أحسب أن !ا
ساخر سبيل
أحسب أن !
الفاتح جبرا
[email][email protected][/email]
هذا ويقام المأتم بمنزل الفقيد بين خطى طول (38.24- 21.4) دقيقة، وخطى عرض (8.45 – 23.8) ?.. إنا لله وإنا إليه رأجعون.. قدمنا لكم سيادتي وسادتي مستمعينا في كل أرجاء الكون الفسيح نشره أخبار الوفيات من الأذاعة ( الكونية(
فور سماع نبأ الوفاة تقاطرت الجموع من كل أنحاء الكون الفسيح يعتصرها الحزن والألم والأسي .. نعم.. أخيراً تم نعي ( المرحوم) رسميا بعد رحلة شقاء وعذاب وألم وجحود ونكران من أبنائه.. مات المرحوم بعد فشلت كل المساعي في علاج جراحة النازفه.
– المرحوم كان بشتكي من حاجة ؟
– هسع لمن مات وإلا زمان؟
– زمان كان عندو شنو وهسع الحصل ليهو شنو؟
– والله المرحوم كان زمان كويس وفي أمانتى الله ? عندو شوية مضاعفات بسيطة وأولادو القاعدين هنا كانوا قاعدين يعالجو فيهو وشوية شوية قعد بتحسن .
– وطيب الحصل شنو بعد داك ؟
– الحصل إنو عندو ( أولادو) تانين (فجأتن) جو قالو العلاج دا ما بنفع وعاوزين يعالجوهو بى (كتاب الله) و (الرقية الشرعية) عشان ينقذوهو ، قاموا ( زحوا) اولادو القاعدين يشرفوا على علاجو واستلموا هم المسألة والحاصل براك شايفو
– بإستغراب) شنو يعني أهملو فيهو؟
– والله ما أشتغلو بيهو شغله.. همهم كلو في (العقود السرية) والحسابات (الخارجية) والمدن الرياضية والخطوط (الجوية) والتقاوى والأقطان والما بعرف شنو !
– أها و ما قاعدين يصرفوا على البيت؟؟
– عليك أمان الله ( البيت) من عدم ( الصرف) بقت حالتو صعبه.. يوم الكهرباء قاطعة.. يوم المويه قاطعة.. يوم أكل مافي.. ( الأولاد) خلوا المدرسة عشان المصاريف
– وأولاد المرحوم التانين ديل ساكتين كيف ؟
– والله ما سكتو .. لكن تقول شنو بعد قروش أبوهم كلها (إتلغفت) وحالة ( أبوهم) بقت خطيرة والبيت بقى ما بنقعد من عدم ( الصرف) عليهو.. كلهم الاغترب إغترب والقاعد عاطل بدون شغل قاعد اليوم كلو (مركلس) و(الفكت منو) قعد ليهو في ( صينية) !
– وأولادو العاملين عاوزين يعالجوهو ديل هسع وين ما شايفهم في الصيوان.. يكونوا مع الجثمان في المستشفى
-جثمان شنو عليك أمان الله مما قالو ليهم ابوكم مستحضر واحدين سافرو ليك ماليزيا وواحدين مشوا ليك بانكوك وواحدين الأمارات !
– وبعد الحالة ما وصلت كدا جيرانكم ديل ما قاعدين يساعدوكم؟
– يساعدو منو ؟ أي قروش يجيبوها لينا ( تتلحس) أول بأول?
– طيب ما يجيبوها أكل .. ومعلبات ( يغيثوكم ) بيها ؟
– عليك أمان الله يجيبوا المعلبات الليلة.. بكره تلقاها قاعدة تتباع في (سوق ليبيا)
– والله ديل ناس عجيبين خلاس
– أقول ليك حاجة هسع دا مش البكاء بتاع أبوهم عليك أمان الله البرسلوهو يجيب ( الخضار) تلقاهو طلع حقوه بره.. والمشى جاب (التلج) تلقاهو ختا ليهو كم (لوح) زيادة.. والمشى أجر ( الصيوانات) تلقاهو عمل ليهو (فاتورتين) .. ( مواصلاً) أنت قايل المرحوم دا مات بالساهل؟
– هسع قلت ليا اولادو ديل كلهم سافروا وللا في ناس منهم قاعدين عشان نديهم الفاتحه؟
-شوف المسافرين ديل خليهم ماخلاص مسافرين ? لكن أنا أوريك القاعدين ? شفت أي زول لونو (رايق) وفاتح ولامع وجضومو ( نايره) و ( مدغلب) ولابس نضيف وسايق ليهو عربيه جديدة وفاخرة وعندو (العلامة ديك في جبهتو) .. دا وأحد منهم أديهو الفاتحة طوااالي..
