ندرة المواصلات وزيادة التعرفة … شكاوي المواطنين وأصحاب الحافلات وصمت الحكومة

الراكوبة: مهجه ابو القاسم

شكا مواطنون من ندرة المواصلات في خطوط المواصلات العامة التي يستغلونها وزيادة التعرفة التي قال بعضهم إنها أصبحت في الغالب 100 جنيه .

وذكر مواطنون استطلعتهم (الراكوبة) إن بعض السائقين يقومون بمضاعفة التعرفة في حالة قلة الحافلات في المواقف ورصدت جولة لـ(الراكوبة) انعدام للمواصلات في المحطة الوسطى بحري منتصف النهار وارتفاع قيمة التعرفة حيث بلغت التعرفة في الكريز 50 جنيها لاي خط .

الموظف (س / ع ) شكا من ارتفاع تعرفة المواصلات وقال إن المرتب لا يغطي الاحتياجات وأضاف :” أنا بجي من امدرمان ببحري لحدي ما أصل المحطة الوسطي بكون صارف 200 جينه. ولسه بكون ياداب عايز أركب  أمشي للخرطوم  لو لقيت مواصلات بركب الكريز بي 50 لو مافي مواصلات معناها أركب  امجاد طرحه  واقله شي  100 جنيه دي 300 الجينه. والرجعه  برضو في حدود ال300 وبعد مرات لو مافي مواصلات بتصل ال٥٠٠ الجينه الرجعه بس من وين نجيب  القروش دي” .

الطالب (م /أ ) يجلس للامتحانات النهائية في الجامعة قال إن مصروفه اليومي 500 جنيه وهي بالكاد تكفيه وأضاف ” موضوع نقول للسواق والكمساري انا طالب ونص القيمة بقول لينا انا ما فاتحه للطلاب وانزل وبنتحرج  وبنتطراء ندفع” .

وشكت مواطنة فضلت حجب اسمها من ارتفاع الأسعار عموما والمواصلات على وجه التحديد، وقالت :” نسوي شنو الله غالب بقينا ما بنطلع الا للشديد القوي وقفنا المجاملات والطلعات الكتيرة لانو لو انتو نفرين عايزين تمشو اي مكان ما اقل من مليون جينه ماشي وجاي واساسا العربات والمواصلات الخاصه دي بقت ما بتتهبش غاليه شديد المشاوير دي”.

كما استطلعت (الراكوبة) عددا من سائقي الحافلات الذين اشتكو من ارتفاع اسبيرات السيارات بسبب تراجع قيمة الجنيه ( م/ أ ) الذي شكا من ارتفاع الاسعار ايضا قال لـ(الراكوبة) “انتو بدل تقولو لينا رخصو التعرفه المفروض تعملو رقابة علي الاسعار حقت الاسبيرات دي  وحتي تنجيد العربات والحافلات دي بقي غالي يعني العلينا علي المواطن ” ،كما انتقد اداء الحكومة قائلا : “الحكومة دي   ما عملت اي شي خلاف ضيقت علينا الوضع زياده  وانا بعتبرها فشلت شددديد عاينو الدولار الليله بكم” .

اما صاحب الحافله (ع/أ )قال :”  والله بنشيل بالساهله العندو. بنرفعو والي ما عندو بنرفعو برضو نعمل شنو الوضع صعب وكعب” ووجه نداء للحكومة قائلا :”  يا الحكومه الجديده عليكم الله ركزو واضبطوو ورقابو المواصلات دي عشان نحنا. نرتاح وانتو زاتكم راسكم دا يرتاح” .

أما يس وهو صاحب كريز فقال :” انا شخصيا ما بشيل بالخسارة مهما كان  البلد والحكومه ما بتوفر لي شي اي زول ما عندو ينزل بس”، واضاف”  نحنا زاتو عندنا اولاد واسرة ياكلو ويشربو من وين المواطنين الصباح والمساء بجوطو فينا  نسوي شنو اي شي غالي اسي المواطن دا ما بمشي الدكان عادي بيشوف السعر زايد وبيشتري من يجي علي المواصلات يقعدو يجوطو”.