قصيدة بعنوان اللبد وشارك في العصيان

اللبد وشارك في العصيان
طالب وطالبه وسيد دكان
ستات الشاي…
اسياد الفطنة
وسمح الراي
سواق الحافلة
وساقي المويا
افندي جسور
استاذ ولعيبة
مطرب وفنان….
اشان البلد البح
سكاتو
اشان النيل
الطال في سهادو…
اشانك يمه
ويابا الفضحك عوزك
وقعدت تلاهي
اشان الخيبة
النسجت فينا…
وخلتنا دلاهي…
يمرق صوتنا …
حسيس
وفرايحي
ما ناوين لخرابك سوبا…
نحن نوينا نعز حبوبة
واسم الوطن
الصار متواهي…
سكتنا عليك يالغول الغاشم…
صبرنا خلاص
ونهايتو ملاحم….
نحن الشعب القرا العالم….
نحن سكتنا اشان نتفاهم….
مافي فارغة فتحنا الفيس….
ولا شمشارة
فاضي الكيس….
نحن جسارة…
حضارة الدنيا…
نحن سبقنا الناس
للميس….
احسن ترحل….
صمتي رخيص
بكرة أن صحت
نهايتو وطيس
……..
سكوتنا رسالة …
طيب وجسارة….
مروقنا حقارة…
نهايتو مغارة
تغور في داهية…
وحالتك واهية
والف خسارة…
انت خسارة البلد الاولى
انت العيب
والشين منكورة..
انت فضيحة البلد الصاحية
ياممحوق
وديتنا في داهية…
ف نحن عشان اصلنا طيب
هادي رسالة
اكتب وقيد
وقفت طالبة …
طالبة جميلة امبارح
سألت بابا
بصوت متصالح..
انت يابابا …
صحيح
الناس الدايرة تصارح…
ممكن تسكت
وصمتها جارح…
ايوة يا بابا
وفرحة بكرة…
نحن سكاتنا
صوت زمارة بتعزف فكرة..
وان جازفنا وقمنا مرقنا…
صعب نتراجع..
وعدوكي بجازف…
خرم الابره

حيدر الشيخ هلال
الاثنين ٢٨/١١/٢٠١٦
#العصيان_المدني_السوداني_في_يومه_الثاني

[email][email protected][/email]