في



الأخبار
أخبار السودان
نواب مجلس "بدرية سليمان" بعد اقتناء العربات هاجموا الشعب السوداني!!
نواب مجلس "بدرية سليمان" بعد اقتناء العربات هاجموا الشعب السوداني!!
نواب مجلس


10-27-2015 11:59 PM
بكري الصائغ


١-
***- لم يعد غريبآ علي السودانيين ان يسمعوا كل يوم غرائب مايدور في مجلس "بدرية سليمان" من هبل وضحك علي الدقون باسم نواب الشعب!!، وما من سوداني في داخل البلاد او خارجها الا ورأيناه قد استنكر بشدة تلك المقترحات الغريبة التي قدمها النواب من قبل ولا تمس اطلاقآ اولويات البلد، ولا تمس ايضآ القضايا الملحة العاجلة الواجب مناقشتها قبل اي قضايا هامشية كالتي تناقش الان باهتمام شديد!!

***- ما من سوداني الا واستغرب من طريقة المناقشات العقيمة التي تدور في المجلس، وكيف انها قد خلت تمامآ من ابسط ابجديات المنطق وفهم حقائق ما يدور في السودان المنكوب بالمحن ورزايا.

٢-
*** بثت صحيفة "اخر لحظة" المملوكة لجهاز الامن، اليوم الثلاثاء ٢٧ اكتوبر الحالي ٢٠١٥- خبر له علاقة بمهازل ما يدور في مجلس "بدرية سليمان"، وجاء تحت عنوان: (برلمانيون يحملون الشعب مسؤولية الفقر وتدهور الاقتصاد: الشعب المتراخي غير الجاد أفقر السودان بسياساته)!!...جاء في سياق الخبر، ان النائب البرلماني عن حزب الأمة الفدرالي، طارق حمد الشيخ، حمل الشعب السوداني مسؤولية تدهور الاقتصاد والمعاناة التي يعيشها نسبة لتراخيه وعدم جديته،، وقال ايضآ «منو القال ليكم العيب في اقتصاد البلاد العيب في الشعب المتراخي وغير الجاد»)!!...

***- ليت الامر وقف عند هجوم هذا النائب علي الشعب ، لكن سرعان ما راح عضو البرلمان المستقل الطيب إبراهيم وشد من ازر صديقه النائب، وأكد إن السودان ليس ببلد فقير، ولكن أفقره الشعب السوداني بسياساته!! ...

٣-
***- نسأل النائب طارق حمد الشيخ وزميله النائب الطيب إبراهيم، اذا كان الشعب السوداني كسول ولا يملك الجدية في العمل، اذآ من اين تحصلان علي الراتب الشهري والامتيازات وبدل السفر...اليس من عائدات الضرائب التي يدفعها المواطن؟!!...هل ينكر احدكما انكما تستمتعان باموال بائعات الشاي والقهوة وستات اللقيمات والكسرة؟!!...

***- هذه العربات الفارهة التي منحها لكم رئيس الجمهورية - ودارت حولها مشاحنات ونزاعات حول من هو احق في المجلس بملكيتها؟!! -، اليست هي عربات مستوردة لكم ولاسركم باموال الشعب الذي يكد كل يوم بلا كلل ولا ملل؟!!..كيف يكون الشعب السوداني - حسب تصريحاتكما انه كسول ولا يحب العمل- وانتم تعيشون عالة عليه؟!!

٤-
***- نسأل ايضآ، ايهما الكسول حسب وجهه نظركما، المواطن الذي يكد ويشقي طول يومه، بعض المواطنين اصبحوا يعملون في "وردتين" صباح ومساء واشغال اضافية بعد ساعات العمل الرسمية من اجل السترة؟!!..ام هو النائب الذي ياتي لينام في المجلس في الاجواء المكيفة كما اوضحت بعض الصور التي نشرت في الصحف وهم في حالة نوم عميق؟!!

٥-
***- نسال للمرة الثالثة:
***- بدلآ ان تناقشوا كسل السودان وخمولهم، لماذا لا تتناقشون حول اسباب كسل نواب المجلس الذين لايرغبون زيارة حلايب او الفشقة وابيي ؟!!

***- لماذا لم يقم نائب واحد بزيارة الي ولاية النيل الازرق ليري بأم عينيه حال السكان الذين اصبحوا يطبخون اوراق الشجر بسبب الحصار المفروض عليهم منذ اكثر من خمسة اعوام؟!!

٦-
***- ما الذي يمنع النائب طارق حمد الشيخ وزميله النائب الطيب إبراهيم من السفر الي جبال النوبة ليلمسا علي الطبيعة حال السكان هناك وكيف يعيشون تحت القصف الجوي المستمر علي المنطقة منذ عام ٢٠٠٤، علمآ بان السفر الي جبال النوبة سيكون بالمجان، وخصمآ من اموال الشعب؟!!

٧-
نسأل للمرة الرابعة:
***- هل كسل النواب ام الرعب من صاحبة المجلس هو الذي يمنعهم من مناقشة اوضاع البلد بجدية، ولماذا لم يستفيد الشعب من عائدات النفط طوال ١٩ عام؟!!...ولماذا يستحوذ القوات المسلحة وجهاز الامن علي ٦٦% من الميزانية العامة كل عام!!..وما تبقي من فتات اموال يروح للخدمات التي هي اصلآ غير موجودة؟!!

٨-
***- لماذا لم نسمع باي زيارة قام بها نائب الي الولاية الشمالية ليري النخيل المحروقة وبلغ عددها نحو نصف مليون نخلة وشتلة، وهي حرائق متعمدة بفعل فاعل مجهول؟!!...(الغريب والمدهش في الموضوع، ان البشير نفسه امتنع عن زيارة الولاية الشمالية اثناء جولاته الانتخابية وزار باقي الولايات)!!

٩-
***- هل هو الكسل الذي منع رئيس المجلس والنواب من زيارة المناطق التي تاثرت بالامطار والسيول اخيرآ؟!!..

١٠
***- من هو الكسول: الشعب السوداني..ام النواب الذين ما خرجوا من مجلسهم ليعاينوا حال القضارف والامن الفالت فيها، وحال المواطنين الذين يعانون يوميآ من خطر الاختطاف علانية من قبل عصابات "تجار البشر" ؟!!..

١١-
***- هاجم النائب طارق حمد الشيخ وزميله النائب الطيب إبراهيم الشعب ببذاءة تستحق الاحتقار، ندرك تمامآ انهما قد رغبا في الظهور ولمعان شخصيتهما اعلاميآ بهذه الطريقة الوقحة المستهجنة، لكن الاغرب من كل هذا ان لا احد من نواب المجلس اعترض علي بذاءة النائبين!! ولا تم اسكاتهما من طرف رئيسة المجلس!!..ولا تم شطب الشتيمة من محاضر الجلسات!!

١٢-
***- يا تري هل كانت رئيسة المجلس والنواب في حالة نوم عميق -كالعادة-؟!!.. والا كيف فات عليهم قبول مثل هذا الهجوم ولم يعترضوا عليه؟!!

