قالوا نفير
لما النيل الساكن
يبقي دمير
قالوا نفير
كيف ما الغرقان
إيهاب وعبير
مسكين الهامش
إن شاء الله يطير
—–
نبكي الخرطوم
إن ماصت طوبه
مسكينه جبال النوبه
الما خبروا دروبه
يومي يا ناس مضروبه
وما حدي يجير
قالوا نفير
——
ماتوا النوبه
ومات أدروب
والدارفوري
كتال وحروب
وضمير الأمة
الصحي يا دوب
لما السيل إتحدر
وهيثم قال الروب
هبوا كبير وصغير
قالوا نفير
——
يا شعبا ساكت
ومجلود بي مطرق
خلي الخرطوم التغرق
وباقي البلد التحرق
شن الشعب
الفي خوفو إتمرغ
والهمه إن شاء الله تطير
قالوا نفير
——
عنصري قولوا
فينا وشكو
والما حكا ضهرنا زمان
أبدا ليو مانحكو
نوحوا الليلة
كتير وإتبكو
ما تجونا براكو تتشكو
أصحوا وفوقوا
ومن أوهامكم إتفكو
إما الحزن الواحد
وإما الفرح الواحد
ولا وطنا ندكو
ولابد التغيير
قالوا نفير
——
ما تقولوا الخرطوم أجناس
مات القلب الكلب
البقوا حراس
مات اللابس أهلوا
عشيرتو مداس
وخرطوكم ناسا ما ناس
القاعد تحت الضل
ما بنبح جرقاس
مات فيهم
كل ضمير
قالوا نفير
——
قالوا نفير
العالم كلو
تعالوا عيال
الهامش ولينا إزلو
موصوا الحزن
الفيكم وبلو
أنسوا الماتو زمان
أنسوا الكانو أعيان
أنفرو والكل سودان
طال ما المركز غرقان
هل يارب جاديين
أم بينا إتسلو
أم ليهم تبرير
قالوا نفير
قالوا نفير
[email][email protected][/email]
ليست القضيّة بهذه الرؤية الضبابيّة
هم(سودان مصغّر)نهضوا لأعانة من هم حولهم دون تمييز
ومع ذلك حوربوا وصودروا من قبل خونة الوطن خوفا من تكاتفهم
هل تعتقد أنّ الأمن سوف يتركهم يتحركون نحو مناطق الهامش؟
إذا ليكن في كلّ حلّة وقرية ومدينة مجموعة (نفير ) خاصة بها
يومئذ لايستطيع الكيزان ضربها أو إختراقها ، فتكون عونا وشرارة للخلاص
آمل أن أكون قد فهمت مقصدك خطأ فعهدي بك
مناضلا من أجل الحريّة والخلاص من الشموليّة
كل اطراف السودان عانت من التهميش و ليس دارفور وحدها و الجماعه ديل في حدود امكاناتهم هبو لنجدة الموجودون بالخرطوم لماذا تنظر للمسأله بنظره عنصريه كل السودان اهل المفروض تحي تلك الجماعه و نطالب بكل الناس بكل بقاع السودان بتشكيل مجموعات نفير و تتلاقي جميعا بدلا من احباط هذه المجموعه الكريمه فرق بين العداء للحكومه و كل الناس كارهاها ما انت براك و بين جهود هذه الجماعه
شاعر الثوره يطرح أسئله مشروعه