حديث المدينة
وزارة (في عين العدو)..!!
عثمان ميرغني
بعد حمل استمر خمسة أشهر كاملة.. ولدت الوزارة (الجديدة!!).. الأطباء الذين أشرفوا على شهور الحمل كانوا يقولون إنهم رأوا في صور الأمواج الصوتية فتاة رشيقة جميلة جذابة.. وأطلقوا عليها تيمناً (حكومة رشيقة).. ولأن العرب كانت لها مقاييس معتمدة للجمال.. أضافوا للفتاة الرشيقة صفة (حكومة القاعدة العريضة) على قول الشاعر كعب بن زهير: هيفاء مقبلة عجزاء مدبرة لا يشتكى قصر منها ولا طول وكانت المفاجأة الكبرى أمس ليلة ولادتها.. أنها فعلاً (عريضة) (عجزاء مقبلة ومدبرة معاً) عندما بدأ الدكتور نافع يذيع أسماء الوزراء والوزارات وبدا المشهد للشعب السوداني كأنها أسماء في (العرس الجماعي) من كثرة عدد الزيجات.. وزير لوزارة.. لكن العتب ليس على حزب المؤتمر الوطني الذي ظل يحاور ويداور الأحزاب كل هذه المدة ليصل إلى هذه النتيجة.. ولا على وعوده الكثيرة التي وعد فيها بـ(التغيير).. العتب على الشعب السوداني الذي ظلّ ينتظر.. وينتظر الميلاد.. رغم أنّى قلت لكم في هذا العمود.. لا تنتظروا الوزارة إلا إذا كان أبوك.. أمك.. أخوك.. زوجتك.. ابنك مرشح لوزارة.. سوى ذلك فاتبع القاعدة الشعبية الشهيرة (شهراً ما ليك فيهو نفقة.. لا تعد أيامو..) ولكنكم ظللتم تعدون الأيام.. والليالي أيضاً.. للدرجة التي أجبرتم المؤتمر الوطني (يتسربع) فيستخدم جهاز الطلق الصناعي ليلد الوزارة في خمسة بدلاً من تسعة أشهر. هذا التشكيل الوزاري أثبت أن الحكومة أقوى من الشعب.. بعض الوزراء فقدوا صلاحيتهم من كثرة الاستخدام.. لم يخرجوا من المنصب الوزاري منذ أكثر من عشرين عاماً.. كل ما لديهم من خبرة قدموها خلال العقود الماضية.. ومع ذلك لا يزالون يمثلون طلائع (التغيير!).. ينطبق عليهم قول الشيخ أبو سن: (كويس.. إلا.. طول). ووزراء أخرون أكدوا عيانا نهاراً فشلهم خلال السنوات الماضية.. وكان الشعب كله يظن أن المؤتمر الوطني كله ينتظر الفرصة التاريخية ليرحلوا عن سماء وزارته.. ومع ذلك عادوا (فوق عين العدو).. ولا نامت أعين المراقبين. الترضيات توزعت على (15) حزباً .. بعضها لم يكتمل تسجيله (حزبا الحركة الشعبية).. وعلى قبائل وعائلات.. محاولة لإرضاء عدة أطراف ليس من بينها الشعب السوداني.. الذي يعامله حزب المؤتمر الوطني بمبدأ (غضبك جميل .. زي بسمتك).. غضب ليس له أي شبه بغضب الشعب التونسي أو المصري أو الليبي أو اليمني أو السوري.. وغضب الحبيب (كأكل الزبيب). على كل حال.. حزب المؤتمر الوطني هو الحاكم.. والوزارة وزارته.. لكن يبقى السؤال المشروع.. ماهو الهدف من هذه الوزارة التي استغرق بناؤها أكثر من خمسة أشهر.. الهدف حل مشكلة السودان أم الأحزاب .. أم الوزراء؟؟ من سيدفع فاتورة هذا الجيش الجرار من الوزراء ووزراء الدولة الذين بلغوا (66) وزيراً رغم أن الوزارة السابقة بما فيها الجنوبيين (قبل الانفصال) لم تزد عنها إلا بـ(11) وزيراً فقط.. هل نحن في حاجة لكل هذه الوزارات والوزراء.. الإجابة تتوقف تماماً على تخريف الضمير (نحن).. إذا كان المقصود بـ(نحن) الشعب السوداني فهي ..لا أما إذا كان المقصود (الأحزاب).. فهي وزارة رشيقة جداً .. وكان الأجدر أن تبلغ (200) كرسي.. حتى تستوعب كل الأحزاب المسجلة والتي في الخاطر لم تسجل بعد.
التيار
يا هندسه ما وريتنا أخبار صاحبك الوزير شالوه ولا لسه
من حقنا أن نعرف ما يتقاضاه الوزير من مرتبات ومخصصات على الحكومة أن تتحلى بالشجاعة وتنشر في موقع وزارة المالية البيانات المالية لهذا الجيش الجرار من الدستوريين هذه من أبسط الحقوق يجب على الشعب السوداني أن لا يتساهل في هذه القضية هذا يعتبر نهب مصلح حسبنا الله ونعم الوكيل فيك يا عمر البشير وجميع زمرتك الفاسدة.
والراجل رجعوا ليه الكشك ولا لسه ؟
نفس الملامح والشبه خمسة شهور تصبيرة علشان الشعب ينتظر وينسى شوية المرقة للشارع
خمسه اشهر ونفس الشخصيات الفاشلة في كل وزاراتها غي وزارة فيها فساد إبتداء من الزراعة ، والصحة ، والتعليم ، والمالية ، والرياضة ، والطاقة ، وغيرها وغيرها .
الناس ديل شكلهم كدا تاني 20 سنة ح يقعدوا اقنعوا والفيهم اتعرفت .. والفي راسهم كلها طلعوها ما عندهم خطة جديده غير استمرار الحرب وزيادة البنزين المفروض يعينوا وزير واحد ويقوم الصباح ويزيد البنزين وخلاص كل شئ بزيد تبعه
الحكومة الجاية برضو فيها نفس الشخصيات
حكومة امس والليلة وبكره
لا بفوتوا ولا موتو
يحلنا الحل بلة
معتمر قايدو نافع و المشير راجي منه عمار؟
اخبار الاكشاك شنو اليومين ديل؟؟؟
والله يا استاذ ما عندنا مشكلة منو يكون وزير ويتبع لأي جهة خليهم يجيبوا الشيطان بس ينصلح الحال . خلاااااص فقدنا كل طيب من الاخلاق السودانية السمحة بسبب رعونة السياسات الزفت وعدم المعرفة بادارة شئون البلاد والعباد . انا خايف نفقد كل ديننا بعد أن فقدنا جله
اعجبت جدا بمقالك شوف واحد من اتنين يابقيت زول منحاز للشعب السودانى وبعد كدا خليك من مسك العصاية من النص وابقى تكتب عن كيفية التغيير أو الجماعة وعدوك بوزارة وما أوفوا عهودهم عشان كدا من وين جبت الجراءة دى أنا شايف أنت حتى الان الناس ديل ما أدوك العين الحمرا الانت عارفها وإلا بتناور من بعيد عشان كدا ياباشمهندس والله الناس ديل مافيهم خير أحسن خليك صادق مع نفسك اولاً لأن عاقبة المؤتمر الوطنى وخيمة ماتقول الشعب السودانى الطيب داك وشفت بعيونك القذافى مرقوه من ماسورة ضيقة
الرقم 66 وزير ليس مصادفة وإنما مقصود ويعتقد فيه ناس المؤتمر الأونطجي اعتقادا راسخا…فقد سمعت قبل أكثر من عشرة سنوات سأل ناس الانقاذ ست ودع عن المدة التي سيقضوها في الحكم؟ بعدما رمت ودعها قالت ليهم ما دام عبود قعد ست سنوات والنميري 26 سنة الودع بقول إنتو حتقعدوا 66 سنة…ما شايفنهم مطمئنين وبعملوا زي ما عايزين يعملوا في الشعب السوداني الفضل
هو اصلا لمن مافى مؤتمر جامع لاهل السودان و عدم استجابة الانقاذ للاجندة الوطنية الطرحتها المعارضة و تمسكهم بنتيجة الانتخابات اى زول بيعرف شوية سياسة ما كان راجى خير فى حكومة عريضة ولا ضيقة او منتظر ظهور التشكيل الوزارى!!! انتوا ما تدوا ناس الانقاذ ديل 23 سنة اخرى عشان يعالجوا اخطائهم و بعد داك ادوهم 23 سنة تانية كمان عشان تظهر نتيجة اصلاح اخطائهم و اكان لقيتوهم ما اصلحوا حاجة خلال فترة حكمهم و التى تكون امتدت ل 69 سنة بعد داك ارفعوا ايديكم الى السماء و ادعوا عليهم!!!!!!!!!!!!!!!!!!!!!!!!!!!!!!!!! :lool: :lool: :lool: :lool: :lool: :lool: :lool: :lool: :lool: :lool: :lool:
الاستاذ الجليل عثمان ..كلامك جميل و وصف للحكومه الجديده جميل ..
لكن يا أستاذ إذا كنت انت مثال للمثق السودانى منتظر شنو من بقيه الشعب السودانى …
غنت مواقفك دايما ضبابيه و ماسك العصايه من النص ..ومهادن لدرجه انك احيانا تمدح الحكومه ..فإذا كنت موعود بى منصب وحسيت انو طار منك ..الشعب السودانى ما محتاج لى امثالك ….
خلى بابك موارب احتمال اسيادك ديل يحنو عليك ويدوك حاجه ..تلحق تستفيد منها زى ما عمل مامون حميده …احتمال تلحق ليك لهفه كبيره قبل الطوفان ..
لا فض فوك يا استاذ والله انا ما عارف بلد فيها كتاب ينصحون مثلك وما تقدم كيف ؟؟ مع العلم انو ناس الامن كل كلامك دا عاملين ليهو ارشيف \ سبحان الله
ربع البصل ب عشرين الف جنيه وكيلو الطماطم ب اربعه الف جنيه وود الميرغنى دخل الوزاره لاهداف وطنيه خالصه وقرر بعد 22سنه معارضه يصلح من الداخل و الداخل العايز يصلحه عندو حراس خبره 22 سنه توزير وتنوير وتهليل وتكبير والحاقدين بيضيفو تهليب وتهليس ………….. ومافى مشكله طالما الشمس بتشرق كل يوم والنيل بيجرى والكتاحة بتجى والعمارات بتتبنى والداير يغنى بيغنى بس يعرف كيف يصل لكن برضو فى ناس بقو ما ناس من شدة العصر والدواس وفى النهاية يكون عشمنا زى عشم ابو الجعران الداير يعرس القمرا
كلامك منطقى يا مدحت….عشان الدود بيلد الدود
استاذ عثمان ميرغنى : مقالك رائع يعبر عن آراء كثير من ابناء شعبنا الصابر المتصبر الكادح المكدوح … نأمل ونرجوا أن تسعى لمعرفة رواتب ومخصصات وأمتيازات كل مستشار ومساعد ووزير لتنشر و ليعرف أفراد الشعب السوادانى الذين يربطون الصخور على بطونهم جوعا ومغصة كيف يلعب ويستهزءبه ويستغفله ولاة أمره … يرضون الاسياد ووزرائهم الديناصرويين وارضائهم ليس على بالهم .
مقال حلو وجميل ويعبر عن اغلب اراء الشعب السودانى لكن والله ماقادر اقنع نفسى انك بقيت كوز مصلح وقدر مااتذكرك وكوزنتك الزمان اكجنك لكن اقراء لك الايام اصدقك ومتردد المهم التوبة الله بقبلها خلى نحن ناس قريعتى راحت