الوقت مناسب جدا لتكوين لجان الاحياء او التنسيقيات او أيا كان اسمها، سميها “خلايا مندسة” عديل. الناس تكون مجموعات صغيرة من ناس الحلة او الاصحاب او زملاء الجامعة او العمل. اجتمع مع اي واحد/واحدة من الناس البتثق فيهم و متفق معاهم على ضرورة ذهاب النظام، خططوا مع بعض، اطلعوا مواكب تجمع المهنيين مع بعض، اكتموا مظاهرات الاحياء مع بعض، نسقوا مع بعض، اشتغلوا توعية وكلام مع الناس الحولكم البتعرفوهم (اهل، جيران, اصحاب).
الثورة ما بتحصل كده تلقائيا براها، والزخم الثوري محتاج تراكم بي شغل مستمر وفعال. مبدئيا طلع من يومك وعلى الاقل ساعة شغل للثورة و لي مستقبل السودان. أمن نفسك قدر المستطاع و تجنب الاعتقال عشان البلد محتاجاك الفترة دي. ولو اعتقلت اعرف انو موقفك صح، والاعتقال في سبيل البلد وسام شجاعة و تضحية تفخر بيهو.
#تسقطبس
#مدنالسودان_تنتفض
غايتو عندنا بمدينة البراري الناس ما دايرة توعية يعني في إتفاق بنسبة تعدت ال 70% إن لم تكن اكثر علي ذهاب نظام الإسلام السياسي و نعلم تماما ان بري مستهدفة من النظام اللا وطني مثلها و مثل منطقة شمبات و الجريف شرق بل ان ابناء البراري العاملين بالمؤتمر الوثني مختفين تماما من المشهد