بكري الصائغ
bakrielsaiegh@yahoo.de






تعليقات 19 | إهداء 1 | زيارات 4168

التعليقات
#1362229 [ابو سحر]
0.00/5 (0 صوت)

10-29-2015 08:31 AM
الاخ الكريم بكري الصائغ
مع التحية
شكرا علي ردك علي تعليقي
لكن نحن ما انسرقنا وضعنا
دا كله حاصل علينا في السودان وما جايبين خبر
الراجنها شنو؟؟؟؟؟؟؟؟؟؟؟؟؟؟؟؟؟؟


#1362121 [بكري الصائغ]
0.00/5 (0 صوت)

10-29-2015 12:01 AM
١-
اقتباس:
نواب تشريعى القضارف يطالبون نظام البشير
بالإسراع فى إعادة ترسيم الحدود السودانية الإثيوبية
*****************************
10-27-2015-
- (سونا) -
-----------------
طالب نواب مجلس ولاية القضارف التشريعى خلال مداولاتهم اليوم حول خطاب والي ولاية القضارف الذى اودعه منضدة المجلس أمس طالبوا الحكومة الاتحادية بضرورة الإسراع فى إعادة ترسيم الحدود السودانية الأثيوبية . ودعا النواب الي تخصيص جزء من ميزانية العام 2016 م لتنمية الشريط الحدودي من خلال إقامة القرى وتوفير الخدمات الأساسية من طرق وتعليم وصحة لإحداث الاستقرار.

٢-
الي نواب مجلس "بدرية سليمان":
هل نفهم من الخبر اعلاه، ان الحدود بين السودان واثيوبيا منذ عام ١٩٩٥ - بعد محاولة اغتيال الرئيس السابق حسني مبارك - وحتي الان غير واضحة المعالم، والسودان لا يعرف حدوده الجغرافية؟!!


#1361952 [مدحت عروة]
5.00/5 (1 صوت)

10-28-2015 02:53 PM
وهذه الرواتب والسيارات والامتيازات تكون من بيوت اماتكم او آبائكم او دهب حبوباتكم اقسم بالله انكم مفروض تكونوا تبيعوا الموية او تغسلوا العربات فى شوارع الخرطوم ايها الجهلة الاغبياء الدلاهات والفاقد التربوى المنتفعين وتجوا تتكلموا عن الشعب الذى هو سيدكم ايها العواليق اوع تكونوا بتفتكروا ان هذه الاموال من بيوتكم قوموا كده جاكم بلا يخمكم ويخم العينكم كمان والله انتم لا تسووا جزمة او براز من اى مواطن سودانى !!
كسرة:انتو عاملين زى زول يجيب ليه خدامة وتقعد الخدامة تقول ليه انت ما بتنضف كويس مالك وقاعد كسلان حقيقة ورب الكعبة الانظمة الديكتاتورية ما يطلع فيها فى الكفر الا الدلاهات والاغبياء والفاقد التربوى والنفعيين والله انكم لا تستحقوا اى قرش من اموال الشعب اللى هو سيدكم ايها الفشلة العطالى ولا تستحقوا اى احترام وزى ماقلت فى تعليق آخر سبب فشل السودان هو زى النظام الانتوا شغالين معاه ده وغياب الديمقراطية ودولة القانون!!!!!!!!!!!


ردود على مدحت عروة
[بكري الصائغ] 10-28-2015 11:11 PM
أخوي الحبوب،
مدحت عروة،

تحية طيبة حارة ممزوجة باجمل ايآت الشكر علي الزيارة الكريمة،
والله ياحبيب لك الحق ان تزغل كل هذا الزعل وتصب جام غضبك العارم علي نواب مجلس "بدرية سليمان" الذين لايخافون ولايستحون من اعمالهم المخزية التي وصلت اخيرآ الي شتيمة الشعب السوداني المقتول كمد ومغلوب علي امره...

لك الحق يا مدحت ان تسب ابالسة مجلس بدرية الذي حتي الان ما رايناهم قد انجزوا شي مفيد للبلاد، ولا ناقشوا المواضيع الملحة العاجلة التي تمس الحياة اليومية للمواطن!!..سكتوا عن مايدور في البلاد من فساد وتخريب اقتصادي وسرقات ونهب اراضي الدولة وتفرغوا لمناقشة المواضيع الفارغة!!

***- لقد اصبح الشعب كل يوم يزداد اقتناعآ، ان الذين دخلوا المجلس عام ٢٠١٥ تحت اسم "نواب الشعب"،ما هم الا مجموعة من الارزقية، اصحاب مصالح علي حساب اي شي حتي ان كان الثمن بيع البلاد بالتقسيط!!..

المشكلة الكبري ياأخي مدحت، ان هؤلاء سيكونون في المجلس حتي عام ٢٠٢٠....ما لم تحدث معجزة..انتفاضة..ثورة..انقلاب عسكري..


#1361942 [سوداني غيور]
5.00/5 (1 صوت)

10-28-2015 02:35 PM
للمعلومية : قبل أن يمنح هؤلاء النواب العالة السيارات الفارهة ، تم منحههم قطع أراضي شرق المطار الجديد بمبالغ رمزية تافهة _ 7 مليون ج سوداني وبالتقسيط علما بأنها بيعت للمغتربين ( الكسالى على حد قولهم ) بما يعادل 25 مليون ج س .هذه الأراضي أولى بها أهل المنطقة الجموعية والمغتربين من هذه المنطقةوليس النواب المترفين النائمين تحت مكيفات مباني المجلس غير الوطني.الظلم ظلمات يوم القيامة والمولى يمهل ولا يهمل.


ردود على سوداني غيور
[بكري الصائغ] 10-28-2015 10:54 PM
أخوي الحبوب،
سوداني غيور،
تحية طيبة ممزوجة بالشكر علي قدومك السعيد،

يا حبيب، ماقلته في تعليقك الكريم سبق ان نشر مئات المرات في الصحف المحلية، المواطنون طالبوا الحكومة الحالية والسابقة بان تكون اولوية الحصول علي قطع سكنية للمغتربين بحكم انهم يدعمون ميزانية الدولة كل عام بمليارات الدولارات. رفضت الحكومة كل نداءات المظلومين والمسحوقين، ووزعت الاراضي علي أهل السلطة واقاربهم، ليت الامر وقف عند اراضي معينة خصصت لهم، بل راحوا يستولون حتي علي الميادين والاراضي التابعة لوزارات وشيدوا عليها الفلل والقصور، بعض قادة المؤتمر صرحوا علانية في الصحف انهم يملكون عدة قطع سكنية في مناطق متعددة، الدكتور عبدالعاطي اعترف بملكية ٨ قطع!!..الدكتور مصطفي اسماعيل ايضآ كشفت المواقع الالكترونية حقيقة عقاراته واراضيه في الخرطوم!!..والي الخرطوم الجديد صرح ان الخرطوم غدت خالية من الاراضي السكنية!!

[بكري الصائغ] 10-28-2015 10:53 PM
أخوي الحبوب،
سوداني غيور،

تحية طيبة ممزوجة بالشكر علي قدومك السعيد،

يا حبيب، ماقلته في تعليقك الكريم سبق ان نشر مئات المرات في الصحف المحلية، المواطنون طالبوا الحكومة الحالية والسابقة بان تكون اولوية الحصول علي قطع سكنية للمغتربين بحكم انهم يدعمون ميزانية الدولة كل عام بمليارات الدولارات. رفضت الحكومة كل نداءات المظلومين والمسحوقين، ووزعت الاراضي علي أهل السلطة واقاربهم، ليت الامر وقف عند اراضي معينة خصصت لهم، بل راحوا يستولون حتي علي الميادين والاراضي التابعة لوزارات وشيدوا عليها الفلل والقصور، بعض قادة المؤتمر صرحوا علانية في الصحف انهم يملكون عدة قطع سكنية في مناطق متعددة، الدكتور عبدالعاطي اعترف بملكية ٨ قطع!!..الدكتور مصطفي اسماعيل ايضآ كشفت المواقع الالكترونية حقيقة عقاراته واراضيه في الخرطوم!!..والي الخرطوم الجديد صرح ان الخرطوم غدت خالية من الاراضي السكنية!!


#1361818 [الكجور الأسود]
5.00/5 (1 صوت)

10-28-2015 11:37 AM
الشعب السوداني هو نفسه الشعب السوداني الذي عندما تركه الإنجليز سنة1956م كان ينعم بعملة الجنيه القوي الذي ينافس الدولار،ينعم بمشروع الجزيرة وهو في قمه عطائه ،ينعم بالقطار الذي يتنغنى به في أشعاره واغانيه،ينعم بجامعة غردون/التي أصبحت جامعة الخرطوم وإستحقت فيما بعد لقب جميلة ومستحيلة،وكان الإغتراب عيب،فماذا الذي تغير ؟ الذي تغير ليس هو الشعب السوداني،ولكن الذي تغير هو "المستعمر"!!!


ردود على الكجور الأسود
[بكري الصائغ] 10-28-2015 10:41 PM
أخوي الحبوب،
الكجور الأسود،

مساءكم الله بكل ما هو جميل ومفرح، الف شكر علي قدومك السعيد،

والله تعليقك الرائع قمة في الفهم، تغير حال السودان من المستعمر البريطاني الي المستعمر الوطني ماركة الانقاذ، عاصر السودان انواع من الانظمة الاستعمارية:
١- التركية السابقة،
٢- التركية - المصرية،
٣- الاستعمار البريطاني،
٤- الحكم الثنائي.
لكن حكم الانقاذ بقيادة عمر البشير وطوال ٢٦ عام، كان هو الاسوأ من نوعه في تاريخ السودان منذ عام ١٨٨٥ (حكم غردون) حتي اليوم.

غردون ومن بعده من جنرالات لم يقتلوا سودانيين بهذا العدد الذي قتل فيه البشير السودانيين!!..الانقاذ كان وراء تقسيم السودان بعد ان كان موحدآ، لا يجب ان ننكر فضل الحكم البريطاني في توحيد الاطراف السودانية في بلد واحد، علي سبيل المثال: دارفور عام ١٩١٦ - بحر الغزال ١٩١٦.


#1361817 [assad]
5.00/5 (1 صوت)

10-28-2015 11:37 AM
الاخ/بكرى اشكرك على هذا الرد الوافي الكافي لكن لا نملك الا الدعاء على حزب المؤتمر الوطني اللهم ارنا فيهم عجائب قدرتك اللهم زلزلهم ودمرهم انك على كل شي قدير


ردود على assad
[بكري الصائغ] 10-28-2015 10:22 PM
أخوي الحبوب،
Assad - أسـد،
(أ)-
التحايا الطيبة الحارة لشخصك الكريم، سعدت بمرورك الكريم،

(ب)-
-شي من تاريخ المجلس الوطني-
فساد معلن لمن يفترض فيهم مكافحة الفساد :
منح نواب برلمان البشير قطعاً سكنية بأسعار زهيدة
*****************************
January 27, 2015
صحيفة - "اليوم التالي"-
-------------------
***- اشترى البرلمان مساحات واسعة من الأراضي السكنية في مخطط (المندرة) السكني قرب المطار الجديد جنوبي أم درمان، ووزعت إدارة البرلمان أكثر من (300) قطعة على مساحة (400) متر مربع للنواب أمس بعد إجراء سحب القرعة، وتمت الخطوة في الأيام الأخيرة لدورة انعقاد البرلمان، بمنح النواب الراغبين قطعا سكنية في المواقع المذكورة بواقع 7 آلاف جنيه للقطعة على أن تدفع 50% من القيمة نقدا ويتم تقسيط الباقي على ثلاثة شهور، وكشف نواب عن أن الأمر ليست له علاقة بالإسكان الشعبي ولا يخضع لأسسه ولوائحه وتسلم شهادات البحث فور سحب القرعة.

***- ورصدت (اليوم التالي) تدافعا كبيرا من النواب على مكتب مهدي إبراهيم رئيس كتلة نواب (الوطني) الأحد لمعاينة الأرض على خارطة كبيرة موضوعة على طاولة مكتب رئيس الكتلة بعد أن سحبوا القرعة وسددوا الرسوم في القاعة الخضراء.

***- يشار إلى أن أسعار قطع أراضي مخطط المندرة السكني المعلن عنها في الصحف السيارة تتراوح بين (17 ـ 20) ألف جنيه.


#1361801 [المغبون]
0.00/5 (0 صوت)

10-28-2015 11:15 AM
اذا كان الشعب حيلو اتهد والله انتم من هديتو حيلو لانه هو المسؤول عن توفير المخصصات التى تنعموا بها عيالوا محرومين وعيالكم منعمين تركبون فى الفارهات وهو مسكين حتى المواصلات العادية ما موفرنها ليهو وبرضو جاين تلوموا فيهو ده ما كان عشمو فيكم انتخبكم عشان تريحوه وتساعدوه فى تحقيق مطالبه البسيطة ولكن للاسف تنكرتم له ووصفتوه بانه هو سبب الفقر وخراب الميزانية يعنى الكلام ده قبل ما تترشحوا ويصوت لكم هذا المواطن المسكين الم تكونوا تعرفوه لماذا لم تقولوا له هذا الكلام قبلما تجلسوا تحت قبة البرلمان الشعب يلجأ لمن بعد ده ما معروف ما دام من يرشحهم يقعدوا يهينوا فيه .


ردود على المغبون
[بكري الصائغ] 10-28-2015 10:00 PM
أخوي الحبوب،
المغبون
مساءكم الله بالعافية، مشكور علي القدوم الكريم،

نعم الكلام ما قلت يا حبيب، قبل ان يدخل النائب للبرلمان، كان يوعد انصاره بانه سيحيل حياتهم الي نعيم، وما ان يدخل البرلمان حتي يقوم من تلقاء نفسه بالانضمام لمجموعة نواب المؤتمر الوطني من اجل الحصول علي اكبر قدر من الامتيازات وفرص السفر للخارج (١٠٠٠ يورو في اليوم )، كل هموم النواب قبل ان تنقضي الخمسة اعوام في كيفية الثراء والحصول علي مباهج الدنيا والتمتع هو واسرته باكبر قدر من المباهج!!.. نواب لا ضمائر لهم..عليهم اللعنة الي يوم الدين.


#1361790 [ابو سحر]
5.00/5 (1 صوت)

10-28-2015 10:56 AM
السودان بلد العجائب

1-نهرين و موية مافي
2-سدين و كهرباء ما في؟
3-شريحتين في الموبايل وشبكة مافي؟

تتصل بالسودان ما تسمع غير رد مكرر
4-الواحد يكون عنده شهادتين و شغل مافي؟
5-انبوبتين و غاز ما في؟
6-تلفونين و رصيد ما في؟
7-خطيبتين و عرس ما في؟
8-ترسل الرسالة و زول يقراهم ما في
و زول يعلق ما في

9-25 مجلس وبرلمان و نواب ما في؟
اخير عدهم
تقول لي برلمان و نواب؟؟؟؟؟؟؟؟؟؟؟؟؟؟؟؟؟؟؟

فساد بالكوم و محاكم ما في؟؟؟؟؟؟؟؟؟؟؟؟؟؟؟؟؟


ردود على ابو سحر
[بكري الصائغ] 10-28-2015 09:51 PM
أخوي الحبوب،
ابو سحر،
(أ)-
مساء الخير والافراح، سعدت بقدومك الكريم،
والله ياحبيب ال(مافي) بتاعتك في السودان قليلة شديد.

(ب)-
لا تستغرب انت فى السودان
*******************
لو أنت في بلد فيهو سنه سابعة وسنة تامنه ابتدائي…
تبقى أنت أكيد في السودان!!
*****
لو طالعت إعلانات لشركات (مسئول) كبير وهو لا زال (في الخدمة…)
تبقى أنت أكيد في السودان!
*****
لو (لبد) ليك شرطي (مرور) في نهاية شارع (اتجاه واحد)..وخلاك لمن دخلت وجاك بى (دفتر إيصالاتو…)
تبقى أنت أكيد في السودان!!
*****
لو لقيت في بلد ما فيهو (معينات البحث العلمي).. وكل يوم الجامعات تناقش (خمسين) رسالة دكتوراه وكل يوم الجامعات تناقش (خمسين) رسالة دكتوراه.. و(ميتين) رسالة (ماجستير)!!
تبقى أنت أكيد في السودان!
*****
لو أنت في بلد وزارة الصحة فيهو قالت (الدواء) ده (فاسد) أحظروهو ...
وبعد شويه قالت (ما فاسد) خلوهو...وبعد شويتين قالت (فاسد) أمنعوهو..
تبقى أنت أكيد في السودان!!
*****
لو لقيت في بلد (الصحف) بتتقفل بى (مادة) في القانون (معمولة للمطاعم …)
تبقى أنت أكيد في السودان!!
*****
لما تلاقى الترزي كاتب على باب المحل بتاعو آية بتقول ( وفصلنا كل شئ تفصيلا) صدق الله العظيم …
تبقى أنت أكيد في السودان!!
*****
لما تخلص موضوع في مكان ما، وتجى تركب عربيتك وتلاقى (المساحات ) مرفوعة عشان تعرف على طول انو في واحد مسحها ليك وح ياخد منك واحد جنيه …
تبقى أنت أكيد في السودان!!
*****
لو قرأت الصحف في 1987 أو في 2016 عن (انتهاء قطوعات) الكهرباء ولقيت نفس الكلام في صيف 2030..
تبقى أنت أكيد في السودان!!
*****
لو زوجة الوزير مليانة دهب بتتجدع بيه بالعلن في الشارع من غير حساب
وأطفالها بيملطشوا اولاد الجيران...
تبقى أكيد إنت في السودان!!
*****
لو أهم (كبرى) في عاصمة البلد صيانتو عاوزة ليها (سنتين)…
تبقى أنت أكيد في السودان!!
*****
لو بهدلوك في اي مكانواشتكيت للشرطة وقالوا دا مش اختصاصنا امشي اشتكي في الثروة الحيوانية ....
تبقى أكيد أنت في السودان!!
*****
لو لقيت أنو وزارة الداخلية عندها مؤسسات (تعليمية) ووزارة التعليم عندها مؤسسات (صحية)ووزارة الصحة عندها (شركات إنشائية)…
تبقى أنت أكيد في السودان!!
*****
لو دخلت (الوزارة) وأنت مؤجر في (زقلونا) وطلعت وعندك عمارتين في (قاردن سيتى)...
تبقى أنت أكيد في السودان
*****
لو اشتغلت في الخدمة المدنية 30 سنه وأدوك معاش شهرى يساوى 6 كيلو لحمة ....
تبقى أنت أكيد في السودان!!
*****
لو توقفت (الحركة) إثناء ساعات (الذروة) وإكتشفت أن السبب (كشه)...
تبقى أنت أكيد في السودان
*****
لو عدمت (التعريفة) وكمان دخلت في (ديون) للإيفاء بنفقات (فراش) قريبك الذى توفى إلى رحمة الله...
تبقى أنت أكيد في السودان!!
*****
لو وجدت أن (ترخيص عربتك) يساوى (ربع) قيمتها ….
تبقى أنت أكيد في السودان!
*****
لو تقدم إبنك (المهندس) لشغل وظيفة وكان (الإنترفيو) عن (صلاة الجنازة)..
تبقى أنت أكيد في السودان!!
*****
لو (فجأة) إكتشف (المسئولون) أن (الخريف) على الأبواب...
تبقى أنت أكيد في السودان!!
*****
لو عندك (الكلية) اليمين متعطلة وعاوزين يشيلوها ليك قامو (إستأصوا) الشمال السليمة لأنو الدكتور كان ماسك الأشعة (بالمقلوب)...
تبقى أنت أكيد في السودان!!
*****
لو مكث (مرتبك) معك (تلاته ساعات وإطناشر دقيقة) هى الفترة من لحظة إستلامه من الصراف إلى حين عودتك للمنزل...
تبقى أنت أكيد في السودان!!
*****
لو فاز فريقك الذى تشجعه على الفريق الخصم في مباراة الذهاب 8/صفر
وخسر في مباراة الإياب 12/صفر….
تبقى أنت أكيد في السودان!!
*****
لو لقيت لوري التراب وكومر البلدية من سنة 50 شغال بالاضافة للركشة في نفس الشارع...
تبقى اكيد انت في السودان!!
*****
لو وجدت أن رؤساء (الأحزاب) هم (رؤساء) مدى الحياة...
تبقى أنت أكيد في السودان!!
*****
لو وجدت أن نسبة الفقر تزداد بإزدياد (معدل النمو تبع الحكومة)
تبقى أنت أكيد في السودان!!
*****
لو ضربتك عربية حكومة ومشيت القسم و طلعتا انت الغلطان...
تبقى اكيد انت في السودان!!
*****
لو خشيت مؤسسة حكومية ولقيت الموظفين مافي اثناء الدوام..
تبقى اكيد انت في السودان!!
*****
لو طلعت مستحمي و متريح وماشي عرس ودخلت العرس زي الكأنك كنت بتلعب كورة...
تبقى انت اكيد و اكيد في السودان!!
*****
لو لقيت مطعم وقدامو دورات مياه...
تبقى اكيد انت في السودان!!
*****
لو مشيت الحوادث وقالو ليك (لوعندك رصيد اضرب للدكتور لانو نايم)
تبقى انت اكيد في السودان!!
*****
لو شغال في السوق وقالو ليك ادفع ضريبة ميزان ....
تبقى اكيد انت في السودان
*****
لو لقيت اجنبي وعواطلي وعندو صلاحية اكتر منك والناس كلها تحترمو...
تبقى انت اكيد في السودان!!
*****
لو اعلنو عن 3000 وظيفة ومشيت تقدم في اليوم الاول وقالو ليك
(تعال بكرة لانو لجنة المعاينة ما اكتملت) وجيت تاني يوم و لقيت التقديم قفل...
تبقى انت اكيد في السودان!!
*****
لو لقيت حي ساكن فيهو مسؤول كبير والكهرباء فيهو ما بتقطع نهائى...
تبقى اكيد انت في السودان!!
*****
لو محتاج حاجة ولقيت اقرب حتة تجيبا منها على بعد 3 كيلو متر...
تبقى اكيد انت في السودان!!
*****
لوقريت الكلام دا.. وما علقتا ولا جنيت..وكنت بارد شديد ومستسلم...
تبقى أكيد أنت من السودان!!

