الأخبار
أخبار إقليمية
المنبر التصحيحي في المؤتمر الوطني والتيار التصحيحي في القوات المسلحة ينقضا بيعتهما للرئيس ويبايعان العميد (ود إبراهيم)
المنبر التصحيحي في المؤتمر الوطني والتيار التصحيحي في القوات المسلحة ينقضا بيعتهما للرئيس ويبايعان العميد (ود إبراهيم)


بيان للناس : الخرطوم أفسد المدن العربية والإسلامية،فإذا كان رئيسها راقص فشيمة أهلها الرقص.
05-25-2013 05:42 PM
بسم الله الرحمن الرحيم

بيان للناس
الخرطوم 25 مايو 2013م
المؤتمر الوطني- المنبر التصحيحي والتيار التصحيحي في القوات المسلحة

قال تعالي في محكم تزيله: (إنَّ الَّذِينَ يُبَايِعُونَكَ إِنَّمَا يُبَايِعُونَ اللهَ يَدُ اللهِ فَوْقَ أَيْدِيهِم) سورة الفتح الآيه 10.
التقى نفر كرام من خيرة أبناء قوات شعبكم المسلحة والمصلحون في المؤتمر الوطني للتشاور حول أمر البيعة التي عقدناها للسيد رئيس الجمهورية بصفته القائد الأعلى لقواتنا المسلحة ورئيس حزبنا حيث بايعنا الرئيس عمر البشير على السمع والطاعة وإنفاذ مهامه على الوجه الأكمل بصفته الراعى ونحن رعيته مقابل تحكيمه لشرع الله والحكم بين الناس بالعدل والقسط.

ولكن بعد أكثر من ثلاثة وعشرين عاما شهدت فيها بلادنا تقسيم ترابها الذي بذلنا لأجل وحدته الغالي والنفيس وأستشهد في أرض الجنوب خيرة أبناء الشعب السوداني أمثال الشهيد علي عبدالفتاح والدكتور محمود شريف والشهيد الزبير محمد صالح والشهيد إبراهيم شمس الدين وغيرهم كثر لم يتوانوا عن تقديم أرواحهم فداءً لتراب وعزة هذا الوطن.

وبعد كل تلك التضحيات حنث الرئيس بوعده في الحفاظ على تراب الوطن موحدا كما تركه لنا الأجداد ولم يقم بتطبيق شرع الله والخرطوم اليوم تعد من أفسد المدن العربية والإسلامية، وإذا كان رئيسها راقص فشيمة أهلها الرقص. والحرب اليوم تهدد السودان في أركانه الأربعة في ظل فساد شامل طال الرئيس وإخوانه الذين عاثوا فسادا في الأرض ليس لسبب سوى أنهم إخوة الرئيس والعنصرية تجلت في كافة مرافق الحياة العامة والخاصة نسبة لأن الرئيس وبؤر الفساد التي ظلت إلى جواره في الحكم مارست عنصرية مقننة ضد مجموعات بعينها وعلى سبيل المثال الفريق أمن عوض الجاز حول من قبل وزارة بأكلمها لصالح قبيلته! وغيره كثر.

نحن لم نبايع الرئيس عمر البشير على الظلم والفساد والعنصرية ، عليه ننقض بيعتنا له ونبايع المجاهد الصابر العميد محمد إبراهيم عبد الجليل (ود إبراهيم) على السمع والطاعة ووضع يدنا في يده لتغيير هذه الوجوه الكالحة التي تسمرت على كراسي السلطة وعاثت في الأرض فساداً وإفساداً.

ونحن إذ نبايع المجاهد محمد إبراهيم لأننا رأينا فيه الصدق وعفة اليد واللسان وغيرته على دينه ووطنه، ونعاهده أن نخوض معه معركة تغيير هذه الحكومة التي حكمت بإسمنا كمجاهدين وكقوات شعب مسلحة دون أن تفي بوعدها في تطبيع شرع الله.

والله أكبر ولا نامت أعين الجبناء


تعليقات 110 | إهداء 0 | زيارات 22001

صفحة 1 من 212>
التعليقات
#677801 [ابوملاية]
0.00/5 (0 صوت)

05-27-2013 06:22 AM
لاخير في هذا ولا ذاك وشهاب الدين اضرط من اخيه


#677726 [adil a omer]
0.00/5 (0 صوت)

05-27-2013 01:37 AM
نحنا نجيب الحمار ونلبسوا قناع ككو

يعنى نقضنا البيعه للفشل وبايعنا الخيبه


#677655 [sulieman abdella]
5.00/5 (2 صوت)

05-26-2013 11:01 PM
ابو القنفت ما فيهو املس (مثل سوداني)
يعني بالواضح كده ديل وجهان لعملة واحدة


#677645 [zozo]
5.00/5 (1 صوت)

05-26-2013 10:39 PM
الكيزان كلهم سفله حراميه أولاد حححاااررراااممم


#677631 [nagatabuzaid]
4.00/5 (2 صوت)

05-26-2013 09:57 PM
يا ود اباهيم فى التعليقات ما يعكس لك راى الناس ولكن اضيف لا اعرفك ولم اسمع عنك الا عند

اعتقالك لا ادرى كيف شعرت بنوع من الاحترام لك ومن معك ماعدا قوش ومجموعته لانهم معروفين

ما حدث بعد ذلك جعلنى احس بانك لست كما توقعت الان ان كان فعلا هذا البيان صدر منكم وان كان

لدى احساس ان 50 % ايوه و50 % لا لكن ان حقا صادر منكم فقد زدتم الطين بلل واثبت انه ليست

لديك قراءة صحيحة وذكية للشخصية السودانية مجرد ذكر ( المؤتمر الوطنى المنبر التصحيحى ) نقول

لا يا بيه ما كانش يتعز ومؤتمر وطنى شنو البتصحح ونحن كرهناه ومن يواليه واصبحنا نلف بضهر

البيت علشان ما نمر بجنب النادى الكاثوليكى المغتصب مجرد اسم المؤتمر الوطنى كخخخخخخخخخخخ

وخربتها اكثر بجعلك الهالك المجرم ابراهيم شمس الدين من الشهداء قاتل زملائك ودافنهم احياء

