نمل سكر

🔴 والي الخرطوم : لا مجال لتحويل الاراضي الزراعيه الى غابات اسمنت.

🔨🐜 اراضي شنو يا ريس مش قلت كل الحتات اتباعت.

🔴 اتصالات دوليه مكثفه بحركتي جبريل ومناوي لكسر جمود التفاوض مع الحكومه.

🔨🐜 وشيخنا ثامبو امبيكي وين من الاتصالات دي؟. ولا محايته طلعت (بيبسي) وما جايبه حقها.

🔴 مجموعه اتحاديه تعلن فقدان السيد محمد عثمان الميرغني للشرعيه.

🔨🐜 يا الله وفقدها وين الشرعيه دي؟.غايتو يستحسن تعملو بلاغ فقدان في القسم.

🔴 الفيضان يحاصر منزل معتمد الحصاحيصا ويغمر كورنيش النيل بمدني.

🔨🐜 دا شكله قاصد المعتمد عدييل. عموما نسأل الله السلامه لاهلنا في الحصاحيصا.

🔴 تصاعد ازمة الخبز واتحاد المخابز يكشف عن مشاكل بمطاحن الدقيق.

🔨🐜 الله يستر المشاكل دي ما تكون نفسيه زي بتاعة الدولار.

🔴 مناشده لبكري وابراهيم محمود لمعالجة الخلاف بين جماع وترك.

🔨🐜 جماع وترك ديل عليهم بالجماعه وترك الخلافات.لكن يا ناس الوطني غسيلكم دا انشروه جوه.

🔴 الامم المتحده تطلع شباب الاحزاب على التجارب السياسيه في عدد من البلدان.

🔨🐜 ويا ريت ناسنا كووومان يطلعوهم على تجارب مشاريع استقرار الشباب التي اثبتت نجاحها.

🔴 مبارك المهدي يدعو للتطبيع مع اسرائيل.

🔨🐜 ولو اسرائيل رفضت نعمل ليها شنو (نجضمها) ولا نحنسها. وانت ناسي ان الطبع يغلب التطبع.

🔴 حسبو : التحنيس افقد الدوله هيبتها.

🔨🐜 مين هيبه دي؟.علي الجزيم انا قريتها (التجنيس) وعشنا وشفنا حكومه بتحنس

🔴 حسبو : سنستعين بالاقمار الصناعيه للكشف عن السلاح المخبأ.

🔨🐜 يوووخ يستحسن تستخدمو (النظر) في الحته دي لان الاقمار الصناعيه فشلت تكشف عن الطائرات الضربتنا زووومان.

🔴 القضارف .. بعد حادثة تلف الذره ضبط مواد غذائيه منتهية الصلاحيه بمخازن الزكاة.

🔨🐜 ارجعو لكلام مشاعر الدولب في موضوع الذره التالفه وكله قضاء وقدر .

🐜نمله مندهشه🐜

😳 في قنواتنا التلفزيونيه اعلانات مكتوبه بلغه واتسابيه.

يا ناس التلفزيون بالله راجعو الاعلانات قبل بثها ما تشوهو لغتنا يوووخ.

✍🏼 خالد الضبياني
[email][email protected][/email]