***-
***- الله يلعنكم ناس الانقاذ وصلتونا للحالة دي!!


#1361738 [أبوقرجة]
0.00/5 (0 صوت)

10-28-2015 09:48 AM
بقول للنواب القالوا الكلام دا ... الأفقر السودان سياسات ا لجبهة الإسلامية التي تنتمون إليها وتؤيدونها.... أتركوا الشعب السوداني ليختار طريقة حكمه ومن يحكمه .. وستروا شعب آخر ... دمرتوه في ظل حكمكم لمدة تزيد عن 26 سنه


ردود على أبوقرجة
[بكري الصائغ] 10-28-2015 09:20 PM
أخوي الحبوب،
أبوقرجة،

الف مرحبا بقدومك المتالق، سعدت باهتمامك للموضوع،
وصلتني رسالة من صديق عزيز يقيم في ميونيخ، وكتب:

(..من متين كانوا نواب المجلس الوطني محترمين واولاد ناس؟!!..من تاسيس اول مجلس اول مجلس وطني في التسعينات حتي اليوم وكل النواب من الوقت داك كذابين انتهازيين سفلة!! مستعدين يبيعوا البلد كلها من اجل مصالحهم الشخصية والثراء علي حساب اي شي!!..اخبار الاخبار افادت ان العصابات الاثيوبية قتلت ٢٢ سوداني، وبدل ما المجلس الوطني يناقش الوضع الخطير، راحوا يتشاكلوا في تقسيم العربات!!...لك الله يابلد).


#1361736 [أبوقرجة]
0.00/5 (0 صوت)

10-28-2015 09:46 AM
أستاذنا الفاضل / بكري الصائغ ... تحياتي وتقدير لشخصك العزيز

في زمن الانقاذ دي سمعنا كلام أقل ما يوصف بالغريب... الناس ديل الواحد بقى ما عارف يقول فيهم شنو...... ونتوقع منهم أشيء... احتمال الكلام دا يكون مقدمة لمقترح في البرلمان ... إعطاء الأجانب الجنسيةالسودانية بدون قيد أو شرط ... وتكليفهم بالعمل بدل السودانيين... ويفرغ السودان من السودانيين .. ويأتوا بشعوب أو شعب آخر............... وإلا تفسر شنو ظاهرة الحبش والمصريين والفلسطينين والسوريين واليمنين والهنود والبنغلاديش وجميع أجناس العالم....

أتمنى أن لا يحدث هذا ... لكن في ظل الانقاذ كل شيء ممكن.


ردود على أبوقرجة
[بكري الصائغ] 10-28-2015 09:09 PM
أخوي الحبوب،
أبوقرجة،

مساكم الله تعالي بوافر الصحة والعافية التامة، الف شكر علي قدومك الميمون، اما بخصوص تعليقك وكتبت:

(في زمن الانقاذ دي سمعنا كلام أقل ما يوصف بالغريب...الناس ديل الواحد بقى ما عارف يقول فيهم شنو......ونتوقع منهم أشيء... احتمال الكلام دا يكون مقدمة لمقترح في البرلمان...إعطاء الأجانب الجنسية السودانية بدون قيد أو شرط... وتكليفهم بالعمل بدل السودانيين...ويفرغ السودان من السودانيين .. ويأتوا بشعوب أو شعب آخر)...

***- هناك دليل علي تفريغ البلد من اهله السودانيين(الاصليين) واستبدالهم باجانب (من كل فج عميق)!! والي الخرطوم اكد ان ٤٧% من سكان الخرطوم اجانب!! ...احصائية اخري افادت ان نحو ٥ مليون اجنبي يقيمون في السودان الان واغلبهم عطالي ومرضي!!..عدد السودانيين الذين فروا من النظام الحاكم ويقيمون في الخارج بلغ عددهم ١٥ مليون شخص!!...اخر الاخبار ان معتمد الحصاحيصا بولاية الجزيرة بابكر عبد الرازق دفع الله الخضر تقدم باستقالته لوالي الولاية محمد طاهر إيلا، بعد ثلاثة أشهر من التعيين!!

***- بكرة تسمع يا حبيب، السودان ما بقي فيه الا البشير ونواب المجلس!!


#1361712 [عزيز دنياى]
0.00/5 (0 صوت)

10-28-2015 09:16 AM
دا جاء بي ياتو باص دا نائب شنو وعايش وين لافهم لا خلقة لا اخلاق سبحان الله فى كلامو ...............
اكيد شارب حاجة افتكر روحو فى برلمان الامارات ولا السعودية


ردود على عزيز دنياى
[بكري الصائغ] 10-28-2015 08:24 PM
أخوي الحبوب،
عزيز دنياى،
الف مرحبا بك وبقدومك الكريم،

تعليقك القوي يؤكد بالفعل ان نواب المجلس في حاجة الي كشف طبي عاجل لمعرفة حالة قواهم العقلية!!..ان الذين يشتمون شعوبهم هم ليسوا ببشر.


#1361676 [الباشا]
0.00/5 (0 صوت)

10-28-2015 08:45 AM
اخي الصائغ ماذا يرجو الشعب من اميين وشذاذ افاق تجمعوا تحت قبة برلمان وهو ليس ببرلمان ... النائبان ارادا التزلف للعصابة الحاكمة بمسح الجوخ وشتم الشعب الذي ياكلان من عرق جبينة.... أعوذ بالله.


ردود على الباشا
[بكري الصائغ] 10-28-2015 08:13 PM
أخوي الحبوب،
الباشا،

تحياتي الطيبة الحارة لشخصك الكريم، الف الف شكر علي الزيارة السعيدة،

والله يا حبيب ما قلت الا الصدق، بالفعل، النائبان ارادا التزلف للعصابة الحاكمة بمسح الجوخ وشتم الشعب الذي ياكلان من عرق جبينه، وكلما زادا في الصفاقة وقلة الادب زادات الامتيازات!!..زادت قطع الاراضي والتوكيلات التجارية!!...رحم الله الطيب صالح الذي قال: هؤلاء؟!! من هم؟!! ومن اين جاءوا؟!!