ميتم الصغار ثاكل الامهات مرمل النساء قاتل مجدى ومن معه بلا خجل تسميه شهيدا انه فطيسا

ولكى لا يلوث البيئة ورحمة للسودان من رائحته كفطيس حرقه الله اللهم لا شماتة ياربى ولكنها

حكمتك يا منتقم ياجبار يا ود ابراهيم ان كان هذا قولك ونهجك السودان وشعبه ليسوا فى حوجة

لك وفى السودان رجال سيظهرون وقتما يشاء الله


#677487 [Nadus]
0.00/5 (0 صوت)

05-26-2013 08:57 PM
Go to hell


#677550 [ابوحمرون]
1.00/5 (1 صوت)

05-26-2013 07:49 PM
ربما يكن تيار الاصلاح هذا هو الاقرب لتحقيق التغيير في السودان فالمعارضة فاشلة والجبهة الثورية ليس معها تعاطف ولكن الاهم هو تحقيق ديمقراطية لايحكم الرئيس فيها اكثر من دورتين ومحروسة بالسلاح ضد الاساليب الفاسدة في العملية السياسية


#677461 [ابو الشيماء]
1.00/5 (1 صوت)

05-26-2013 05:17 PM
امشي لود ابراهيم واطلب منه ان يرسل بيان يكذب فيه هذا البيان بان لاعلاقة له به
حتى يتم نشره اذا كنت مشكك.


#677425 [عبود حمزة]
0.00/5 (0 صوت)

05-26-2013 04:39 PM
راكب سرجين وقيع...لا خير فيكم جميعا فالتغيير الذي ينادي به السودانيون نعم السودانيون يشمل حتي ود ابراهيم فام الكلب بعشوم.......
نتمني و لو انتم رجال اظهروا اسمائكم عندما تكتبون مثل هذا الكلام الانشائي..
من الذي يعزف للرئيس حينما يرقص ؟ الستم انتم الضاربين علي الدف؟
الكاتب من انصار ود ابراهيم و من الذين يتطلعون الي حكم العباد و خمهم...


#677424 [بدرالدين]
5.00/5 (1 صوت)

05-26-2013 04:38 PM
عفوا السيد ود ابراهيم لن نبايعك بدلا عن البشير فالمهم حاليا هو اسقاط النظام و نزيح الظلم و الفساد ونترك جماهير الشعب السوداني تختار من يحكمها فمهما كنت جيدا ومحترما لا نبايعك حتى يختارك الشعب السوداني.

(كلام جد) كلماتك الهبت مشاعري و جعلتني احزن لأننا نقف مكتفي الايدي ولدينا عزيمتك التي لا تلين.


ردود على بدرالدين
United States [nagatabuzaid] 05-26-2013 09:15 PM
والضان شنو انه ما يطلع ماسورة قبل كده صدقنا عمر البشير فك صامولتنا اتلموا كده نحن

ريالتنا مسحناها والقنابير وهطنا الشعب فى الواطا وحلقناها


#677408 [واو..القطع الأخضر]
5.00/5 (1 صوت)

05-26-2013 04:17 PM
=***هذه كلها محاولات جديدة قديمة لاعادة استنساخ الاسلام السياسى تحت لافتة جديدة...الحال الآن أن تجربة الاسلام السياسى فى السودان قد فشلت...وقرائن الحال اليوم تشير لعلامات واضحة فى كل الاتجاهات...ولما تأكد القوم من انفضاض الجميع من حولهم...وأن التستر بلافتة الدين ماعاد يخفى عوراتهم...ومفارقة واقع التطبيق لمعالم الطريق...وبعد ان تأكدوا تماما بعد غزوة اب كرشولا أن محاولة التلويح براية سوداء ماعادت تلفت انتباه احد...وخلت مواقع الاستنفار من الأنفار..وماعاد الناس يأبهون لمصيرهم ويدعون عليهم...وبعد أن دعوا بدعاء التضرع فى ساحتهم الخضراء...وتجيبهم السماء...مطعمكم حرام...مشربكم حرام..وغذيتم بالحرام..فكيف أستجيب لكم...هاهو رب العزة من فوق سبع سموات يذيقهم العذاب فى دارفور وكردفان والنيل الأزرق...فلينتظروا مصيرهم..أما محاولاتهم اليائسة باستنساخ الاسلام السياسى فى غازى صلاح الدين أو محمد ابراهيم عبد الجليل..أو السائحون..أو الاصلاح والنهضة..أو جبهة الدستور الاسلامى..أو المنبر التصحيحى بالمؤتمر الوطنى أو المنبر التصحيحى بالقوات المسلحة...فهى كلها من مردم واحد..old wine in a new bottle.يبقى الأمل أن ينضم حزب الأمة القومى بمرشحيه عبدالرحمن الغالى وعبدالرحمن دوسة ومريم كايداهم الى الحكومة...حتى يدمغوا جميعا ويزفوا الى مذبلة التاريخ...والعهد القادم بلا اسلام سياسى ولاطائفى ...عنوانه الهوية هى الوطن..والوطن هو الهوية..بلا عرقية ولاقبلية ولا اثنية ولامذهبية..ولاتفريق بين الناس بمعتقد أو لون أو عنصر أو جنس...حذار من مغامرات العسكر...وتذكروا ماحدث فى ابريل 85...


ردود على واو..القطع الأخضر
European Union [عرقلة] 05-27-2013 12:42 AM
سيطول انتظارك إذا كنت تأمل في مشاركة حزب الأمةالقومي الوحيد الذي لم يتلوث بحكم الانقاذبمن فيهم الجبهة الثورية


#677388 [Locholo]
0.00/5 (0 صوت)

05-26-2013 03:55 PM
الشعب السودانى بايع الحلو و عرمان و عقار على السمع و الطاعة وخوض معركة التغير لسودان جديد يسع الجميع ...


