تصريح أشتر ..!!

(ثم أن الأجلاء الذين يديرون دفة إمتحانات الشهادة السودانية ليسوا من السياسيين كأمثال غندور بحيث ( يمشطوها بي قملها)..بل هم بعض نقاء المجتمع الذي لم يتلوث بمؤثرات السلطة والثروة، وقد يكون أصغرهم عمراً وعطاء في دروب التربية والتعليم بعمر غندور السياسي.. ولا يُوجد من هو أحرص منهم في التمسك بشرف المهنة ونزاهتها)
نقاء وأجلاء ونزاهة…. هل أنت تكتب عن بلد غير سودان البشير وكيزانه يا طاهر يا ساتي؟ يا رجل!! إذا فسد رأس الأمر فسد الأمر كله … وعندما يكون الحاكم ظالماً فاشلاً، فاسداً كعمر البشير، مثلاً، ستجد الفساد في كل مناحي الحياة مثلما أنه عندما يكون الحاكم عادلاً كعمر بن عبد العزيز، مثلاً، كف الذئب عن افتراس الغنم!

يمشطوها بي قملها

ده كلام صحافة يا جدعان ….هههه..تسرب القمل إلى مسام الروح قصيدة للعملاق فحلاتي

أعتقد أنت زدت من العيار ضد بروف غندور لمجرد أنو قال أن الحصل هو تسريب وأن الموقوفين عددهم 15.. ياخي ده وزير الخارجية وعارف الحصل أكتر منك تقوم تدمغه بالجهل بالبساطة دي؟؟ ياخي شمت فينا الطلاب الاجانب زاتو.. أنا متفق معاك أن هناك تشويش علي الموضوع ده لأنو البعض بيقول تسريب والبعض الاخر بيقول غش.. يعني وزيرة التعليم قالت مافي تسريب بمعني تسريب لكن كان في حالات غش بإستخدام الهواتف الذكية.. ده كلام وزيرة التعليم.. وطبعاً الحكاية ما تلفونات عادية لأنو الطالب ممنوع يدخل الامتحان بتلفونه.. الموضوع هو أن تلفون الطالب يكون جوة شنطته جنب السبورة البعيدة ديك لكنه فاتح البلوتوث وشابك أجهزة إلكترونية تانية.. يعني أجهزة بلوتوث صغيرة تضعها جوة أضانك وتتكلم بيها مع الناس القاعدين برة قاعة الامتحان كأنك بتتكلم وتوشوش مع الزول القاعد في الكرسي القدامك، وكمان في كاميرات صغيرة دقيقة ممكن تركبها في نص شعر رأسك أو نظارتك أو طاقيتك ومافي زول بيشوفها وهي بتصور ورقة الامتحان وترسلها للناس برة قاعة الامتحان.. أنا زول بكالريوس علوم حاسوب وخبير في الحاجات دي عشان كده عارف البلاوي دي.. هسع حالياً شركة قوقل الامريكية دي عملت نظارات مجنونة كده تكون لابسها كأنها نظارة عادية لكن بتقدر تتصفح بيها الانترنت وتقرأ الاخبار وتفتح الايميل وتصور بيها الحاجات قدامك برمشة من عينيك.. يعني التحكم بيكون برمشة العين ولمسة اليد بس.. يعني كمبيوتر عديل كده لكن في شكل نظارة هههههههههه!!

أنا تحليلي أنو الحصل هو حالات غش (بالطرق الحديثة أعلاه دي) لكن في نفس الوقت فالغش في الامتحانات هو أمر طبيعي وبيحدث كل سنة وما بيستاهل الجوطة الكبيرة دي.. يعني الطالب الذي يغش بيطردوه من الامتحان ويكتبو ليهو صفر وخلاص.. يعني ما بيعتبروه تهديد للأمن القومي(!!!!) إذاً ليه كل الجوطة دي ضد الاردنيين والمصريين؟؟ ياخي كل السودانيين بيغشوا في الامتحانات وأنا أتحدي يكون في مدرسة أو مركز إمتحان ما بيحصل فيهو حالات غش سوداني.. والبخرة بالمناسبة لسع موجودة في الإمتحانات بتاعتنا يا أستاذ الطاهر مش في الثانوي بس بل حتي في الجامعات.

غايتو لا أظن أن الحصل هو تسريب إمتحانات بل حالات غش بطرق تكنولوجية مبتكرة لدرجة أنها لخبطت للمسؤولين رأسهم عديل كده!! نحن السودانيين الهواتف الذكية دي يادوب بدينا نعرفها قبل كم سنة لكن العرب ديل بيستخدموها من قبلنا وبيعرفوا تقنيات حديثة نحن لسع ما عرفناها زاتو (ذي نظارة قوقل دي مثلاً).. ممكن الطالب يدخل قاعة الامتحان من الدقيقة الاولي ويصور كراسة الامتحان كلها بالكاميرا السحرية (اللفي نظارته دي) في ثواني ويرسلها للطلاب بالخارج والطلاب بالخارج ديل يحلوا الامتحان سريع من الكتب والمذكرات ويجوا داخلين القاعة متأخرين شوية (بيسمحوا ليهم بالدخول متأخرين عادي).. ذي دي ممكن بعض الناس يقولوا عليها تسريب لأنها فعلاً تسريب من طالب جوة القاعة لطالب برة القاعة، لكنه تسريب من نوع الغش الطلابي وليس تسريب من وزارة التربية والتعليم مقابل قروش ودولارات والكلام الفاضي ده.. الشهادة السودانية دي من أقوي الشهادات في الوطن العربي وعندها نظم قوية جداً لحمايتها من التسريب وفي جيش من الشرطة بيكون متابع الورق من مكان لمكان والكراتين بتكون مشمعة بالشمع الاحمر لغاية قبل الامتحان بدقائق يعني مافي زول بيقدر يسحب ورقة واحدة.. الحكاية في النهاية غش مش تسريب.. غندور ربما إختلق عليه الامر.. نحن مشكلتنا ما قادرين نفرز بين معني كلمتي تسريب وغش زاتو مع أنو الحكاية واضحة.. فول وطعمية.. الفول فول والطعمية طعمية.

أنا رأئي ما كان في داعي للجوطة دي كلها والطلاب الاجانب المراهقين ديل ما كان في داعي يحبسوهم في السجون الفترة دي كلها وكأنهم هددوا الأمن القومي أو تمردوا علي النظام أو إنضموا لداعش!! ياخي أديهم صفر كبييير وأعلن بوضوح في وسائل الاعلام أنك أديتهم صفر لأنهم غشاشين ومخادعين وخلاص.. كده أنت بتحمي شهادتك السودانية من السمعة البطالة دي.. هسع حكومة الاردن قالت ما حتعترف بالشهادة السودانية عشان حكايات التسريب دي، أها إستفدنا شنو كده بالله عليكم؟؟ ياخي نحن بقينا ذي كوريا الشمالية: صعبين جداً.

أولاد وبنات أجانب مراهقين عمرهم 16-18 سنة نجدعهم في السجون في قضية ذي دي؟؟ عيب والله.

رغم أنفك يا ساتي تم تسريب إمتحانات الشهادة و بيعها لطلاب أردنيين و مصريين و لا يستبعد بعض السودانيين بواسطة شبكة فاسدة من منسوبي النظام الفاسد هذا حقيقة أصبح مفروغ منها و لا داعي للدغمسة و اللف و الدوران و كان من المفترض أن تعاد كل الإمتحانات ، المهم أن الشعب السوداني في انتظار أن تكشف لنا وزيرة التعليم من المسؤول عن هذه الجريمة الكبرى ، أما حكاية كم اعتقلنا من الأردنيين أو المصريين و ماذا سنفعل بهم هذا كلام لا يهمنا كشعب سوداني