نفرة لحس الكوع الكبرى

في حقيقة الأمر فإن الفار كان قد لعب في عب الجماعة تماما ، حينما فوجئوا بدعوة عاجلة لحضور جلسة استثنائية لمجلسهم القيادي ، الذي لا نعرف ماذا يقود ، وقد قيل لهم أن هذه الجلسة العاجلة سوف تكون برئاسة الزعيم شخصيتا …
وسبب لعبان الفار في عبهم هو أنهم كانوا اول امس فقط في اجتماع لهذا المجلس القيادي و إن كان قد ترأسه نايب الزعيم وقتها …. إذن فهي ليست بجلسة عاجلة فحسب ، بل هي جلسة طارئة أيضا ….
كانوا على طاولة الاجتماع في الوقت المحدد تماما ، وعلى غير العادة لم يبدأ الزعيم بتحيتهم كما هو ديدنه … بل تلاحظ لهم انه متجهم الوجه ، عبوسا قمطريرا .. وينظر لهم شذر مذرا ….
الزعيم دخل في الموضوع على طول قائلا :
شوفوا يا جماعة … لقد تلاحظ لدينا حدوث تآكلا مريعا ، بل مخزيا و محرجا في شعبيتنا في الآونة الأخيرة … ما ممكن ندعو لحشد ولا نجد غير بضعة انفار فقط حضورا !!! ..
أيوا نعم … بضعة انفار لا تزيد عن ال 50 حضورا .. وكمان ال 50 ديل كلهم من كوادرنا البندفع ليهم مرتبات راتبة …
والمسألة دي تكررت معانا في مناسبات عامة كتيييرة … يعني نقول شنو للضيوف ، وخاصة ضيوفنا الأجانب من السلك الدبلوماسي وغيره ؟؟؟!!!
نقول ليهم ان حزبنا لم يعد الحزب الملهم و القائد و الرائد الذي تنضوي تحت عضويته قرابة العشرة ملايين من افراد كوادرنا المخلصة ؟؟؟؟!!!
اعتقد ده كلام ما مقبول ابدا و ما ح نسكت عليه بعد اليوم … نحن مالين العالم زيطة و زمبريطة ان 90% من الشعب واقف تماما معانا … وال 10% دي كلها موتورين و مرجفين و طابور خامس …
وينهم ال 90% ديل ؟؟؟؟!!! وين حتى 2% منهم ؟؟؟!!! ليه ما قاعدين يظهروا لينا لما نعلن عن مناسبة عامة تقتضي الحشد الضخم ؟؟؟!!!
المهم أنا جمعتكم الليلة عشان أديكم من الآخر … نحن ما قصرنا أبدا معاكم ، وانتوا عارفين ده تماما .. كل واحد منكم ماهيته متلتلة ، وعربيته على الأقل برادو، وعنده من عمارة لى عمارتين غير البيت الساكن فيهو … والاهم من ده كله إنه نحن بنديكم ميزانيات مفتوحة لحشد الجماهير المخلصة و الوفية …. يبقى بالواضح الفاضح وكده انتوا المقصرين ومافي زول غيركم مقصر … ونحن زي ما قلت ليكم في الاول ، ما ح نسكت على الموضوع ده ابدا تاني ….
ومن أسع بقول ليكم … انتوا عارفين انه نحن بعد اسبوعين عندنا نفرة لحس الكوع الكبرى … و أنا عايز أشوف حشد مليوني في النفرة دي .. أكرر حشد مليوني .. يعني لو نقص الحشد ده عن المليون بالقديم و لو بي نفر واحد ، ما ح يحصل ليكم طيب أبدا … ح أرفدكم كلكم و أسحب منكم فارهاتكم وعماراتكم و ما خفي أعظم .. وكمان ح ندخلكم لجان تحقيق عاجلة و فورية في مفوضية مكافحة الفساد .. أصلو المفوضية دي من ما أسسناها ما قبضت ليها ولا زول واحد …
يلا قوموا اتخارجوا و وروني عرض اكتافكم .. الاجتماع انتهى !!!!!
انصرف الجماعة من الاجتماع بعد انصراف الزعيم ، و وشهم ينعل قفاهم …. لسان حالهم يقول معقول نفرط في مواهينا و فوارهنا و عماراتنا بالساهل كدة ؟؟؟!!…
انبرى كبيرهم الذي علمهم السحر قائلا :
يا جماعة الموضوع دخل الحوش و بقي في تولا … عشان كدة لازم نتصرف بسرعة وباقي لينا اسبوعين فقط زي ما هددنا الزعيم من موعد نفرة لحس الكوع الكبرى .. عشان كدة ما عندنا وقت نضيعه … اقترح انه نتحرك من هنا وعلى مزرعتي في سوبا على طول ، عشان نناقش كيفية المخارجة من المصيبة الوقعنا فيها دي ….
امتطى كل منهم الفواره من السيارات المظللة ذات الدفع الرباعي و التعشيقة الأوتامتيك … وفوووو على مزرعة كبيرهم بسوبا …
وبالتحلق في حديقة المزرعة الغناء حول كبيرهم الذي علمهم السحر .. تم فتح الباب للاقتراحات التي من شأنها أن تمكنهم من حشد هذا المليون …
قال احدهم :
يا جماعة والله محمد احمد ده أتعبنا شديييد … ليه ما بيجي طائعا مختارا للحشود البنعلنها في كافة وسائل الإعلام ؟؟؟!!!
قال الثاني:
يا شيخنا تتوقع شنو من زول ضايقناهو في رزقه و معيشته ، وفي تعليم و علاج اولاده وتوفير العيش و السكن الكريم لهم ؟؟؟!!
قال الثالث:
احسب انني أتفق تماما مع كلام شيخنا السبقني في الكلام ده … محمد احمد العليهو كتيييير و تقييييل كمان … مش كفاية صابر علينا لغاية أسع ؟؟؟؟
قال الرابع:
انا كمان احسب ان المسألة بقت واضحة تماما … لو عايزين محمد احمد يجيكم في الحشد ده من تلقاء نفسه .. أنا بقول احسن تلحسوا كوعكم انتم واسسسسع قدامي هنا ، وقبل ميعاد نفرة لحس الكوع الكبرى !!!…
قال الخامس :
نعم كلام شيخنا ده صاح … مافي أمل في محمد احمد … اظنه ما عايز مصلحته و لا عايز مصلحة اولاده وبلده …
وعشان ما نضيع الوقت ، نقوم طوالي نستخدم الكاش الذي يقلل النقاش … يعني بالعربي كده نعمل حملات من بكرة وندفع للناس مقابل حليفة كاااربة على المصحف انها ح تحضر الحشد ..
يعني ندفع لي مليون نفر كدة عشان نكون في السيف سايد ، والاسامي و العناوين وارقام جوالاتهم تكون مسجلة في دفتر … ده عشان نضمن انه العدد وصل المليون زي ما طلب الزعيم ، وكدة نسلم كلنا من عقابه …
تدخل الرابع مرة اخرى:
ده الكلام المفيد .. بس ما نعتمد على الدفع و الحليفة بس … نعمل ليهم نقاط تجمع في الحتات القريبة جدا جدا من سكنهم ، و نجي ننقلهم من بدررررري بالدفارات الى مكان الحشد ، وكدة نضمن فعلا وصولهم لغاية موقع نفرة لحس الكوع الكبرى ، عشان ما يتفلتوا منا و يزوغوا …
انبرى احدهم :
يا جماعة ده كلام جميل … بس انتوا عارفين انه معظم الناس الح نجيبهم بالقروش ديل ح يكونوا من الرجرجة و الدهماء .. يعني ديل لو خليناهم يقعدوا في الصفوف الامامية ح يعملوا لينا هرجلة شديدة وكده يفضحونا اما الزعيم و ضيوفه الاجانب وامام الكميرات ….
تداخل أحدهم :
يا جماعة دي بسيطة جدا … نحن بي فراستنا ح نعرف منو الفاهم و المتعلم منهم ، ومنو النص نص ، و منوا المنتهي خالص …
عشان كدة نعمل (علَاقات) بي 3 ألوان مختلفة و نعلَقها على رقبة كل واحد منهم … اللون الأخضر للفاهم و المتعلم منهم ، و الأصفر للنص نص .. و الأصفر للمنتهين خالص …
أها بمجرد نزولهم من الدفارات في موقع النفرة ، نقوم نحن نشرف على توزيع أماكن جلوسهم … ناس الأخضر نقعدهم قدام ، و الأصفر في النص .. أما ناس الأحمر ديل يقعدوا ورا خاااالص ….
قام واحد ناطي :
يا جماعة القصة دي وبالشكل ده ح تكون مكشوفة جدا لي ناس المعارضة و أعداء التوجه الحضاري … ح يقولوا نحن بنعمل خيار و فقوس في عضويتنا .. ما عايزين التلاتة ألوان دي تكون ظاهرة كدة ، وكمان معلقة وااضحة على رقبة كل عضو … لازم تكون الالوان دي مخفية ما أمكن ذلك …
وجدتها … وجدتها … وجدتها …
ويلتفت الجميع نحو الشخص البيردد في وجدتها دي … قال ليهم :
فكرة التفريق بالألوان دي فكرة تمام ، لأنه ما عندنا حل غيرها … وعشان تكون مخفية انا بقول ليكم نسوي شنو …
نقوم نجيب القماش الأبيض الخفيييف داك .. ونفصل منه لي كل واحد نشتريهو بالقروش طقم يتكون من جلالبية + عراقي + الشال المخطط و المحبب لنا + سروال ابو تكة … ونخليهم يجيبوا طواقيهم و عممهم معاهم من بيوتهم …
تداخل واحد :
وبعدين ؟؟؟؟
واصل صاحبنا حديثه :
بعدين القصة كلها في تكة السراويل … يعني التكة تكون مختلفة في اللون .. تكة خضراء نصرفها للناس الح نقعدهم قدام ، وصفراء لي ناس النص ، و حمراء لي ناس ورا .. ورا … وكدة الشيطان زاتو ما يكشف لعبتنا دي ….
ضج الحضور بالتكبير و التهليل و التصفيق لهذه الفكرة الألمعية و اتفقوا جميعهم على تنفيذها و بالاجماع الغير سكوتي …
في ساحة نفرة لحس الكوع الكبرى :
بمجرد نزول أخونا سالم وصديقه جابر من الدفار ، حاولا شق الصفوف الهادرة للجلوس في المقاعد الوثيرة الأمامية … لكن نط عليهم واحد وطلب منهم السير خلفه الى أن وصل بهم الى قاع الصفوف الخلفية وطلب منهم الجلوس على الكراسي إياها …
بعد جلوسهما على الكراسي الخلفية لاحظ سالم ان صديقه جابر وقد تجهم وجهه و بدا عليه الضيق و الحنق الشديدين …
سالم :
يا جابر يا اخوي .. انا عارفك زعلان من انه الجماعة ديل قعدونا في الكراسي الورا دي … انت ما فردتي و انا فاهمك كويس .. لكن ياخوي انا عايزك تحسبها معاي بالعقل كدة … أسع كل واحد مننا قبض ليهو مليونين جنيه بالتمام و الكمال .. ياخوي اليقعدونا محل اليقعدونا .. نحن كنا لاقين المليونين دي وين ؟؟؟
جابر :
ياخوي يا سالم انا ما زعلان ابدا من قعادنا الورا دا … ولو قعدونا في كوشة ما بزعل … فعلا المليونيين ديل لو اشتغلنا ستة شهور ما بنلقاهم …
سالم :
طيب ليه وشك متغير كده و الزعل باين عليك ؟؟؟؟
جابر :
انا زعلان من حاجة تانية ياخي …
سالم :
حاجة تانية شنو ياخوي ؟؟ كان على الاكل و الشراب .. أسسسع دي بيجيبوهم لينا .. ما شفتهم بدوا من الناس القدام ؟؟…
جابر :
اكل شنو و شراب شنو .. انا زعلان من حاجة تانية خالص ….
سالم :
الحاجة التانية دي شنو ؟؟؟ قول ياخي … بوظت اعصابي ..
جابر :
يعني انت ما شفت الناس الكانوا بعاينوا لينا معاينة شديييدة كدة بمجرد ما نزلنا من الدفار ؟؟؟
سالم :
ناس منو ؟؟؟ و بعاينوا لينا كيف و وين ؟؟؟؟
جابر :
ياخي ما الناس زاتهم الجونا في بيوتنا في الاول و سلمونا القروش …
سالم :
طيب … بعاينوا لينا وين ؟؟؟
جابر :
ياخي بعاينوا لينا في محلات حساسة شديد … يعني من التكة و لي تحت …
هنا قام سالم مات من الضحك … يضحك ويقهقه لمدة 5 دقايق متواصلة .. بعدها اتلفت ناحية صديقه جابر قائلا :
ياخي ما تبقى زول معقد كدة … الناس ديل بعاينوا لينا المعاينة الوصفتها دي عشان يعرفوا حجم (العضو) و مكانته في التنظيم !!!!!!

د. محمد ابراهيم قرض …