#677376 [lawlawa]
5.00/5 (1 صوت)

05-26-2013 03:30 PM
لا يوجد بين هؤلاء المجوس، الذين حكمو ربع قرن من الزمان، لايوجد من بينهم من يستحق حتى الإلتفات اليه..؟؟.. دعك من المبايعة..؟؟..ان مكانهم المزابل والمنافي ..؟؟


#677362 [Rio]
5.00/5 (1 صوت)

05-26-2013 03:18 PM
السودان لن يحكم بعد الأن إلا ديمقراطيا" والشعب من سيقرر .. واذهبوا جميعا" غير مأسوف عليكم .


#677274 [ابو حلقا مر]
5.00/5 (1 صوت)

05-26-2013 02:06 PM
مالنا انحنا عملنا شنو فى الدنيا دى. يا جبهجية هسسسسسسسسسسسسسسسسسسسسسسسسسسسسسسس انحنا بايعنا /ياسر عرمان وعقار والحلو


#677210 [كلحية]
5.00/5 (1 صوت)

05-26-2013 01:13 PM
بعد ربع قرن من الذل والهوان والتسلط والقهر والإنحلال والتفسخ والفساد، خلال الفترة الى بايعتم فيها البشير ، تعودوا وتبايعوا طاغية آخر ليمارس فينا التسلط والقهر والفساد والإستبداد والمزيد من تشظى وتقطيع أواصر الوطن من أجل إقامة شرع الله خلال ربع قرن آخر من عمر الوطن !!. هل شعب السودان أصبحوا قطيعاً من السوائم تارة يهش عليه البشير بعصاه وهو يرقص وتارة سيجره ود أبراهيم الى حروب مقدسة ُيشهر فيها سيف الشريعة فى وجه المعارضين و يبشر فيهاالمجاهدين من الشباب المراهق بحور من العين ، بينما الجنة تمتلىء وتفيض بالفاكهة ولحم طير مما يشتهون! آ لا يكفى الإنقاذ ما إرتكبته من جرائم وفظائع فى حق أهل السودان !. هذه المناورات الساذجة، لا تنطلى على بسطاء الناس ناهيك عن السياسيين .يجب على الإنقاذ أن تجلس اليوم وليس غداً الى طاولة الحوار مع كافة فصائل المعارضة المسلحة منها والمدنية ، لوقف نزيف الدم السودانى أولا ثم بحث سبل إقامة الدولة المدنية ، دون ذلك خرط القتاد. وهو بالضبط ما يجري حالياً فى الأطراف المستعرة بالحرب والقتل والتدمير. أما الإصرار على إقصاء كافة أهل السودان وحرمانهم من ممارسة حقهم المشروع فى تقرير مصير وطنهم القارة ، والإستئثار بسلطة فاسدة ومفسدة لغيرها من المتعاونيين معها من المرتزقة وآلكلى الفتات من أعضاء ما يسمى بحكومة الوحدة الوطنية، هذا العنت والصلف والإستبداد بالرأى ,و إحتقار الآخر ، سوف تؤدي بالضرورة الى زوال هذا الوطن الجميل ،إن لم تحدث معجزة ويهب شعب السودان كعادته ويقتلع هذا النظام من جذوره ويفكك دولته ويلقى بها فى مزبلة التاريج . عندها يكون السودان الوطن الواحد الموحد الذي يسع أهله جميعاً بما لديهم من تنوع وثراء يمتن أواصر وحدتهم ولا يمزقها .


#677198 [Zoal]
5.00/5 (1 صوت)

05-26-2013 01:03 PM
انته والبشير روحوا في الف داهية, وسيب الدجل والخرافه. التارخ اثبت مافي دوله مبنيه علي دستور ديني كللت بالنجاح في عصرنا هذاء. الدولة المتحضرة هي الدولة القائمة علي دستور علماني فيها يتساوي الجميع في الحقوق والواجبات. امسك تاريخ الدولة الاسلاميه بعد موت الرسول(صلعم)كان الكل يتهافت عاي السلطة والتسلط علي العباد الدليل كل الخلفاء الراشدين ماتوا مقتولين(راجع التاريخ الاسلامي). خلينا نتعلم من الدول المتحضره التي تمد لنا يد العون في كل المجالات ونبذ الحقد والكراهية لكل مايختلف عننا واحترام الرائ الاخر والاعتراف بالخطاء وعدم المعرفه مافي اسواء من الجهل والغرور والظلم وسلب حقوق الاخرين.


#677186 [ود عويضة]
0.00/5 (0 صوت)

05-26-2013 12:55 PM
الترابي قال عمر البشير ابتلاء من الله .... وصلاح قوش ندم على انضمامه لهؤلاء الابالسة وقال بدأت أشعر بما فعلت وود ابراهيم بالتاكيد نادم على ما فعل - وقد نسب اليه انه قال لو خرجت لقمت بانقلاب اخر - اذن الامر ليس في من نبايع ولماذا نبايع - فالحرب في السودان هي (فتنة) وليست حرب جهادية طالما الطرفين يشهدون لا اله اله الا الله ويقيمون الصلاة - ولا غرابة ان يلتقي المسلمان بسيفهما فالقاتل والمقتول في النار - والحل هو في السعي للصلح ((وَإِنْ طَائِفَتَانِ مِنَ الْمُؤْمِنِينَ اقْتَتَلُوا فَأَصْلِحُوا بَيْنَهُمَا فَإِنْ بَغَتْ إِحْدَاهُمَا عَلَى الأُخْرَى فَقَاتِلُوا الَّتِي تَبْغِي حَتَّى تَفِيءَ إِلَى أَمْرِ اللَّهِ)) [الاية


#677182 [احمد]
0.00/5 (0 صوت)

05-26-2013 12:54 PM
ود ابراهيم كوز متورط في جرائم اباده بحق الجنوبيون في ابيي ، غبي جداولا يصلح لقيادة طلاب اساس


#677151 [الكلام الجد]
4.00/5 (3 صوت)

05-26-2013 12:26 PM
بالدارجي كده ... دقت ساعه الحقيقه ... دقت ساعه النضال ... ايها الاخوه دماؤناليست اغلي من دماء الشهداء والقابضون علي جمر القضيه هنالك في ابوكرشولا وغيرها من المناطق الذين يواصلون الليل بالنهار باذلون ارواحهم رخيصه من اجل اسقاط هذا النظام الذي رهن السودان كله لصالح جماعه مافونه تسمي الكيزان ... ايها الاخوه كلنا في الهم شرق هدفنا الوحيد هو اسقاط هذا النظام في تلاحم يسمي (مرحلي) ومن بعد ذلك نحتكم للديموقراطيه لاقرار الحقوق والواجبات والدستور وغيره في وطن ديموقراطي متسامح ..متساوي بين الجميع ...ايها الاخوه .. ان اضعف حلقات هذا الحراك الثوري هي حلقه الحراك الجماهيري المدني التي نعول عليها في احداث الثوره القادمه بإذن الله والمنتصره بإذنه..واول اسباب ضعف هذه الحلقه انعدام الوسائل الاعلاميه التي توعي الجماهير بالموقف اول باول وتوجيه حركه الجماهير لاحداث الثوره ... وفي هذا المجال اقترح العوده الي وسائل المناشير الحزبيه لسهوله نشرها وسط الجماهير والعوده مره اخري الي اسلوب الكتابه علي الجدران ... وارسال مناشير للشرفاء في القوات المسلحه والشرطه للالتذام الي جانب جماهير الشعب في حركته نحو التغير..مع ارسال خطابات انذار لمنتفعي الكيزان من عدم التعرض لحركه الجماهير .. ولكسر حاجز الخوف يجب ان تبداء المظاهرات من امام مقرات الامن وخصوصا(الاحتياطي المركزي - بوليس ابو طيره) ايها الاخوه ان بدايه التحرك اذا كانت من امام مقرات اللامن والشرطه تنقل حاجز الخوف من المواطنين الي اجهزه الامن نفسها ... ايها الاخوه الثقه بالنفس ... والثقه با لشعب السوداني الكريم صاحب اكبر ارث في احداث الثورات ... وصاحب ليله المتاريس المعروفه في التاريخ الحديث للشعب السوداني و الثقه في الله من قبل ومن بعد ستصنع ثوره محميه بالسلاح لرمي هذا النظام المتعفن الي مزبله التاريخ والله ولي التوفيـق


ردود على الكلام الجد
United States [مواطن] 05-27-2013 12:26 AM
والله فعلا ده الكلام الجد والمفيد لازالة هذا النظام الفاسد واتمنا ان ينفذ علي ارض الواقع لانة الاسرع لانهاء الظلم وكسر حاجز الخوف من ملشيات النظام


#677122 [osama dai elnaiem]
0.00/5 (0 صوت)

05-26-2013 12:02 PM
ما في داعي تدخلوا بعض ا لايات القرانية في صراعكم بينكم اهل البيت وزمان كنتم تكفرون الغير والان الذبح داخل الحوش وليس هناك ما يدعو لاقحام ايات القران -- استحوا شوية -- ثم صناعة الفراعين والطغاة هي كما تفعلون بالعجول كما بني اسرائيل تضخمون العميد هذا او الذي قبله ويخرج من دبره صياح وتعبدون عجلكم ويفتك بالشعب السوداني --- بالله اعيدوا الشعب السوداني الي 29/06/1989 وهو من هناك قادر علي اختيار قائده الذي يستطيع تقويمه واصلاحه متي ما اخطا او حاد عن الجادة


#677044 [المتعجب أشد العجب]
0.00/5 (0 صوت)

05-26-2013 11:12 AM
لكم ولمن بابعتموه سابقا أيها الظلمة أبيات الشاعر الفذ الرائع المرحوم حميد والتي توضح الفرق الشاسع بينكم وبين الشرفاء من أبناء شعبي الصابر ، يقول حميد :
كنت وين وين إنت كنت
كنت وين لما طلاب الحقيقة كانوا برتادوا المشانق
كنت وين وين إنت كنت
كنت وين لما كان الحق بموت في الجنوب بين البنادق
كنت وين وين إنت كنت
كنت لما البيوت في الشمال صارت خنادق للكتابات البتنزل فوق طهاريهم مطارق
كنت وين وين إنت كنت


#677042 [AburishA]
0.00/5 (0 صوت)

05-26-2013 11:10 AM
بعد ده دايرين رطّاني بس!!!!
مشاكل السودان دي ما بتتفهم ولا بتتحل بالعربي!!!!
أموركم باظت دايرين تعلموا لينا فيها جبهة مؤتمر وطني ثورية!!!!!
هو ود ابراهيم ده من حوش ياتو ؟؟؟؟؟؟؟


#677033 [jazeera Aba]
5.00/5 (1 صوت)

05-26-2013 11:07 AM
أين كان هؤلاء الأوغاد من السلب والنهب، الفساد، إفقار العباد والقمع..الخ من كوارثكم في البلد ، خلاص لما الدولة أصحبت زي جنازة البحر في عهدكم المشؤوم عايزين الناس تشيلها معاكم أذهبوا أنتم وعفنكم للجحيم، لم ولن نستامح مع الإنتهاكات والفساد في عهدكم سوف نطالكم جميعاُ أيها الأوباش. قال نبايع ود إبراهيم، كلكم نكرات لم يتعرف عليكم الشعب السوداني بعطاءكم تم إحلالكم محل الشرفاء من أبناء الوطن بعد ما طالهم الإقصاء والفصل التعسفي لكي تتمكنوا في البلد ، وكمان عايزين تنسخوا لينا عهود ثانية كفاية ربع قرن من عمرنا راح في خبر كان، لم نستمتع بها في عفوان شبابنا في وطن كان بالإمكان أن يسع الجميع أيها الأبالسة: كلكم طينة واحدة ولن نغفر لكم


#677027 [حسكنيت]
0.00/5 (0 صوت)

05-26-2013 11:03 AM
قرف ياكل قرف


#677026 [اعز مكان]
0.00/5 (0 صوت)

05-26-2013 11:03 AM
هههههههههه دة موش ياهو ود ابراهيم القديم ولا غيرو
بالله ارحمونا يعني خلاص عدمنا القايد لمن تعيدو لينا ود ابراهيم


#677004 [اشقى و مجنون]
5.00/5 (2 صوت)

05-26-2013 10:49 AM
خلاص مدام هم دايرين يغيرو الحكومة , يمشي ود ابراهيم و لا زفت الطين دا و ينضم للجبهة الثورية

بعدين الناس ديل هنود ولا قايلننا هنود ؟؟

زول يحاول يعمل انقلاب تفكوه من الحبس و ترسلو على راس جيش عشان يحرر ليك مدينة محتلة ؟؟

ايه الغباء الكيزاني المثير للغضب دا ؟؟

تف عليكم من اصغر كوز للترابي


#676999 [احد ضحايا الالغاذ]
0.00/5 (0 صوت)

05-26-2013 10:46 AM
الجماعة ديل عنوانهم شنو ونلقاهم وين عشان ننضم ليهم ونناقشهم عسى ان نركب معه


#676985 [الطريفي]
3.00/5 (2 صوت)

05-26-2013 10:35 AM
ود ابراهيم لو طالب السلطة يقدم استقالتو من موقعة في الجيش وينزل انتخابات حرة نزيهه الشعب السوداني وعي الدرس 46 عاما من الحكم العسكري الشمولي عبود , نميري , بشبش اثبتت فشلها حل ماشكل السودان ومزقت البلاد والعباد .
نخريمة الفرق شنو بين احمد وحاج احمد بلا ود ابراهيم بلا بطيخ


#676972 [انين الصمت]
0.00/5 (0 صوت)

05-26-2013 10:30 AM
ما اشبه الليله بالبارحه والتاريخ يعيد نفسه ......نفس الشخوص ونفس السيناريو ونفس الاخراج من هم (السائحون) من هم (المصلحون) ....هم اساس المنظومة السابقة وجزء اصيل لا يتجزء من نفس الظلم الذي صاروا يتبرون منه اليوم (صحي الشينه منكورة) .. يريدون ان يعيدو مجدهم الافل ليدخلو مرة اخري الحياة السياسيه ولكن هيهات الان حصحص الحق .... وعرف الناس من انتم ....اللهم اعد الينا وطننا الحبيب الي امانه وطيبته ووداعته واعد الينا البسمه ولامل اعد الينا وطن بعانخي وطن الازهري ووطن محجوب شريف ورابحه الكنانية وطن كل الشرفاء ....اللهم ارحم شهداء الحرية والظلم والتعسف اللهم اجعل موتهم عزاب لجلاديهم......اللهم ارنا فيهم جليل قدرتك يا رب العالمين


#676948 [sul.dafa]
5.00/5 (1 صوت)

05-26-2013 10:16 AM
يا جماعة جننونا ود ابراهيم ودابراهيم وا برضو كوز زيهم احسن منهم فى شنو ولا عشان خلاص الكيكة قربت تخلص اى واحد فيهم عايز يعمل فيها المنقذ للوطن . من زمان كان وين 24 سنة كان وين . بالله نرجو كنس كل ما يمت للكيزان بصلة حتى الناس المصاحبنهم برضو يتكنسوا معاهم وما تنسوا ناس الشعبى الترابى وربعه هم سبب بلية السودان .عاش السودان حرا مستقلا.


#676942 [Alsakin Juba]
0.00/5 (0 صوت)

05-26-2013 10:12 AM
A new dirty game and bad scenario no body is going to beleive it


#676912 [سودانى حر]
5.00/5 (1 صوت)

05-26-2013 09:57 AM
أنا بقول للجماعة ديل ألعبوا غيرها. شافوا السفينة بتغرق قالوا أحسن نتلب من بدرى. بس فى ناس اشطر منكم تلبوا من أيام الربيع العربى و فى وادين أبدر من كدا. الشعب السودانى أكبر و أذكى من هذه الهرطقات. بعدين بالله كيف نهضم دى بعد 23 سنة . أنا بشوف دا استنكاح و تقل دم و عباطة و غباء بزيادة. أقلبوا وجيهكم يا .................


#676883 [ismail basheri]
5.00/5 (5 صوت)

05-26-2013 09:45 AM
يعنى نحنا من البشير لود إبراهيم إنتو البلد حقت أبو أهلكم ينعل أبوكم أولاد كلب


ردود على ismail basheri
United States [الواضح ما فاضح] 05-26-2013 01:17 PM
مع انو انا ما مع الشتايم ولكن يا صديقى فى دى معاك حق

[كرهنا هارون وعبد الرحيم والبشير لحد العمى] 05-26-2013 11:29 AM
والله دا المختصر المفيد يا اسماعيل اخوي انا ذاتى بقول يعنى نحنا من البشير لود إبراهيم إنتو البلد حقت أبو أهلكم ينعل أبوكم أولاد كلب

United States [أبوالكجص] 05-26-2013 10:53 AM
هي دي الفكرة التي أسسوا عليها في تمكينهم وأفعالهم وأقوالهم يا اسماعيل أخوي لكن في المقابل ومن أجل أن يعودوا إلى رشدهم لا بد من العلاج بالكهرباء بأمبير عالي.


#676880 [محمد علي]
5.00/5 (1 صوت)

05-26-2013 09:44 AM
كفاية لعب وتلاعب أيها الجبناء السفلة كلكم واحد (من سوار الدهب إلى الترابي)..أي بيعة تتحدثون عنها ومن أنتم أيهاالأنذال الأوغاد ومن فوضكم وكأن الشعب أصبح مصيره بأيدكم القذرة
الله لا يمكنكم أكثر ذلك.