– وطيب أولادوا التانين أعرفهم كيف؟
– أولادو التانين تلقى الواحد منهم قاعد يكلم في روخو و( عضام وشو طالعة) ولابس ليهو جلابية ( شربانه) وفيها كم ( فتق) ولابس ليهو في كرعينو ( سفنجة) مقطعة وألا مركوب مقدد وعيونو (ورمانه) من البكاء
تركت ( محدثى) وذهبت إلى بداية ( الصيوان الكبير) حيث كان فى مقدمة ( الصيوان) أولاد المرحوم (المرتاحين) يقفون صفا من كل جانب يستقبلون ( كبار الزوار) والوفود الأجنبية.. المعزية.. وهم يلبسون الجلاليب (الزبدة) البيضاء .. والشالات (المطرزة) والعمائم (التوتال الأصلى) يتكئون بيد على عصى (الأبنوس) المزركشة (بالعاج) وباليدالأخرى على (المسابح) متعددة الأشكال والأنواع ? وقد إنتهزها (واحد منهم) فرصة فقام بوضع تربيزه فاخرة أمامه عليها دفتر وقلم لإستلام الكشف (ما بالعملة الصعبة وكده) ! بينما كان أولاد المرحوم الآخرين بثيابهم المتسخة (المكرفسة) يقومون بتقديم الشاي والقهوة والماء البارد للمعزين وهم في حالة الحزن والشحوب والإعياء ..
بعد صلاة المغرب تم تفكيك قطع الصيوان على الأرض حتى تستخدم لأداء الصلاة عليها.. وبعد أن قام الجميع بأداء صلاة المغرب وبينما كانت أسرة المرحوم تتداول حول من سوف يقوم بإلقاء (كلمة الأسرة) بعد أن تم رفع الفراش تقدم (واحد من الجماعة) نحو الصدارة :
– بسم الله الرحمن الرحيم وبه نستعين والصلاة والسلام على أفضل المرسلين سيدنا محمد وعلى آله وصحبه أجمعين .. أيها الجمع الكريم (أحسب أن) :
– (صوت يقاطعه) : إنتو تاااني .. هو بلا (أحسب أن) بتاعتكم دى الكتل المرحوم شنو؟
كسرة :
(أحسب) أن البركة فينا (إن شاء الله) وجزاكم الله كل خير !!
كسرة ثابتة :
أخبار خط هيثرو شنو(ووووو)؟
و صاحبك المسك الكشف بكون بعد الصلاة ما لقوه ………………
الله يديك العافية استاذنا جبرة…. فشيت جزء بسييييييييط من غبينتناااااااا .. اقول ليك,,, انا خايف ما نلقى مكان نعمل فيه العزاء… (ما باعونا وكدة………..)
خلاص يا عمنا اخيرا عملت العزاء اليوم من زمن الخط ما كان تعمله ليه عملتة اليوم والبلد ضرب فيها واحد في الشرق ما معروف الضربه منوا وكيف . علي العموم الدوام لله وحده واحسن الله عزائكم وخلوا بالكم من اخوكم الكبير . الراح ما بيرجع وسيبكم من البكاء وانفضوا الغبار عن هدومكم وادفنوا المرحوم قبال ما يعفن في ايديكم وتبقي الحكاية صعبة عليكم . الشئ التاني الاخوان بتوعكم اللي هم اصحاب سيماء في وجوهم ديل ما اخوانكم ديل ابناء سيد ابوكم مش ابناء ابوكم خلوهم يشيلوا التركة ويخلوا ليكم قطعة الارض تلمكم . وارفعوا وكيلكم لله .
