الفساد يرد ..!ا
ساخر سبيل
الفاتح يوسف جبرا
الفساد يرد !
عزيزي جبرا .. المحترم
تحية طيبة وبعد:
أسمح لي سيدي أن أرد على رسالتكم لي بهذه الزاوية والتى تم نشرها قبل عدة أيام ، بداية أرجو ألا أكون قد تسببت لك وأنت تستلم ردى هذا في (شلل رباعي) أو ما شابه من أثر المفاجأة (وإنتا زول قلب وكده) والمفاجأة هى أنك و(معشر المواطنين) تعتقدون بأنني (شخصية معنوية) لكن الشئ الذى تجهلونه تماما هو أنني كائن حي مثلي مثل كل الكائنات الحية ، أمشى في الأسواق (وأخربها) وأدخل إلى الوزارات (وألغفا) واجلس فى البنوك (وألهطا) وأدلف إلى المؤسسات (فأنشفا) ! وأتربع في المحليات (وأشفطا) .
نعم أنا كائن حي أتنقل وأسافر وأقيم في كل الدول والأقطار ، أمكث فى بعضها إن طاب لى المقام وتهيأت لى الأجواء عشرات السنين (لحدت ما الشعوب تقول الرووووب) ، وإن لم يطب لى المقام ووجدت أن دولة ما (مقفلة اللعب) في وجهى فإننى أكون في تلك الحالة مضطراً لرفع الراية البيضاء ومغادرة تلك الدولة والبحث عن (مأوى مناسب آخر) !
عزيزي جبرا :
لعلك تود أن تسألنى متى (أرفع الراية البيضاء) وأغادر دولة لا تتهيأ لي ظروف العمل فيها ؟ ومتى يطيب لي المقام ويحلو لي البقاء في دولة ما؟ والإجابة على هذا السؤال يا عزيزى جبرا واضحة كما أعتقد (وما عاوزه ليها درس عصر) ، إذ أن فرصتى للعمل تكون شبه معدومة وأتعب غاية التعب وأعاني الإضطهاد و(العطالة وقلة الشغلة) في المجتمعات التي تنتهج أنظمتها السياسية أساليب الديمقراطية وتوسيع المشاركة، لأنو فى الدول دى القوانين كفيلة بردعى وردع كل من يتعاون معي .. كما إنو (دغمسة وغتغيت مافي ) .. وأى عمل (عام) قاعد يتم في العلن والناس كوووولها شايفاهو ومتابعاهو ولو الزول عمل ليهو (شوية فساد سغيروووني) الله قال بى قولو .. وعلى القانون (طواالي) بدون فقه سترة و(أجاويد) وقصة المال (تلتو ولا كتلتو)!
أما عن مسألة (طيب المقام) ومزاولتى لعملي بحرية وبدون أي شوشرة من أحد فأود أن أخبرك عزيزي جبرا بأن الإمور تكون آخر حلاوة عند مكوثى بالدول التى يكون فيها الحكم (شمولي) ومتحكمة فيهو جماعة واحدة لا تمثل عموم أفراد المجتمع الشئ اليخليها غير خاضعة للمساءلة و(تبرطع زى ما عاوزه) وما فيش زول يقدر يقول ليها (تلت التلاته كم؟) ، وبينى وبينك يا أستاذ لمن ألاقى ليا (مناخ) زى ده .. أنا بسوى (البدع) وأظنو براااك شايف (الخط الفي سماهو إتسرق !!) ومنظمة (أصحاب الميمنة) الوهمية بتاعت (المدينة الرياضية) اللذين ذكرتهما كأمثلة في خطابك المذكور لي وغيرهم !
عزيزي جبرا :
لن تجدى محاربتك لي وكتاباتك عني شيئاً .. (إنتا شنو ياخ ؟ أنا الوازع الديني ما قدر يعمل ليا حاجه) .. عشان كده أسمح ليا أنصحك .. يااخ إنتا زول كبير في السن وكمان عيان .. وعندك عيال بتربي فيهم .. يااخ أعمل حسابك وما تقوم نفسك ساااى .. والله تقعد تباري فيني كده يوم يطق فيك عرق يلحقك أمات طه ..!!
كسرة :
نصيحة السيد الفساد دى ما ح أهملا لأنو أثبتت البحوث الطبية مؤخراً أن النفخ فى (قربة مقدودة) سبب رئيس فى إنفجار الشريان الأورطي !!