ردود على محمد علي
[nagatabuzaid] 05-26-2013 09:20 PM
الجاب سوار الذهب للترابى شنو ؟؟ لتعرف عن سوار الذهب شنو ؟؟ ما تهاجم من طرف هداك الله


#676847 [زول طرنقاش ساكت]
5.00/5 (1 صوت)

05-26-2013 09:29 AM
من حق كل سوداني غيور على الوطن ان يدلو بدلوه في مصلحة الوطن ومن اجل الوطن ان يقدم الغالي والنفيس . ومن حق الامة ان تجتمع على من تراه اهل للثقة وايضا من حق الاخرين ان يستوضحوا الامر من تلك الفئة التي اجتمعت وقررت اين كنتم منذو اكثر من 23 عاما الم تلاحظوا فساد البشير واهله . اين كنتم منذو ان وقعت اتفاقية نيفاشا في عام 2005 اين كنتم عندما تقرر مصير انفصال الجنوب في عام 2011 . والسؤال الذي اراه اكثر اهمية ما هي السيرة الذاتية للمدعوا ود ابراهيم متى دخل الكلية الحربية إذا كان في عهد الانقاذ فهو فاسد وإذا تكلم باسم الانقاذ التصحيحية ايضا فهو فاسد لان كل لان كل جزء سقط عليه شيء من الخبث فهو نجس وخبيث .
كما اعتقد ان هذه فتنة فمن المفترض ان لا يكون هنالك تيار مضاد للجبهة الثورية لان معظم الشعب السوداني التف حولها فعلى كل الحادبين على مصلحة السودان ان يلتفوا حول راية واحده ضد الطاغوت والفساد الذي افسد السودان وحياة السودانيين ثم من بعد ذلك يتواثق الشعب على دستور دائم للبلاد يوضح كيف تحكم البلادويكفل حرية التعبير والحريات عامة وحقوق المواطنه وتقسيم الثروة . ثم تنشأ الاحزاب التي على حسب القناعات او تعاد هيكلة الاحزاب الموجودة اصلا وتجرى انتخابات حره ونزيهة


#676822 [حريه]
5.00/5 (1 صوت)

05-26-2013 09:11 AM
كلكم في الهوي سوي والله يجعل كيدكم في نحركم ولا خيرا في ابليس ولا وليدو


#676813 [ابعاج]
5.00/5 (1 صوت)

05-26-2013 09:05 AM
ود ابراهيم شنو اليومين ديل طالع فى الفكر وكان حواء السودان عقمت ان تنجب غيره ليخرج السودان من جحر الضب الذى دخل فيه ...؟
مسكين هذا الشعب السودانى اذ كان ينتظر مايسمى ودابراهيم ليخلصه مما هو فيه ...الا يعلم السودانيون من هو ودابراهيم ومن يقف من خلفه ...انهم الفاقد التربوى من طلبه المدارس وبعض الطامعين فى السلطه ..وهم على فكرة اسوا من الانقاذيين الذين يحكمون اليوم .هذا الرجل ان سنحت له الفرصه لحكم السودان سيعود به للوراء للسنين السوداءالاولى للانقاذ التى جلبت العداوة للسودان وكان السودان وقتها محاصرا من كل الجهات لولا ان اتى الفرج بتنحى حسن الترابى لما كان هناك سودان ..؟
ان كان ودابراهيم ومن معه يهدفون لمواصله الحرب الجهاديه فعليهم ان يراجعوا انفسهم ...فاليعلموا ان العالم اليوم تحكمه قوى كبرى تملك المال والسلاح وباستطاعتها دعم المتمردين باسلحه احدث من تلك التى تملكها حكومه ودابراهيم والخاسر فى النهايه الشعب السودانى ولن يجد الذين يطمعون فى الحكم ارض يحكموها او شعب يتسلطون عليه .حل مشكلة السودان يكون بالحوار واحترام الاخرين ..والا فانتظروا الطوفان..؟؟


#676812 [سالمة حامد]
0.00/5 (0 صوت)

05-26-2013 09:04 AM
البيعه للديمقراطيه ايعا الجبناء البيعه للسودان العلملنى الحر السودان سودان الثوره سودان كل فصيل لا يقبل الكوز ولا ابريق نحن خلفاؤ على عبداللطيف الشرفاء نحن من صلب الثوره المهديه نحن ابناؤ جيش اسس على على لا تسيس ادخلت ثوره الانقاذ وكما تسمى الحروب والافلاس

لا لا لا للا لا لا لامثال ود ابراهيم
هب الشعب طرد جلاده
لا للظلم لا القتل لا لتقسيم الوطن


#676791 [abdelrahim]
0.00/5 (0 صوت)

05-26-2013 08:52 AM
ان كان ود ابراهيم ضد النظام ليه ما قبضوه
دى لعبة من الجكومة لالهاء الناس
ثانيا نحن بعد كده ما دايرين حكم عسكرى


#676777 [يوسف باشا]
5.00/5 (3 صوت)

05-26-2013 08:41 AM
هذا هو انسب وقت للعصيان المدني يا ناس لان الكيزان ارسلوا جميع منسوبيهم لمناطق العمليات والتي فشلوا فيها فشلا ذريعا حتى الان.

ابسط حاجة شارك فقط في انجاح العصيان المدني

شارك في الحملة القومية لاسقاط النظام الفاسد

العصيان المدني ياناس
العصيان المدني ياناس
العصيان المدني ياناس
العصيان المدني ياناس


#676772 [أمبده أمبدة]
0.00/5 (0 صوت)

05-26-2013 08:36 AM
والله نحن بيعتكم الخاسرة دي ما بتلزمنا وما بنعترف بيها دي بيعة زور ( يعني بيعة مدغمسة كالعادة)ود إبراهيم لو عايز يغير النظام الفاسد ده بصدق لازم ينضم للجبهة الثورية ويوقع على ميثاق الفجر الجديد ويلتزم بكل بنوده ويعلق على كل ملحقاتة وينزل الميدان ويقود الكتائب لإسقاط النظام كما يفعل الابطال الشرفاء الآن في كردفان ودارفور


#676713 [د . محمد علي خيرالله رئيس جبهة السودان المتحد الجديد]
5.00/5 (1 صوت)

