الأخبار
أخبار إقليمية
انتو مودننا وين ؟!
انتو مودننا وين ؟!
انتو مودننا وين ؟!


01-09-2016 01:05 PM
زهير السراج

* أخيرا عرفنا سبب أزمة الغاز بعد عدة تبريرات وتفسيرات مضللة حاولت جاهدة إلقاء اللوم على الوكلاء والجشع وسوء التوزيع والتهريب وإيه كده موش عارف .. إلى آخر هذه الاسطوانة المشروخة، فلقد اعترف وزير النفط بعظمة لسانه أمام المجلس الوطنى بأن افلاس الحكومة بالإضافة الى الحصار المصرفى المفروض على السودان هما السبب، وقال بالنص :" الغاز موجود فى الاسواق ويمكن الحصول عليه خلال اسبوعين لولا الحصار وشح موارد البلاد من العملات الصعبة" !!

* شح موارد البلاد من العملة الصعبة يا أخوانا، معناهو إنو الحكومة ما عندها عملة صعبة (دولار ويورو وكده)، يعنى الحكومة مفلسة (ببح)، عملة صعبة مافى، وعليكم الله يا القاعدين كل يوم تنقنقوا "غاز مافى غاز مافى"، سيبكم من النقنقنة والكلام الفارغ، الحكومة ما عندها قرووووش، تعمل ليكم شنو يعنى؟ القمح والدوا والكهربة فى تلتلة، غاز شنو الدايرنو، الغاز يطير ويقع فى البير (على طريقة زميلنا صلاح عبدالله)، ونصيحة أخوية لكم أصالة عن نفسى ونيابة عن ابوصلاح وكل زملائى فى هذه الجريدة الجميلة: "استفحموا فإن النعمة لا تدوم" .. استفحموا من (الفحم)، ولعلمكم شوال الفحم تسليم زريبة الفحم بأم درمان (400 ج) بالتمام والكمال، والما عاجبو يموت فطيسة فى صف الغاز، وأعملوا حسابكم ما تتغشوا، فى فحم (سنط) مالى الاسواق اليومين ديل، وده ما بيولع، وكان ولع بطفى طوالى، يعنى يولع بى جاى ويروح طافى بى جاى، وتقعد انت والحكومة والاولاد تنفخوا فى الفاضى لحدى ما لوزكم تورم وعيشتكم تتطين بى طين مع الفيروسات الحايمة فى البلد اليومين ديل وكاتمة الأنفاس ( يعنى خلاص قاعدين نتنفس ) وقروش لى دوا مافى، وحتى لو فى، ما مضمون الدوا يكون مضروب ولا ما مضروب !!

* طيّب يا وزير النفط: غاز مافى، والفحم نار حمرة، وعلى العليهو مغشوش، نعمل شنوووووووووو؟! (على طريقة صديقنا جبرا) .. وبمناسبة جبرا وتوقفه عن الكتابة هذه الأيام بسبب إيقاف (التيار) جبر الله كسرها، أود أن أسأل نيابة عن جبرا وقرائه الكرام " خط هيثرو عملتو فيهو شنوووو، والتحقيقات وصلت لى وييييييييييين وشنو كده ما عاررررررررف؟". هيثرو شنو يا جبرة يا أخوى، ده راح زمان وأكلو التمساح، والتمساح ذاتو أكلو تمساح تانى، والإتنين أكلتهم سحلية والعملية فى النملية .. سيبك من الحكاية دى وشوف ليك كسرة تانية، والكسرات مالية البلد، وعلى طريقة أولاد بمبة (على أفا مين يشيل) !!

