*تقدم الدكتور حمدوك باستقالته
*طرحت تلك الاستقالة الكثير من الاسئلة؟
*قدمها لي منو؟؟؟
*وتم قبولها ولا لسة؟
*وقدمها لييييييه؟؟؟؟؟
*والحا يحصل شنو؟؟؟؟
*الاجابة على السؤال الاول تطرح بدورها الكثير من الاسئلة
*حمدوك قدم الاستقالة للشعب السوداني المكنة وسيد الرصة والمنصة.
*ولكن تقدم الاستقالة عادة للجهة التي كان عندها حق التعيين
*وحق التعيين بموجب الوثيقة الدستورية (طيبة الذكر) كان للمجلس السيادي المحلول.
*المجلس السيادي المحلول ذاتو الحلاهو منو وبموجب شنو؟؟؟
*وهل يحل محله المجلس الاسي ده؟
*هو المجلس الاسي ده ذاتو الجابو منو؟؟؟؟
*وبموجب شنو؟
*الوثيقة الدستورية ذاتها وينا؟؟؟؟
*والالغاها منو؟ وبي ياتو سلطة؟؟؟؟
*تبقى استقالة حمدوك غير قانونية لانها مخالفة للمرحومة الوثيقة الدستورية الراحلة المقيمة..
*وان تقديمها للشعب كما ذكر حمدوك
*هو تقديم لغير جهة الاختصاص
*الامر الذي يستوجب شطبها شكلا
*برغم ان الشعب هو سيد الرصة
*الا ان القانون هو سيد الموقف
*الجبانة هاصت
*والخط الدولي انقطع
*وصيب السماء آت لكل ظالم
*فدعوات امهات الشهداء لا اظن ان بينها وبين رب السماء حجابا
*حتى ولو قفلوا الافق بالكونتينرات
*ايها الناس
*يسمو كل يوم شهيد
*ويطل علينا من يبخس الشهداء شهادتهم
*وما اشرف الاستشهاد لاجل وطن يئن ومواطن اضناه العذاب
*من خلال صفحات التواصل الاجتماعي
*يطل بعض الذين نطلق عليهم بشر
*يعلقون بـ(اضحكني) على خبر استشهاد شاب في مقتبل العمر
*الضحك بلا سبب قلة ادب
*فما بالك من الضحك في مثل هذا الموقف !!
*كاتل الروح وين بروح؟؟؟؟
*ولكن
*يبقى الوطن شامخا مطمئنا يطمئن
*طالما كانت ارواح شبابه تسمو لبارئها بفرح
*بهكذا فرح
*وكأنها تزفها الملائكة وترفرف حولها اجنحة الحرية والسلام والعدالة
*ايها الناس
*مواكب مابتتراجع تاني
*انشدها الاجداد وطبقها الاحفاد على ارض الواقع
*واقعا جميلا جليلا مشرفا
*فمتى يفهم هؤلاء!!!!!!!!!
*ايها الناس
*حلمت بتكوين حكومة مدنية جديدة
*نمت نوم شديد خلاس
*عشان اعرف التشكيل
*اشيل وانوم اشيل وانوم
تعبت تعب شديد حتى لمحت ليك في نومتي ديك كشف تشكيل الحكومة الجديدة
*يا اخوانا كان رقتو بوصف الشفتو
*البقرا في الموضوع ده اذا داير يعرف التشكيل الجديد كان واقف يقعد
*وكان راقد يقوم
*الجلطات اليومين دي كتيرة
*وكان واقف تحت عمود يزح من جمبو
*مايقع فيهو
*وكان في السطوح ينزل عشان مايقع
*وكان نايم يصحى
*وكان صاحي ينوم
*كان برة البلد يجي يشوف بي عينو
*وكان في البلد يتخارج
*كان في البيت يطلع الشارع عشان شفعو مايسمعو الكلام ده
*وكان في الشارع يدخل البيت
*اليومين دي البت الشايلة الشنطة وطلعت منها البندقية الكتلت بيها دكتور بابكر حاااايمة
*اقول ليكم التشكيل طوالي ولا كلو يوم اديكم اسم اسمين من التشكيل؟؟؟؟
*كلها مرة واحدة صعبة عليكم
*جرعة كبيرة
*مابتتحملوها
*لكن عشان ما ابقى ثقيل
*اديكم اسمين تلاتة
*انا في نومتي ديك لمحت ليك كشف الحكومة الجديدة
*مكتوب بخط ينم عن رجفة الكاتب
*الورقة طوووويلة
*وفيها كشط وشطب كتيييير
*وقدام كلو كشط او شطب
توقيع
*التوقيع ماعرفتو توقيع منو
*لكن توقيع بشبه شنب الفار
*عارفكم زهجتو
*لكن داير ادخلكم في الصورة
*واملكم حقيقة الحلمة كاملة
*أها
*لمحت ليك في الورقة ديك
*التوم هجو رئيسا للوزراء
*برطم وزيرا للخارجية
*اردول وزيرا للمعادن النفيسة
*الجاكومي وزيرا للرياضة ورئيسا للاتحاد العام
*تلاتة من الخبراء الاستراتيجيين البجيبوهم في الحدث والعربية والجزيرة
*واحد وزير داخلية
*واحد وزير دفاع
*واحد حرس صيد
*الاستاذة
*من الاستاذة ولي قدام خلوها لعمود بكرة ان كانت للعمود بقية
*لحدي هنا فيكم زول واقف طولو؟؟….
*أها
*نجي لي شمارات والي الخرتوم
*والينا المكلف علينا
*انت عارف انو البت الشايلة البندقية في الشنطة وطلعتها كتلت بيها دكتور بابكر اليومين دي طايحة فينا؟؟؟؟
*كان ماعارف مامشكلة يا والينا
*شمارات الكلب
ننساك كيف والكلب قال استقيل ياثقيل
والي لقاء
سلك
السلك دا عريان اعملوا حسابكم منه