05-26-2013 07:51 AM
الفساد لا يخفى على أحد وهؤلاء الذين قتلوا الشعب السوداني وشردوه وأجاعوا العباد وفشلوا فشلاً ذريعاً في إنقاذ الشعب السوداني بل تسلطوا على الشعب السوداني نعم للدين الإسلامي الذي نشر الدين في السودان نعم للصوفية ولا لإسلام الإنقاذ الذي تشبع بالمصالح والدجل ونعم للعلمانية في أجهزة الدولة ونعم لأصحاب الديانات الأخرى داخل السودان الوطن للجميع والدين لله نعم لمن يريد نشر الإسلام الحقيقي وبسطه وسط الناس ولا لمن يريد أن يحكم بالقوة ويدخل الناس في الإسلام بالقوة الحرية للجميع والخدمة المدنية للجميع والتعليم للجميع ونعم لدستور سوداني يطال الجميع ولا لدستور سمي بطلاناً بأسم الدستور الإسلامي السودان ظل يحكم بالشريعة الاسلامية في قضايا الأحوال الشخصية منذ الاستقلال وهناك قوانين تحكم الجميع بمختلف دياناتهم وهي القوانين الوضعية والتي لا يوجد مثيل لها في الشرع وهي الإجتهاد وهذا مسموح به في الدين الاسلامي ولذلك لا بد وأن يكون الدين الإسلامي هو دين الدولة تالرسمي مع السماح لغير المسلمين من الإحتكام لشرائعهم هذا هو الوضع الذي يجب أن يسود السودان وبعد 23 عام السودان بلد علماني أراد البشير أم لم يرد ولم تحكم الشريعة حتى الآن وكفانا نفاق .


ردود على د . محمد علي خيرالله رئيس جبهة السودان المتحد الجديد
United States [فيصل احمد عمر (الرياض)] 05-26-2013 10:17 AM
يقول الله تعالى (افحكم الجاهليه يبغون) قال هنالك قوانين وضعيه تحكم الجميع (ياجاهل)


#676684 [m almhasy]
5.00/5 (1 صوت)

05-26-2013 07:34 AM
من ود البشير لود ابراهيم نحن زنبنا شنو البلد بتاعة ابوكم كيزان وعساكر فاشلىن هذا السودان لايستحق ان يحكمه هؤلاء الاقزام وكفايه نغمة الشريعه والاتجار بالدين خلاص قرفناقال ايه ود ابراهيم ياحبيبي ىاننوس


#676683 [الجنقوري]
5.00/5 (1 صوت)

05-26-2013 07:34 AM
تمييز الحق عن الباطل لايحتاج الى كل هذه السنين (24)؟؟؟؟!!!


#676653 [برنابه عكود]
5.00/5 (1 صوت)

05-26-2013 07:06 AM
عسكر عسكر تانى !! ود ابراهيم قال !! اتقو الله فينا حسبى الله ونعم والوكيل فيكم. خلاص الدرس انتهى وشعب اصبح فاهم فاهم خلاص !


#676652 [اللهم ألعن الانقاذ لعنا كبيرا]
0.00/5 (0 صوت)

05-26-2013 07:05 AM
قال عنصريه .. هو لو ما العنصريه دي زمان كان اعدموك ...لكن اذا سرق فيهم الشريف تركوه


اللهم ألعن الانقاذ لعنا كبيرا


#676647 [سوداني براني]
5.00/5 (1 صوت)

05-26-2013 06:55 AM
قديمة يا أخوانا .....
يعني دايرين تطلعوا بالباب لامن عرفتوا رقبتكم مارقين وتجوا داخلين بالشباك
مواصلة لخدعة القصر وكوبر القديمة والتي لازالت مستمرة.....
ود أبراهيم ولا ود البشير ياهم وجهين لعملة واحدة قذرة...


#676630 [karlos]
0.00/5 (0 صوت)

05-26-2013 06:25 AM
لا ود البشير و لا ود ابراهيم الاتنين الى مزبلة التاريخ و المحاكمة الثورية انشاء الاتنين حيكونزا مطلوبين للاعدام لما اغترفوه من جرائم بشعة و يا ريت معاهم محمد المعتصم حاكم....اليومين دى ظهر على حقيقته


#676618 [واحد من الناس]
0.00/5 (0 صوت)

05-26-2013 06:02 AM
عشم ابلييييييييييييييس في الجنة !


#676594 [واحد مسطول]
0.00/5 (0 صوت)

05-26-2013 05:01 AM
ما هو الفرق بين ود ابراهيم وبشة


#676578 [امين الشريف]
5.00/5 (1 صوت)

05-26-2013 03:26 AM
دا كله ما بحلكم 24 سنة وانتم شهود على الفساد الذي تتبجحوا به الان بعد ان فاحت ريحة العفانة وملات الدنيا عايزين تعملوا فيها انبياء ومصلحين ؟؟؟؟ تاني مافي حاجة اسمها عفا الله عما سلف الحساب سيشمل كل من شارك النظام حتى كسارين التلج ما عندهم طريقة ... ارجو الراجيكم واركزوا - كل القوة بكرة الخرطوم جووووووووووووووووووة ...


#676574 [سودانى شديد]
5.00/5 (4 صوت)

05-26-2013 03:10 AM
بصراحة كده موضوع المدعو ود ابراهيم و السائحون و التصحيحية و حتى المؤتمر الشعبى كلها خزعبلات لتجهيز بدائل مقبولة للمجتمع الدولى تقبل بصورة محسنة من حكم الانقاذ. عساكر القوات المسلحة السودانية هى اكبر تظيم للمرتزقة سارقى حكم و قوت الشعب لمن يدفع أكثر داخليا أو خارجيا. لن نقبل ببزات عسكرية مرة أخرية تكون دمى تحمل سلاحا يحركها ساسة من وراء الكواليس خدمة و حماية لأهواء شخصية. هذه البزات العسكرية لا تمتلك عقلا او حكمة تؤهلانها لتمثل رجال دولة. يجب اعادة هيكلة تلك القوات المرتزقة التى فشلت فى حماية التراب الوطنى و لكنها نجحت فى تقويض الحكم الديمقراطى المخرج الوحيد لأزمات السودان المتعاقبة بشرط استدامتها.

بعدين قصة "نبايع" و "بيعة" و "شرع الله" و "جهاد" الكترونى و فرعونى و "قرود كاسحة للألغام" و "عرس الشهيد" فهى تعابير أضحت لا تجد لها سوقا عند السودانيين بعد ان انكشفتوا امامنا و انكم تتخذونها ككلمة حق يراد بها باطلا و نساءا و عماراتا و لاندكروزراتا و بنوكا و شركاتا و مزارعا و كافورا و سياحتا و كوالالمبورا و دبيا و لندنا و أخيرا و ليس آخرا هلالا و مريخا غسيلا لأموالا قد غنمت من مشارق الأرض و مغاربها.


