نضال الحاج : هذا رأيي في ” صلاح ” وتأثرت في قصائدي بشعراء البطانة
صاحبة 25 عاماً فقط لكن عمرها الشعري اكبر .. الشاعرة نضال حسن الحاج صوت نسائي شق طريقه جيدا وعلى عجالة من خلال مشاركتها في الكثير من المحافل أثبتت ان النجم يصنع الجمهور وليست المؤسسات .
? ممكن نقول إنو نضال محظوظة في طريق النجاح والشهرة ؟
النجاح البجي عن طريق الحظ ما بيدوم والنجاح متى ما بقى حظ او فرصة ما اعتقد انو بمشي لي قدام ، لكن النجاح متين ما اجتمع فيه الحظ والفرصة وعزم وإرادة بيمشي لي قدام .
? طيب ممكن نقول ياتو نوع من الحظ كان معاك ؟
انا عندي عزيمة قوية وبحترم الوطتي الختوني فهو الناس وبحافظ عليه ، ولا أنكر ان الحظ وقع لي حاجات كتيرة ودتني لي قدام .
? أنا بكرهك .. الكل يؤمن ان قصيدة انا بكرهك كانت سبب ظهورك الإعلامي لكن السؤال .. البيئة العشتي فيها وانتي إمراة ، حكاية البوح دي ما صعبة شوية ؟
ح أقول ليك حاجة انا في أولى ثانوي وفي الإجازة لقيت جريدة ( قلب الشارع ) وانا بقرا لقيت صندوق بريد خاص بمساهمات القراء ، الوقت داك انا كنت في الشهداء ، طوالي إتذكرت انو عندي قصائد معاي ، واحدة اسمها ( إشتقت ليك ) و ( ما تزعل ) طوالي مشيت البوسته ورسلت القصائد . الكلام ده كان يوم السبت وفي سنة 2003 وكنت خايفة من انو يقولوا لي القصائد لا تتناسب مع شنو وشنو .. ولكن تفاجأت يوم الأحد بأنو عمتي جات من الخرطوم وجابت معاها الجريدة ونزلت فيها قصيدة ( إشتقت ليك ) وكنت خايفة من ردة فعل ابوي تجاه ما نشر كنت متوقعه ابوي يقول لي ” نحنا وديناك عشان تقري ما عشان تكتبي الكلام الفارغ ده ” . وبعد ما قراء القصيدة قال لي : كانت تكتبي ” نضال حسن عبد الله ” بدل ” نضال حسن الحاج ” عشان ناس القرى المجاورة يعرفوا إنك بتي .
? طيب ناس القرية كانوا قبلانين الشعر بتاعك ؟
في الاول كان في بعض منهم ما راضين بالحاجة دي وكانوا بيقولوا ” نحنا ما عندنا بت بتقول الكلام ده ” لكن بعد داك بقت والحمد لله شهرة القرية بشعر نضال .
? ده شنو الكتبتيهو عن المريخ ..
هل جاء عليك أثر سلبي من الفيس بوك ؟
والله مرة اتصلوا علي ناس كتار قالو لي ده شنو الكتبتيهو عن المريخ ده ، لأنو في واحد كتب بإسمي إني إتمنين فوز الهلال ، وكتب بإسمي كمان ان المريخ إن شاء الله يتكسروا كلهم ، في حين انو انا ما قلت كده .
? ما قمتي بأي خطوة فعلية عشان توقفي الحكاية دي ؟
والله أنا رفعت شكوى رسمية لهيئة الإتصالات بحكم انهم ممكن يعملو حاجة لكن لحدي هسى ما ردوا علي ما عارفة إتاخروا في الرد ليه .
? ظهور نضال الحاج كان بسبب ( أنا بكرهك ) ..
انا اقول ليك حاجة .. قصيدة انا بكرهك سبقتني للخرطوم بسبب ( الحرامي السرق الموبايل بتاعي ) .. كان سجلت في البدايات لتلفزيون الجزيرة وقلت في اللقاء ده قصيدة انا بكرهك ، وطلبت من المخرج يديني القصيدة في ذاكرة الموبايل ، وإتسرق الموبايل ووصلت القصيدة الخرطوم قبلي .
? شعر غنائي .. إنتي ما عندك شعر غنائي ؟
مافي قصيدة اسمها غنائية ، في حاجة اسمها شعر بس ، بعداك فنون الملحن هي التي تجعل القصيدة أغنية .
? طيب إتزوجتي من ملحن ورجل اعمال ، هل معنى ذلك ان قصائد نضال ستكون حصرية التلحين على الأرباب فقط ؟
القصيدة إحساس ، وصلاح لو ما حس بالقصيدة ما اعتقد انو ممكن يلحنها ، وفي قصائد بحسها عشان كده لازم يلحنها ، وأنا دايما بقول ان الاغنية كلمة ولحن وأداء ، وأي خلل ح يهزها .
أجمل قصيدة كتبتها في الحب
بهواك أنا وبفرد عليك الريح غطا
وببراك بالدفو والأمان كان خربشك خوف الشتا
وببقالك العشم البلا تحراو همومك كلفتا
وشبّع بنية وجعتك ذلة وإهانة وكفتا
بهواك انا ومتيقنة الروح لي لقاك متمردة
وكضاب البحدد ليك وطن وإنت المسامي محددا
ودا منو البقيسك في الحروف .. منو بي فراقك هددا
وإنت الفرشنالك دروب إحساسنا شان تتوسدا
بهواك ونفسي محل تدق النوبة
شقيش الصباح اندس تمرق بالشمس
بهواك ونفسي محل تنابذني الظروف
أحفر جواك وجي وأدس
وأنا نفسي في درس الصباح ألقاك
وفي طابور صغار الروضة في حصص الدرس
وألقاك تنطط من قفا الدلوكة في بيت العرس
image
image
الدار
كنتي بتقولي كلام كويس قبل العرس /شنو الخربشة والنطيط؟
يا جماعة وين صورة الشاعرة دي وهي من أي قرية عشان نعرف زوق صلاح إدريس
اتي ما نضال بت ناس العوض المن فريق بت الريده كله كضب في كضب fake fake fake ,,,
يا اختي نحن مالنا ومال سفاسف الامور هذه دايره تبقي زي روضة مين كده مافي زول فاضي للشعر وبعدين رايك في صلاح او امه او اخته هذا لايعني اي شخص فكوها سيرة هذا نوع من الفراغ في المجتمع ولا شنو
كنت متابع لمجموعة الشعراء الشباب ذكور واناث في الفضائيات خاصة ايام رمضان ولاحظت تمتع معظمهم بمواهب حقيقية مبشرة وبقدرتهم على اختيار مفردات الكلام من الدارجة الموغلة في المحلية والمناطقية حتى لنخاف ان تندثر ولا حظت ايضا تشابههم اولاد وبنات في طريقة النظم والاسلوب وحتى طريقة الالقاء الشعري وهم كلهم يجمعهم في الغالب الأعم تقليد حميد والقدال.. ,اكثر شئ مثير للخوف عليهم هو الثقة الزائدة في مقدراتهم الشعرية فمثلا مقدم برنامج ريحة البن الشاعر الجيلي فجأة وجد نفسه قد تجاوز ان يكون شاعر لأنه ببساطة سيهتم أكثر وأكثر بالبن المحروق في الاستوديو حتى ان دخانه يحجب رؤية ضيوفه وهو بالتالي على صغر سنه يؤطر لمزاجية خاصة به شخصيا.
ربنا يسعدك يا بتنا ويرزقك الزرية الصالحة .
ماكنتي كويسه قبل العرس الحصل ليك شنو؟مشتتا كده ,,,,,,,,,,,,,,,, الحنه دي اكيد عملتيها براك
قصائدك الشعرية جميلة جداً لكن الحنة بتاعتك شكلها ما جميل غيري الحنانة
عندما نبنى سعادتنا على حساب سعادة الآخرين ,, ماذا نسمى ذلك ؟؟ عندما نرضى بأن نكون رقم 2 ماذا نسمى ذلك ؟؟ عندما يكون الفارق بيننا أكثر من 30 عاما ماذا نسمى ذلك ؟؟؟
مجرد غسئله ,, لاننتظر لها إجابة
الارباب هو الارباب ونضال هي نضال وكلاهما علم لا يشق له غبار رضيتم ام ابيتم والذهب لا يصداء
شديدة !
البنية دي شاعرة، شاعرة، شاعرة، وصلاح إدريس الذي كنت أعلق ضده بكثرة، أول ما استمعت إليه في التلفزيون عرفت أنه رجل طيب، طيب، طيب، بل وطيب جدا وود بلد. الله يخليكم لينا ولي سودانا يا أجمل كبل.
نضال هي لسان اهل البادية وصلاح ادريس هو دوزنة الخواطر هنيئا لنضال بصلاح
عليك الله فكينا من كلام اهل العوض ده
ما شفتى البترفع الراس روضه الحاج ياااااااااااه من شعرهايفتح النفس
الجعلى دا مش شايف شقلو ولا ايه ياخرابى يخرابى يا خرابىىىىىىىىىىىىىىىىىىىىىىىىىىىى
مبروك لابو احمد –
الحاصل شنو؟؟؟؟؟شبهينا واتلاقينا؟؟؟؟
واي واي واي انا من ود ارباب يا بنت ارباب