الأستاذ الفاضل جبرا ,, عرفنا أن السيد الفساد هو أعلي سلطة في تواربورا ,, بس الخوف يكون متزوج من الغنوجة محسوبية بت العجوزة الشمطاء عنصرية,, والخوف كمان تولد ليهو جيروات يقوموا يكملوا الباقي ,, ما أصلوا قالوا لينا البلد بلدنا ونحن أسيادا ,,, ودي ذاتا ما عارفينها تجي كيف ,, مع انو البلد حقت الخالقا,, ولايكونوا كمان دخلوا في حق الله ,, ونحن اصلنا داقسين طوووووووووووووووووووووووووووووووووووووووووووووووووووووووووووالي
ياسيد جبرة ماذا تسمي اهداء رئيسنا الهمام الي مصر 20الف خروف و90%من شعبه يعاني الجوع والمسغبه وكتر خير الحكومه المصريه لانها ستقوم باعادة تصدير الكوارع والاضالفين والكمونيه والروسين بتاعت الخرفان لانهم مابياكلوها وسيتبرعوا بيها لمساكين السودان وكتر خيرهم بس بعدين لمن تجينا العفشه دي ارجو ان يتم توزيعها بشفافيه ومايقوموا يبيعوها لينا:lool:
عسل ياجبرا ربنا مايحرمنا منك
ياخي الفساد ده هو فاااااضي الايام دي لحدي ما رد ليك؟
ما قصر معناها عندو شوية ضمير
يا أستاذ جبرا
صدقنى أنا خايف عليك من الفساد ده…ربنا يستر…ما تكون من ضحاياه
عمك جبرة دبل ورقة البرنسيسة :lool: :lool: :lool: :lool: :lool: :lool: :lool: :lool: :lool: :lool: :lool: :lool: :lool: :lool: :lool: :lool: :lool: :lool: :lool: :lool: :lool: :lool: :lool:
عليك الله ياجبرا المرة الجاية اسألوا عن علاقتو بصرافة قطبي المهدي وهل قطبي سارق ام مسروق ؟ عشان ما نضيع زمن المحكمة – وهل يقطع القاضي يد السارق في الجمهورية الثانية ؟
اطلب منك يا استاذي جبورا ان تتحقق لنا من المشروبات الغازيه و ادارة المواصفات والمقاييس والمعامل اني اري انواع الفساد تسير بارجلها العشره
واضح ان الفساد قد وجد فى السودان مرتعا خصبا فاختار الاستيطان فيه و بنى لنفسه بيوتا حتى وصلت نسبته الى 178% ووجد أهلا و سهلا، و من مقره الدائم يقوم بزيارات أحيانا الى الدول الأخرى و يجرب الاقامة فيها لمدة و لكن فى النهاية لم يطيب له المقام الا فى السودان حيث يسرح و يمرح علي كيفه فى حماية كاملة من الدولة بفقه السترة و الناس "الاتقياء الذين يخافون الله" كما قال أحمد ابراهيم الطاهر بعد أن أجرى تحقيقا لمدة أسبوع فى الفساد ليخرج علينا بعدها ليقول أن أهل الانقاذ ناس أتقياء يخافون الله و لذلك لا يوجد فساد بينهم، و لكن سيدنا عمر بن الخطاب لم يقل ذلك عن الصحابة بل كان يحاسب الولاة و العاملين حتى يتأكد أنهم قد أدوا الأمانة و لم يقل ان الصحابة أتقياء يخافون الله و لذلك لا يوجد داعى للمحاسبة.
والله يا جبره بياخه شديده ما عارف فقدت لمستك ولا الحاصل شنو
من المؤسف حقا ان كل ما تردد فى الصحف عن الفساد العديل كده
لم تتكرم العصابه بالرد عليه طبعا لو كانت حكومه كانت ردت
انما هذه مجموعه من قطاع الطرق
الاخ السيد الفاتح جبره.
ارجوا ان تقبل مني هذا الاقتراح: لتوثيق فتره الانقاذ "لان ليس في العمر بقية" يمكنكم وبعض الاخوه الذين لديهم مستندات بنشر غسيل فساد الانقاذ كله في كتاب واحد ونشره في بيروت.
المكتسبات:
1. توفير الجهد الجسدي والمخي لكم ولنا.
2. توثيق فترة من اقبح الفترات التي مر بها السودان.
3. قفل الباب امام شباب المستقبل من الانضمام لهذة الفئة الضاله.
4. كل الشعب السوداني بما فيه الجبهجية سوف يشترون الكتاب وسف يدر دخل كبير يمكن بة اصلاح حال بعض المرافق والمؤسسات (التعليمية والصحية)