أين ينفق مال الشعب ؟
كمال كرار
انفاق الحكومة الفاسدة والذي كان يساوي 64 مليار جنيه في 2015،متوقع أن يصل إلي 78.5 مليار بنهاية هذا العام،وعجز الميزانية الذي كان 9 مليار جنيه في 2015،متوقع له أن يصل إلي 11 مليار بنهاية السنة.
عجز الميزانية يعني ان المصروفات تزيد عن الايرادات..فماهي وجهة مصروفات هذا النظام،الذي لا يصرف علي صحة المواطن،بدليل إلغاء العلاج المجاني ولا يصرف علي التعليم بدليل إلغاء التعليم المجاني،ولا يصرف علي الخدمات الاخري لأن الناس تدفع رسوم النفايات ورسوم عبور الطرق،وتحفر المجاري بالعون الذاتي،وتجمع التبرعات للوجبة المدرسية ولمرتبات المعلمين.
في ورق الحكومة الرسمي يصرف علي قطاع الامن والدفاع 16.9 مليار جنيه،بخلاف الصرف خارج الميزانية وهو شراء السلاح وغيره.
ويصرف علي جهاز الامن مبلغ وقدره 3.3 مليار جنيه،بخلاف الصرف من خارج الموازنة عليه،ويصرف علي القطاع المتنوع،وهي الطوارئ وما شابهها،ونثريات الوزراء وسفرهم ما يساوي 23.3 مليار جنيه.
وتصرف الحكومة علي القصر الجمهوري وملحقاته مبلغ 3.1 مليار جنيه بنهاية عام 2016،وعلي منسوبيها في الولايات 19 مليار جنيه.
وقارن بين الصرف البذخي أعلاه علي الحرب والفشخرة،وبين ما يصرف علي المجلس القومي للتعليم العالي وهو 18 مليون جنيه فقط لاغير،ومو الامية وهي 6 مليون جنيه،والقومسيون الطبي 4 مليون،وبنك الدم 4 مليون .
وبخلاف الصرف الظاهر في الميزانية فإن الحرامية الكبار ينهبون المال العام،ويحصلون علي الإعفاءات الضريبية والجمركية.
ولو جلس أي منهم علي كرسي الوظيفة الحكومية فالتعيين بعقد خاص،يعادل 10 أضعاف الهيكل الراتبي،بخلاف الامتيازات الأخري،والوظائف المستترة مثل عضوية مجالس الإدارة،والإنتداب وبدل التمثيل .
وكلما احتاج النظام الفاسد للأموال رفع الضريبة علي المواطنين،فالضرائب ارتفعت من 39 مليار في 2015 إلي 48 مليار جنيه في 2016 ،ولكن الاموال لا تكفي التماسيح .
لهذا كان خيارهم رفع اسعار المواد البترولية والكهرباء وزيادة الرسوم الجمركية،وبقية الزيادات في الطريق.
وكان خيارهم تخفيض قيمة الجنيه،وتقنين السوق الاسود للعملة،من اجل الحصول علي النقد الاجنبي ولا يهم انهيار الجنيه،أو الاقتصاد أو إفقار الناس وتجويعهم.
وكان خيارهم رفع الاستعداد داخل القوات العسكرية بنسبة 100% لقمع المظاهرات واعتقال الناس.
وكان خيارهم مواصلة الحرب علي الشعب،وتصفيته حتي آخر مواطن شريف.
ويبقى خيار الشعب،كنس الحرامية حتى آخر مرتشي،والتظاهر حتي إسقاط النظام،والعصيان المدني الذي يرمي بطغمة الإنقاذ في مزابل التاريخ.
ويوم أن يواجهوا مصيرهم المحتوم،سترجع الأموال العامة،إلي مجراها الطبيعي للصحة والتعليم والتنمية والخدمات.
يرونه بعيداً ونراه قريباً سودان حر ديمقراطي،يهتف أبناؤه(حرية سلام وعدالة..والوحدة خيار الشعب).
[email][email protected][/email]
أميييييييييييييييييييييييييييين أنشاء الله يارب…………..من خشمك لباب السماء…….لكن يظل السؤال قائم……من البديل…..لاتقولي ياسر عرمان وجماعته….ديل حايحرقوا البلد !!!!!!!
جهاز الأمن يمتلك شركات خاصة مستحوزةعلى
حق الاستيراد والتوريد والتوزيع على حساب
التجار تدر عليهم البلايين يستخدموها فى
شراء الذمم والصرف البذخىوالسلاح خارج
نظام الدولة.