#1361637 [sami]
0.00/5 (0 صوت)

10-28-2015 08:19 AM
ايش يعني مستقل
فرخ الحزب الحاكم
هؤلاء الغوغاء التي اشتراها الحزب الحاكم بالبرلمان
للتصويت لهم حتي تكون لهم الاغلبية بالقانون الداخلي والعالمي
ديل نوع الدكتور القال لابوالمريض المفلوق ونزف اغلب دمو(تجيبو لي الان من قبيل كنتا وين) يعني يجيبو قبل انفلق.
انامازلتا غبيا


ردود على sami
[بكري الصائغ] 10-28-2015 08:05 PM
أخوي الحبوب،
Sami- سامي
تحية طيبة، مشكور علي القدوم الكريم،
(أ)-
لست هذه المرة التي يشتم فيها اعضاء مجلس "بدرية سليمان" الشعب السوداني، فهناك ايضآ القصة المعروفة التي اثارت استهجان كل الناس بشدة وبغضب عارم بما فيهم اعضاء حزب المؤتمر الوطني ذاته، ذلك عندما صرح رئيس المجلس الوطني السابق الدكتور الفاتح عزالدين ان المجلس بصدد سن قانون يح يتم بموجبه منع دفن الموتى من معارضي النظام داخل وطنهم السودان!!

(ب)-
من هو هذا الدكتور الفاتح عزالدين؟!!
مخصصات رئيس المجلس الوطني
(الفاتح عزالدين) تثقل كاهل الشعب..!!
**************************
يستلم رئيس المجلس الوطني (الفاتح عزالدين) نظير ما يقوم به من “خدمة مضنية للشعب ولتفانيه في إعلاء كلمة الحق والعمل علي راحة المواطن ورفاهيته”..!!؟ فقط علي الإمتيازات والبدلات الآتية:
السكن المؤثث.. بينما معظم الشعب يعاني ذل المأوى وعوز السكينة .. مع خدمات المياه.. بينما شعبه يقتله الظمأ وهو بين نيلين عظيمين.. وخدمات والكهرباء.. وأغلب الناس يعيشون في ظلام دامس .. والهاتف الذي لم يسمع به البعض في الفيافي القصية، كل هذا الترف على نفقة الشعب يُدفع من لبن الرضع وقوت الخُشع وخبز الشُفع..

ويستمر هذا (المولد) من الإمتياز لمدة عامين (حولين كاملين) بعد إخلاء المنصب.. يعني الآن أحمد إبراهيم الطاهر (برضو بيقبض “دّاره ليهو وهو يحلب” رزق ساقه الله إليه.. حولين كاملين..!!

والسبحة كارة.. تخصيص سيارة للعمل الرسمي والناس مقهورة في المدافرة للمواصلات.. وسيارة للخدمة للإستعمال الكامل .. دي خاصة بالمنزل لزوم توصيل الأولاد المدرسة والنادي..وزيارات الأهل والعشيرة.. غضافة لزيارات المدام للمجاملات والشمارات ..من عرق (محمد أحمد، وتيه، وأوهاج ، وآدم ،والعوض) ..أثناء شغل المنصب ويستمر إمتياز سيارة الخدمة لمدة ستة أشهر فقط لاغير بعد إخلاء المنصب..

(عرفتوا سر الركوع والسجود لغير الله) في صحن (البرلمان) بأمدرمان يوم التعميد..!؟

أقيف لسع وتعال وأسمع .. العلاج على نفقة الدولة.. أثناء شغل المنصب له ولعائلته في داخل السودان أو خارجه إذا تقرر ذلك بوساطة القومسيون الطبي العام.. والمواطن.. “علاجه قدر ظروفك”

هل أتاك حديث الضيافة..؟
*****************
ضيافة دائمة على نفقة الدولة أثناء الخدمة ” الما بلحق الميري يتدردق في ترابه”.. وإجازة سنوية قدرها .. شهر “عسل” .. بكامل المخصصات ونفقات السفر له ولعائلته..وكمان.. بدلات تمثلت في بدل لبس .. “والناس عريانة”.. يعادل راتب ستة أشهر..وبدل مراجع ” حتي تثقيفه علينا”!! يعادل راتب ستة أشهر..وتذاكر سفر على الخطوط الجوية السودانية لشخصه هو وثلاثة من أفراد عائلته لأقصى مكان تصل إليه الخطوط الجوية السودانية” لزوم الفسحة”.. وفى حالة عدم السفر “يستلم كاش داون” يمنح بديلاً نقدياً يساوي 50% من قيمة التذاكر…
(ما قصرتوا يقصر الملح)..!!

فيما يلي نص الإمتيازات:
****************
إمتيازات وبدلات رئيس المجلس الوطنى
ـ تكون لرئيس المجلس الوطنى الإمتيازات والبدلات الآتية :
(أ) السكن المؤثث مع خدمات المياه والكهرباء والهاتف على نفقة الدولة ويستمر هذا الإمتياز لمدة عامين بعد إخلاءالمنصب
(ب) تخصيص سيارة للعمل الرسمى وسيارة للخدمة للإستعمال الكامل على نفقة الدولة أثناء شغل المنصب ويستمر إمتياز سيارةالخدمة لمدة ستة أشهر بعد إخلاء المنصب .
(ج) العلاج على نفقة الدولة أثناء شغل المنصب له ولعائلته في داخل السودان أو خارجه إذا تقرر ذلك بوساطة القومسيون الطبى العام ،
(د) الضيافة الدائمة على نفقة الدولة أثناء الخدمة ،
(هـ) إجازة سنوية قدرها شهر واحد بكامل المخصصات ونفقات السفر له ولعائلته ،
(و ) بدل لبس يعادل راتب ستة أشهر ،
(ز ) بدل مراجع يعادل راتب ستة أشهر ،
(ح ) تذاكر سفر على الخطوط الجوية السودانية لشخصه هو وثلاثة من أفراد عائلته لأقصى مكان تصل إليه الخطوط الجوية السودانية وفى حالة عدم السفر يمنح بديل نقدى يساوى 50% من قيمة التذاكر.

الأزمة بلغت سنامها وما إستبانت..ولكم أولاً وأخيراً أعزائي (القراء) معرفة حقوقكم ..هذا غير جمع أغلب المنتفذين من تنفذيين وتشرعيين مابين الإمارة التجارة.. وإستقوائهم علي الضعيف وظلمهم الفاشي.. فمثل هذه الأحوال من المحال دوامها مهما تطاول بقائها.. وعواقبها دائماً ليست حميدة.


#1361626 [ابوكدوك]
0.00/5 (0 صوت)

10-28-2015 08:09 AM
العزومه على الشعب والشكر لبدريه !!!

يخس عليهم عديمى الاصل وناكرى الجميل ، اكلونا لحم ورمونا عضم ؟!.


