أعز الناس
(هيج رحيلو مع الغروب)
(إحساس غلبني إتحملو)
قلبي إتحسر عليه
وعيني بالدموع إتملو
ما هان عليك
مشوار ربيعنا تكملو
يا سودانا ليه الطيبين
لفراقنا ديمة يعجلو
مش كان الرحيل
تسيبو شوية تأجلو
ديل فرسان النضال
كِملو وخلاص إترجلو
ورغم قساوة المشوار
ما بح الصوت الحِلو
الدنيا عماها الأسي
وبي سوادها إتكحلو
فارقنا النغم الشجي
وين نلقاه ياخ نتأملو
من بعدك خلاص
ما عرفنا إيه النعملو
وآأسفاي علي الحلوين
من دنيانا راحو وعزلو
ليه إنتو يا الزينين
ديمة تسافروا وترحلو
منو البعدكم بكون غناي
وللشعب ديمة يعلمو
السودان بيهتف ليك
دوام عن حبك أسألو
يا نور العين
إنت وينك وين
يا أعز الناس
حبايبك نحنا
كيف ترحل
تسيبنا في محنه
معاك غنينا
ياما فرحنا
وبعدك كيفن
نداوي جرحنا
غبت الليلة
ومعاكا سمحنا
ضعت وضاع
الوطن وقِمِحنا
وآأسفاي غاب
جميل السِحنه
بعد ما دبنا
في هواهو وسِحنا
ياريتنا رُحنا
زمان و إرتحنا
يا أعز الناس
حبايبك نحنا
بلاك السودان
دوام في محنه
[email][email protected][/email]
اللهم أرحمه وأغفر له …
وأرحم كل سوداني حادب على السودان …
غادر دار الفناء …
وأرحم السودان الذي كان وطناً واحداً …
حسين شنقراى لك التحية
بالغت عديل كده فى قصيدتك هذه
والله يديك العافية
ويرحم ورى ويدخله فسيح جناته برحمته
واصبح الصبح والسجن والسجان لسع باقين الله ياخذهم اخذ عزيز مقتدر
لك الشكر … قصيدة جميلة جدا … الله يرحمه ويغفر له ويجعله من أصحاب اليمين … وردى الوطن …