إفادات مثيرة في قضية اختلاسات وزارة العمل

فسادكم يزكم الانف.. ويحرق قلوب الفقراء… ويغضب الرب… ويدخل النار.. وأنتم في غيكم تمرحون… كل البلاد تقدمت برجالها وحكامها… إلا انتم.. لقد دمرتم البلد… وعثتم في الارض فسادا… اهلكتم الحرث والنسل..وقتلتم النفس التي حرم الله إلا بالحق.. ألا تعلمون إن الله بالمرصاد.. وإن الدنيا ضل ضحي.. وكما يقول الزهاد.. الدنيا جيفة وطلابها كلاب.. وانتم ولغتم في في الدنيا حتي امتدت كروشكم.. وانتفخت الاوداج.. وران علي القلوب فقر الشعب.. وجوع الشعب.. ومرض الشعب.. ودم الشعب.. وليس فيكم رجل رشيد.. لا تنقذونا با انقذوا انفسكم من يوم تشخص فيه الابصار.

ما يدور بدهاليز (وزارة التنمية البشرية والعمل ولاية الخرطوم) هذه الأيام :
طبعا حافز (الدعم الإجتماعي) الجماعة الكبار في الوزارة غيروا اسمو وسموهو حافز أداء !!! … قول لي طيب المشكلة وين ؟؟؟ … المشكلة إنو في الشهر اللي فات واللي كان واقع فيهو العيد الناس الكبار اللي في الوزارة جابوا ليهم ورقة ووزعوها لجميع المراكز التي تنتمي للوزارة (مراكز التدريب المهني) مركز{الخرطوم جنوب – الحلفايا – التركي – الحاج يوسف – كرري} … طيب قالوا شنو في الورقة (هم غايتو قالوا الوزير قال) قالوا في الورقة إنو الوزير عاوز يجيبو ليهو ورقة حضور الموظفين لليومين اللي قبل العيد واللي بعد العيد مباشرة … وقالوا لازم أي زول يحضر ويمضى لأنو الحضور حيمشي للوزير … في الواقع الناس اتخضت وحرصت إنها تجي برغم ضيق فترة إجازة العيد وكدا … وقالت أكيد الغياب حيكونوا من المغضوب عليهم أوالضالين … ولما جا وكت صرف حافز الدعم الإجتماعي بعد العيد (طبعا بيصرفوهو بعد 25 يوم من نهاية الشهر) يعني مثلاً بتاع شهر 6 بيصرفوهو للموظفين يوم 25/7 شفتو اللولوة دي كيف … قالوا (طبعا الجماعة الكبار) قالوا الوزير قال إنو في غياب كتير في وزارتو (((الأداء بطال))) إذا مافي حافز اداء … مافي ولا تعريفة !!! … أنا يدابو عرفتا غيرو اسم الدعم الإجتماعي لحافز اداء علشان شنو! … {طيب موظفين المراكز ذنبهم شنو؟ والناس اللي جات في الوزارة ذنبها شنو وحتي اللي غاب ليهو يوم ولا يومين بيتخصم منو حافز الشهر كلو علشان شنو؟} … ثم اختفى الوزير مكوار مع التشكيلة الوزارية الجديدة ودونت القضية ضد مجهول …
الأظرف من كدا حافز الأداء(تسمية الناس الكبار) اللي عمل ليهو جناحين وطار دا بتاع شهر ستة اللي ما فيهو الغياب يعني المفروض حسب سلفقتهم وخمهم يطيروا بتاع شهر 7 اللي حصل فيهو الغياب لكن تقول شنو ؟ حكم القوي على الضعيف …اللي بيعمل في وزارة التنمية البشرية اليومين دي حيحس بإنو تابع بيعيش نظام عصر الإقطاع في العصور الظلامية … هذا غير التجاوزات في الترقية (القفز بالزانة) عادي من الدرجة ال12 ممكن تمشي الدرجة ال8 … الفساد المصاحب لتوزيع فرص البعثات السفرية الخارجية… الإستقالات الكثيرة وخاصة هذا العام 2015م ….لو واحد قال طيب وين ناس النقابة الجواب هو ناس النقابة في وزارة التنمية البشرية والعمل في ولاية الخرطوم زي مهاجم الهلال صلاح الجزولي طيبين جنس طيبة …. وطبعاً قبل كم سنة كدة لي ورا كان في مشكلة في مراكز التدريب المهني الوزارة عطلت حافز الدعم دا زاتو على ما اظن فالناس أضربت عن العمل والشغلانة وصلت الصحافة وكان ناس النقابة واقفين مع الموظيفين لكن اتحلت المشكلة ورجع حافزهم بس بعد داك الناس اللي في النقابة ترقياتهم اتعطلت يعني الناس اللي اتعينو معاهم اترقوا وفاتوا خلوهم ودخلوا في كمية من المضايقات من (الناس الكبار) في الوزارة … وشكلو كدا من القرف الحاصل للموظفين الأيام دي بسبب حوافزهم اللي بتتقلع وبتتأكل عينك يا تاجر الناس حتدخل في اضرابات جديدة عن العمل …