مالو ياسر عرمان مناضل شريف ولو عاوز كان اغني زول لو انضم للوطني الاحد ما يبقي زي الببغاء البديل البديل دي عبارات وكلمات التخزيل تلبستعملوها هم زاتم البديل عرمان والمهدي وانا وانت وكرار،، كديس افريقيا. يقول. لكم دقت ساعه النصر الي الامام واهم شي نقفل المطار عشان ما يزوغو. المطار المطار
أميييييييييييييييييييييييييييين أنشاء الله يارب…………..من خشمك لباب السماء…….لكن يظل السؤال قائم……من البديل…..لاتقولي ياسر عرمان وجماعته….ديل حايحرقوا البلد !!!!!!!
جهاز الأمن يمتلك شركات خاصة مستحوزةعلى
حق الاستيراد والتوريد والتوزيع على حساب
التجار تدر عليهم البلايين يستخدموها فى
شراء الذمم والصرف البذخىوالسلاح خارج
نظام الدولة.
مالو ياسر عرمان مناضل شريف ولو عاوز كان اغني زول لو انضم للوطني الاحد ما يبقي زي الببغاء البديل البديل دي عبارات وكلمات التخزيل تلبستعملوها هم زاتم البديل عرمان والمهدي وانا وانت وكرار،، كديس افريقيا. يقول. لكم دقت ساعه النصر الي الامام واهم شي نقفل المطار عشان ما يزوغو. المطار المطار
كدي حاول تاجر في السكر
كدي حاول تاجر في الاسمنت
كدي حاول تاجر في اللحمة المصدرة لو كانت حية أو مذبوحة
كدي حاول تاجر في الفحم وأحرق ليك شجرة في غابة
كدي حاول آخد ليك مناقصة أو اي عطاء من الحكومة
كدي حاول استبدل ليك قطعة ارض في اطراف ولاية الخرطوم بارض في قلب الخرطوم
كدي حاول سافر برة بمنحة من الحكومة
كدي حاول اصرف ليك راتبين من جهتين مختلفتين
كدي حاول آخد ليك اعفاء جمركي لاي شي يخصك
كدي حاول اصرف راتبك بالدولار
كدي وكدي وكدي هكذا الكلاب يسرقون البلد !!!!!
والله نحن شعب غريب ……..حكمة الله في الكون هي التغيير ودوام الحال من المحال البديل موجود وحواء السودان لازالت حبلى ……من قال لكم بأنه لايوجد بديل؟؟؟هذه كلمات تستخدم لتخدير البسطاء والمساكين …..ياسر عرمان شخص سوداني أصيل وصدقوني لو أتيحت الفرصة لياسر عرمان أو غيره لما وصل الحال إلى ما أوصلتنا إياه حكومة المـتأسلمين الحرامية والمنافقون و الكذابين …..ولكن الله يمهل ولا يهمل
#خربشة_برلومية:
… #خربشة_الإنتفاضة_3 … خربشتي المره جات بنسق قريب لسلم الأدبيات السياسية بتاعت الأركان ( كولين ) أقدر أقول يعني بالسلم الموسيقي الشعري الفيهو اللحن … ايوا … ايوا … ايوا، ناس أركان النقاش والندوات والمخاطبات السياسية بيكون أستوعبوا الرصه دي زماااااان …ولكم حرية إختيار اللحن لأي مدخل كما يحلو لكم … والناس ما تركز ههههه
… بتقولوا نستغفر …لا طاعة لسلطان … فاقد لشرعيتو …
… #خربشة_الإنتفاضة_3…
مدخل:(1)
بتقولوا نستغفر
سبب البلاوي منو …؟!
بتقولوا نستغفر
العمل الغلاء هو منو …؟!
لا حولة لا قوة
بِقِنا شماعتو …!
