«الفلول» يهددون بإغلاق شرق السودان بالقوة المسلحة

يا ست الشاي: كدي يا اختي روقي المنقة واخدي ليك “كباية شاي” بزنجبيل وخلينا “نقلي” الموضوع دة براحة في “الطوة”. يا اختي الكلام القالوا الكوز اياه مسجل في فيديو وحتى الناس الحاضرين ومن بينهم موسى هلال واضح انهم كيزان ولا داسينها. صاح؟ يبقى حكاية اى اقليم عاوز ينفصل دي نخليها على جنب لانو دي محاولة واضحة – لاستغلال – قضية شرق السودان كذريعة وحجة يعبروا من خلالها بني كوز من “الكوشة” الهم قاعدين فيها لبرة. خلينا من قحت وما ادراك ما قحت. الناس ديل كلامهم واضح وقال شنو “نمشي نطلع الاسد الفي السجن واخوانه”. عليك الله يا بنت امي انتي مقتنعة بإنه دة أسد؟ وينو الجنوب ووينها حلايب ووينها شلاتين؟ لما اتلحست الاسد كان نائم ولا شنو؟ وكدي اخدي ليك جعمة وكلميني عن حكاية التدخلات الاجنبية التي قلت نحن كنا في غنى عنها. منو الفتح الباب قدام التدخلات الاجنبية؟ وهل بتعتبري دخول اسامة بن لادن وكارلوس وغيره الالاف من الاجانب اللي حضروا للسودان – تحت عباية الدين – دة ما تدخل اجنبي؟ ولو قلنا دة ما تدخل اجنبي تقولي شنو عن قوات الامم المتحدة الكانت قاعدة في دارفور؟
شوفي يا ست الشاي: لانك – قديمة – الواحد بفترض فيكي الحكمة. الناس ديل كيزان راح ليهم الدرب في الموية وشعروا بإنوا كله مؤامراتهم ووساخاتهم وعمايلهم الخبيثة من فتن واقتتال قبلي كلها راحت في الهواء والاتفاق النهائي اللي حيوقع بإذن الله قريبا يعني النهاية بالنسبة لهم فما لقوا قدامهم غير “قشة” شرق السودان عشان يمسكوا فيها ووالله انا اتمنى انهم ينفذوا الشىء اللي بخططوا ليهو عشان تكون دي الضربة القاضية اللي ما تقوم ليهم بعدها قائمة. اها يا بت امي بعد دة ختي ليكي سفة. ودعتك لله.