد لجماهير المؤتمر الوطنى العظيمة واكيد هى ح تؤيد كلامى هذا اى زول يبقول ان حكم العسكر والحزب الواحد ما بينفع اكيد هو عميل لاسرائيل واعداء الاسلام والامة !!!
كسرة اخيرة:انت يا ابراهيم عثمان بتتريق زيى ولا بى صحك ؟؟؟؟؟ قال عسكر قال ما هم سبب البلاوى والمصايب فى السودان تاركين المصريين يحتلوا حلايب والحبش يضربوا المزارعين السودانيين فى الفشقة واسرائيل تضرب اى حتة فى السودان وهم ساكين المعارضة من اجل حكومة اتت بانقلاب عسكرى فى 30/6/1989 هسع عليك الله الهند دى مثلا لو حكموها عسكر كانت بقت دولة محترمة؟؟؟؟؟


#1357665 [عصمتووف]
0.00/5 (0 صوت)

10-20-2015 06:30 PM
معليش منقول لمن فاتهم
المصدر حريات

أسعد التاى : بين الجبهة الثورية والمؤتمر الوطنى
October 20, 2015
(أسعد التاى – فيسبوك)
الحملة التي يشنها اعلام المؤتمر الوطني ضد الجبهة الثورية فيما يخص اختلافهم حول تداول رئاستها تبدو لي منطقية و مهضومة ومفهومة..
ومن غير المؤتمر الوطني مؤهل للحديث حول هذا الامر، وهو الذي قدم للعالم تجربة فريدة في التداول الديمقراطي والسلمي للرئاسة.
ففي سابقة هي الاولى من نوعها في العالم انتقل الحكم بكل سلاسة من العميد عمر حسن احمد البشير رئيس مجلس قيادة الثورة الى الفريق عمر البشير ليكون رئيسا لجمهورية السودان بعد (انحلال) المجلس.
ثم تنحى الرجل طواعية بعد انتخابات 97 ليسلم الحكم للفريق البشير.
الفريق البشير هو الاخر كان زاهدا في الحكم ، فقام في نهاية عقد التسعينات بحل البرلمان و امانة الحزب و قام بتسليم قيادة البلد للمشير البشير الذي قبل به على مضض و قاد البلد في ظروف بالغة التعقيد.
ثم قام بتسليم الراية حسب اتفاقية السلام الشامل للسيد الرئيس عمر البشير.
و في تجربة ديموقراطية كاملة الدسم في 2010 و بشهادة المجتمع الدولي نال الرئيس عمر البشير هزيمة ساحقة ليخلفه في المقعد الرئيس البشير.
و اكمل الرئيس البشير دورته بعد جهد جهيد، فقد كان زاهدا في الكرسي لولا (التحانيس)،فانسحب من السباق الرئاسي في انتخابات 2015 ليفوز بالكرسي شقيقه الرئيس المشير عمر البشير.
المؤتمر الوطني يرجو من الجبهة الثورية ان تتعلم منه الديمقراطية والتداول السلمي للسطلة.. اقصد السلطة..
ولا نامت اعين الدكاترة..
اقصد الدكتاتووووووووووووووو..
ياخ انعل ابوغنمايتنا زاتو.


#1357661 [منتصر سورتود]
0.00/5 (0 صوت)

10-20-2015 06:19 PM
نهائيا. . لا حوار مع اللصوص .. لا مستقبل للبلاد الا بزوالهم الإسقاط الإسقاط الاسقاط


ردود على منتصر سورتود
European Union [أبو] 10-21-2015 10:16 AM
أبوس إيدك وريني ح تسقط كيف؟؟؟؟؟؟؟



خدمات المحتوى


مساحة اعلانية





الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة