القصّة الكاملة لعلاج ابن وزير المالية على حساب الدولة .. وزير المالية : كانت التكلفة عالية وكنت قد رتبت حالي لتحمل تكاليف العلاج الا أن بعض الأخوة في السفارة طلبوا إلى ألا أدفع شيئاً .
اجتمع عدد من رؤساء تحرير الصحف السياسية اليومية عند الثالثة من ظهر أمس في القاعة الملحقة بمكتب وزير المالية علي محمود لالقاء الضوء على نتائج زيارة رئيس الجمهورية المشير عمر حسن أحمد البشير والوفد المرافق له إلى جمهورية الصين الشعبية. وكان الاجتماع بناء على دعوة الوزير التي لباها الأساتذة فضل الله محمد (الخرطوم).. عادل الباز (الأحداث).. ضياء الدين بلال (السوداني).. رحاب طه (الوفاق).. حسن البطري (الصحافة) ومصطفى أبو العزائم (آخرلحظة). .
تحدث الوزير عن نتائج الزيارة وهي الأمر الذي أراد من أجله الحديث لرؤساء التحرير إلا أن الأخيرين أبوا ذلك لأن نتائج الرحلة كانت واضحة واهتم بها الخاصة والعامة بعد أن حدث ما حدث وأدى إلى تأخير وصول الطائرة الرئاسة إلى الصين في موعدها المحدد بعد أن غادرت مطار طهران في إيران.. لذلك جاءت أكثر أسئلة الصحفيين عن نتائج ومآلات الانفصال ثم عرج السائلون إلى قضية أهم وأخطر بالنسبة للصحافة والصحفيين هي ما نشرته إحدى الصحف يوم أمس عن التصديق بملايين الجنيهات لعلاج ابن السيد وزير المالية في أمريكا إضافة إلى اشارة الصحيفة أنها أبلغت مستشاراً للرئيس بالأمر واحتفظت بمستندات وكاسيت مسجل بصوت وكيل المالية بالانابة.
وجاء في الصحيفة أن التصديق ممهور بتوقيع وكيل وزارة المالية بالانابة الاستاذة منى السيد أبو حراز وان المبلغ المصدق به كان (32.391.70) دولار أمريكي أي حوالي الاثنين وثلاثين ألف واربعمائة دولار الا قليلاً وان في هذا تجاوز لضوابط علاج الدستوريين وأسرهم بالخارج وفيه مخالفة للإجراء التصديقات المالية.
إذن ما الذي قاله الوزير بعد ان طرح عليه الأستاذ عادل الباز سؤالاً حول صحة ما تم نشره؟
قال الوزير:-
– انظروا لتاريخ التصديق إنه في 31 مايو 2011م .. والتاريخ مسألة مهمة في هذه القضية.
ما الذي حدث بالضبط؟
– كنت في رحلة عمل إلى الولايات المتحدة الأمريكية للمشاركة في اجتماعات صندوق النقد في أبريل الماضي، ورأيت أن اصحب معي إبني وهو طفل يعاني من مشكلة في السمع بسبب ثقب في طيلة الاذن ومعه والدته، واحد مرافقي وهو الاخ محمد أحمد الذي يجلس أمامكم الآن، وقد كانت كل تكاليف السفر والتذاكر على حسابي الخاص بالنسبة للزوجة والابن ولم تتحمل الدولة مليماً واحداً من تكاليف الرحلة، أمر العلاج فهو موضوع آخر.
كيف بدأت القصة؟
– سبق أن أخذت أبني للعلاج في الأردن قبل أن أكون وزيراً للمالية وأجريت له عملية جراحية وبقينا هناك فترة طويلة وجاء الطبيب وقال إن العملية ناجحة وعدنا للسودان، لكن العملية للأسف فشلت وصار الحال أسوأ مما كان عليه وعرفت أن افضل مستشفيات يمكن ان تقوم بعلاج مثل هذه الحالة في أوربا وأمريكا لذلك أخذت أبني معي.
وماذا بعد الوصول؟
– انشغلت باجتماعاتي وتولى بعض العاملين في السفارة مع أفراد أسرتي مسألة البحث من مستشفى وقد وجدوه وكانت التكلفة عالية وكنت قد رتبت حالي لتحمل تكاليف العلاج الا أن بعض الأخوة في السفارة طلبوا إلى ألا أدفع شيئاً باعتبار أن للدستوريين وأسرهم حق في العلاج بالخارج.. وقد قاموا بالأمر من جانبهم كسفارة وليس هناك أي توجيه مكتوب أو غير مكتوب مني لتخصيص أي مبالغ للعلاج رغم ان ذلك حق كفله القانون واللوائح.
إذن كيف تفجر الأمر الآن؟
– علمت منكم قبل قليل ان هذه الأوراق مرت عليكم في صحفكم ويحملها صحفي حاول مقابلة بعض المسؤولين في الوزارة ثم عاد بصحبة أحد المستشارين بالرئاسة الذي كان له موضوع آخر وقابلا وكيل المالية بالانابة منى أبو حراز.
مستشار رئيس الجمهورية يذهب للوكيل بالإنابة ولا يمر على الوزير؟
– لا.. المستشار مر على من قبل وكان قد طلب التصديق له بمبلغ مالي لمقابلة نتائج حريق اندلع في قريته، وقد صدقنا له من مال التبرعات بمبلغ مائة ألف جنيه.
– مائة مليون بالقديم – ولكني اخبرته ان التبرع لابد من أن يمر عن طريق قناة حكومية، مثل الولاية أو المحلية التي تقوم بدورها بسداده للجنة أو الجهة المختصة.
ü إذن المستشار كان يتابع أمر التصديق؟
– نعم.. وقد زار الوكيل بالانابة ومعه الصحفي المذكور الذي كان يتحدث عن أمر العلاج بالخارج وقد ظنت السيدة منى أبو حراز أنه من مكتب المستشار، ويبدو أنه قام بتسجيل الحديث الذي دار بينهم.
هنا يتدخل الأستاذ آدم الزبير من مكتب الوزير الذي أمن على ما قال به الوزير وسألناه
من هو المستشار؟
– هو الدكتور أحمد بلال عثمان
هل كان يريد متابعة التصديق فقط؟
– هناك مذكرة بعث بها للأستاذة منى أبو حراز
ما الذي جاء فيها؟
– جاء فيها نصاًً ما يلي:-
الأخت العزيزة منى أبو حراز
لك التحية والود
هنالك أمر هام وضروري يتعلق بابن السيد الوزير وعلاجه في الخارج و بامضائك.. وجدت هذه الأوراق مع أحد الصحفيين وأوقفته لكن الموضوع يحتاج إلى معالجة.. سأمر عليك لاحقاً اليوم.
أوراقنا مع الأخت إنعام.. نرجو أن ترى طريقها إلى النور مع تحياتي.. د. أحمد
ثم رقم هاتفه أسفل التوقيع.
هل يمكننا ان نحصل على صورة من خطاب المستشار؟
– نعم.. هذه صورة لكل واحد منكم.
هل تري في الأمر ابتزاز…؟ يعني اجازة التصديق كاملاً مقابل حجز أوراق العلاج بالخارج؟
– أنتم ماذا ترون.. دعوني أنا
خرج المجتمعون وربما لم يبق في أذهانهم سوى هذا الحديث الخطر الذي جعل مستشاراً كبيراً يقف عند اعتاب موظفي الخدمة المدنية سعياً وراء تصديق مالي لاغاثة قرية قال إن النار أتت عليها.. وعندما يحدث التأخير أو التدقيق تتفجر الأوضاع مثل براكين الغضب.
آخر لحظة
4/7/2011م
والله دا ما تصرف مسئولين ودي ما حكومة , البحصل دا نهب عديل وهمبتة- ألا لعنة الله على الظالمين – لعنة الله على الفاسدين , لعنة الله على الحرامية أكالين مال الأيتام .. يخس عليكم.
ما هي المشكلة في أن يعالج وزير المالية وللا وزير المويه وللا وزير اي حاجه ابنه او ابنته على حساب الدولة ماهي المشكلة – هل هي حرام ؟ انها ابسط مكافأة تقدمها الدولة لوزير يحمل هموم شعبه يسافر شرقا وغربا ليوفر لهم العيش الكريم – دعوا عنكم الحسد وعيشوا الحياة كما هي فانكم والله لتشتغلون بأتفه الامور لتؤججوا الفتن وتنسون امورا اكبر شأنا من متابعات مرض أبن الوزير –
طلعت بحق يا سيادتوا عواسه ناكل الرهيفه وانت الرغيفة الله غالب
الاختشوا ماتوا هذا المبلغ الخرافي في نظر الناس كان اولي به دعم الفتريته
اهه ناس طلعت ضلافين بقر
ولسة انتو شفتو حاجة ياما ينقلب السحر علي الساحرين
لك الله يا وطني ولكم الله يافقراء بلادي
يا الله يا مثبت العقول …….
يبدو أن ما خفى كان أعظم
الله المستعان
الكلام واضح ولا يحتاج لتفسير ………………………..
هذا الامر يحدث في دواووين الحكومة ….. كل حسب قوته في الحصول على الاشياء
والمثل البلدي بيقول ((( التور كان وقع بيكترن سكاكينوا )))))
لا إله إلا الله…ولا حول ولاقوة إلا بالله
يا أخوانا
ده ما كلام القنابير ذات نفسو على قول أستاذنا صلاح عووضة
الشريف الشيخ وزير بيت مال الإنقاذ قال بان بعض الأخوة فى السفارة طلبوا منه ألا يدفع شيئاً بمبدا فهمهم ( قدم السبت ..تلقى الأحد ) وكلو بى تمنو..وقد قاموا بواجبهم كسفارة.شايفين سفاراتنا فى الخارج؟؟ينهشون من لحمنا الحى فى الضرائب والمساهمات والزكوات والدمغات ويتصرفون فيها كما يحلوا لهم وتوزع هبات وحفلات ورحلات وإجازات وعلاجات ولا عزاء للمغتربين.
تصديق الشيك صدر فى يوم 31/5/2011 ..قبل شهر بس!!!ممهوراً بتوقيع وكيل وزارة المال (بالإنابة).لااحظو ليس بتوقيع الوكيل شخصياً.( ملعوبة )
ياسيادتك..عايزنا نصدق إنو منى أبو حراز..صدقت الشيك دون علمكم؟؟( طيب هاك جِزْ القنابير دى )
وزير بيت مال الإنقاذ يعلج ثقب ( بأُذن أحد أبنائه ) بتكلفة (32.391.70) دولار بس!!!!!
دفعت من حر مال المغتربين فى سفارة البشير بأميريكا.وعند عودته أبرز الفواتير بنفس التكلفة (32.391.70) دولار تانى من خزينة مال الشعب الذى تم بيع جزء من أطفاله لضيق سعة يد أسرهم فى تربيتهم .
سؤال: كيف ؟؟ ومتى؟؟ تم دفع تكاليف العلاج الذى تم بالأردن؟؟
هناك الكثير من أطفال بلدى يعانون من ثقوب فى الآذان والقلوب والأجهزة الهضمية والعقول وسوء التغذية والسرطانات بأنواعها والفشل الكلوى وإلتهاب الكبد الوبائى والملاريا والتيفوئيد والسل والربو والأمية..و( أكل الكِسرة )
وحين يُسأل اللص الظريف ( أرسين لوبين ) هل يرى فى الأمر إبتزاز؟ يرد بكل وقاحة:
ماذا ترون أنتم ؟؟ نحن نرى الإبتزاز نهجكم ..وحكمكم الفاجرالفاسق .الفاسد ..المبتز
الذى إستباح طيبة وسماحة هذا الشعب المسالم بآيات كتاب الله البينات وأحاديث رسوله الكريم وشعاراتكم الكاذبة المنافقة( هى لله ) لتعيثوا فى الأرض مفسدين.
أيها الشعب الفضل هذا نموذج واحد من قادة التوجه الحضارى الذين تم فرضهم لإدارة شئونكم ومصالحكم بفقه الأنتماء الحزبى والتمكين وبإسم الدين للهط المال العام بفقه السترة فماذا أنتم فاعلون؟؟؟
والله العظيم حتي في السياسين في بعضهم في عنصريه لانه وزير من الغرب كم واحد مسك الوزاره مافي واحد سرب لوا وثيقه لان ناس وسخين وتافهين يعملون بمبدا العنصريه القبليه في الزبير محمد الحسن باني بيت في الاماب مليار جنيه مافي واحد اتكلم عنه وابو الجاز لما كان في الجاز التعين كان بالقبيلة ما شفنا صحيفه كتبت ولا وثيقه اتسربت لما يكون وزير شمالي ياكل مال عام مافي ناس تتكلم لان معظم الوزراء المعينين من الشرق والجزيره والجنوب مدراء والسكرتاريه كلهم شماليين يعملون بمبدا الخباثة لي حساب اخرين في الحكومه لانه ينظروا ليه يا جنوبي يا جزيراوي يا غربي شفتوا مبارك الفاضل لما كان مساع رءيس الجمهوريه كانو بفتشو كمبيوترو الزي بعد نهايه الدوام ومن 00000000000
دي يا سيد تصلح ان تكون مسرحية ذات فصل ولحد ( اسكتش ) بس وين نلقا – مكي سنادة – الفاضل سعيد ؟؟؟؟؟؟؟؟
شفتوا المجرم , اتكلم عن سياسة التغشف وكده , وهم اكبر مفسدين ومبددين لثروة السودان
يا أتبراوى
أرجع البصر كَرتين
العلاج تم مرتين …جميل…واحدة فى الأردن…والتانية فى ماما أميريكا جميل
علاج الأردن …على حساب الدولة وده من حق الوزير زى ماقلت إنتا عشان هو( تعبان فى خدمة السودان)..جميل….علاج ماما أميريكا دفعتو السفارة هناك من حر مال المغتربين..جميل…تصديق المبلغ قبل شهر …لزومو إيييه ما دام ..الأخوة فى السفارة حموهوا يدفع ( جدعنة ) منهم وكدة!!!
أقرا المقال تانى عشان تفهم
نحن نثق في وزير المالية علي محمود ومن حقه علاج ابنه مثله مثل كل الدستوريين
(…. لا.. المستشار مر على من قبل وكان قد طلب التصديق له بمبلغ مالي لمقابلة نتائج
حريق اندلع في قريته، وقد صدقنا له من مال التبرعات بمبلغ مائة ألف جنيه….))
يعني مال الله دولة بينهم تجار دين الله !!
بحتو كمان و كمان اصلو فساد العصابة دي زي غسيل الكرشة كلما تفتح جنبة تفتح
جنبات تانية بلا نهاية وما خفي اعظم ..
أخخخخخخخخخخخخخخخخخخخخخخخخخ
حل مشكلة السودان كالآتي
تعيين الشعب السوداني الفضل وزراء ومستشارين
اما سمع وزير الماليه المحترم بلمواطن الذى ارد ان ينتحر فى مستشفى امدرمان؟;( المشكله ان هذه الحكومه تولى اللصوص و حثالة الناس امور العباد وهم يحسبون ضمن اهل البلد المحترمين. ولو اولاد الناس لانهم لايريدون مال ولا جاه الا المودة فى القربى. اخيرا يا وزير الماليه لاتحسب ان الله غافل عما تعمل.
