الأخبار
أخبار إقليمية
حركة حق تواصل نضالاتها بالمحطة الوسطي ببحري في مخاطبة جماهيرية لإسقاط النظام
حركة حق تواصل نضالاتها بالمحطة الوسطي ببحري في مخاطبة جماهيرية لإسقاط النظام


11-18-2015 10:56 PM
محمد محجوب محي الدين

واصلت حركة القوي الجديدة الديمقراطية حق مخاطباتها الجماهيرية في مساء اليوم 18 نوفمبر بالمحطة الوسطي ببحري .
احتشدت المخاطبة بجماهير الشعب السوداني من المواطنين والمواطنات - في وقت وجهت فيه الحركة جماهير الشعب السوداني علي طريق الانتفاضة الشعبية وضرورة إسقاط النظام حيث لاخيار آخر ترضيه .

وقد قامت حركة القوي الجديدة الديمقراطية حق بمخاطبة جماهيرية الإسبوع الماضي بجاكسون و دعت فيها لإسقاط النظام ووزعت بيان احتوي نصه علي الآتي :

حركة القوى الجديدة الديمقراطية
حركة حق
نحن حركة حق ، حركة سياسية سودانية إتأسست سنة 95 ، لأننا كنا شايفين و لحدي أسي إنو الحياة السياسية في السودان في ناس كتار جدا ما بتعبر عنهم و عن أحلامهم و أمنياتهم ، عشان كده ظهرنا ، حركة ديمقراطية علمانية لاننا بنرفض إستغلال الدين في السياسية والمتاجرة بيهو ، و عشان الدين لله و السودان حق كل السودانيين بمختلف أديانهم و معتقداتهم ، و حركتنا بتساوي بينا كلنا كسودانيين و بتنادي بي حقوقنا ، بدون أي خلفية عرقية و لا دينية ، كلنا سودانيين .
الحركة الليلة جات تتكلم معاكم ، لأنها شايفة زي ما إنتو شايفين حكومة الجبهة الإسلامية و المؤتمر الوطني بعد ما عملو إنقلابهم في سنة 89 ، خربو كل حاجة و أشعلو الحرب مرة تانية و لحدي أسي مستمرة و كل يوم بتكتل فينا و بتحرق بيوتنا ، ده الخلانا ننزح و نتشرد بسبب الإبادة و الإغتصاب لأمهاتنا و أخواتنا في مناطق الحروب لي باقي دول العالم ، عشان كده الحركة (حركة حق ) عندها شعار ضخم بتنادي بيهو و لازم تحققو (إيقاف الحرب) و العنصرية و حرب الابادة الحاصلة في دارفور و جبال النوبة و النيل الأزرق .
و غير كده كلنا شايفين الفساد و السرقات الكبيرة لي قروشنا بي إسم الدين وعملو ليها فقه تحلل و فقه السترة بتحمي المجرمين من العدالة ، مليارات بتتسرق من أكلنا من لقمة عيشنا عشان الكيزان يبنو بيها قصورهم و يقرو بيها أولادهم بره و يشغلوهم و نحنا كلنا عطالة ، أي بيت فيهو عاطل و أي بيت فيهو زول ما قدر يكمل تعليمو و فيهو زول مريض ، و دي كلها بسبب سياسيات الحكومة ، اللي كل همها النهب و السرقة و إشعال الحروب .
لدرجة مانزلو سلوكم في المجتمع السوداني زي ماحصل لشاب الفيديو اللي تم تعذيبو بالشطه ده بوري انو الحكومة ضد سيادة حكم القانون المفروض يسود فينا بعد ما نتفق و نصيغ دستوره .
لأنو نحن مع كرامة الانسان و سيادة حقوق الانسان .
الحكومة في فسادها و جرائمها ما بتفرق بين مسلم و لا مسيحي و لا لاديني ، بتكتلنا كلنا بنفس البشاعة و بتسرق لقمتنا كلنا ، عشان كده واجب علينا كلنا كسودانيين نسقطها و نبني بلد جديد يحترمنا و يعبر عننا و يوفر لينا الصحة و التعليم و الأمان و الرفاهية و لي اولادنا
وده مابحققو إلا مشروع النهضة الوطنية الشاملة البتنادي بيهو في حركتنا القدمت نضالات عديدة في الجامعات و في أوساط القوى المعارضة و في المدن و في المنافي و إتعرض اعضاءها للسجن و الإعتقال و التشريد و المنافي .
عشان كده الحركة ما مشاركة فب الحوار الزايف الحاصل ده الاسمو حوار الوثبة و الحركة بتدعو الشعب السوداني لخيار الانتفاضة و إسقاط النظام .

حركة حق
نوفمبر 2015 .




تعليقات 7 | إهداء 0 | زيارات 3025

التعليقات
#1372266 [همام]
0.00/5 (0 صوت)

11-19-2015 02:05 PM
أنا مع حركة حق بشرط أن تعد بمحاكمة البشير وشركاه محاكمة عادلة بعدالة ناجزة


#1372229 [سوداني حر]
0.00/5 (0 صوت)

11-19-2015 01:08 PM
مزيداً من النضال
مزيداً من العمل الجماهيري
التحية لحركة حق وشايف الشـــيوعيبن زعلانين من حركة حق وحركة حق ولدت نتيجة لخلاف حول كثير من الأشياء داخل الحزب الشيوعي وإن واصل الحزب الشيوعي رفضه للرأي داخل الحزب سوف يشهد إنقسام جديد وتجميد الحزب للشفيع خضر وبعض القيادات ليس ببعيد .

لست بحركة حق لكن أدعم كل عمل وسط الجماهير


#1372044 [عوض قنداوي]
0.00/5 (0 صوت)

11-19-2015 09:10 AM
انشاء الحركة كانت زعلة من المرحوم الخاتم عدلان وليس لها دور كبير في التغير وهي تردد نفس الكلام من غير منهج


#1371971 [Kakan]
0.00/5 (0 صوت)

11-19-2015 07:17 AM
الخطاب ضعيف من حركة شق بها الاخوان الحزب الشيوعي السوداني


#1371969 [fatmon]
5.00/5 (1 صوت)

11-19-2015 06:57 AM
حركة حق دي مش هي ذاتها نفس الحركة التي ترأسها هالة محمد عبدالحليم والتي في يوم من الايام قامت بدور في إصلاح ذات البين بين كبير الأبالسة الترابي والصادق وعلى حد قولها لما لها من صلات طيبه مع الطرفين وماذا كان الهدف حينها؟؟؟ تحت أي بند يا ترى ؟؟؟؟؟؟؟؟؟؟ ولمصلحة من يا ترى ؟؟؟؟؟؟؟ وبعدين الشعب يسقطها كيف بدون تنظيم يعني تطالعنا الصحف أرواح شهداء سبتمبر راحت شمار في مرقة بالطريقة نفسها تحب حركة حق القضاء على الشعب كله فطايس ولا مفروض تكون هناك آليات تنظيميه غاية في السرية والحذر حتى تكون العدد المطلوب لعمل الإنتفاضة السعن الملان ما بجلبق وخصوصا والسلاح الايراني الشيطاني يملا المخازن والحاويات تملأ العقول والمحصلة مزيد من الضحايا يا جماعة الخير نظموا الصفوف بما يتناسب والمرحلة الجعجعة مافيهاأي مصلحة وما بتخدم غرض التوعية والتنظيم والترتيب ووضع الخطط بالعمل السري السريييييييييي


#1371938 [احمد ابراهيم]
1.00/5 (1 صوت)

11-19-2015 03:54 AM
فقه الستره والتحلل يا كيزان عليك الله بعد ما اكلتو حقنا دارين تحللو كمان اكلتو حق المسكين والغلابه والشباب واليتامه والكدحين التعابه انه الاسلام السياسي لا خير فيه الا بي تغير هذا النظام الفاسده المجرم


#1371897 [الراجل]
5.00/5 (2 صوت)

11-18-2015 11:39 PM
مذيد من العمل وسط المواطنين ومخاطبتهم بمثل هذه اللغة البسيطة والعميقة حتى يعلموا اين حقوقهم المسلوبة وتشجيعهم وكسر حاجز الخوف عندهم وحثهم لانتزاع الحقوق والحرية من نظام الفساد والظلم وكلنا معكم وتحيى حركة حق وكل الحركات والتنظيمات والاحزاب والشخصيات الوطنية الحرة هيا لنعمل معا من اجل تحرير السودان من مافيا الاسلام السياسى



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية
تقييم
0.00/10 (0 صوت)




الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة