بحاول أغير سيارتى إن وجدت الترطيبة !!..بلة جابر : بحب الطرب والمزازيك شوف ناس رونالدينو وربينهو ديل طوالي سماعات الهيدفون فى (اضنيهم).. ولن أتخلى عن الجوز
كان لقيت محمود عبد العزيز شغال في حفل جماهيري ما بكضب عليك بمشى
الخرطوم :حسام الدين ميرغني
رغم ظفره بنجومية كبيرة الا ان النجم المريخي بلة جابر لم يتخل عن بساطته،متى ما فرغ من الدوريات الكروية تفرغ بلة لممارسة هوايته الموسيقية وحب الطرب فى حضور معظم حفلات محمود عبد العزيز فى العاصمة،بلة يرى انه طالما يحتفظ بلياقته البدنية والذهنية فلا حرج عليه ان يستمع شيئا من طرب الحوت فنانه المفضل.
اول حافز تسجيل ناله بلة جابر؟
بدأت اللعب فى رابطة ناشئي مايو ببورتسودان منها انتقلت لفريق النجوم وسط المدينة ونلت حافز عبارة عن صحن مخبازة ..عزومة عشاء.
من اكتشف بلة؟
كابتن حمودة الثغر والمرحوم المرضي وراء انتقالى من الناشئين الى مريخ الثغر وتقاضيت مبلغ اربعة ملايين جنيه..وكثرة القروش لمن فكرت اخلى الكورة.
بدأت مهاجما؟
القال ليك منو؟انا كنت بلعب وراء المهاجمين مباشرة ..العكسيات و(الثروهات)العجيبة دى كلها بتطلع من اخوك دا.
?الانتقال من بورتسودان الى اللعب فى المريخ والشهرة والاعلام.. هل غير مجرى حياتك؟
لازم تتغير بعد انتقالك لنادى كبير مثل المريخ..تخليت قليلا عن حبى للطرب والمزازيك .
لكن السهر يضعف اللياقة البدنية؟
كمان الموسيقى علاج نفسى بيخلى اللاعب يلعب جيدا..شوف ناس رونالدينو وربينهو ديل طوالي سماعات الهيدفون فى (اضنيهم)..ديل نجوم كبار ..كلما استمعت لموسيقى العب بصورة متماسكة.
من تحب من المطربين؟
محمود عبد العزيز او كما يلقبه الجمهور بالجان او الحوت وبعده احمد الصادق وهم اصدقائي ومن بعد فرفور وشكر الله..مرات كتيرة تصادفنى حفلات رهيبة عشان المريخ ما بقدر انزل عليها.
المباريات الثلاث الأخيرة في الممتاز كنت النجم الاول فى الفريق ..صنعت اهدافا حاسمة واحرزتها؟
ثقة المدرب بي هى السبب وكان يحدثني بان لياقتي البدنية هي الأعلى وسط اللاعبين ويركز علىِ في صناعة اللعب من الاطراف ومنع الهجمات على الفريق ..وكان ذلك دافعا لتفوقى .
ميول الاسرة الرياضية؟
كلهم بحبوا كرة القدم ووالدي كان يمارس المصارعة التقليدية ويمتاز فيها.
?بلة ..انفعالى فى الميدان؟
حب الشعار هو السبب بعدين الحكام ديل مرات بطلعوك من طورك كما فى المباراة الاخيرة مع الهلال.
جوز بلة ..لا تخلو مباراة منه؟
هى طريقة لتخليص الكرة من الخصم ..انزلاق عادى لكن الاعلام ضخمها..انا بقصد ألم كورتي بس ما اكتر ولا اؤذى احدا فى اللعب.
?لاعب هلالى محبوب عندك بصراحة شديدة؟
بصراحة مهند الطاهر..منذ ان كان فى المرغنى كسلا وانا فى مريخ الثغر هو صديقى يعنى الحكاية دى ما بعد جينا القمة ..مهند لاعب ممتاز واحب ان اشاهده متى ما سنحت لى فرصة بالاضافة الى انه صديق مقرب عندى وعند عدد من نجوم المريخ..زول لعاب بالجد وراقى التعامل.
هناك ارهصات انتقاله للعب معكم؟
انا قلت ليك كدا..؟ أنت سألت وأنا جاوبتك بصراحة..
اهتمامكم متعاظم بتبديل السيارات والهواتف الجوالة باستمرار؟
عن نفسى بحاول اغير سيارتى ان وجدت (الترطيبة) ..انت تلعب فى نادى قمة لازم تكون مميز..
اموال المباريات والحوافز وغيرها بتودوها وين؟
لدى التزامات باسرتى الكبيرة..عندنا طلبة بيقروا ..كما أنني أشيد منزلي الخاص وأوفر ما استطعت لانجازه فى الفترة المقبلة.
عطلة الدورى ..بتمشى وين؟
السنة كلها جاريين منتخب ونادى وتمارين ومباريات عطلة الممتاز هى شهر بقضيها فى زيارة الاهل والاصدقاء واكمل مشاريعى المستقبلية ..منها بيتى الببنى فيهو دا..
حفلات مافى؟
اكان لقيت محمود شغال في حفل جماهيري ما بكضب عليك بمشى.
الراي العام
العك البتسوي فيهو …..برضو اسمو كورة….لله درك يا سودان..
بله يابله الشغل الهلالاب والحلة ، عندما تجد إنسان أكثر صراحة مثل بله فلابد منك أن تحترمه وتعطيه حقه طالما تحدث إليك بكل صراحة وبمنتهى الشفافية ، فقط أطرف مافى حديثك حكاية (جوز بله ) نجد أن هذا الجوز الرهيب حتى فى المباريات الدولية يقوم الحكام بإحتساب مخالفة ضدك يابله بالله عليك كيف يكون هذا الجوز عادى ، والحاجة التانية عندما لم يحتسب الحكم مخالفة لمصلحتك تقوم بأخذ حقك بنفسك ليه كدا يابله .
أما عن حديثك حول الغزال حقا إنه محترم ويستحق أن نحترمه كمريخاب ليس من باب تمهيد رحيله من الهلال فقط لأخلاقه العالية التى لم تتوفر حتى فى قائد فريقه . على الرغم من كونه يلعب للهلال فعندما يكون لاعبا فى مباراة رسمية بإسم ناديه فإننا نشجعه ونتمنى له كل خير وأن يحالفه الحظ فى إجتياز تلك العقبة ، فكم أنت عظيم ياغزال يا أسمر لك منا التحيه والإجلال والتقدير .
نعود للمايسترو بله ونقول من هنا أعمل حسابك جايين ناس (ضفر ،كرنقو ،أمير كمال ،والقائمة تطول لو ماعملت حسابك تجد نفسك فى الكنبة . وتذكر دائما مقولتك الشهيرة (حد يترك البوفيه المفتوح دا ويمشى لساندوتشات الطع100
غزالى القلابات :cool: ;) :cool: ;) :cool: ;) :cool: ;)
بالله عليكم شوفوا لغة الشوارع والشماسة يستخخدم كلمات مثل (ترطيبة) مما يدل علي انه فاقد تربوي وعمره ما فتح ليهو كتاب. امثال هؤلاء مطلوب منهم فهم وتنفيذ خطط وتكتيكات المدربيين كيف يتسني له ذلك وهو كلام ما بعرف يتكلم. ثم لاحظوا الفهم القاصر لكل شي فقد قال انه فكر في ان يترك لعب الكرة عندما صار عنده مبلغ 4 ملايين . مثل هؤلاء القت بهم الاقدار الغريبة في مجال الرياضة وصاروا لعيبة في سودان العجائب. الم يسمع هذا البلة بلاعبيين جمعوا بين رصانة ولباقة الحديث والعلم ولعب الكرة امثال الدكتور علي قاقرين والدكتور كسلا والاساتذة بشارة عبد النظيف وكمال عبدالوهاب. اضف الي كل هذا السوء تعامله بعصبية تجاه اي قرار يتخده الحكم.
عليك الله هسي انت بتشبة رونالدينو يااخي شوف ليك عرقة والله فتة اكلة :mad: :mad: :mad: :mad: :mad: :mad: :mad:
كلام شوارع والفاظ غريبــة (مفروض يتعلم اولا ثـم بعد يتم عمل حــوار معه…يكون العمل معاه الحــوار من شاكلتــه) البركـة فى العيال البتعلـــم فيهم ديل …………
ده حارقكم جوه الميدان وبره الميدان قطن اللوزة وجوزة اللوزة يا بلة الجوز الجماعة ديل كتلتهم براها علي العيال ديل ثمانيين سنة وهم محروميين من الجوية تجي انت تاني تعمل فيهم دبل الجوز في القمة يا راجل الرفق بالطيشاب والوصيفاب الدائمين فيها للابد .
ملحوظة
ده الاكسبريس السريع يوديكم شندي تاقدو واحد بالعودة المحلي داخل عطبرة
كما ذكرت انا هلالابي
وعجبتني صراحة وبساطة اللاعب بلة جابر .. وكنت لا اطيقه بسبب لعبة الجوز التي يمارسها .. وهي ضربة خطيرة ومحرمة دوليا وتستحق كرت احمر حتى لو لم تصيب الخصم لانها تعكس نوايا سيئة .. واحذرك انك لا تمارسها وخاصة مع المنتخب في المشوار الافريقي .. انت لازلت شاب وصغير السن ولا نريد ان نحبطك بكلام يسيئك بقدر ما نريد ننصحك ونراك في قمة موهبتك .. ارجوك حاول ان تتخلى على لعبة الجووووووووووووووووووووووز يا بلة جوز ..
شنو ياناس مافي داعي للتنظير والفلسفة في الفاضي اصلو نحنا مشهورين بالتنظير وكثرة الكلام لاكن مالدرجة دي اولا رونالدو وغيرهم لا بلدهم ولا اشكالهم ولا ثقافاتهم ولا كورتهم بتشبه حاجه فينا وخلوا الولد بتعامل بطبيعتو ولو كورة عك يبقى ناس خليفة والتاج واتوبنج وغيرهم من ناس قرعتي راحت يمشوا يزرعوا ليهم قطن ولا اي حاجه عشان يعملوا حاجه الناس تستفيد منها :D :D :D :D :D :D :D :D
يا صاحب التعليق يا الاسمك عادل
ما في داعي للاساءة والتعالي على الناس , الغريب في كده شنو ؟ انسان بسيط ولاعب كورة ومثال لشاب سوداني مكافح . وبعدين ازيدك من كلام الشوارع حسب اسلوبك :
(الكورة كرعين والحلة بصل والمراة اخلاق ) يعني الحكاية ما محتاجة كتاب .
هذا زمانك يا مهاذل فامرحي قد عد كلب الصيد من الفرسان
من زمن ليس بالبعيد كان لاعبى كرة القدم عندنا مهارة وثقافة …نستمتع بمهاراتهم ونستفيد من احاديثم وحواراتهم … ومثال ليس للحصر … صديق منزول – برعى -على قاقارين- شرف – بشرى وهبه- محمدحسين كسلا- سامى عزالدين- كل الامم تسير للامام ونحن ماشين للخلف حتى وصلنا ( ضفر – مرق -عنكبة – شعلبه) وتقول لى نحنا اتدهورنا من شوية …
نتمنى ليك التوفيق يا بلبل مع المريخ لانك لاعب غيور وبتلعب بى حماس ونحى فيك حب المريخ . بس لو خليت الجوز بتكون تمام . وبله يا بله وينو بله
يا اخى يابلة انت بتتكلم بكل عفوية وانت من ابناء البلد البسطاء ولكن وجودك فى فريق كبير زى المريخ يفرض عليك ان تتكلم بلغة جادة ومحترمة غير اللغة التى بتتكلم بها فانت تضرب المثل برونالدينهو وروبينهو فى حبهم للموسيقى ولكن اللى ذكرتهم ديل نجوم كبار تعملوا مع كورة القدم باحتراف وطبقوا الاحتراف بكل متطلباته واحترموا نفسهم كلاعبين ونجوم كبار لهم شهرتهم وعندما يتكلمون يتكلموا بطريقة محترمة لانه نجم كل كلمة يقوله محسوبة عليه لذلك تجدهم حريصون جدا فى لقاءاتهم ان يكون كلامهم لبقا وجميل فأتمنى ان تاخذ من هولاء النجوم الجانب الايجابى وليس الجانب السلبى وانتبه لنفسك كلاعب فى فريق كبير كالمريخ وغير طريقة حياتك حتى يحترمك الآخرون
السلام عليكم يا جماعة الخير….
اولا: هذا البلة جابر انسان بسيط جدا..جدا….
ثانيا: اتفق مع الاخ معاوية الجريف في ما ساقه….
ثالثا: اخ عادل ليس من الادب ان تذم اللاعب بهذه الكلمات.
هذا الانسان سوداني بسيط استخدم لغة بسيطة جدا…هو ليس باستاذ لغة عربية جامعي …
علي الذين يتحدثون عن الالفاظ التي لا تتماشي مع ادبنا و مورثاتنا الانتباه الي انه بذلك يخاطب رئيس جمهورية السودان…فهو المسن لهذه الالفاظ…ماذا يفعل بلة جابر اذا كان البشير لدف الكلمات ضارب…ام وجدوا في هذا الفتي ماحفزهم ان يخرجوا ما كان كامن في الضمائر (لان الود ما عندو ضهر- و البشير طبعا هو زاتو الضهر)
فعلي الذين ينقدون هذا الفتي البسيط في اقواله, ان يعلموا كيف ينقدون رئيس دولتهم….
فمتي صرنا جمهورا يشجع اللاعب حتي و لو كانت النتيجة ليست في صالحه….لان كل الجمهور الذي يذهب الي حضور مباريات هلال/مريخ , هلال/ اي فريق ثاني او مريخ/ اي فريق ثانيو تجدهم في موقع المدرب لا المشجع…
عندما نتعلم ثقافة التشجيع…عندها يجب ان ننتقد هذا اللاعب و ذلك المدرب وذلك الاداري….
فالكرة واطة…كما يقول الشارع…
مع إني من محبي المريخ ؛إلا إننا نعترف بأن اللاعب السوداني تنقصه لغة اللباغة والدبلوماسية في المحاورة ؛نعم بلة جابر لاعب كبير وكان لك دور رئيسي في فوز المريخ بالدوري الممتاز ؛إلا أن هذا الحوار بصراحة مامفروض يبدر من لاعب بقامة المريخ ؛صحيح نحن السودانين تُقلب علينا العفوية والبساطة في حديثنالكن يجب علينا أن لانتعامل بها في كل حدث ؛أرجوا أن ترتقي لأسلوب يليق بلاعب يلعب في نادي كبير وله صولات وجولات محلياً وخارجياً
أخ:راشــــد..آســف ماقصدى اتعالى علـى أحد واتمنـى ان تكــون الفاظك غير نابية لان الراكوبة للجميع رجال ونســاء كل يتطلع عليها لاتتعامل بمثل ه\ا الإســـوب (كرعين وبصل ) فكل اخواتنا متعلمات ويطلعن علـى مايكتب أتمنى ان تبعد عن الالفاظ الغريبة ولك العتبــــــــــــــــى حتى ترضى (تحياتى لك)
تدهور اخلاقي وسلوكي وبالتالي النتيجة مستوى كروي لا يساوي شئ ما هذا يالراكوبة ؟؟؟؟؟ هل هذا لاعب كرة وكمساري حافلة ؟؟؟؟؟؟؟؟؟؟؟؟؟؟؟
قال بلة قال
:mad: :mad: :mad: :mad: