ده آخر كلام (…) قالته قبل خروجها من البيت ووفاتها
بتي وجعتني شديد ..القتلها ربنا ينتقم منه شر انتقام
(ست النفور) طلعت من البيت ضاحكة وباسمة رجعت جثة
كانت بتنزف بغزارة من خدها حتي بعد تكفينها
فقدت بنت وولد قبل ست النفور الان وجعي كبير
شقيقتها : الموجودين علي رأس الدولة كيف مايعرفوا القاتل؟
عدالة السماء أقوي حنلقي حق اختي وكل الشهداء
العايز يبرئ نفسه يبرأها لكن كيف يبرأها أمام ربنا
حوار : محاسن أحمد عبدالله
منذ أن وضعت قدماي علي حوش منزلهما بمنطقة أم القري شمال الكدرو وجدت الحزن يرسم ملامحه في كل جدران ذلك المنزل البسيط الذي كان شاهدا علي تفاصيل وحياة الشهيدة (ست النفور).
استقبلتني والدتها بمزيج من الحزن والصبر، كانت طويلة القامة كسا الشيب شعرها كما كسا الحزن ملامحها الممزوجة بين الحدة وحنية الامومة ،كانت عيناها ششعان بالحزن والألم ،بدأت خطواتها ثقيلة وهي تجتر آلاف أطنان من الوجع.
جلست معها داخل غرفة كانت تتصدرها شهادات (ست النفور) التي تؤكد تميزها العلمي.
بدأت حديثي معها عن آخر لحظات لابنتها (ستو) كما تحب ان تطلق عليها حتي مغادرتها المنزل وسماع خبر وفاتها وكثير من التفاصيل عن حياتها
تحدثت معي الا ان عيناها كانت مليئة بالدموع لم تتوقف عن البكاء حتي نهاية الحوار ..نتابع ما جاء علي لسان والدتها المكلومة..
# بداية…حديثنا عن آخر لحظات لابنتك (ست النفور)قبل مغادرتها المنزل ؟
كان اليوم اربعاء حوالي الساعة ٨ قالت لي يا أمي أنا طالعة مشوار وما بتأخر برجع اشرب القهوة في البيت ، ما كنت عارفة انها طالعة موكب ، بتي طلعت باسمة ضاحكة لابسة عباية عادية حتي ما شايلة شنطة في يدها غير تلفونها ، فعلا طلعت لكن علي غير عادتها اتأخرت اتصلت في تلفونها لكن مافي رد حتي المغرب بعدها بديت أقلق شديد قلت ياربي بتي مشت وين ؟ وبقت قاعدة منتظرة لحدي ما جاني الخبر
# من الذي جاءكم بخبر وفاتها..وكيف كان حالك وقتها ؟
بعد صلاة العشاء مشيت الدكان وأثناء ما انا راجعة قابلني ولد بتي هالة قال لي في رجال منتظرني في الباب فعلا لقيتهم واقفين سلمت عليهم ، واحد منهم قال لي عايزين الحاج فعلا دخلت ناديته قلت ليه في ناس واقفين ليك برا، طلع ليهم اتكلموا معاه بعدها دخل البيت شال تلفونه وطلع سريع قلت ليه مالك الحاصل شنو رد لي (دي ست النفور) طلعت وراه قال لي ارجعي .
# كيف تلقيتي الخبر ؟
بعدها جأة وبدون مقدمات بتي صرخت بصوت عالي قالت لي (يا امي ست النفور ضربتها رصاصة وماتت) وقتها كنت في الشارع تاني لا سمعت لا شفت حاجة الدنيا ضلمت في وشي ، بعدها جاء الجثمان الناس كانت كتيرة جدا حاولت أتمالك نفسي عشان ادخل عليها في الغرفة لكن غلبني دخلوني ليها وهي ممدة جثة بنفس عبايتها والدم في كل جسمها ،فتحتها قعدت قصاد رأسها سلمت عليها وغسلت وشها من الدم كان في خرم كبير في خدها مكان الطلقة نزف حوالي جردلين دم طلعنا ملابسها ولسه الدم بينزف الي ان بردناها وكفناها الدم برضو ماوقف.
توقفت عن الحديث لحظة باكية وهي تردد (حسبي الله ونعم الوكيل ،حسبي الله ونعم الوكيل )
# ماهو ترتيبها بين اشقائها…هل لديك أبناء غيرها ؟
ست النفور نوارة البيت كانت أصغرهم عمرها ٢٣ سنة اتولدت هنا في ام القري ،عندي هالة وفدوي وولد واحد خارج السودان، قبلها كان عندي محمد عمره ٢٣ سنة كان تاجر في السوق العربي اتوفي وبعد ٩ شهور من وفاته توفت بتي ليلي في الولادة ، الحمدلله الان انوفت ست النفور الما يرضي فيها الهبشة كنت بنتظرها لمن تتاخر لحدي ما ترجع البيت.
بدأت نوبة بكاء أخري ثم واصلت
:(ماقادرة انسي طلتها في البيت ودخلها ومرقتها وحركتها مع صحباتها بيكونوا معاها دايما في البيت ، ما حصل زعلتني أي سمح عايزها لي البيت أي حاجة سمحة بتجيبها لي بتقول لي يمة انا عايزة راحتك مافي زول بزعل منها طيبة ومجاملة تحترم الكبير والصغير مافي زول بشبها نهائي.
# وظيفتها ؟
كانت شغالة في مستشفي بحري قسم الطواري والإصابات كانت بتسعف الجرحي في المواكب ،
درست كورسات مختلفة ولغة إنجليزية ودورات متخصصة ترافق الاطباء في بحري في منطقتنا هنا في ام القري تضرب الحقن وتركب الفراشة الأكسجين ، كانت زولة مجتهدة ومثابرة حتي انها قدمت أوراقها للعمل في السعودية وتم اختيارها لكن بعد شنو؟
# علاقتها بالمشغولات اليدوية؟
كانت بتعمل مشغولات يدوية زي زخرفت الشيلة وتزيين وتغليف حاجات الخطوبة بصورة جميلة ،كانوا يطلبوا منها طلبات من مناطق مختلفة توصلها بنفسها ،كمان بتشتغل في تصميم وتطريز التياب
# ماهي الإجراءات القانونية التي اتخذتمونها؟
ماعندي علم بأي شئ متابع ابوها شكواي لي رب العباد ينتقم منهم شر انتقام.
# رسالة أخيرة؟
شاحادة ربي الضرب بتي ست النفور التقع فيه تقطعه حته حته كوريك مايخمه وكفن مايلمه وقبر مايلقوهو ليه بتي صغيرة وجعني فيها الله يوجع قلبه.
شقيقة ست النفور تعلن عن غضبها
من جانبها تحدثت هالة الشقيقة الكبري للشهيدة ست النفور عن كيفية تلقيها خبر الوفاة :( وقتها ما كنت حاضرة جيت تاني يوم من بيتي في الكلاكلة كانت الكباري مقفولةسمعت الخبر الساعة واحدة ظهر لانه يوم الوفاة تحديد ما فتحت التلفون نهائي .
مواصلة :( خبرها صادم علينا كلنا فجعتنا ووجعتنا ما عندنا حاجة غير نقول حسبي الله ونعم الوكيل في أي جهة مسؤولة عن قتل اختي ،حسبي الله ونعم الوكيل فيهم ،كيف القاعدين علي راس الدولة ومسؤولين من الشعب مايعرفوا القتلة ؟ ماعندنا غير نقول ربنا ينتقم .
اختتمت هالة :( العايز ينكر ينكر والعايز يبري نفسه يبري لكن عند الله تقدر تبرئ نفسك ؟ دم اختي وكل الشهداء بنلقي حقهم عند ربنا يوم القيامة وعدالته فوق كل شئ بندعي ليها في كل صلاة ربنا يرحمها ويغفر ليها وللقتلة بتقول حسبي الله ونعم الوكيل فيكم.