انت الحكاية شنو خلاص وصلت انك تفقد المريض زاته ما كفاية فقدت الخط وسالناك كتير عن اللالوب بتاع هجليج ما اديتنا خبر الحكاية شنو ؟
الحمد لله فكيتنا من حكاية الخط ديك جابت لينا الجلاء ……………. (الجلاء من البلاد قريب )
انا من اولاد المرحوم لي زمن قاعد افتش على صينية ما لاقى تصور بقت الصينية الواحدة فيها 3 اولاد مرحوم و يوم والتاني يجوا ناس المحليةوناس النفايات يشيلوا منهم المعلوم الصوانى غرقت مع الجنيه الظاهر وطارت مع خط هيثرو هو في صوانى في البلد ؟
حسي انا لافي صينية افتراضية ساكت ودة طبعا جريمه في حق اولاد المرحوم الزي حالاتى – صينية لله يا مرطبين
مبالغة
الرحوم هو السودان ونحن اذ ننعى انفسنا اولا وثانيا نعذى الكادحين والشرفاء ونظيفى اليد من الشعب السودانى ولا عزاء على المدغلبين الفاسدين وامثالهم كثر ناس الاقطان وناس الاوقاف وناس خط هيثرو وناس الدغمسه وناس احسبه وناس التقاوى والناس الوقفوا لجنه التحقيق وناس القبليه والجهويهو
انشاء الله يفهوا ، مقال فى منتهى الروعة شخص الحالة بكل دقة
ياستاذ انت قاصد شنو بي كلامك ده ؟
سيدي العزيز الفاتح جبرا نفسي أعرف هم ليه عملوا عزاء ماكان يعملوا ذي ولاد عمنا الصومال لما مات قالوا العزاء ينتهي بمراسم الدفن ….اووووه إتزكرتا إحتمال عشان الكشف
1
يا الفاتح جبرا إن شاء الله يجبر كسركم ويعظم اجركم اها الصدقة متين ؟
ياجبره ياخ ماتشوف لينا كسره متحركه او ان شاء الله عند اللزوم لموضوع حلايب والله قسما الموضوع هارني شديد
كفيت وو فيت يارائع لك منا كل الود …
يا أستاذنا جبرا
شوف لينا كمان حكاية :
* الحراك السياسي
* جرت مياه تحت الجسر
* ربما …( ربما دي حصريا لخالد ساتي بتاع مواطن صحفي والود الأسمو مامون بتاع الشروق )
* في الحقيقة نحن لما جينا ( ودي بناعة بتاع البتاع )
فهمت يا جبرا ولا أجي أقلع ليك ضرسك ؟؟
عرفناهو الميت .. الوطن وولادو الببكو نحن المشتتين في الغربة …
في الصميم ياجبرة وكتر من النوع دا ..
اخوي الكريم ود جبرة
لكم العزاء ولنا كذلك في فقدكم الكريم والله يرحمة برحمته الواسعة فقد كان من قبل كريما جوادا ومعطاء وفارس زمانه .. والله يلعن اولادو المرتاحين ديل علي ما سببوه له من اذي حتي مات بالقهر
الفـــــــــــــــــــــــــــــــــاتحة … آآآآآآآمين
والله ياجبرة احسب ان بتعمل لى تهيج فى المصران الغليظ ووجع نوايط كمان
ياخى إنت عسل با جبرة وياريت لو تكتب لينا يومى إنشاءلله سطرين نتصبر بيهم
ههههههههههههههههه قوية جدا يا استاذ بس عندى بعض الاضافة
زمن يطلع حقو من مشوار الخضار و يشيل كم لوح تلج ده ولى خلاص هسى الواحد فيم بشيل حق الخضار كلو و يجيب ليك شوية خضار منتهى و يشيل 10 الواح تلج و يخلى واحدو لا اتنين للصيوان.
الجماعة يدفعوا فى الكشف 100 جنيه و هو يسجلها 40 و يشيل 30 لانو من العاملين عليه وكده.
فى كشف تانى فى الديوان الجوا بس ما فى زول شافو لأنو بنودو سرية.
لمن جا وقت الصلاة واحد من اخوان المرحوم مشهور بالتقوى و الصلاح و قيام الليل و ترتيل القرآن بصوت عذب قام عشان يصلى بالناس.واحد من الجماعة النضفين نهروا و زحاهو بعيدو جا وقف قدام و قبل قال ليهم (اقيموا الصلاة). بعد داك قال ليهم ( استووووووو) (انت ياخى اطلع لقدام شوية و انت يا اب فميص اسود ارجع لورا و يا اللابس الجلاابية المشرطة امشى الصفوف الورا و انت يا البتغنى ما تصلى معانا زاتوووو). عمك كبر و بدا الصلاة و صوتو اعوذ بالله و شغال خرمجة سااااكت الجماعة يشيلو و يصلحو فوقو و بعد الفراغ من الصلاة قبل و قاعد يعاين عاوز يعرف الكان بيصلح فيهو منو. بعد شوية جا واحد من ورا قال ليهو هاك دى اللستة بتاعت الناس الكانو بيصلحو فيك.
كسرة
البركة فينا و فيكم و الفقد واااااااااااااااااااااااحد
ملحوظة عدد حروف الالف كلمة واحد 23 .
والله شكلو الموضوع فار خلاص تصدق أنا رحت بيت العزاء ما لقيت اي واحد من عيال المرحوم…..شلت الفاتحة مع روحي علي روحي…..وجزاكم الله خير وما نجيكم في وحش ابدا
أحسن الله عزاكم ..
مبببببدع مبدع استاذنا جبرا
ده السودان زاتو ونحن اولاد المرحوم البيزعوا فى الشاى ؟؟؟؟؟؟؟؟؟؟؟؟؟؟؟؟؟؟
اخوانكم اولاد ابوكم اخدوا جزء من الحوش وفرزوا عيشتم
خلوهم بالله ماتكابسوهم فى القسموا ليهم الله
والله المرحوم ده السودان والجماعة المرطبين ناس حسب ديل جماعتنا الطيبين التانين براكم بتعرفوهم اى هم بقية الشعب الطيب الكريم
عمي جبرا بلد سائب ???
الله يرحمك يا سودان العزة ،،،
قبل 23 سنة قالو سودان العزه يتقدم
وبعد 23 سنه سودان العزه يتهدم … والكيزان ملوك بالدم … ويتقسموك بالطلاق وحرم
انا لله وانا اليه راجعون
آآآآآآآآآآ او او او او يا حليلوا آآآآآآآآآ وو ووو وأأأأأأأأأأأأأأأأأأأأ
استغفر الله العظيم.
ابونا اتوفى…الموت حق…بس أمنا لسة قاعدة…ماتقوم تمشي تعرس فوق راجلها خصوصا لما يكون الراجل البديل عربي اصيل ودمو نقي شدييييييد….ياجبرا مامغصتنا
ووب علي من احسب ان0000 طوالي بتجيب لي خمه النفس وذكريات الوحم
والله دى قوية
ادينا منها انشالله هََد
هو الجماعة لحسوا اى شى انحنا قاعدين حارسين شنوووووو؟؟؟؟؟؟؟؟؟؟؟؟؟؟؟؟؟؟ظ
احسب ان ….. ويمكن القول…. بان الوطن والمواطن لا قيمة له في دني الانقاذ… الا تعرفون التجار…. تجار المواسم الذين يخزنون السلع …. حتى اذا ما نزل المطر وانقطعت السبل… باعوا للناس عند الحاجة الماسة بما يشاءون…..
هؤلاء هم تجار البشر… واستغلال الانسان …. الى ادنى حد ممكن…. هذا ما تفعله الانقاذ … بالمواطن……
اما علموا بحديث الني صلى الله عليه وسلم ( ما آمن بي من بات شبعان وجاره جائع الى جنبه وهو يعلم) …..
بل ان الانقاذ تذهب الى ابعد من ذلك …. من حرمان الناس من حق الحياة وتلقي مساعدات الغير…
الله اكبر …. الا ان النصر لقادم لا محالة….. اللهم عليك بالرقااااااص وزمرته… اللهم لا تغادر منهم احدا….. اللهم ارنا فيهم عجائب قدرتك….
لا عزاء للسيدات
الفاتح جبرا كعادته دائماً كتاباته ممتازه ( ماشاء الله) نقول والله المستعان أصبروا يا أهل السودان إن مع العسر يسرا وعسي الله يخلصنا من ناس الإنقاذ و يريحنا من بطشهم و ظلمهم و جبروتهم و يومئذٍ يفرح المؤمنين ، اللهم ارفع غضبك و مقتك عنّا اللهم ارفع غضبك و مقتك عنّا آمين آمين آمين و صلي الله علي حبيبنا محمدٍ و علي آله و صحبه و سلم تسليماً كثيراً و الحمد لله رب العالمين.
يا زول هوي أعمل حسابك لا قدر الله ما نقوم نشيل الفاتحة فيك
يأجبره المره دى بالغت عديل. كده وانا مشيت سوق ام درمان. واشتريت لى عامود اكل. وحفاظة مويه. وحفاظة شاى. لزوم. زيارتك بكره. فى كوبر. وأوعك تشيل جلا بيتك المكرفسه ديك. او سفنجتك. المقطوعة كم حته ديكا. علشان. الجماعه. ما يقولوا. انت. ابن. المرحوم. الحقيقة. وبعدين يقوموا طيارتك
انا داير حقى من الميراث…..!!
والله يا استاذ جبرة الشى الحاصل فى البلد دى بقا يحير عديل نهب وسرقة وعبث بمقدرات شعب وبعد دا كلو يقولو ليك هيا لله… والله برئ منهم يا خى نحنا قرفنا وجعنا واتبهدلناوالله نحنا وصلنا الحدبعد دة يا يفوتو هم يا نفوت نحاويا رزاز الدم حبابك…….
وبكل بجاحة يقولو ليك هى لله هى لله ونسوا يوما عبوسا قمطريرا ؟؟؟؟
كسرة ثابتة: صلاة الجمعة في كاودا ياتو يوم ؟؟؟
ياجبرا00خربة الشغلانه بكلمة (السبح!!) الناس ديل أصابعينم مصممه لعد (النكتوت) ولا تصلح بتاتا للتسبيح!! وكلهن عشرين صباع وما مكفيه00تقول لى سبحه00هو فى وقت للتسبيح00ياراااجل00جلابيه بيضه مكويه نعم00شال مطرزأيوه00مركوب جلد نمر مسموح لهم حصرا لزوم التمييز ولمعرفة بعضهم بعضا بينما يطارد الما منهم من قبل حماية الحياة البريه00والعصى (الابنوس) المطرزه هى الاخرى بالعاج الفاخر ابو فيل00ياسلام!!00الابنوس والعاج الذان لحقا بجداره (النفط ابو بلف)بعد الفرز الذى تم دون الوضع فى الاعتبار مغبة فقدان (الابنوس)الذى سيسبب لهم قطع شك ضررا فادحا وتحط من قدرهم نتيجه خسارتهم (للابنوس)أمام الناس لانهم لم يتحسبوا لهذه النقطه بالذات وإلا لكانوا تنازلوا حتى من ملابسهم الداخليه ولاسيما إنهم بنو قيمتهم أمام الخلائق على (الابنوس)!!الم تشاهد رئيسهم وهو يلوح (بأبنوسته) وهو يقول لهم (لاتشترى العبد إلا والابن00أقصد العصى معه)؟!!وبالعوده لموضوع السبحه هى الاخرى حباتها تصنع من (الابنوس والعاج) وتجدها حصرا فى ايدى المريدين (المميزين) المنتمين لبعض الطرق الصوفيه الذين يحسنون (العد)!! التى تأسسة بعد العام(1989)المكلفين يعد (نعم الانقاذ) على شيخهم00واما نحن فلا باكيات ولا نائحات علينا(إكمننا) خارج حسابات الطرفين ولا حول ولا قوة إلا بالله العلى العظيم0
مبدع يا جبرة ……
الفاتحة ياجماعة……
يا ربي ما حنحصل شوية ونحن حيين؟؟
الحقوا ابوكم يا ناس وخلوا الكلام الكتير.
يا مرة اهمدي اجازة شنو للسودان انتي ما شايفة ود جبرة كاتب شنو ؟؟؟؟ قال اجازة السودان قال واقوليك دقي ليكي غويشة بالريالات العندك دي تنفع للزمن الاغبر النحنا فيهو ….الفااااااااتحة على المرحوم واولاده المغتربين والمغربين بالداخل.