شوف التغطرس دا
والله بالغتو
فالحين تعصروا الشعب
وتعيشوا من جيبو
بتقولوا ماف حلول
وسبب الصرف انتو
90 وزير يا ناس
وتزيدوا ماهيتو
و90 وزير دولة
حايم بعربتو
وكم بنود تخصيص
تدخل في محفظتو
بزار وصرف تقيل
من إنتو ما جيتو
وتقولوا ماف حلول
والله بالغتو
لما الخُرم يوسع
ما تزيدوا في قدو
ولو ما بتعرفوا شغل
أخلوا الطرف قدو
الشعب فيو كادر
قادر علي سدو
نحن الصبر لُكنا
وصل القرف حدو
وتقولوا نستغفر
شدو الحزام شدو
الشعب قالوا كفا
لازم يرد حقو
لا أمن لا كجرك
قادر يقيف ضدو
بالكلمة اتحزم
للكاكي إتحدو
لا طلقة لا بمبان
تقدر تشق صفو
ودم الشهيد المات
ما سال عشان هدرو
وقت قراركم حار
وإنتو ما قدرو
شنو الشلاقة إذن
والسيف سنين شفرو
وتقولوا نستغفر
…
مدخل:(2)
لا طاعة لسلطان
ضيع لنا السودان
أرحل كفاك ما تفوت
رأجياك محكمتك
الشعب هو القاضي
جهزنا مشنقتك
وقلنا القرار قاطع
حضرنا ليك كفنك
وراجيك تاني حساب
أكرب براك بطنك
نحن العلينا خفيف
راجياك هناك مهنك
يا جيتنا نص الليل
وثقنا ليك فتنك
شلة حرامية
انت وعطالتك ديل
ضيعتوا للسودان
كرهتوا في الأوطان
الآن أوانكم حان
ياخ امشوا خلونا
سيبونا في حالنا
بباقي أحوالنا
زايدين كمان اسعار
وتقول إستغفار
تباً لكم أشرار
…
مدخل:(3)
لا طاعة لسلطان
فاقد لشرعيتو
بالدين كمان كفار
بتاجروا بدينا
وتقولوا نستغفر
بالله نستغفر
خافوا الكريم يا طير
بتسرقوا في غوتنا
قدام عيونا نهاااار
فقرتو ابواتنا
لا صحة لا تعليم
ولا حتي ياخ بنزين
وعومتوا عملتنا
حجم التضخم زاد
لا عيشة لا كسرة
لا حبة لا حقنة
كل الخلوق جاعت
كل الخلوق مرضت
من سوء إدارتكم
فكونا سيرتكم
وتقولوا نستغفر
تباً لكم حكام
…
مدخل:(4)
لا طاعة لسلطان
حكومتو طاردة الشعب
طفشتوا خِبراتنا
عطلتوا عُملانا
كل الشباب جبنات
من قهوة لقهوة
ومن جنبة لشيشة
مشروع حضاري خطير
وحتي المزارعية
عدموا الوقود والجاز
وقت الحصاد والجد
جانا الجراد والطير
خرب محاصيلنا
لا زهرة لا طابت
إنحت سمسمنا
عطش القمح أزمان
لا سكة لا مشروع
عطلت محالجنا
وتقولوا نستغفر
تباً لإنقاذكم
…
مدخل:(5)
لمين كلامكم دا
بتقولوا نستغفر
نحن الإله زاتو
عارفنا زُهادوا
فُقرة ووُلايا عديل
حافظين لآياتوا
نحن العقيدة صلاح
لبسنا لبيتوا
بتقولوا نستغفر
تباً لفتواكم
نحن البنقلعكم
بإرادة شعبية
برعاية قدسية
…
مدخل:(6)
لا طاعة لسلطان
باع الوطن كيمان
شيد قصور شامخات
خلي الخزينة تراب
وحتي التراب مبيوع
صبح المواطن ضيف
يرقد يقوم بالكف
من بوت جناب الكلب
العسكري الطرطور
والعسكري الطرطور
عامل رئيس يا ناس
الجيش حماية الشعب
وسخت سمعتهم
بدلت قواتنا
بالجنجويد والأمن
والشرطة ناس تأمين
صبحت تخل بالأمن
لا طاقة لا تخزين
عطلتوا صادراتنا
وبتقولوا نستغفر
…
مدخل:(7)
لا طاعة لسلطان
طلع عيون شعبوا
بتغذي من دموا
قاتل ومجرم حرب
رش الكيماوي عديل
أطفال بريئة تمووت
تحرق بدم بارد
في الهامش الطاهر
وكل البلاد هامش
والشعب جد غلبان
وتقولوا نستغفر
تباً لكم سفاح
…
مدخل:(8)
لا طاعة لسلطان
مكن لحاشيتوا
وخط الفقر يا ناس
ما قدرنا ليهو نطول
او حتي ياخ ساكت
فوقاً عليو ننجم
أنت الرواتب دي
أنت الرواتب دي
بتزيدها لناسك
وكل الشعب عاطلين
ياخوان ما تروقوا
وخلوا المهازل دي
إحترموا ياخ الشعب
إحترموا عقليتوا
ما دام عقولكم ماف
نحن اللبن جبنا
من طيرة فوق الجو
حنصدق كلامكم دا
بأنو الزيادة علاج
للدولة ما تنهار
صدقنا ياخ خلاص
صدقنا ياخ خلاص
يا طيرة ما تتلم
شوف لك أخير مهروب
قبل القيامة تقوم
ونهتف هتافنا الحي
ثورية يا خرطوم
ثورية يا خرطوم
ثورية حتي القصر
ثورية حتي النصر
ثورتنا راح تنتم
لو حتي القيامة تقوم
قسماً نجيب الحق
ووقت الحساب نتلم
كل الخلق حتجيك
وبعزة جلال الرب
كيف الصراط حيكون …؟؟!
