جهاز المغتربين ينظم الملتقى الاستثماري للسودانيين العاملين بالأمارات

والله ناس جهاز المغتربين ديل امبارح قبضتهم قبضة..كنت عايز اطلع تأشيرة..
قالو لي امشي طلعو ورنيك تأشيرة اول حاجة..
مشيت وقفت في الصف..اي زول بجي يسأل بتقول ليهو الورنيك ب 15 (الموظفة)
في واحد قدامي يبدو نسى الايصال حقو
ف الموظفة قالت ليهو شيل ايصالك دا بعدين تجو تتشكو وتكوركوا واي وواي…يبدو عمك جعلي حار وحرقتو
ردا ليها دا راجلك البكورك واي واي نحن ما عندنا رجال بكوركو واي واي.. بصوت عالي ولهجة غاضبة.. وضرب القزاز..العسكري جا..حلو المشكلة بعد تحانيس ..بالله دا كلام يصدر من موظفة حكومية؟؟؟
معقولة يعني..دي طريقة؟؟بالمناسبة دا ما موضوعي جاييكم انا
جا دوري ودفعت 15..بعد مشيت منها..لاحظت انو ادتني ايصال بقيمة عشرة جنيهات وفي الورنيك في دمغتين واحدة بقيمة 2 جنيه والتانية بقيمة 2 ونص..ديل 14 ونص..باقي خمسين قرش..وينا.هي اي زول بجيها بتقول ليهو الورنيك ب 15..يا جماعة يا قانونيين افتوني..تصرف الموظفة دي بعتبر شنو؟؟لانو والله زعلتني لمن قالت لي عمك تكوركو واي واي..مع انو طلع راجل وضرب القزاز لمن اتشق..مصداقية لكلامي حسي الليلة لو مشيت المغتربين حتلقى موظفة قزازا مشقوق..
رجعت وقفت في الصف..ووصلت ليها..
السلام عليكم..ياخي انتي بتتطلبي من الناس 15 جنيه في حين انو فعليا بتدينا ايصال ودمغات بقيمة 14 ونص…شوف ردها كان شنو؟
قالت لي حسي انت جاي تسك خمسمية جنيه.شايقي انت..شوف بالله غلطانة وعينه قوية..ولسوء حظها انا جعلي حر..
رديت ليها..انا ما ساكي خمسمية انا ساكي الفساد والاختلاس وحق الناس البتلغفوا فيهو كلو يوم دا..لو كل يوم شلتي من كل زول 50 قرش يمكن يومك يكون بي نص مليون ولا مليون عديل..
في الاخر لمن عصرتها شديد قالت لي الموضوع دا ما مسؤوليتي امشي اسأل الشؤون المالية..
مشيت الشؤون المالية..وارتبكوا جداً لمن سألتهم..قالو لي قابل المدير..
قابلت المدير..وبرضو ارتبك جداً لمن سألتو..قال لي الموضوع بتم بتوجيه من المدير العام؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
اصلو ما خليتهم..مشيت المدير العام.قالو ما ممكن تقابلو عندو اجتماع وانا متأكد ما عندو اجتماع لانو سمعتهم بتهامسو
الزول دا هوا ما تخلوهو يقابل المدير..
في الاخير لمن بقيت اكورك..قالو لي ممكن تقابل نائب المدير او تجي بكرة تلاقي المدير.
خشيت للنائب المدير
اتصورو ردوا كان شنو..
قال ال 50 قرش دي قيمة طباعة الورنيك..يا جماعة الورنيك عبارة ورقة a4
ونوعها رديء زاتو..وبعدين ال14 ونص دي قيمة شنو؟؟ واضح انو دا تبرير سيء منو وعذر اقبح من ذنب..
وبعدين يا جماعة…لو اشتكيتهم يعلقوك في المحاكم 10 سنة..ولو سكت عن الحق ابقى شيطان اخرس…
بعدين يا سادة يا مغتربين ما تبقوا طرش لمن تمشوا جهاز المغتربين اتأكدوا انو الايصالات الا ستلمتها والدمغات تساوي قيمة ما دفعته فعلاً..بعدين عندهم مأكلة اسمها رسوم دعم جهاز المغتربين عبارة عن ورقة ليست بايصال من وزارة المالية..قول ليهم ما عايز ادعمكم هي كانت فترة في بس الناس لاحظوا ليها ووقفت بس مرات كدا برجعوها..

بالله ناس الجهاز ديل مابخجلوا؟ بعد فضيحة اولادنا فى ليبيا لسعه عندهم وش؟ ولا لاقيين المغتربيين ديل (طيور)!! طيب ياشباب اذا اهلنا فى الداخل وقفوا عاجزين للاسباب الكلنا عارفنها لدحر النظام الفاسد ده ومصر على خداع شعبه وابتزاز المغتربين فعلينا اخذ زمام المبادرة ونلقن هؤلاء اللصوص درس لن ينسوه وياحبذا لو بادرنا بدعوة اكبر عدد من الاعلاميين لتشهد طائفة منهم بان كيف سيتم فضحهم وفضح نظامهم الذى اكل مال الشعب بالداخل وكيف انهم يسعون للقضاء على ما لدى المغتربين حتى يحرموا اهلينا المعاش الذى نرسله لهم على قلته- – ومن تخاذل ليس منا-

استثمار ورجال اعمال سودانيين والله لو جهاز المغتربين نظر في قضايا البنات السودانيات بائعات الهوى في ديرة و شحدة السودانيين وعوائلهم في جميرا أمام المساجد كان أفضل لينا كسودانيين و ان نحفظ ما تبقي من ماء وجهنا و علي الاقل نقول القنصلية السودانية في دبي او جهاز المغتربين عمل خير بس ما اظن تنظروا للامور دي لانه شكله الاستثمار منسيكم حاجات كتيرة كما ادعوا جهاز المغتربين لفتح مكاتب تمثيل في جميع المطارات وفي بورتسودان لإنجاز كل المعاملات وذلك لتسهيل خدمة المراجعين و لتوفير فرص عمل لجيوش الخريجين العاطلين