ينصر دينك يا جبرا ::::::::::::
والله انت الوحيد القاعد تحبش في الصميم
لكن قلت لي الجماعة ديل مرطبين لمن منديين (دة جاي من الندي )
انا الموضوع كلو عرفتو الا موضوع العلامة الفي الجبهة دي ,
اوع تقول لي دة سيماهم في وجوههم من اثر السوجود ؟؟؟
لانو انا بعرف لي واحد كان ما عندو العلامة وبقي مع اولاد المرحوم المرطبين دة
وبعد اسبوع شفنا العلامة ظاهرة قلنا ماشاء الله الدين ما عندكم ,
انت الجماعة ديل عندهم زول بحكو ليهم ولا الحكاية شنو ؟؟؟؟
كسرة :
احسب ان الموضوع من اثر الصلاة
والله يا جبرا يا أخوي كلامك ده خش الحوش عديييييييل كدة , يا زول ما تخليك في خط هيثرو وكدة , يا زول أنت ما سامع بالعربات البقت تتلغم دي ؟ يا زول هوووووي أوعك تركب عربيتك تاني ! زمان كان الطيارات بتتفجر وكدة , هسع العربات ذااااااتها . غايتو يا أخوانا ( أحسن الله عزاءكم في أخونا الفاتح جبرا ) وإنا لله وإنا إليه راجعون , وأحسب أنه من الشهداء .
يا ناس يا اهل المقام والله مقام موت عديل يا نبقي ذي الحريم البقعدن تحت سرير المريض و ينوحن والا نبقي رجال ونشيل ابونا قلع من هؤلاء العاقين الفاسدين الطريق واضح و تشخيص الحالة احتضار عديل والموت داير رجال يا ننقذ ابونا والا نبقي ذي اخواتنا نحضر الكركدي والشاي والكبابي.
فعلا لقد عاني المرحوم كثيرا من عقوق أبنائه؛ فقد بدأ البتر في أطرافه في حياته إذ بترت قدماه و انتقلت الغرغرينة لساقيه و غايتو الله يرحمه و ربنا لا يبارك في أولاده العاقين ديل – الحقيقة هم كتلوه عمدا.
هذا ويقام المأتم بمنزل الفقيد بين خطى طول (38.24- 21.4) دقيقة، وخطى عرض (8.45 – 23.8) ياأستاذ جبرة خليك واضح ووصف بيت العزاء كويس لأنه مستشارينا جوجو وعبودي حايروحوا يعزوا في اليابان ؟؟؟واخبار حلم الأمام شنو ؟؟؟
والله انا قريت العنوان والكسره الثابته.وعلقت من علق يعلق تعلقيا
يا مندهشة …… حقى دايرو من اخوانى اصحاب الجضوم ، ناوى ابنى بيه مدرسة ….انشاء الله فهمتى .!
العم الفاتح جبر اتخيل لي المرتاحين ديل اولاد الحرام (ما فارقة معاهم ياكلو حلال ياكلاو حرام اهـ مرتاحين وخلاص عشان اولاد حرام وحاقدين علي اولاد الحلال لانو اياديهم طاهره ونظيفة .(اولاد الحرام ماخلو لاولاد الحلال شئي).الله المستعان
الو…..الو……هو الخط مالو بقطع الو…..ايو انا معاك والله مما سمعت بالوفا كنت جايييييييي بس مالقيت لي حجز لانو ناس لندن قالو لي خط هيثرو(ووووو) بتاع ابوك باعوه اخوانك والله انا كنت عارف انو من يوم الطبيب قرر يبتر النص التحت عارفو مابيعيش لانو المرض كان مزمن والوالده الله يطول في عمرها كانو ماولدت غير ديل الواحد عمرو 23سنة ولسع فهو تحت كريعنولا بصد ولابرد والله معنهم اتخرجو من الجامعات بس الواحد تقول خريج اساس تلاتة كلمات مع بعض ما بيعرف اقوله العجب اخوي الكبير والله الدلوكة اخير منو لانها بطلع صوت بيطرب السامعين ما سمعتوها عند (انصاف مدني ) لانو صوتو اجش وان انكر الاصوات……….0
شنو ياجبرا ده مقال وداع ولة شنو؟؟؟؟ ماشى وين؟؟ اوعا تركب خط هيثرو… ببيعوك…
ياجماعة جبرا ده بلعب على الحبلين هل حصل يوم منع مقاله من النشر؟!! أولاد الريف ديل شواطين أعملوا حسابكم .
رائع كالعاده استاذنا جبرا متعك الله بالصحه هو ده تصوير رائع لحال الوطن الاب المسكين وماال اليه
ابشرك باتى الاسبوع القادم فى لندن واشوفليك مره وحده الاشترى الخط ده منو.