(ميدهاني تسفامريم بيرهي)

[CENTER][/CENTER]

(ميدهاني تسفامريم بيرهي) .. أريتري الجنسية ..
جا داخل الخرطوم .. مفلس .. يائس .. وأمورو كلها جايطه ..
حلمه الكبير ومشروعه المستقبلي .. يمشي أوروبا ..
بس ما أستطاع إليها سبيلا .. دايره كاش تقيل .. ومخاطرات ..

أها (ميدهاني) ماشي في قلب الخرطوم ..
يشلت في حظو والعلب الفاضية ..
وقفت جمبو عربية جهاز الأمن .. كـف لفحوه وأتخارجوا ..
و(ميدهاني) ما فاهم شي ..
تاني يوم جابوه البيت .. فتشوا البيت قلبوه قلب ..
و(ميدهاني) برضو ما فاهم شي ..
رجعوه مكان أحتجازه ..
طاااااااخ أنت (الجنرال) ؟؟؟
و(ميدهاني) في رقبتو كايس للجنرال عشان يخارجو أوروبا ..
المهم ..
أتصالات مع الأيطاليين تلاتة يوم ..
واليوم الرابع (ميدهاني) مصنقر جوه طيارة .. وتووووشك (روما) ..

الليلة (الجمعة) حيعرضوه للمدعي العام الأيطالي ..
وحيخضع لجهاز مضاهاة الصوت .. يقارنوا صوتو مع صوت
(الجنرال) المسجل بمكالمات سابقة ..
والأكيد أنهم حيكتشفوا أنه ده ما (الجنرال) ..
وبعداك يشوف هو داير شنو منهم ..
حيعوضوه كيف وحيعتذروا ليه كيف ..
و أيطاليا مشهورة بأشطر وأفسد محامين وقضاة تعويضات ..
وياخ حتى كان ما عوضوه ..
أقل شي بلقى ورق رسمي وبيت وراتب وحماية .. وشهرة ..
و(شهرة) دي هي القروش زاااااتها في أوروبا ..
لا تهريب لا كداري في الصحراء .. لا زوارق الموت في البحر ..

ربك البقسم الارزاق ..
إيطاليا تكوس ليها .. وأيطاليا تكوس ليك.

محمد أحمد (ودقلبا) – فيسبوك