ردود على ابوكدوك
[بكري الصائغ] 10-28-2015 07:45 PM
أخوي الحبوب،
ابوكدوك،

مساكم الله تعالي بالصحة التامة والعافية الكاملة، سعدت بقدومك الكريم،
وصلتني رسالة من صديق عزيز يقيم في كندا، وكتب:

(..هذا العام الحالي ملئ بالاحباطات والفشل، السودان بقي في البند العاشر لعام اخر!!..اثيوبيا وسعت من احتلالها للاراضي السودانية..فريق الهلال فشل في تحقيق نصر افريقي!!..المريخ افشل منه!!..نواب المجلس شتموا ولي نعمتهم!!)...


#1361591 [nagatabuzaid]
5.00/5 (1 صوت)

10-28-2015 07:24 AM
يا جماعة ما نزعل المخلوق ده صدق لأول مرة فى حياتهم يصدقون نحن فعلا كما قال بدليل أننا تركنا هم يسرحون ويمرحون ويفقرونا ويمتلكون السيارات من أموالنا ويفقرونا وكان كلاموا ما صاح اقتحموا البرلمان وانزعووه من كرسى النوم وهو نام واجدعوه برمية واحده حده النهر يا غرق يا وصل توتى. وما حتعملوا طيب ليه نزعل وهو ادانا حجمنا الحقيقى


ردود على nagatabuzaid
[nagatabuzaid] 10-29-2015 02:41 AM
تسلم بكرى الصايغ نحن من تركنا هم يصلوا لهذه الدرجة مثلما قالت حبيبة لنا من الفاشر .:(افجغى دبيباية قبل تبقى اصلاية)أفجغى الدبيب قبل يبقى اصلة وما فجغناها نحن خليناهم لمن بقوا اصلة

[بكري الصائغ] 10-28-2015 07:36 PM
أختي الحبوبة،
Nagatabuzaid- نجاة ابوزيد،

مساكم الله تعالي بالعافية، والف شكر علي قدومك الكريم،

كل فئات الشعب السودان لا تكن الاحترام ل"مجلس بدرية سليمان" لانه مسيس وتابع رأسآ للبشير، ومن يسمون انفسهم نواب هم في حقيقة الامر موظفين او اعضاء في المؤتمر الوطني يحركهم البشير بال"رموت كنترول" يتقاضون اجور مقابل ان يسمعوا جيدآ كلام السيدة الدكتورة بدرية!!..الا يناقشوا اي مواضيع ملحة وعاجلة!!..الا يتعرضوا بالنقد لقرارات البشير الجمهورية حتي ان كانت مخالفة للقوانين!!..ان يبتعدوا عن مسألة الفاسدين ولصوص النظام!!...هذا المجلس لا يتمتع ايضآ باي احترام بسبب تفاهة المواضيع التي تمت مناقشتها!!


#1361589 [أبو عبدو]
0.00/5 (0 صوت)

10-28-2015 07:23 AM
ياهو دا السودان جابوهم فزعة بقوا وجعة.... والله المستعان....


ردود على أبو عبدو
[بكري الصائغ] 10-28-2015 07:21 PM
أخوي الحبوب،
أبو عبدو،
السلام والتحايا الطيبة لشخصك الكريم.

في كل برلمانات العالم توجد ضوابط شديدة تقنن عمل البرلمانات يلتزم بها النائب، توجد شروط مسبقة يلتزم بها كل متحدث، واهم هذه الشروط ان يكون النائب محترم في كلامه ولا يسب او يشتم او يعلق تعليق بذئ يثير غضب الجماهير والاعلام علي المجلس. لكن بما ان المجلس في السودان تابع للحزب الحاكم وايضآ اجهزو الاعلام، فلا غرابة اذآ ان نري هذه الفوضي العارمة في مجلس "بدرية سليمان"!!..وما سياتي لاحقآ اسوأ بكثير ...


#1361545 [بكري الصائغ]
5.00/5 (1 صوت)

10-28-2015 04:23 AM
١-
دي يفهموها كيف يا نواب المجلس؟!!

٢-
في نفس اليوم (الثلاثاء ٢٧ اكتوبر الحالي ٢٠١٥) الذي شتم فيه النائب البرلماني طارق حمد الشيخ ومعه النائب المسقل الطيب إبراهيم الشعب السوداني، وان هذا الشعب هو المسؤول عن تدهور الاقتصاد والمعاناة التي يعيشها نسبة لتراخيه وعدم جديته، وان السودان ليس ببلد فقير، ولكن أفقره الشعب السوداني بسياساته!!

نجد انه في نفس اليوم ذاته اتهم نواب بالهيئة التشريعية القومية، الحكومة بإفقار الشعب السوداني وتهجير عقوله النيرة إلى الخارج، وكشفوا عن استغلال بعض الوزراء لسلطاتهم المطلقة وتجاوز القوانين ومصادرة سلطات وكلاء الوزارات وإقامة (وزارة الرجل الواحد) وأشاروا الى أن ذلك تسبب في انهيار الخدمة المدنية. وهاجم النواب بعض موظفي الدولة واتهموهم بالتعمد في إضاعة الوقت في الإفطار، والمواصلات بدلاً عن قضاء معاملات المواطنين، بالإضافة الى إضاعة فرص استثمار، ولفتوا إلى شكوى المستثمرين من الفساد وسوء الإدارة.

٣-
***- يا نواب مجلس بدرية سليمان)، نسقوا المواقف..وحدوا كلامكم.. اتفقوا علي تصريح واحد متفق عليه منعآ للاحراج...الا اذا ما يجري الان في المجلس شي متفق عليه من قبلكم مسبقآ!!


#1361537 [بكري الصائغ]
5.00/5 (1 صوت)

10-28-2015 02:47 AM
الشي بالشي يذكر:
عينة من بذاءات وشتائم أهل السلطة في الانقاذ. وعلي هداهم يسير نواب مجلس "بدرية سليمان"!!

١-
***- البشير شتم الشعب ووصفهم ب"شذاذالافاق"!!
٢-
***- البشير سب الجنوبيين ووصفهم ب"الحشرة"!!
٣-
***- البشير: "الحرية لا تعني شتم وسب الآخرين"!!

٤-
التسجيل الصوتي للبشير وهو
يسخر ويشتم مواطني الجزيره!!
*********************
قال البشير – بحسب التسجيل الصوتي:
(مزارعي الجزيرة هم تربية شيوعيين، وانه تمت تعبئتهم بصورة كبيرة من بعض قيادات الحزب الشيوعي امثال احمد سليمان المحامي والامين محمد الامين ويوسف احمد المصطفى ..مزراعي المشروع غشوهم الشيوعيين وقالوا لهم انكم حفاة وعراة بينما اموال المشروع تذهب الى غيركم ليبنوا بها العمارات..ناس الجزيرة تعودوا ياكلوا الحكومة من خلال المطالبة بجدولة واعفاء الديون..يا اخوانا ناس الجزيرة ديل اتعودوا ياكلوا الحكومة من خلال المطالبة بجدولة واعفاء الديون، وهم دايرين الحكومة تشتري منهم حواشاتهم المملوكة لهم وتقوم بتمليكها لهم مرة اخرى بالمجان )!!

