صفية .. شرف بلد !!ا
صفية .. شرف بلد !!
بقلم / نادية عثمان مختار
شن نقول !!
يأخي نحنا فترنا قول !!
جد شن نقول ؟!!
دايرة أصرخ وأبكي وجعاً
دايرة أكورك أوووووب عليا !!
عاوزة أضمك خايفة يُمّة
شن بزيح عن صدري غُمّة ؟
وكيف نجيب تار البنية ؟!!
هتكوا عرضك ياعرضنا
يا الأميرة وست أرضنا
وعكّروا الموية النقية !!
نحن وين في ياتو غابة ؟!
وين بلدنا .. ووين شبابها ؟!!
وين بلد سمح السجية ؟!
يا شماتة الدنيا فينا !
تاني عاد شن باقي لينا !!
نبقى شعب أولاد لذينا ؟!
والأمان عند عُصبجية ؟!!
بتي تصرخ كُر عليّا !
أختي تصرخ أوب عليّا !
أمي تصرخ حي عليّا !
الأمان بقى ليه شوية ؟!!
بت جميلة شديد نقية
بت عفيفة وجد ذكية
رفعوا ( إسكيرتيها) عنوة
وعاثوا صلفاً وعنجهية !!
غالية بت الناس حلاتها
شابة سمحة ومرمرية
مابتخاف من ذئب جائع
بت شجاعة وجد قوية !
ورغم حزننا يا صفية
إنتِ معنى العزّة فينا
وإنتِ نار الثورجية !!
إنتِ رمز العفة دائماً
مريم القديسة طاهرة
هزّي جزعنا يا آبية !!
أمسحي الدمع المدفّق
طهّري الجُرح المنوسر
ورُشي فوقنا الصندلية !
نحن ليك دفقت دموعنا
نزفنا وإتوجعت قلوبنا
وبيك فتحنا ملف قضية !!
كيف يجوز يعني السُكات ؟
كيف نقول الفات ده مات ؟
ومات شرف (طب) وعسكرية !!
لا لا يا بتي الجميلة
لا لا يا أختي العزيزة
لا لا يا أمي البهية
لا لا ما بنسكت وحاتك
وبيك بنقوى وبي ثباتك
بكرة تشرق بيك شمسنا
ومابكسّروا رأس وليِّة !!
لمِّي ( إسكيرتيك) وقومي
قُشي دمّك في وشوشهم
وأوعي تقبلي بالأذية !!
غطي ( عورة) إتناوبوها !!
إنتِ مستورة وشريفة
هم جناة وإنتِ الضحية !
رأسك المرفوع هو تاجنا
سنك الفيل إنتِ عاجنا
ونحنا بيك مليون ومية !
أوعي تجفلي يا بنية
بكرة جاي عشانك إنتِ
وتتفتح مليون قضية !!
ديلا هتكوا ( الأمن) فينا
وقدّوا قمصان الصبية !!
ده إغتصاب للأمن ( يخسي) !!
عشة ، مريومة وهدية !!
نحن بندور فجر أخضر
ومعنى أكبر
للوطن والمواطنة والهوية !!
نحنا حقنا يأخي نقدل في بلدنا
ومافي زول يقبض صفية !!
كل زول حُر لو مؤيد
وكل زول حُر لو معارض
والحوار ما بندقية !!
حقي أطلع زي صفية
وزي عشوشة وزي علية
حقي أرفض .. حقي أصرخ
في الصباح أو في العشية !
حقي أرجع بيتي ( آمنة)
دون مساس من ( بلطجية) !!
جيبي حقنا يا صفية
حق بلد حُرّة وآبية
ويلا نرفض يا بنية
إغتصاب شرف المعاني
وإنتهاك نبض الأغاني
من عصابة وأمنجية !!
الله عادل ما بيقبل
ظلم أو فعل الأذية !
القصاص حُكم الله عادل
وأي بت في الكون صفية !!
تستحق فتح القضية
وينتصر شرف البنية !!
ينتصر شرف البنية !!
بسم الله الرحمن الرحيم
ستظل صفية جرحنا الذي لن يندمل حتى يلقى هؤلا الكلاب حسابهم ومهماأندسوا
وتحصنوا سنصل اليهم
لا أحد منكم يتصور مقدار الألم الهائل التي تحملته هذه الفتاة وهي تدفع ضريبة
النضال السلمي
أنها جريمة مدبرة ومتفق عليها وليس القصد أبدا منعها من النضال القصدأصتيادها
وهم الذين يتوفر عندهم المكان المحمي والسيارات التي تخطف والسلطة التي تحمي
وتغطي
ان الشرطة والامن في ظل هذا النظام الفاسد القمعي أرتكبوا كثير جدا من الجرائم
في حق هذا الشعب رجاله ونسائه وبناته ولن تمر هذه الاشياء وسيأتي قريبا جدا وقت الحساب
لتكن صفية قضيتنا ولنضعها في أول أولوياتنا
لابد أن تحس صفية أن لها أخوة يحموها ويغطوها ويمسحوا دموعها
لابد ان تحس صفية أن لها أخوة يموتون من أجلها
فلنكن كلنا صفية
رائعه حقاً , وكفى
(( نبقى شعباً اولاد لذينا))
,,,,,,,,,,,,,,,,,,,,,,,,,,,,,,,,,,,,,,,,,,,,,,
دمتما :
صفية,
نادية
الله اكبر والحمد لله على المكاره
صفيه شرفها غالى علينا
السواى ماحداث
البوليس لبس ثوب النجاسة
العسكر وقف طابور
الصبر الجميل
يا صفية ما فى فايدة
الامن انعدام
العقوبة لازم تكون اعدام صبرا جميلا
المعركة القادمة مع البوليس
بتاع الشرطة الكذاب القال مافى اورنيك 8
الاورنيك قاعد والدكتورة موجودة
اذا قيايل الموضوع كده انتهى تبقى غلطان يادوب انفتح
واسفاه علي شعبا يترنم بلا اشعار فقط هل هاذا كل مانملكه
ام هاذا الوعد الزي قطعوه للشهيد عبد الفتاح واخوا نه
الا يوجد حا مي قانون ابي كريم من خريجي المحامة ليرد الكرامه
فهل من مجيب