وصية والد..ماتختلس..!!

لو عينوك جوة النظام..
يا ولدي يوم ..
أو وظفوك في أمرِ عام..
ما تختلس..
خليك أمين..
إيّاك والمال الحرام..
لو راودوك .. أوعاك تلين..
أغروك بالجاه والعرس..
برادو جديدة لا أو مرسيدس..
لا تستكين..أوعاك تلين..
لو ضايقوك.. ما تبتئس..
خليك حريص..
ما تقرب أموال الغلابا..
أهلك الفُقرا ..التعابا..
تلحق الناس القبيل..سالت لُعابا..
لما شافوا المال ده سايب.. بلا رقابة..
ما تغُشك أبراجنا العِلت..
الناطحة يا ولدي السحابة..
يسيل لُعابك زيهم..
هم الزمان.. أشباه صحابة..
صاموا اثنين والخميس..
جاهدوا الروح.. بي صلابة..
فى الجنوب كانوا الأشاوس..
حاربوهم قاتلوهم بي ضراوة..
طاردوهم غابة غابة..
حجوا بيت الله الحرام.. في كل عام..
يا ربي نسألك السلامة..
ينجانا منك يا جهنم ومن عذابا..
ندعو (للأمة) الهداية..
يحفظ الدولة وترابا..
للمولى أسأل واستعين..
إيّاك والفعل النجس..
يغُشك إبليس اللعين.. ليك يفترس..
ينصب عليك شِراكو..
السلطة والجاه واللبس..
ما تختلس..

صحيفة الجريدة
[email][email protected][/email]