٥-
واصل عمر البشير عنفه اللفظي مسيئا للحركة الشعبية والجنوبيين اساءة عنصرية وقال في خطابه بالابيض: هؤلاء ( لا تنفع معهم الا العصا ) ،( ربنا خلقهم كده ) في تلميح لبيت الشعر العنصري ( لا تشتري العبد الا والعصا معه ان العبيد الانجاس مناكيد )!!..وسبق ووصف الحركة الشعبية اول امس ب(الحشرة) وتعهد بابادتهم!!

الدكتور مصطفي اسماعيل: قبل قدوم البشير كان الشعب «شحاتا» لا يعرف السكر!!

٦-
الترابي: الشعب السوداني متخلف!!

٧-
أرجع الترابي أسباب عدم اندلاع الثورة بالسودان إلى تخلف الشعب وحمَّله مسؤولية بقاء النظام!!

٨-
- هدد عمر البشير المعارضة بصيف ساخن سيشويهم!!

٩-
اغلب الناس في السودان يطلقون علي النافع علي النافع لقب (فتوة الحزب الحاكم)!!، وواحدة من شتائمه التي جلبت المصائب علي نظامه، يوم راح ويتحدي المعارضة بتغيير النظام وان (يلحسوا كوعهم)!!، وعمت المظاهرات التي ماتوقعها اعضاء الحزب وان تعم القري والحضر، ولم يكن من حل اخر الا وان يطلب اعضاء الحزب من النافع وان يلجم لسانه!!

١٠-
قال البشير في خطاب جماهيري:(نحنا جينا بالبندقية واخدنا السلطة والعاوز يشيلها يجينا بالبندقية)!!

١١-
صلاح قوش:( المؤتمر الشعبي عواليق )!!

١٢-
التصريح الشهير للنائب الاول السابق على عثمان: (shoot to kill)!!

١٣-
حدثت الواقعة فى أعقاب المؤتمر العام والشورى لحزب المؤتمر الوطنى الحاكم عندما أساء السيد رئيس الجمهورية المشير عمر احمد حسن البشير للنوبيين وذلك أثناء إجتماعه بأعضاء المؤتمر الوطنى من الولاية الشمالية من منطقة المناصير الى حلفا وبحضور كل من الاساتذة فتحى خليل المحامى والدكتور سلاف الدين صالح وعبدالله شكوكو، فقد خبط السيد رئيس الجمهورية الطاولة وقال:" أنا بتكلم وما بدى فرصة لزول.." ثم شكر وأثنى على اسامة (الوزير المسؤول عن سد مروى) لمجهوداته فى جذب الاستثمار من السعودية والخليج للولاية الشمالية وانه رجل مخلص جدا، وان الولاية الشمالية بها 120 ألف من السكان- وان محافظة حلفا فاضية وناس النوبة شالو حس الحكومة فى الإعلام والنت...

***- وعندما علقت اسلامية تدعى تاجوج قائلة ان المشاريع الزراعية فى الشمالية قد انهارت نتيجة للغلاء والتهميش وان تطوير المشاريع بواسطة سد مروى سيشجع الملايين فى المهجر وفى مصر والخرطوم على العودة لمناطقهم، انفعل السيد رئيس الجمهورية وقال ان الملايين الموجودة فى مصر والدول العربية بوابين وطباخين وفى الخرطوم مجدوعين فى الكلاكلات وامبدات .. ثم غادر مكان الاجتماع غاضبا ولم يستطع احد ان يرد عليه، ولاحتي فتحي خليل النوبي!!

١٤-
الترابي:
البشير عنصرى، كان يطلق على الجنوبيين لفظ العبيد ويسمي علي الحاج الفريخ... البشير ديكتاتور بدائى.. ضيق الأفق، لا يرى إلا عشيرته، لم يكن إسلاميا، كان فى الأصل بعثيآ!!

١٥-
قال البشير في خطاب جماهيري بميدان الحرية بمناسبة احتفالات عيد الشهيد بمدينة كوستي ، إن المصير الذي انتهى اليه القذافي سيكون مصير كل من يقدم الدعم للعمل المسلح ضد السودان ، مؤكداً قدرة القوات المسلحة على ردع كل من تسول له نفسه العبث بأمن واستقرار المواطنين ، ووجه انتقادات حادة لمالك عقار وقال: " «نصبناه حاكماً واعطيناه الميزانية ،لكنه طلع تور وما بفهم وأعمى بصيرة»، واضاف: «الزول دا جثة كبيرة وراسو صغير ولم يعِ الدرس في جنوب كردفان، واصبح شارد من شجرة لي شجرة ».


#1361528 [بكري الصائغ]
0.00/5 (0 صوت)

10-28-2015 01:35 AM
١-
وصلتني رسالة غاضبة من صديق عزيز يقيم في موسكو، وكتب:
(...اقول للنائب الحيوان في المجلس الفاشل وشتم الشعب وقال: "منو القال ليكم العيب في اقتصاد البلاد العيب في الشعب المتراخي وغير الجاد"...

من وين انت ياعطالة مقنعة وعايش علي اكتاف الاخرين ومن ارزاق الفقراء؟!!، مش واحد من ناس السودان.. ولا جئت من كوكب تاني ؟!!.. وكمان عامل نائب مستقل؟!! امال خليت شنو لناس الحزب الحاكم الكلو يوم بشتمونا وما خلوا شتيمة قبيحة الا قالوها بلا خجل بتفرق شنو انت عنهم ؟!!..والله طلعت ازفت من نافع وربيع عبدالعاطي الف مرة؟!!

واقول´كمان للاهبل التاني وقال: "السودان ليس ببلد فقير، ولكن أفقره الشعب السوداني بسياساته"، يا أخي اختشي علي نفسك وراجع تاريخ بلدك وشوف منو افقر السودان وخلي الناس تعيش سنوات طويلة عالة علي المنظمات الخيرية واعانات الدول؟ !!...منو الخلي ناس جبال النوبة ياكلوا اوراق وجذور الاشجار؟!!..منو القسم البلد ونهب وسرق خيرات البلد؟!!.. منو القتل اكتر من ربع مليون شخص ولسه مستمرين في القتل والابادة؟!!

اتمني ان ينهد المجلس علي رؤوسكم الفارغة ولا يخرج احد منكم حيآ من تحت الانقاض الي يوم الدين..


ردود على بكري الصائغ
[بكري الصائغ] 10-28-2015 07:11 PM
أخوي الحبوب،
كاســتـرو عـبـدالحـمـيـد،

تحية الود، والاعزاء بقدومك الكريم.
طالعت صحف اليوم المحلية وما وجدت اي خبر عن اعتذار المجلس للبذاءة، وقبيح الكلام الذي صدر من النائب المستقبل والاخر عضو حزب الامة الفدرالي!!..كنت اتوقع ان اجد ايضآ في صحف اليوم اعتذار من حزب الامة الفدرالي!!...ولكن الحمدلله الشعب السوداني اصبح عنده مناعة قوية ولا يتاثر بتصريحات الرجرجة والدهماء!!

[كاســتـرو عـبـدالحـمـيـد] 10-28-2015 05:03 AM
ربنا يسمع منك آمـيـن يارب العالـمـين .



خدمات المحتوى


مساحة اعلانية





الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة