ساخر سبيل – لو عندو فكك !
الفاتح جبرا
لا حول ولا قوة إلا بالله .. نطقت بها لا شعورياً مثنى وثلاث وأنا أتابع الخلاف الذي دار بين إدارتي (مستشفيين حكوميين) وهما إدارة مستشفي النو وإدارة مستشفي البقعة والذي للمرة الأولى أعرف أنه مستشفى أم درمان ولا أدري ما سر هذا الوله في تغيير الأسماء فمستشفى أم درمان( مما قمنا) ياهو ده إسمها .
كل فريق من المستشفيين يتنصل من أي تقصير قام به و (يدرع) القصة في الفريق الآخر ، القصة وبإختصار كالآتي :
? الساعة الثامنة صباحاً : جيئ بشخص وهو في غيبوبة كاملة إلى مستشفى النو بعد إصابته في حادث مروري .
? الساعة 12 (بعد 4 ساعات) كتب مدير مستشفى النو خطاب تحويل إلى للمريض لمستشفى البقعة يوصي فيه بعمل صورة مقكطعية للمريض مجانا لعدم وجود مرافقين معه حيث أن هذه الصورة غير متوفرة في مستشفى النو
? الساعة 4:10 عصراً ( بعد 4 ساعات تاااني) تحرك الإسعاف من مستشفى النو يحمل المريض
? وصل المريض بالإسعاف إلى مستشفي البقعة وهنالك قام المدير الطبي بالسؤال عن تقرير حالة المريض فإتضح أن المريض خرج من مستشفى النو دون تقرير وعند سؤال طبيب الإمتياز المرافق عن الحالة قال أنه لا يعلم عنها شيئاً .
? الساعة 8 مساء : (بعد أربعة ساعات تااااالت) : تم عمل صورة الأشعة للمريض (بعد أجاويد) !
تعليق :
عليكم الله ده إسمو كلام؟ المريض ده لو عندو (فكك) في كراعو مفروض يكون مات !!
من فوائد حدوث القصة الفوق دي (كان فيها فوائد) إنو عرفنا إنو علاج الحوادث (ما مجاني) وإنو لو الزول عمل حادث وما معاهو أهلو (أو مرافقين ليهو) دي مشكلة لأنو المستشفيات ما ح تقدر تعالجك وتقوم باللازم ، عشان اللازم ده عاوز قروش وإنتا جاي براك مافي زول ح يدفع ليك … يعني إذا حصل ليك حادث ورجلينك إتكسرو (مثلا) يجب أن تمشي بي رجلينك (المكسرات) ديل ذاااتم وتكلم أهلك عشان يمشوا معاك المستشفى …
? ليه ؟
? شنو ليه؟ إنتا هسه لو مشيت تطلب بت براااك أهلها بيدوك ليها؟
? لا طبعن .. إلا يكونوا معاي أهلي
? خلاس المستشفي كده .. كان مشيت ليهو براك عامل حادث ما بسعفك إلا يكونو معاك أهلك !!
? يعني قبل ما أعمل حادث أكلم أهلي أقول ليهم تعالو أنا ح أعمل حادث؟
? لا طبعن مااا تبالغ .. لكن بعد الحادث ما يحصل ومهما الضرر والإصابات الحصلت ليك لازم تمشي تكلم أهلك يرافقوك !
الحاجة التانية (العرفناها) إنو ولاية الخرطوم دي كووووولها فيها جهازين بتاعين أجهزة مقطعية لخدمة المواطنين ، يعني لو قلنا ولاية الخرطوم دي فيها عشرة مليون مواطن فالعشرة مليون قصاد الجهازين ديل بس !! (هسه دي ولاية عليكم الله يتحللوا فيها) !!
الحاجة التالته عرفنا مما دار في الصحف والفضائيات بشأن هذا الأمر بأن المريض المذكورإحتمال كبير يكون قد حدث له قطع بالنخاع الشوكي وذلك من طريقة حمله وتحريكه والعبدلله يضيف لذلك (الإسعاف ذاااتو) و (نقالات الحديد) المستعملة في معظم مستشفياتنا فمعظم عربات الإسعاف (فاضية) لا فرق بينها وبين (بكاسي السوق الشعبي) التي ينقل عليها (الخضار) أما (نقالات الحديد) فلو كنتا محظوظ وطلعتا من حادث ممكن (يجيك تيتانوس) !
كسرة :
جهازين أشعة مقطعية (بس) في ولاية فيها ستين ألف حرامي (أنظر تقرير النائب العام) … !
? كسرة تصريح النائب العام : (لا حماية لفاسد ولا كبير على القانون) … في إنتظار ملف هيثرو (ليها شهر)!
كسرة جديدة لنج : أخبار كتب فيتنام شنو(و) يا وزير المالية ووزيرة التربية والتعليم شنو(و) … (ليها ستة شهور)
? كسرة ثابتة (قديمة): أخبار ملف خط هيثرو العند النائب العام شنو؟ 94 واو – (ليها سبع سنوات وحداشر شهر)؟
? كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو؟ 53 واو (ليها أربعة سنوات وستة شهور)
الجريدة
الحوادث بالنسبة للمريض مجاناً ولكن ليست مجاناً لأهل المريض وذلك حسب توجيهات عمر البشير مش زمان عمر البشير قال تأشيرة الخروج مجاناً طلعت مجاناً في جوازالسفر لكن لازم تدفع الرسوم في ورقة صغيرة غير الجواز انت قائل ناس الحكومة ديل مغفلين
كسرة تصريح النائب العام : (لا حماية لفاسد ولا كبير على القانون) ياجبرة كسرة النائم العام دى أستلما بشــة بعد دا لازم تخلى طرف النائم العام
ما قصرت أخونا الفاتح .. غايتو قدرت نوعا ما أحضر جزء من ذلك البرنامج بسودانية 24 ( للنقاش ) لكن ما قدرت أكمل تلك الشمطة .. فعملية تفقع المرارة ..لوفضل فيها شىء .. طولنا بالخارج عن البلد .. لكن لا يمكن يكون مستوى الإنحدار وصل لهذا المستوى .. جهازين لولاية كاملة لملايين من البشر !!!!الله يجازى الكان السبب .زالله المستعان
مستشفى البقعه ده مستشفى خاص قائم فى جزء من اراضى مستشفى امدرمان
مستشفى النو مستشفى حكومى لكن شغال بمكنة مستشفى خاص
فعلا مافى اى علاج مجانى فى المستشفيات الحكوميه سواء كان للطوارئ وللا للاطفال دون 5 سنوات
حسبي الله ونعم الوكيل
يعني تاني الواحد وهو طالع من البيت يكلم أهله عشان يجو المستشفى (صنبهار) قبل الحادث لا قدر الله عشان الواحد ما يشيلوا من نقالة ل نقالة وانا خايف تبقى درداقة…
أه اه اه يا بلد ما ليك وجيع……
للامانه فى اجهزه مقطعية كتيره فى البلد و المستشفيات الخاصه معظمها فيها جهاز اشعه مقطعية. بس مافى حاجه مجانى
الحوادث بالنسبة للمريض مجاناً ولكن ليست مجاناً لأهل المريض وذلك حسب توجيهات عمر البشير مش زمان عمر البشير قال تأشيرة الخروج مجاناً طلعت مجاناً في جوازالسفر لكن لازم تدفع الرسوم في ورقة صغيرة غير الجواز انت قائل ناس الحكومة ديل مغفلين
كسرة تصريح النائب العام : (لا حماية لفاسد ولا كبير على القانون) ياجبرة كسرة النائم العام دى أستلما بشــة بعد دا لازم تخلى طرف النائم العام
ما قصرت أخونا الفاتح .. غايتو قدرت نوعا ما أحضر جزء من ذلك البرنامج بسودانية 24 ( للنقاش ) لكن ما قدرت أكمل تلك الشمطة .. فعملية تفقع المرارة ..لوفضل فيها شىء .. طولنا بالخارج عن البلد .. لكن لا يمكن يكون مستوى الإنحدار وصل لهذا المستوى .. جهازين لولاية كاملة لملايين من البشر !!!!الله يجازى الكان السبب .زالله المستعان
مستشفى البقعه ده مستشفى خاص قائم فى جزء من اراضى مستشفى امدرمان
مستشفى النو مستشفى حكومى لكن شغال بمكنة مستشفى خاص
فعلا مافى اى علاج مجانى فى المستشفيات الحكوميه سواء كان للطوارئ وللا للاطفال دون 5 سنوات
حسبي الله ونعم الوكيل
يعني تاني الواحد وهو طالع من البيت يكلم أهله عشان يجو المستشفى (صنبهار) قبل الحادث لا قدر الله عشان الواحد ما يشيلوا من نقالة ل نقالة وانا خايف تبقى درداقة…
أه اه اه يا بلد ما ليك وجيع……
للامانه فى اجهزه مقطعية كتيره فى البلد و المستشفيات الخاصه معظمها فيها جهاز اشعه مقطعية. بس مافى حاجه مجانى
يا اخوانا ساعدونا بالصبر ، في الأيام القريبات الفاتت ، تم تكريم وزير الصحة ، بتاع نظرية القعونجات ، الراجل مجتهد وبيعمل اقصى ما عندو . إن شاء الله سوف يكون عندنا أحسن المستشفيات في الخرطوم وحيكون العلاج مجاني ، والما قادر يصل المستشفى ، يتصل على الدكتور وهو يجيه لغاية عند البيت ، بس ما ينسى يرسل للدكتور موقعه على الـGPSC وحاضرين.
الصبر جميل ، الآن ناس بورتسودان يستمتعون بماء النيل النظيف الرايق ، بعد وعود بشه لهم. أصبروا
يا اخوانا ساعدونا بالصبر ، في الأيام القريبات الفاتت ، تم تكريم وزير الصحة ، بتاع نظرية القعونجات ، الراجل مجتهد وبيعمل اقصى ما عندو . إن شاء الله سوف يكون عندنا أحسن المستشفيات في الخرطوم وحيكون العلاج مجاني ، والما قادر يصل المستشفى ، يتصل على الدكتور وهو يجيه لغاية عند البيت ، بس ما ينسى يرسل للدكتور موقعه على الـGPSC وحاضرين.
الصبر جميل ، الآن ناس بورتسودان يستمتعون بماء النيل النظيف الرايق ، بعد وعود بشه لهم. أصبروا