ترنيمة الى أهلي مروي
يا الله يا كنداكة أسعدي
سلي سيفك داك واجبدي
وهزي فوق فرسانك هناك
ولى عيون الروم قددي
يمة قودي جحافلك هناك
وفوق حدودك اتمددي
النصر للأهلي باركي
ويبن نخيلك داك غردي
وهني كل لاعب انتصر
وباركي رمياتو وسددي
خلي دولة نصرك تعم
إنتي يا الارهبتي العدِي
وخلى صولات النصر
ديك لى ولادك متجددي
وعلِّي اهرامات تاني فوق
وخلي بنيانك سرمدي
قولي ليهم خلو اليباب
ينتج السنبل وساعدي
وأملي واطاتك بالقمج
وخلي أجمل توب ترتدي
وغني لى موج السد غناك
إنتي سدك كان مبتدي
وزيدي من أفران الحديد
وأصهري الجامد ومددي
خلي “برمنجهام تزدهر
وتبتسم تبقى مفرهدي
وعيدي للتاريخ من جديد
في رحاب مروي السمحة دي
وخلي لعبك نصرة وثبات
وديمة لى لعبك جوِّدي
انتصار الأهلي العظيم
معني مكتوب بالأبجدي
أنو جنياتنا هناك شمال
رايعين أكتر من كدي
وانو نصر الله جاى يوم
كلما الناس متوحدي
وكل ما الغايات حددت
وبالتواريخ مستشهدي
في الحقول منتوجنا يمرق
مروي قالت أنا ياهودي
أبقى يا بركلنا شامخ
وانتي يا كنداكة أشهدي
د. عبدالرحيم عبدالحليم محمد
[email][email protected][/email]