لزول ظلم شعبوا
لزول سرق شعبوا
لزول كتل للروح
ومعاهو حاشيتوا
وكل الحساب مكتوب
لا عفو لا غفران
بالله ايه رايك
لو في أيدنا انت بقيت
وتاني الحساب راجيك
ما تقولوا نستغفر
نحن العلينا بسيط
خلوهو ينفعكم
الضايقة ديك أصعب
وما أظنوا ينفعكم
ما دام الإله العادل
وناس برلمانك ديل
لا بحلوا لا بربطوا
كلم حمير خايبين
باعيين لذمتنا
بحزمة من برسيم
بتجيز قرارتكم
تباً لكم ديكور
وتباً لأتباعكم
…
مدخل:(9)
لا طاعة لسلطان
أصبح لنا سجان
صانع المزلة سنين
في كل يوم زايدين
رافعين ضغطنا الفار
ما تطيروا خلونا
ما دام هيه غالباكم
أرحل كفاك أرحل
كجشينا خلقتكم
أرحل وفوتنا خلاص
نحن الخلاص جبنا
ثورتنا سلمية
سلمية سلمية
طالعين نجيب الحق
مييين البرجعنا
قول للشوارع ديك
قول للشوارع ديك
نحن الشوراعية
ثورتنا شعبية
ثورتنا ليلية
ثورتنا ضهرية
ثورتنا راح حتم
ولو متنا كمية
وجوه السجون صامدين
إعتقلوا يومياً
إضرابنا ما حيقيف
عصيانا ما حيقيف
كل الخلوق تهتف
نهتف هتافنا الحي
حرية حرية
سلمية سلمية
سلمية وما حنخاف
من الرصاص الحي
حرية حرية
ثورية ثورية
ثورية حتي القصر
ثورية حتي النصر
أحرار ما أتباع
ما بنشتري ونتباع
المجد للأوطان
عاش لنا السودان
حرأ بلا كيزان
تسقط حكومتكم
وتسمو حكومة الشعب
نبني الوطن شامخاً
وطناً كما الأوطان
وطناً لا بلا أخوان
لا طلقة لا دانة
لا عرق لا أنساب
كل الخلق أخوان
نتساوي في الميزان
كل القبيلة وطن
أسمها السودان
عدل ومحبة سماح
جيلاً معافي فلاح
…
مدخل:(10)
بتقولوا نستغفر
أرحل كفاك أرحل
أرحل وفوتنا خلاص
لا طاعة لحاكم
لا يحترم محكوم
لا طاعة لسلطان
ضيع لنا السودان
أرحل كفاك ما تفوت
رأجياك محكمتك
الشعب هو القاضي
جهزنا مشنقتك
وقلنا القرار قاطع
حضرنا ليك كفنك
أسمع هتافنا الحي
وأرجانا في قصرك
…
مداخل نصوص لنص المدخل … وتمت الشخبطة الخرباشية كما لم تنص … لتخرج خربشتي البرلومية #خربشة_الإنتفاضة_3
… بريسدينت مصعب آدم
(8/ نوفمبر/ 2016)
إن عمر البشير علا في الأرض وجعل أهلها شيعاً يستضعف طائفة منهم بالضرائب الباهظة والجبايات والفقر والجوع وغلاء الدواء والعلاج والتعليم والقتل بالرصاص الحي إن تظاهروا على ظلمه، في الوقت الذي يرفه فيه من ينتمي إلى حزبه الفاسد أشد الرفاهية بمشقة الطائفة المستضعفة…إن عمر البشير وجنوده من الخاطئين! قاتلهم الله جميعاً من بشيرهم إلى خفيرهم!
السفاهة هي تبديد المال فيما لا ينفع ومن يقرأ كمال كرار يستطيع الحكم بدقة على النظام الظالم الذي يمسك بتلابيبنا حالياً ويعرف سفاهة أولوياته ويسأل الله مخلصاً أن تنقشع الغمة بزوال هذا الظلم وهذه السفاهة بزوال هذا النظام!