يا أخوانا الموضوع بسيط كان ناس السفاره البرصفو بالدولار يعملو كشف للوزير علشان يعالجوا ولده بدل ما يشيلوا من قروشنا دى لأن القروش دى معمول لها ميزانية تصرف فيها و اللة جنس فساد ذى ده صلو ما شفناهو حرام حرام يا عالم صحي الاختشوح ماتوا الوزير قايل عندنا قنبور قال ما عارف وبعد ما عرفت ليه ما رجعت قروشنا ما تقل لى انو الجماعه فى السفاره حلفوا عليك ؟؟ كان تحلف بالطلاق بالثلاثة ؟؟ برضوا راجنك تكون عندك الشجاعة وترجع قروشنا ؟؟؟؟
يا بتاع الكسره و كده ….هلا جلست في بيت امك و ابوك و شوف ناس الخارجيه حيهدو ليك وللا لا …………يا حراميه اخر الزمان
نتمني الشفاء العاجل لكل سوداني بغض النظر عن الانساب والوظائف وتكاليف العلاج ونترحم علي موتانا في الشوارع والاذقه والخيران والخرابات فهم ايضا ابناؤنا ومسؤلين امام الله يوم البعث ماذا قدمنا لهم في دنياهم وهم في اشد الحوجه والعون بعد فقدانهم للاهل والدار وابسط مقومات الحياه
يا حكومة الوسخ والسجم والرماد
ياوزير السجم والفساد إنت داير تعالج ولدك من ثقب فى إذنه بأموال الشعب والشماشه المساكين يموتون كالخراف النافقه ولا أحد يبالى لهم .. الله لاشفى لك أبنك واصابك الله وأسرتك بكل الأمراض التى تجعلك تتذكر ما نهبته من مال يافاسد
اضـبـــط !!!! وزيـر الـمـالـيـه يـكـذب!!!!
الرجل الوزير ذو الدفع الرباعى بتاع الكسره يقول ان كل تكاليف السفريه لامريكا و التذاكر كانت على حسابو الخاص اكرر الخاص اكرر تانى الخاص و اقتبس
((كنت في رحلة عمل إلى الولايات المتحدة الأمريكية للمشاركة في اجتماعات صندوق النقد في أبريل الماضي، ورأيت أن اصحب معي إبني وهو طفل يعاني من مشكلة في السمع بسبب ثقب في طيلة الاذن ومعه والدته، واحد مرافقي وهو الاخ محمد أحمد الذي يجلس أمامكم الآن، وقد كانت كل تكاليف السفر والتذاكر على حسابي الخاص بالنسبة للزوجة والابن ولم تتحمل الدولة مليماً واحداً من تكاليف الرحلة، ))
و خطاب السيد وكيل اول الوزارة المكلف مصطفى يوسف والى نمرة وم/م/عمومى بتاريخ 9.5.2011 فى خطابو الرسمى لوزارة الخارجية يقول دفع المبلغ ايه و حق التذاكر للسيد( مش الطفل)عمر على محمود راجع صورة الخطاب فى ذيلية مفالة الاستاذ الطاهر ساتى فى الراكوبه !!!!!!!!
لاحظو الرحله تمت فى ابريل و القروش كلها انصرفت فى مايو يعنى باثر رجعى لما الوزير عاد بالسلامه سكه قروشو و صرفها على دايرة المليم ما الزول محمول بيصف على 3 بيوت الله يخربم كلهم زى ما خرب البلد !!!!!!!
وين إنتو يا ناس المراجع العام ؟؟؟؟؟؟ كمان مرسل ليهم صورة من كل مستند ما تصحو وخليكم معانا بقى !!!!!
طـبـعـا دى نـسـمـيـهـا فـضـيـحـه بـجــلاجـل !!!!!
و الناس ركّـزوا على قروش العلاج بسر و نسوا الوزير ذو الدفع الثلاثى بتاع الكسره ماشى فى مامورىة رسميه بتاعت يومين تلاته( و دى عشان نحسب النثريه اليوميه الاخذها و بالتاكيد و لا رجّـع الباقى كما عهدناه الرجل و قالا بخشمو !!!!) طيب ساق العيله ليه!!! و التذاكر كلها بالدرجه الاولى على حساب منو ؟؟؟ و علاج الولد الكان فى الاردن طوّل حسب كلامو لما ساق العيلة لاجتماعات البنك الدولى الاياما المحدودة دى ما كان عامل حسابه انها برضو حتطوّل؟؟؟؟؟ دا معناه الزول دا شال نثريه مفتوحه !!!يعنى لما يمشى لامريكا كل ما الزوجة تنزل السوق يمكن يمشى معاها صراف السفاره ما ديل حسبما ورد هم الكانو بيصرفو ( و الزول ما قال ساق ياتو زوجه ام الثلاثه عشان يعدل؟؟؟) و بعدين ما ممكن كل الفامليا الكريمه يكونو نزلو فى بيت السفير او الفندق بتاعت الضيافه للبنك الدولى لانهم بيحجزوا بس للوفد الرسمى !!و اللا بيكون كذّب على الجماعه ديل و قال انو عيلتو كلها الوفد الرسمى؟؟؟
اكببببد المنصرف فى الرحله دى بيكون زى مليار جنيه !!!!! و عشان وزارة الماليه تنفى الكلام دا بس يطلعوا بيان ما تم صرفوا بالتفصيل !!! و اللا يقولو وزارتم دى بقت تكيه للزول بتاع الكسره دا !!!!!
المواضيع دى كترت يا جماعه !!!!! والحكومه عامله اضان الحامل طرشه و عشان كده حقوا قراء الراكوبه مابسكتو من الكلام دا تعالوا يوماتى ندق فيهو لما يطلع للحكومه دى صاحب !!!! و ارجو من ادارة التحرير ينقلوا لينا اى مقال يظهر فى الصحف المحلية عن الموضوع دا او مثيلاتو …
اللهم إنا نسألك بأنك الله
الواحـــــــد
الأحــــــــــد
الـصـــمــــد
الذي لم يلد
ولم يـولــــد
ولم يكن له كفواً أحد
********
اللهم إنا نسألك بأنك الحي القيوم
يا ذا الجلال و الإكرام
و العزة و الجبروت والكبرياء والعظمة
الملك العــزيــز الجبــــار المـنـتـقــم
********
اللهم يا ربنا و رب العالمين ورب كل شيءٍ ومليكه
لك الحمد كما يليق بجلال وجهك و عظيم سلطان
اللهم صل على محمد عدد ما ذكرت وعدد ما غفل عن ذكرك
********
اللهم إليك نشكو ضعف قوتنا وقلة حيلتنا وهواننا على الناس يا أرحم الراحمين
أنت ربُّ المستضعفين وانت ربنا إلى من تكلنا، إلى بعيد يتجهَّمنا أم إلى عدو ملكته أمرنا إن لم يكن بك علينا غضبُُ فلا نبالي، ولكن عافَيتك أوسع لنا. نعوذ بنور وجهك الذي أشرقت له الظلمات، وصلح عليه أمر الدنيا والآخره من أن تنزل بنا غضبك أو يحل علينا سخطُك لك العتبى حتى ترضى ولا حول ولا قوة إلا بك
********
اللهم إنا نسألك أن تنتقم من الطواغيت الظلمة و أعاونهم
اللهم إنهم طغوا وتجبروا
وظنوا أن لا قادر عليهم ولا ند لهم
و غرتهم أنفسهم و أمانيهم و سطوتهم وما ملكته إياهم
*********
فتسطلوا بها على عبادك
و آذوا بها أوليائك
********
فتنوهم في دينهم وأولادهم وأموالهم وأعراضهم و أنفسهم
وأنت الله القادر المنتقم
اللهم كل من سجن وعذّب وفتن عبادك الصالحين وخاصتك المخلصين
ومن أعانهم على ذلك بالقول أو الفعل
اللهم خذه أخذ عزيز منتقم
اللهم شتت شملهم
واجعلهم شذر مذر
اللهم اجعلهم عبرة لمن لا يعتبر
اللهم اجعل ما يكسبه منهم من أعانهم وبالاً عليه في نفسه وأهله
********
آمين آمين آمين
حك لي ضهري احك ليك ضهرك..لقد تكرر ذكر هذين الإسمين مع الفساد ولكن الى متى؟
ســـبق و أن علقت على انتهازية د. أحمد بلال عثمان هذا الشخص اوعز ذات مرة الى احد ابناء زعماء الشرق الذى كان ييعمل بالقصر الجمهورى فى وظيفة ادارية بأن ينضم الى الجبهة الوطنية العريضة التى كونها الاستاذ على محمود حسنين و أنه حسنها سيتفاوض معه على العودة مقابل وظسفة دستورية عليا …. بالله عليكم هل ترون كيف يمتهن الساسة الخيانة و الانتهازية و المتاجرة بالوطن ؟؟؟؟
يا سلام,,
بالله (قد ) صغير (أد ) النملة فى (أضان) ود السيد الوزير يكلف سفر للأردن وأمريكا وتكاليف تتعدى نص مليون دولار ( غير الذى منو),,
طيب يا السيد الوزير ,, لو كنت ما وزير,, يعنى عنقالى من الطبقة الوسطى (لو بقى فى زمنكم طبقة وسطى) ,, كان ها تسوى شنو,, المبلغ بتجيبو من وييييين,, أنا أقول ليك,, طبعا ها تعمل لفلذة كبدك ( لبخة قرض) وإنت تخت فى أضان طينة وفى اضان عجينة,, وأهو كلو من (الكسرة) ولا عندك حل غير كدا ؟؟؟؟؟؟؟
((هانت الزلابية))
الشفاء العاجل الي ابن الوزير ….. وهو ابن وزير لابد ان يعالج كان من مال الدولة او من اي مال ……. ولكم الله يا ابناء المايقوما ….. حرام والله حرام حسبي الله وهو نعم الوكيل
طالما ……المال حرام الشفاء مستحيل ياوزيرنا تحري الحلال فيما تكسب يبارك الله لك فيه
يعني لو وزير الماليه صدق المائه مليون ل احمد بلال الموضوع ما كان انكشف ولا من شاف ولا من دري ياسيادة الوزير والله اولاد ديل ما ينفعوك ولا ينفعو انفسهم لانو اكيد اكلهم حرام وعلاج حرام اتقي الله في نفسك قبل الاخرين
الأهم ماهو رأي الرئيس الراقص الذى ينادى بمحاربة الفساد والمفسدين
ولو ما عمل كدة يكون مسؤل كيف؟ وكلنا لو بقينا مسؤلين حنكون كدا.. انا ونتا …. كلنا كضابين ونصابين وبنغش في بعض وكأنو واحد مننا نحنا المعلقين لو يوم بقى مسؤل حيكون نزيه وما يسف … ربنا يخسف بينا الارض كلنا ويجمعنا يوم الحساب
الموضوع بسيط
قولوا الكلام دة كلو حصل واعتقلوا الصحفيين ديل كلهم وقولو دة ازعاج للسلطات زي موضوع المناضلة صفية كدة
السيد الوزير قال بنفسه قبل ايام ليس لديه سوى 1800 جنية في البنك. طيب لماذا اصطحب معه ابنه الى امريكا…..ناس الانقاذ دائما حيلهم ضعيفه
العمليات دي هنا في السودان بتتعمل وبعرف كم شخص عملها في مستشفي الخرطوم مش مسنشفي خاص ونجحت ونحن ماشاءالله عندنا مستشفيات خاصه كثر وعلي مستويات عالميه مثل الزيتونه ورويال كما ان عندنا دكاتره كبار وشاطرين جدا . فمافي داعي المسئول ابو دوكه ده اعالح ولده علي حسابنا بره انشاءالله ربنا لا يكسبه ولا يربحه ويصرف كل ما سرقه في علاج ولده وما اتعالج ليه
ربنا يشفى الشافع من مرض الاضان ويشفى ابوه من اكل مال الشعب الجيعان .. قولوا آميييييييييييييييييين
طيب يا جماعة الخير انا زوجتي مريضة وعاوزة عملية والله ما قادر على العملية اتمنى من السفير في الرياض ان يحلف طلاق ويعالج الولية دي على شاكلة ود الوزير الذي قال ابوه ( كانت التكلفة عالية وكنت قد رتبت حالي لتحمل تكاليف العلاج الا أن بعض الأخوة في السفارة طلبوا إلى ألا أدفع شيئاً ) بس الفرق بيننا انه انا فعلا محتاج والوزير مرتب اموره
زمن الديمقراطية المفترى عليها قام المرحوم / عمر نورالدايم فى حكومة السيد الصادق المهدى قام باداء واجب العزاء مستقلا طائرة عمودية كان بها فى مامورية رسمية ( داخل السودان) و قال : مرينا فى طريقنا بالقرية و قلنا نوْدى واجب العزاء بالمرة ؟؟ حينها اقامت صحافة (الجبهة) انذاك (الموْتمر الوطنى) اليوم اقامت الدنيا و لم تقعدها عن استقلال الوزير امىك الدولة لاغراضه الخاصة؟؟؟ اذا ماذا تقولون فى هذه و فى رحلة خارج السودان و صرف بالدولار دون وجه حق ……؟؟؟؟؟؟؟؟؟؟؟
يعنى أى سودانى شب حريق فى قريتهم او حتى راكوبتهم من لدن استقلال السودان الى الآن من حقه ان يذهب ويقدم اوراقه للحصول على تبرع مناسب كما فعل المستشار بلااااال
يا جماعه الراجل اعترف بالواقعه و انها تدفع من المال العام او على الاصح السائب
لو المواطن العادى عايز يتعالج على حسابو عايز اجراءات و قمسيون و جرى لا حد له
و بعدين يصدقو ليهو من مالو الخاص بحدود
بعدين الناس اللى حلفو على الوزير ديل بحلفو على جيوبهم و لا على مال الدولة و الشعب السودانى
و بعدين وين توطين العلاج بالداخل
لمثل هذه المسائل الغير معقدة
و بعدين سعادة المستشار حلتهم دى كانت من القش و حرقت كلها و لا كيف
كمان عايز يصطاد فى الماء العكر
و يقسم بينه و بين السلطة الرابعه و ربما فتات لاهله
و الرئيس بسال هل عندك مستندات ضد اى شخص بالفساد؟؟؟؟؟؟؟؟؟؟؟؟؟؟
طيب دى مستندات
و رئيس المجلس الوطنى يؤمن بتدين كل الدستوريين و الدستوريات
الله ليك يا بلد
يا أخوانا الجفلن خلوهن أقرعوا الواقفات ..ناس القرية بتاعة السيد مستشار الجمهورية أحمد بلال أكيد ما جايبين خبر هسى عندهم 100 ألف جنيه مصدقة وجاهزه في وزارة المالية يكونوا لجنة ويجوا يستلموها( ) .
والله فوضى ما بعدها فوضى وفضائح هذا الواقع بالنسبة للمسؤولين والغريق لا جوا
واحد فيهم الموضوع تحت مسمى العلاج وآلآخر تحت مسمى الحريق والله حرام عليكم
الشعب جائع والبلد غالية وألأسعار لا تطاق ونحن المغتربين نعلم أولادنا بآلآف الدولارات
وهم بالمجان ونحن نتعالج وأبنائنا بملايين الجنيهات وهم بالمجان وأبناء الدستوريين
وعائلاتهم بالمحان هذا الوزير وهذا المستشار وكمان بدون توقيع مستندات ألأمر سائب
وكل واحد أمهد لنفسه يا ناس ماطارين الموت والشبر الضيق وأين صناع القرار من هذا
أتقوا الله في شعبكم هذا خلاف العمائر والفلل والسيارات الفارهة وهذا يتطلب قرار حاسم
من الرئيس لآن ألأمر واضح والمشهد السياسي واضح وهو المسؤول أمام شعبه وأمام الله
وأمام القانون والمساءلة ونحن في ألأنتظار يا سعادة الرئيس ،،،