* نرجع لغازنا وفحمنا تانى: قلنا الغاز مافى، اقصد رااااقد و متوفر (على أفا مين يشيل)، بس للأسف، وحسب إعتراف وزير النفط محمد زايد "الحكومة مفلسة ومحاصرة مصرفيا"، يعنى تجيب ليكم من وين، عايزين الحكومة المسكينة الغلبانة المفلسة دى تصرف عليكم دولارات ويوروهات وعملة صعبة جدا جدا، وانتو قاعدين تتفرجوا ولا شغل ولا مشغلة ولا انتاج، ودايرين الغاز يجيكم فى محلكم؟! بالله عليك الله شوف، شعب عاطل وكمان عايز يولع بالغاز، والله فحم السنط ده كتير عليكم، فحم شنو، إنتو شبه الفحم الغالى ده، شوفوا ليكم حطب ولا عيدان عوير ولا عروق مسكيت مشوا بيها حالكم .. منها تولعوا ومنها تنجضوا (تنجضوا شنو؟) ومنها تربوا الغنم والجداد الجايبوم ليكم معالى رئيس المجلس التشريعى لولاية الخرطوم صديق الشيخ، جزاه الله كل خير وجعل غنمه وجداده فى ميزان حسناته يوم القيامة باذن الله، وأهو الحمدلله الحكاية إتحلت بأبسط ما يكون، الناس مولعة، والجداد يكاكى، والغنم تمعمع، والزرايب عمراااانة، يعنى كم عصفور بى حجر واحد بس، والماضى عاااااد، وتانى ما تقول انتهينا نحنا يا دوب إبتدينا !!

* بارك الله لكم فى غنمكم وفى جدادكم وفى حطبكم وفى مسكيتكم وفى عويركم وفى وزرايبكم وفى شعبكم الطيب، بس سؤال أخير لو سمحتوا: " إنتو مودننا وين؟"

الجريدة
[email protected]




تعليقات 27 | إهداء 0 | زيارات 6260

التعليقات
#1398610 [مكتول هواك يا بلد]
0.00/5 (0 صوت)

01-11-2016 03:53 PM
يااستاذ فحم شنو الجايب سيرتو... الفحم زمـــــــــــــــان غاباته راحت شمار في مرقة وانتهى هذه حكومة الكوارث..المصائب الما مر بيها السودان في زمن الترابي والبشير شنو..من فصل الجنوب وتدمير مشروع الجزيرة والسكة حديد وتشليع المؤسسة العسكرية والمؤسسات الصناعية من نسيج وزيوت ومحالج وفسادالخدمة المدنية والاخلاقية وخراب الذمم والنفوس الي أحداث اطفال المايقوما.... غير شردوا الناس والمات مات بالمرض والجوع والارهاب والمطاردات والقمع والكبت والتشريد والطرد والقهر والاستبداد.... حوار شنو؟ الآن الحكومة قاعدة أم فكو والشعب ساترها... جلابية شنو يا عثمان يرفعوها هو فضل فيها قميص وقديما قالوا قميص عثمان .... آههههه يا شعبا لهبت ثوريتك


#1398267 [lwxtD sudv]
5.00/5 (1 صوت)

01-10-2016 11:24 PM
يا دكتور ..
مُش السيد الرقيص قال مودّينا الجنة .. وتيب
خيشهم الترابي زاااتو بشّر الشعب السوداني السعيد بالآخره و هو بذات نفسه عقد للشباب على بنات الحور
هسي في احسن من كدا ؟؟
في حكومة في الدنيا (ودّت) شعبها للجنة قبل كدا ، ما تبقوا جاحدين يا جماعة ؟؟


#1398207 [khalid osman]
5.00/5 (1 صوت)

01-10-2016 07:10 PM
مش اخونا داك قال دا قدر ونحن راضين بيهو؟؟؟ يالا اقعودوا ولولوا لمن تموتوا... عاوزين تغير وثورة بدون تضحيات؟؟؟ انتظرونا طيب وانشاء الله تراجى جات تحل لينا مشكلتنا...


#1398134 [Atef]
0.00/5 (0 صوت)

01-10-2016 03:46 PM
نعمل ليكم شنو...? مرة شعب شحات ومرة كسلان و مصطل وسكران ومرة زوامل ووو...
اي فخر في ان تتشبثوا بحكم شعب كهذا...??...عجبي


#1398099 [adam]
0.00/5 (0 صوت)

01-10-2016 02:41 PM
عليكم الله كفانا احباط
كدي شفو لينا حاجة تفرحنا ولو لظات
احباط احببببببباط احبباااااااااااااااااااااط


#1398061 [مغترب في المسعودية]
5.00/5 (1 صوت)

01-10-2016 01:08 PM
وادننا التوج طال عمرك


#1398003 [سيف الدين خواجه]
3.50/5 (2 صوت)