ردود على سودانى شديد
United States [nagatabuzaid] 05-26-2013 09:28 PM
عارف يا سودانى شديد ديل عاملين زى لما واحد يوجع راس الناس ( عايز اصلح البيت وما

بعرف شنو داك تعالوا يا اولاد البيت محتاج تصليح ) بللا ناس البيت والجيران وكل من سمع

ينتظر فيتفاجاء الجميع ان البيت هو نفس البيت بس لطخ ليه اسمنت وقلب الباب من الجهة

دى للحهة ديك وضرب المطبخ جير وزاده بمبر بمبرين

United States [من الجذور إلى البذور] 05-26-2013 11:34 AM
01- الله عليك يا [سودانى شديد] ... والله لقد أبدعت شديد ... إنفشّيت وفشّيتنا معاك شديد ... ؟؟؟

02- عليك الله كلمة إنشّيت بتاعتي دي ما ذكّرتك دعاء المُبدع عادل إمام حين قال : اللهمّ أنفخنا وفسّيهم ... لكن أنا دعائي : اللهمّ أنفخهم و ما تفسّيهم ... إلاّ إذا طرشوا دولاراتنا ... قبل أن يهضموها ... ؟؟؟


03- إنت عارف يا [سودانى شديد]... أنا عندما قرأت تعليقك حتّى وصلت إلى قولك ( ... ككلمة حق يراد بها باطلا ... ) كنت عاوز أقول ليك : كلمة باطل دي ممنوعة من الصرف لأنّها على وزن فاعل ... وثانياً ... موقعها هنا نائب فاعل ... يعني مفروض تكون باطلٌ .... لكن عندما واصالت ... إكتشفت أنّك تكتب بطريقة إشراقيّة تنويريّة إبداعيّة حُرّة و طليقة ... كانت الأبلغ تعبيراً ... والأمضى توصيلاً ... والأجدر بالقراءة ... والتفاعل ... ؟؟؟

04- ما كتبته يا [سودانى شديد] ... هو عبارة عن لوحة تشكيليّة ...لكن بالكلمات ... ؟؟؟


#676522 [محمد فضل]
5.00/5 (1 صوت)

05-26-2013 12:34 AM
لا للكيزان نعم لارادة الشعب؟نسقط تسقط حكومة الكيزانعن قريب ان شاء الله


#676516 [الموجوعة]
5.00/5 (1 صوت)

05-26-2013 12:30 AM
بس .الحلو.كوم


#676496 [اب حنكول]
5.00/5 (2 صوت)

05-26-2013 12:14 AM
الحكومة الفاشلة المعفنة ده - جعلت من الخرطوم ( صرة اب مسمار ) وتناست بقية المدن الاخرى ظنا منهم ان الحكم سيكون اسهل وما دروا ان مغبة ذلك انكا وعواقبه امر - حكومة فيها البشير اليائس وعلي عثمان البليد ونافع الخايف ومصطفى عثمان معرص المصريين - هااااااااه سفوا التراب - ليكم يوم يا كلاب يا معرصين - ---


#676494 [AMMAR]
0.00/5 (0 صوت)

05-26-2013 12:11 AM
الله أكبر الله أكبر ولا نامت أعين من خان عهد الشهداء يامن عثتم في الارض فسادا نبايعك على ان تصون عهد الشهداء وان تقيم العدل والمساواة


#676465 [محمد أ]
4.00/5 (3 صوت)

05-25-2013 11:07 PM
"تطبيع شرع الله" ...دي كيف بس..كلكم غثاء


#676437 [Zingar]
5.00/5 (5 صوت)

05-25-2013 10:28 PM
هنا المحك الخقيقى للشعب السودانى إذا عنده ذرة من الوعى فليقطع الطريق عن هؤلاء السفله عديمى الأصول.

عندى سؤال دائما فى بالى لهؤلاء المتأسلمين!!
لماذا تريدون تطبيق الشريعه؟
ألا يوجد نص صريح فى دستور السودان يقول بأن القاتل يقتل؟
وماهو الفرق بين حد السيف وحبل المشنقه أليس كلاهما يؤدى للموت!
ذكرت هذا المثال عن قصد لأن مفهوم الشريعه فى عقول هؤلاء المفلسين كلها تنحصر فى قطع..صلب..رجم.
من أين نال بطل زمانه الأسموا ود ابراهيم علوم الفقه والتفسير حتى يستعرض علينا بأنه العارف بالله وخبايا الكون.

المرحوم احمد ديدات رجل اعجمى لم يفكر ابدا فى السياسيه ليكون شخصيه بارزه او حتى رئيسا لوطنه جنوب افريقيا بل نذر نفسه للدعوه واسلم على يده آلاف من الناس بما فيهم قسسه... تخيل قسسه اسلموا على يده لأنه كان صادقا مع نفسه...تجى إنت يا ود ابراهيم تقول عايز أطبق شريعه فى بلد قبل ما يلدوا اهلك مليئه بمساجد يذكر فيها إسم الله...إختشى يا جربوع.


#676433 [ALIIIIIIIIIIIIIIIIIIIIIIIIIIII]
4.94/5 (8 صوت)

05-25-2013 10:23 PM
خلاص السفينة قربت تغرق كلو وااحد قاعد ينط بيانكم ده بخصكم براكم تبايعو ولا ماتبايعو دي مشكلتكم انحنا تاني نتغشي بيكم اسلاميين ولا مااسالاميين دي العبوا غيرها ابقوا رجل وارجوا الجاييكم تاني مافي عفا الله عما سلف كلو زول يبقي راجل ويتحمل الجايهو دايرين تغشونا مرة تانية انحنا مغشوشين بيكم 24 سنة يعني برضوا ححتفسدوا وحتصلوا مراحل اسوء من ناس عمر البشير لانو السلطة مفسدة ياشطار العبوا غيرها فاتكم القطار فاتكم القطار



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


صفحة 1 من 212>
مساحة اعلانية
تقييم
5.88/10 (6 صوت)




الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة