محاكمة الاستاذين يس حسن ياسر علي

يا جماعة الخير.. يا معلمين يا مدرسين .. يا اللى مفروض تكونو قدوه لتلاميذكم وتكونو على مستوى المسؤوليه ومفروض تكونو محترمين فى نظر ألآباء..وزمان وصفكم احمد شوقى بانكم قاب قوسين او ادنى وتكونو فى مصاف الرسل!! والله وبالله وتاالله انى جد حزين على حالكم!!! وين قدامى وكبار المعلمين يا ناس!!!
(1) هو الغلاط فى شنو؟ اليس من الممكن التثبت والتأكد من المبلغ المستقطع من راتب كل معلم لصالح شيكان ان كان خمسه جنيه او تلاته ونص؟كشوفات الرواتب دى فيهاارقام يمكن قراءتها ولا طلاسم؟ اوع تكون “يوسى ماس” يا محمد الشيخ يا مدنى يا ابا القوانين والرياضيات!! وهى كشوفات الرواتب دى ذات نفسها قاعده وين؟ موش فى الوزاره ولا النقابه داساها عندها؟ ,,
(2) وزيرة التربيه ووزير دولتها ووكيللا (الماسكاهو ام فريحانه وما مصدق انو قعد على كرسى قعدو عليهو الرجال الكانو كلمتهم مسموعه ولما يقولوها كلمه الواقف بيظل واقف والقاعد بيقيف والماشى على العجين بيمشى بدون ما يلخبط العجين!!وما فى زول بيتكلم.. هلآ هلآ وين زمن عوض ساتى ونصر حاج على وعبد الحليم ومحمد حسن عبدالله وحسن احمد يوسف!! يعنى لا الست الوزيره ولا الوكيل ولا الوكيل السابق اللى هو قالو نقيب المعلمين ولهط 165 مليون جنيه ..قال حافز اشراف على امتحان الشهاده يا مفترى.. ديل كوولهم ما فيهم واحد دق سدرو (وزير الدوله يدق سدرو مرتين,, المرّه التانيه نيابة عن الوزيره) و يتدخلو لأيقاف هذا العبث اللى بيحصل بين النقابه وبين المعلمين؟
(3) باى نفس وعقل ,, ايها ألأباء يدخل المعلمون الى الفصول لتدريس اولادكم وبناتكم وهم يرون زملاء لهم فى المحاكم وايه السبب؟ ألأنهم احتجوا على استقطاع تم من رواتبهم يرونه بدون وجه حق!! هم المعلمين متعاقدين مع الوزاره ولآ مع النقابه؟ شيكان بتستلم قروشا من الوزاره ولآ من النقابه؟
(4) كشوفات الرواتب دى مين مسؤول عن اعدادها؟ وموش بتتم حسب النظم واللوائح المحاسبيه؟ يا ناس السودان رااااح ان كانت دى وزارة تعليم اولادو وديل مدرسينا ودى نقابتهم..وديل المسؤولين عنها!! ألآباء ليه ما يكونوا لجنة وساطه بعد تقصى الحقائق والتدخل لحل المشكله ان كانت فى مشكله؟قبال ما الأمر كان يصل المحاكم,, هم وين كباركم يا معلمين وياهل السودان؟ فضائح بجلاجل!!!موش احسن تشترولكم كبار (ان فضل فيها كبار) بدل اللى جدعتم ألأنقاذ !!