01-10-2016 10:45 AM
التسوي النقابات فيتا وفي الديمقراطية تلقي في جلدا !!!اما الجداد والغنم هو الناس لاقيه تاكل لمان تاكل الغنم في بورسودان اوائل الانقاذ ذهبت والدتي حتي البلدية لتشتري جوال رده وجوال ما عارف ايه للبهائم وقالت للضابط الاداري (انا من الله ما خلقني لي بهايمي وجدادي وحمامي ما مرق برا بي شيبي دا من سوق الله اكبر نشتري جيتونا مسكتو كل شئ ومسكتو نفسنا تاني ان كان جيتكم اطردوني وباعت كل شئ وارتاحت ) انها محن الانقاذ ثتلت الانتاج ومصادر الانتاج ورمت الشعب بالكسل طيب من الذي اغلق المصانع وقتل الزراعة وادخل المزارعين السجون لاول مره في تاريخ السوداني الان يتكلموا عن الانتاج والانتاجية يا دوب قامت ليهم سنون اللبن ولسع الفطامة


#1397975 [كبسيـــــــــــــــــــــــبة]
3.50/5 (2 صوت)

01-10-2016 09:34 AM
مودننا وووين!!؟؟؟
هم لسه ما ودنا يعني
انحن وصلنا التوج يا أصلي
تاني وين اكتر من كدا


#1397956 [kpk]
5.00/5 (1 صوت)

01-10-2016 08:24 AM
جيبوا الغنم والبقر.. ومنهم ولعو بالبعر (بايو غاز)


#1397924 [عبدالواحد المستغرب اشد الإستغراب!!]
4.00/5 (3 صوت)

01-10-2016 07:45 AM
حليلك يا جنى السراريج !! انت لسه راكب ؟..يا حراااام !! ود حلال ينزل الدكتور أحسن الجماعه كان اكتشفوا انو لسه راكب (يبصرو بيهو).


#1397843 [المات رجاوء]
3.00/5 (2 صوت)

01-10-2016 02:41 AM
الما عارف ما يركب


#1397817 [Zorba]
4.00/5 (4 صوت)

01-09-2016 11:30 PM
انت ركبت وتجي تقول ما عارف مودنك وين؟

ياخي كان قبل ما تركب تسأل مودنك وين؟ دا اسمه شتات خالي محطات.

انت راكب سفينة الانقاذ التي لا تُبالي بالصِعاب ... دي المناظر انت الصعب لسه ما شفته ... ما من البداية فلنا ليك السفينة دي لا تبالي بالصِعاب ... تجي في نص الطريق وتقول "انتو مودننا وين ؟"

و العقش والراكب داخل السفينة علي مسئولية صاحبه "يعني ركبت تشيل شيلنك".


#1397810 [samer]
3.00/5 (2 صوت)

01-09-2016 11:08 PM
الكيزان الشئ المؤسف بفظائع اعمالهم ادخلوا السودانيين نار جهنم واحده فى الدنيا و الثانيه فى الاخره من اشرار اعمالهم و لذلك خسروا الدنيا و الاخره و الاغلبيه صارت تنهب فى البلد حتى وقعت و والله عيب انو فلوس للغاز غير موجوده و لاحظ هذا الغاز يباع بارباح مهوله اى ما بيعطى مجانا حتى نقول لا توجد فلوس لاستيراده , اللهم انتقم للشعب السودانى فى الترابى و على عثمان و نافع و البشير و الحلبى حمدى صاحب المثلث و عراب الاقتصاد الذى اوقعنا فى هذه الحاله السيئه


#1397749 [Ahmed suliaman]
5.00/5 (2 صوت)

01-09-2016 08:11 PM
يادكتور ديل ودونا وانتهو ..تاني فضل فيها حاجه اعوذ بالله منهم شكيناهم لله يوم الحساب.


#1397713 [معانا يا رب]
3.00/5 (2 صوت)

01-09-2016 06:31 PM
والله بالجد جننتونا!!!! انتو الغاز عاوزينو لشنو ؟ إحنا لا عندنا حلة ملاح ولا حلة لبن ولا حلة عصيدة ولا حلة بليلة زماااان غسلناهم ودخلناهم المخزن بس عندنا في المطبخ جك صغير قدر الكوز بنجيب فيه الفول المحصحص من دكان البرقو مرتين واحيانا مرة واحدة في اليوم وعلي الله حامدين وشاكرين على النفس الطالع ونازل وأكيد تسعين في المئة من الشعب مثلنا وعليه أحنا موافقين عي إقتراح مولانا بتاع تشريعي الخرطوم!! بشرط احنا بندبر حالنا كده كده بندين ونجيب الغنم والجداد ولكن هو عليه يأكلهم لينا وبالمرة يوفر الغاز عشان نسلق البيض ونفور اللبن ولا ايه رأيك شكرا حبيبنا الوالي.


#1397709 [abushihab]
3.97/5 (6 صوت)

01-09-2016 06:19 PM
احسن ليكم بدل ما تولعو بالعوير, ولعو في العوير, والما وقع ليهو الكلام يستعين بصديق.


#1397703 [ابو جاكومه]
4.00/5 (4 صوت)

01-09-2016 05:53 PM
مودنكم الجنه . وبعصروا فيكم عصر علشان تنظفوا من السيئات . يقول المثل البباري الجداد بيوديه الكوش . والبباري الكيزان بيودوه جنة إبليس (نار جهنم).


#1397701 [MA Eltoum]
3.00/5 (2 صوت)

01-09-2016 05:51 PM
Salam
iI realised lately that at least 10 houses belonging to the Sudan Embassy, in London, owned by the Sudan government were sold! These houses included Bait Elsudan, a place for the needy!
This is a greater loss than Heathrow line! I understand Ambassador Elazraq was the secretory of the committee who sold them.
II write, beacuse the remaining few houses are in danger of being sold and engulfed!
Kindly ring the bells if some body is listening.
Kind regards
Mohamed Ahmed


#1397696 [الفاروق]
5.00/5 (2 صوت)

01-09-2016 05:28 PM
التمحيص كفارة الذنوب . يحملوا ذنوبك نيابة عنك الحكم العدل حي قيوم احصي كل شي في امام مبين والايات كثيرة موكدة بحديث قدسي : انما هي اعمالكم احصيها لكم ثم اوفيكم اياها . قال تعالي ( من شاء منكم فليومن ومن شاء فليكفر ) وهولاء كفروا وانت لو دائر تكفر فالشيطان مبين ودربوا ظاهر .


#1397681 [adilnugud]
4.00/5 (3 صوت)

01-09-2016 04:47 PM
الى العصر الحجري...............وفي الاخلاق الى قبل نبؤة محمد


#1397678 [إيتام نيفاشا]
3.00/5 (3 صوت)

01-09-2016 04:33 PM
والله يا دكتور زهير لو كتبت انو العملات الصعبة على رغم من قلتها يتم صرفها على السلاح والذخائر كنت هسه تكون فى مقابر القماير ده لو القماير خلو ليها مقابر ولو كتبت الدولارات فى دولاب قطبى المهدى كان لحقوك انصار المهدى فى كررى وكان كتبت الدولارات تروح نثرية للوزراء والرقاص فى السفريات المهببة كان ودوك الجزيرة ابا ولوكتبت العملات الصعبة بخموها القناصل وضباط امن السفارات كان لحقوك كديس البارات وكديس البارات ده يا جماعة قصتو انو اكل حلة كاملة عضة جماعة كانوا قاعدين فى بار على كيفك بامدرمان وجاء السيد الكديس ولبع الحلة وتانى يوم نفس الجماعة جابو ليهم عضام وكبو فيها سم وجاء السيد الكديس وقام بالواجب وبقت النهاية المحزنة واتمنى ان يدس اهل المعارضة السم للحكومة فى قاعة الصداقة وبالعدم انشاء الله فى سوق الناقة او امواج او جاد لان الحوار ما جايب حقو وقوموا لانتفاضتكم يرحمكم الله


#1397673 [متامل]
5.00/5 (1 صوت)

01-09-2016 04:20 PM
اوريك مودننا ويييين
الى زمن الغزوات والخيام والجمال وغزوه احد
لكن هم شاعريين بفراااغ كبير عايزيين يملوه بملذات القرن الواحد وعشرين
وتالله لن يمتلا ابدااا بسبب شرورهم الدفينه


#1397670 [ميراو]
3.00/5 (2 صوت)

01-09-2016 04:15 PM
يا دكتور وقت تباري الجداد بوديك ووين؟


#1397631 [خالد عمار]
3.00/5 (3 صوت)

01-09-2016 02:03 PM
مودنك لحروب عبثية يحشدون لها الجيوش الآن في جبال النوبة والنيل الأزرق، وكما يحدث كل عام سوف تهزم ويعود الجنرالات تجار الحرب للخرطوم للتخطيط لحرب العام القادم، وهاهم الآن بداو أنتم عاوزين غاز وهم يغتصبون النساء في العباسية تقلي، يا للعار الذي يلحقه هؤلاء،بكم نتيجة لصمتكم، امامكم طريق وأحد الانضمام للثورة من مواقعكم أين كانت والا سوف تساقون الي حيث مودنكم


#1397625 [زرديه]
4.00/5 (3 صوت)

01-09-2016 01:50 PM
هههههههههه
ممتاز يا ود السراريج
مودننا حوش بانقا وصراصر عشان نتاءدب


#1397617 [الجــــــــــــــزيرة ابـــا]
2.88/5 (4 صوت)

01-09-2016 01:29 PM
وفى عويركم وفى ابو ريالتكم وفى ابو حميرتى وحمارتكم وابو الحسو كوعكم وفى جوعيركم وفى مامون قعونجكم وفى ابو يوناميدكم وفى وداد دهبكم وفى شحادكم ولمين محايتكم وخزعبلاتكم وتضليلكم وكضابينكم وفييييييييييي إفييييييييييييييييي شييييييييييط احى يا الرقدنا سلطة
تنظيم المجرمين فتر من امدادكم باﻻموال فى قطر وتركيا وبقية الكواويز المقاطيع ﻻنه يعلم سلفا انه قروشه مشت بنوك خارجية وشركات قبلما
تصل ﻻهدافها .. وايران زواج المتعة انتهى وفتحت متعة غربية وحتشيل حقها من المصانع المضروبة البتضربوا بيها اطفالنا بالطائرات والباقى
تجى اسرائيل تضربوا وانتو تضربوا فى اللحم الحى احى تانى .. والخليج عاصفة صحرائها مضروبة واخرها مفارش وسجادات وكأننا ﻻول مرة
نصلّى فى عهدكم الشحاد .. والسعودية ما حتدفع ليكم اﻻ اليمن تتحرر او اخر مرتزق وديتوه يكون مات هناك وتدفع الديات باثر رجعى وليس لدعم
ميزان اقتصادى وﻻ تنموى وتموا الباقى موية .
والخوار الوثنى انضرب بعدم مشاركة اﻻحزاب المؤثرة والحركات ﻻنه كان جزء من لعبة تمديد الزمن وغش وتلاعب بعقول شعب مفتّح ويحتاج
لمن يقود الرسن ... الحاجة الوحيدة اما تقولوا الروووووب ... او تقولوا الرووووب ﻻ توجد منطقة وسطى بين الروب والزبادى .

بيت العنكبوت اﻻن يلملم اطراف اخر خيوط اللعبة عشان ننفخكم يا اوﻻد ام زقدة .


#1397615 [julgam]
4.00/5 (4 صوت)

01-09-2016 01:22 PM
مودننا المحل المدعين إنخاسنا منه...لأنهم أخيرا وجدوا أن المشكله فى الشعب وأخوان نسيبه ما يستاهلوا يحكموا شعب زى ده...ممكن يحكموا روهينقا .يمانيه ..أحباش. .سوريين. .ولكن ليس أوباش الشعب الفضل. .


ردود على julgam
[تبّى دوكّا] 01-10-2016 08:14 AM
موديننا ويييين موديننا وييين..الله اعلم.. التقارير الغربية والاسرائيلية بتقول انو الناس ديل رغم تشويشنا لطريقهم مازالوا يسلكون الطريق الذي لا نريده ان يسلكوه.. ويملكون القدرة الكافية التي تجعلهم يستمرون وتخطي العقاب والعراقيل الموضوعة لهم..ونحن نقول لالالالالا الناس ديل موديننا درب الودار وديييييك الهاوية لا قدام.. والله يفعل مايريد.. وهو المستعان على امره.



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية
تقييم
10.00/10 (3 صوت)




الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة