حوار: معاناة اللغة العربية..وفصاحة حليمة كاقا النوباوية

حوار: معاناة اللغة العربية..وفصاحة حليمة كاقا النوباوية

مصدق الصاوي
[email][email protected][/email]

– سمعت حليمة كاقا بتتكلم في اليو تيوب؟
– حليمة كاقا دي ذاتها منو ..؟ الأسامي القاطعنا من رسينكم دي ..
– واحدة نوباوية إضطرت مع الضرب بالطيارات والقتل تنزح لدولة السودان الجنوبي .
– يعني عاوز تقول لينا الحكومة قاعدة تضرب في المواطنين العزل.؟ يعني داير الحكومة تعمل شنو ؟ ما المتمردين بتاعين كاودا قاعدين مدسوسين وسط الحريم ..
– غايتو كده ولا كده دا برهان على تهجير الناس من ضربات الحكومة .. ودا ما موضوعي . انا عجبني كلامها كتير ولفتت نظري لنقطة مهمة ..
– اللهي شنو ..؟
– دي مره نوباوية ، بالرغم بساطتها وعدم معرفتا بالعربية إلا إنها قدرت توصل لدرجة كبيرة معاناتا ومعاناة أهلها من الضيم الواقع عليهم من الآلة العسكرية الحكومية …
– طيب إنت من زمان ما قاعد تتكلم عن اللغة وتهاجم في هيمنة اللغة العربية …
– والله فعلا الكلام بتاع حليمة دي وراني بإنو كلامي دا ممكن يكون فيهو شئ من الخطأ وشيئ من الصواب…
– الاعتراف بالخطأ فضيلة. الله يهديك للباقي …!!
– أنا من زمان بقول يا الله ناس أمي وعماتي وخالاتي ديل قاعدين يفهموا كلام الجبهجية الكلو لغة عربية فصحى؟ .. زمان كان أغلب كلام السياسيين بالدارجي لكن ناس الجبهة دخلوا الفصاحة بالعربي في أي حاجة …
– طيب المشكلة شنو …كونو الناس تجود لغتها العربية..؟
– ياخي إحنا هنا بنتكلم عن أجهزة ومسئولين في دولة بيخاطبوا في مواطنين ، فيهم الأمي والمتعلم . بتخاطبهم في صميم معايشهم البسيطة ، دي عاوزالا لغة عربية فصيحة؟
– ………………………
– فإدا كنا إحنا العاملين نفسنا عرب ومتعلمين بنشك في فهم أهلنا ، ناس حليمة ديل يكون حالم كيف..؟
– إنت براك ما قلت المرة فاهمة وإتفاصحت بالمحكمة الجنائية الدولية … وكل الهضربة بتاعتكم ديك
– وفعلا دا الشيئ الغريب .. كان دل على شيئ يدل على إنو المرة دي ذكية قدرت بالرغم من نقص ومحدودية معرفتها بالعربية قدرت تربط ما بين معاناتها والمحكمة الجنائية ..
– يعني ..؟
– يعني إذا كان الكلام دا بيصلها بلغتها الأم أو في أسوأ الأحوال بلغة عربية دارجة بسيطة مش كان ممكن نسمع منها كلام اكبر من كدا.؟
– …………………………….
– المواطن البسيط دا عندو إمكانات كبيرة في مجالات كتيرة بس ما لاقيا الوسط والجو اللي يفجرها ..عارف الحكم دا يا إما ما عندو ثقة في إمكانات البسطا أو عاوز البسطا ديل يقعدوا كده في حالم لغرض ما في نفس الحكم ..
– اللغوسة دي كلها عاوز تفهمنا بأننا نسيب لغة القرآن ونعلم الناس الفارغة ؟ عشان بكرة الناس كلها تسيب الدين وإنتو تلقوا الفرصة تلحسوا عقولم بكلامكم الفارغ دا ..؟
– وهل الإيمان ومعرفة القرآن مرتبطة بتعلم اللغة العربية أو فرضها قسرا على الناس.؟
– ايوه فهم الدين والإيمان مرتبط ارتباط وسيق بمعرفة اللغة العربية .. دي عايزالا درس عصر؟
– طيب ايه رأيك في المسلمين الباكستان والهنود والإندونيسيين والأتراك والماليزيين ..الخ. فيهم ناس زي الأتراك مثلا الإسلام وصل ليهم قبلنا بمراحل وفيهم كمان كانت الخلافة لكن بالرغم من كده فضلوا لحدي الليلة محتفظين بلغتهم الأصلية وبإسلامهم.
– طيب بنفهم من المحاضرة دي أيه ..؟
– هل إختل الإيمان عند الأمم دي نتيجة ضعف معرفتهم بالعربية ..؟ هم مش كل يوم والتاني ببرهنوا إنهم إسلامم وإيمانم أحسن 100 مرة من جملة الدول العربية ، كان زمان كان هسع..؟
– ….؟؟
– وكمان في نفس الوقت محتفظين بلغتهم الأصلية اللي بتسهل عليهم فهم الأشياء من حولهم .. العلوم .. السياسة …الخ
– ….
– والله شوف إحنا الطلعنا مساكين … لا لمينا في لغة عربية توقف سخرية العرب مننا ولا لمينا في إسلاما قوي ومتين زي بتاع الناس ديك ….
– ……………………
– الكلام دا بخلي الزول يفكر يا الله هل اللغة في السودان وسيلة من وسائل الفرز والتمييز والهيمنة لصالح جهات ضد جهات ؟
– زيتنا في بيتنا … تفسر وتبني إستنتاجات على قدر تفسيراتك …!!
– خلينا من دا إنت ما لاحظت بإنو اللغة مجال فرز في الدراسة مثلا..؟
– زي شنو مثلا…؟
– زمان لمن كنا في الجامعة في السنين الأولى كان الطلبة المتفوقين، وخاصة في الكليات العلمية ، من طلبة الكمبوني .. لأنهم كانوا بيجيدو اللغة الإنجليزية. دا بالرغم من إنهم ما كانوا من اوائل الشهادة وبالعكس كان معانا اول السودان وكم واحد من اوائل الشهادة السودانية لكنهم ما جابو نتائج كويسة في السنين الأولى لأنهم ما كان بجيدو اللغة الإنجليزية . بس بعد السنة التالتة الجماعة ديل ، اللي ما اصابو فيهم الإحباط ، بدأ يتفوق تاني وكان تخرجهم بدرجات جيدة جدا. يعني هنا معرفة اللغة مجال فرز غير منصف…!!
– ………….
– برضو إدا جيت وطبقت نفس الكلام على التوظيف والخدمة المدنية حتلقى كتيرين ضاعوا بسبب عدم إجادتهم للغة العربية يعني في ناس ادكياء في مجالهم ضاعت عليهم وعلى البلد إنو يستفيد من خدماتهم. والمشكلة إنو ما عندهم فرصة تانية زي الجماعة اللي قلنا اتفوقوا متأخرين في الدراسة الأكاديمية..
– هسع باين ليك أحسن لحليمة بتاعتك دي تتعلم العربية ولا الإنجليزية مثلا؟
– خليك من حليمة هسع دي إنت المتعلم كان قلنا ليك احسن نديك تقوية في علوم العربية ولا تتقوى في معرفة الإنجليزية بتختار ياتو ..؟ العالم بقى قرية صغيرة والمزاحمة في الوظائف كل يوم حتكون اشد وبكرة (كان ما الليلة) العربية براها ما حتأكلك عيش حتى في المملكة العربية السعودية .. لكن في النهاية دي خيارات بتحددها رغبات الشعوب .